Kapitel 31

Piki tarwe na Sabadei

HERI ESI Jesus nanga den disipel foe en e gowe libi Jerusalem foe drai go baka na Galilea. A de lente, èn tapoe den pranigron a tarwe kon lepi kaba. Angri e kiri den disipel. Dati meki den e piki tarwe èn e njan dati. Ma foe di a de wan Sabadei, meki den no man doe a sani disi sondro foe sma si den.

No so langa pasa den relisi fesiman na Jerusalem ben proeberi foe kiri Jesus, foe di, soleki fa den ben taki, a ben pasa a Sabadeiwet. Now den Fariseiman e kon nanga wan kragi. „Loekoe! Den disipel foe joe e doe wan sani di wet no e gi den pasi foe doe na sabadei”, na a kragi foe den.

Den Fariseiman e taki, dati a piki foe tarwe nanga a wrifi di wan sma e wrifi den siri na ini en anoe foe njan den, na a srefi leki a koti nanga a masi foe a tarwe. Ma a froeklari fa den e froeklari na wán fasi nomo san sma moesoe froestan ondro wroko, e meki taki Sabadei kon tron wan hebi gi sma, ala di a ben moesoe de wan ten foe prisiri èn foe bow sma na jejefasi. Dati meki Jesus e gebroiki bijbel eksempre foe piki tapoe a kragi foe den Fariseiman, foe sori taki noiti Jehovah Gado ben abi na prakseri taki sma ben moesoe hori a Sabadeiwet na wán fasi nomo.

Jesus e taki dati di angri ben kiri David nanga den man foe en, den ben tapoe na a tabernakel èn den ben njan den brede di den priester ben pristeri Jehovah. Den brede dati ben teki poeroe kaba na fesi foe Jehovah. Njoen brede ben poti na a presi foe den èn a ben de a gwenti taki soso den priester ben abi pasi foe njan den. Tokoe, foe di a ben de wan aparti situwâsi, meki den no ben kroetoe David nanga den man foe en taki den ben njan foe den brede.

Jesus e gi ete wan tra eksempre, èn a e taki: „Oenoe no leisi na ini a Wet taki na den sabadei den priester na ini a tempel no e teki sabadei leki wan santa sani, èn tokoe den tan sondro taki den feni fowtoe na den?” Ija, srefi na Sabadei, den priester e go doro nanga a sraktiwroko èn e doe tra wroko na ini a tempel foe sreka meti ofrandi! „Ma mi e taigi oenoe”, Jesus e taki, „dati wan moro bigi sani leki a tempel de dja.”

Foe froemane den Fariseiman, meki Jesus e go moro fara: „Efoe oenoe ben froestan san disi wani taki: ’Mi wani sari-ati, mi no wani srakti-ofrandi’, dan oenoe no ben sa kroetoe den sma di den no feni fowtoe na den.” Dan a e tapoe: „Bika a Manpikin foe libisma na Masra foe sabadei.” San Jesus wani taki nanga dati? Jesus e sori go na en Kownoekondre tiri foe vrede, doesoen jari langa.

Siksi doesoen jari kaba, a libisma famiri e pina foe a hebi katibo na ondro Satan Didibri, ala di ogri di doe nanga tranga, nanga feti, na sani di e pasa ala dei. Na a tra sei, a bigi Sabadei tiri foe Krestes sa de wan ten foe a rostoe di sma sa rostoe foe ala a pina nanga a kwinsi dati. Mateus 12:1-8; Lefitikus 24:5-9; 1 Samuèl 21:1-6; Numeri 28:9; Hosea 6:6.

▪ Foe sortoe sani den e kragi den disipel foe Jesus, èn fa Jesus e piki na tapoe dati?

▪ Na tapoe sortoe fowtoe foe den Fariseiman Jesus e sori?

▪ Na sortoe fasi Jesus na „Masra foe sabadei”?