Kapitel 17

Nikodeimus e kisi leri

ALA DI Jesus de na a Paska foe 30 G.T., a e doe foeroe froewondroe marki, noso wondroe. A bakapisi foe disi de, taki foeroe sma e poti bribi na ini en. Jesus e naki na ati foe Nikodeimus, wan memre foe a Sanhedrin, a djoe Hei Kroetoe, èn a wani sabi moro. Dati meki a e go na Jesus te neti te a doengroe, kande foe di a frede taki a sa kisi wan takroe nen na den tra djoe fesiman, efoe den si en.

„Rabi,” a e taki, „wi sabi taki joe leki leriman kon foe Gado; bika no wan sma kan doe den marki disi di joe e doe, boiti te Gado de nanga en.” Jesus e piki Nikodeimus taki wan sma moesoe „kon gebore njoen baka” foe kan go na ini a Kownoekondre foe Gado.

Ma fa wan sma kan kon gebore njoen baka? „A no kan go wan di foe toe leisi na ini a bere foe en mama èn kon gebore, a no so?”, Nikodeimus e aksi.

Nôno, a no dati kon gebore njoen baka wani taki. „Efoe wan sma no kon gebore foe watra nanga jeje,” Jesus e tjari kon na krin, „dan a no man go na ini a kownoekondre foe Gado.” Jesus ben kon gebore „foe watra nanga jeje”, di a ben teki dopoe èn santa jeje ben saka kon na en tapoe. Di na a srefi ten dati Gado ben froeklari foe hemel: ’Disi na mi Manpikin, di mi ben feni boen’, meki A ben meki bekènti taki A ben meki wan jeje manpikin di ben froewakti foe go na ini a hemel Kownoekondre. Baka ten, na a Pinksterfesa foe 33 G.T., tra sma di dopoe sa kisi a santa jeje èn na a fasi dati den toe sa kon gebore njoen baka leki jeje manpikin foe Gado.

Ma a prati di a spesroetoe libisma Manpikin foe Gado abi, na wan prenspari prati. „Neleki fa Moses ben opo a sneki go na loktoe na ini a sabana,” Jesus e taigi Nikodeimus, „na so den moesoe opo a Manpikin foe libisma go na loktoe, so taki ibri sma di e bribi na ini en, kan kisi têgo libi.” Ija, neleki fa den Israèlsma dati ben moesoe loekoe go na a kopro sneki foe kisi froeloesoe di takroe sneki ben beti den, na so ala libisma moesoe sori bribi ini a Manpikin foe Gado, foe kan kisi froeloesoe foe a situwâsi di den de na ini èn di, te foe kaba, e tjari dede kon gi den.

Jesus e poti krakti na tapoe a lobi-ati prati di Jehovah abi na ini a tori disi, èn a e froeteri Nikodeimus moro fara: „Gado ben lobi grontapoe sote, taki a ben gi en wan-enkri gebore Manpikin, so taki ibri sma di e sori bribi na ini en, no ben sa kisi pori, ma e kisi têgo libi.” Na so Jesus e tjari kon na krin dja na Jerusalem, soso siksi moen baka di a bigin nanga en diniwroko, taki na en na a wrokosani di Jehovah Gado sa gebroiki foe tjari a froeloesoe kon gi a libisma famiri.

Jesus e go doro foe tjari kon na krin moro fara gi Nikodeimus: „Bika Gado no ben seni en Manpikin kon na grontapoe, foe kon kroetoe grontapoe”, dati wani taki, no foe gi grontapoe wan takroe kroetoe, noso foe kroetoe grontapoe so taki a libisma famiri e kisi pori. Na presi foe dati, soleki fa Jesus e taki, Gado ben seni en kon „so taki grontapoe ben kan kisi froeloesoe nanga jepi foe en”.

Di a ben doengroe, dan Nikodeimus ben kon na Jesus na wan kibri fasi, foe di a ben frede. So boen, a de wan moi sani foe si, taki Jesus e tapoe a takimakandra di a abi nanga Nikodeimus, foe di a e taki: „Disi now na a gron foe kisi kroetoe, taki a leti [di Jesus ben sori nanga en libi èn na a fasi fa a ben gi leri] kon na grontapoe, ma libisma ben lobi a doengroe moro leki a leti, bika den wroko foe den ben ogri. Bika a sma di e doe tegoe sani, no wani si a leti na ai èn a no e kon na a leti, so taki den no e piri-ai gi den wroko foe en. Ma a sma di e doe san troe, e kon na a leti, so taki den wroko foe en kan tjari kon na krin leki wroko di ben doe akroederi Gado.” Johanes 2:23–3:21; Mateus 3:16, 17; Tori foe den Apostel 2:1-4; Numeri 21:9.

▪ San e meki taki Nikodeimus e kon na Jesus, èn foe san ede a e kon te neti?

▪ San a wani taki foe „kon gebore njoen baka”?

▪ Fa Jesus e agersi a prati di a abi na ini a froeloesoe di a e froeloesoe wi?

▪ San a wani taki dati Jesus no ben kon foe kroetoe grontapoe?