Kapitel 46

Na oema ben fasi en krosi

A NJOENSOE taki Jesus drai kon baka foe Dekapolis, e doro Kaperna-um èn wan bigi ipi sma e kon makandra na a se-sjoro foe bari en wan switi kon baka. A no abi misi, taki den jere taki a ben saka a bigi winti èn ben dresi den man di ben abi ogri jeje na den tapoe. Te a e go na sjoro now, dan den e poesoe go lontoe en, ala di den de fajafaja èn den e froewakti foeroe.

Wan sma di e angri srefisrefi foe si Jesus, na Ja-irus, wan fesiman dinari foe a snoga. A e fadon na Jesus foetoesei èn a e begi en ibri tron baka: „Mi oemapikin siki tranga. Kon grantangi èn poti joe anoe na en tapoe, so taki a kan kon betre èn tan libi.” Ja-irus lobi en oemapikin srefisrefi, foe di a de a wan-enkri pikin foe en èn a pikin abi soso twarfoe jari.

Jesus e doe san Ja-irus e aksi en, èn a e go na a oso foe Ja-irus, ala di na ipi sma e waka nanga en. Wi kan prakseri fa den sma de nanga span, foe di den e froewakti wan tra wondroe. Ma wán oema na ini na ipi sma e prakseri soso a serjoesoe problema foe ensrefi nomo.

Twarfoe jari kaba na oema disi pina foe a lasi di a e lasi broedoe. A ben go na a wan datra baka a trawan, èn a ben pai ala en moni foe kon betre, ma a no ben kisi jepi. A siki foe en ben kon moro ogri srefi.

Soleki fa joe kan froestan kande, dan boiti taki a siki foe en swaki en boen foeroe, na oema e sjen foe dati toe, èn a e meki taki a firi froeleigi. Moro foeroe a de so, taki sma no e taki na poebliki foe so wan siki. Boiti dati, soleki fa a Wet foe Moses taki, dan wan oema no krin te a e lasi broedoe, èn iniwan sma di fasi en noso a krosi foe en pe broedoe de na tapoe, de froeplekti foe wasi ensrefi èn tan leki wan sma di no krin te leki neti doro.

Na oema jere foe den wondroe di Jesus ben doe èn now a kon soekoe en. Foe di a no krin, meki a e boeweigi ensrefi na mindri den sma someni leki a kan na so wan fasi taki a no e hari a prakseri foe sma, èn a e taki na ensrefi: „Efoe mi fasi en tapoesei krosi nomo, mi sa kon betre.” So esi leki a e doe disi, a e firi wantewante taki a no e lasi broedoe moro!

„Soema ben fasi mi?” Fa na oema moesoe skreki foe den wortoe dati foe Jesus! Fa Jesus ben kan sabi? ’Leriman,’ Petrus e gens taki, ’na ipi sma lontoe joe e poesoe kon krosibei foe joe èn joe e taki: „Soema ben fasi mi?”’

Jesus e loekoe lontoe foe soekoe na oema, èn a e tjari kon na krin: „Wan sma ben fasi mi, bika mi firi taki krakti komoto na mi.” Nôno, a fasi disi di a sma fasi en, a no wan gewoon sani, bika libikrakti foe Jesus ben gebroiki foe meki a sma kon betre.

Te na oema e froestan taki den si en, a e kon na fesi nanga djompo-ati ala di a e beifi èn a e trowe ensrefi na gron na fesi foe Jesus. Na fesi foe ala sma a e froeteri ala sani in a tori foe a siki foe en èn foe a fasi fa a ben kon betre didjonsro.

A e naki na ati foe Jesus, te a e si fa na oema e froeteri ala sani èn na wan sari-ati fasi a e trowstoe na oema nanga den wortoe: „Oemapikin, a bribi foe joe meki joe kon betre. Go ini vrede, èn tan nanga wan boen gosontoe, foe di joe no abi a serjoesoe siki foe joe moro.” A de troetroe wan switi sani foe sabi taki a Sma di Gado froekisi foe tiri grontapoe, na so wan sari-ati sma nanga so wan waran firi èn taki a no e broko en ede wawan gi libisma, ma a abi a makti toe foe jepi den! Mateus 9:18-22; Markus 5:21-34; Lukas 8:40-48; Lefitikus 15:25-27.

▪ Soema na Ja-irus èn foe san ede a e kon na Jesus?

▪ Sortoe problema wan oema abi, èn foe san ede a feni en so wan moeilek sani foe kon na Jesus foe kisi jepi?

▪ Fa na oema e kon betre, èn fa Jesus e trowstoe en?