Kapitel 113

Sakafasi tapoe a lasti Paska

PETRUS nanga Johanes, di ben kisi a komando foe Jesus san den ben moesoe doe, doro kaba na Jerusalem foe sreka sani gi a Paska. Soleki fa a sori, dan Jesus nanga den tra tin apostel e doro moro lati a bakadina dati. Son e dongo kaba, te Jesus nanga a groepoe foe en e saka foe na Olijfbergi. Te leki baka en opobaka, disi na a lasti leisi di Jesus e tanapoe na tapoe a bergi disi èn e si a foto na deiten.

Heri esi Jesus nanga a groepoe foe en, e doro na ini a foto èn e go na a oso pe den o hori a Paska. Den e kren a trapoe go na a bigi kamra na tapoe sodro, pe ala sani sreka foe den hori a Paska den wawan. Jesus wakti na okasi disi, soleki fa a e taki: „Mi ben angri srefisrefi foe njan a Paska disi nanga oenoe bifo mi e pina.”

A de a gwenti, taki den sma di e teki prati na a Paska e dringi fo beker win. Baka te den teki, soleki fa a sori, a di foe dri beker, Jesus e taki Gado tangi èn a e taki: „Teki disi èn meki a waka lontoe foe a wan go na a trawan; bika mi e taigi oenoe: Bigin foe now mi no sa dringi moro foe san e kon foe a droifibon te leki a kownoekondre foe Gado e kon.”

Te den e njan, dan Jesus e opo, a e poeroe den tapoesei krosi foe en, e teki wan doekoe èn e foeroe wan bigi komki nanga watra. Soleki fa a gwenti de, dan wan sma di ben kari fisitiman kon na en oso, ben moesoe sorgoe taki wan sma e wasi den foetoe foe wan fisitiman. Ma foe di na a okasi disi no wan sma de di ben kari den na en oso, meki Jesus e sorgoe gi a wroko disi di e doe gi sma. Ibriwan foe den apostel ben kan teki na okasi foe doe a sani disi, ma foe di, soleki fa a sori, pikinso strei ben de ete na den mindri, meki no wan foe den e doe disi. Now den e sjen te Jesus e bigin wasi den foetoe foe den.

Te Jesus doro na Petrus, dan Petrus di no e agri nanga a tori, e taki: „Noiti joe sa wasi mi foetoe kwetikweti.”

„Efoe mi no e wasi joe, dan joe no abi prati nanga mi”, Jesus e taki.

„Masra,” Petrus e piki, „no mi foetoe wawan, ma mi anoe nanga mi ede toe.”

„A sma di wasi en skin,” Jesus e piki, „no abi foe meki den wasi moro leki en foetoe, ma a krin dorodoro. Èn oenoe krin, ma a no oenoe alamala.” A e taki disi, foe di a sabi taki Judas Iskariòt abi na prakseri foe tori en.

Te Jesus wasi den foetoe foe ala den twarfoe apostel, so srefi den foetoe foe Judas toe, a sma di o tori en, dan a e weri den tapoesei krosi foe en èn e go didon baka na a tafra. Dan a e aksi: „Oenoe sabi san mi doe gi oenoe? Oenoe e kari mi ’Leriman’ nanga ’Masra’, èn oenoe taki leti, bika na dati mi de. Foe dati ede, efoe mi, ala di mi de Masra nanga Leriman, ben wasi oen foetoe, dan oenoe abi foe wasi den foetoe foe makandra toe. Bika mi ben gi oenoe na eksempre, so taki oenoe ben sa doe toe neleki fa mi ben doe gi oenoe. Foe troe, foe troe, mi e taigi oenoe: Wan srafoe no bigi moro en meester, èn a sma di den e seni go, no bigi moro a sma di seni en. Efoe oenoe sabi den sani disi, kolokoe foe oenoe te oenoe e doe den.”

Disi na troetroe wan toemoesi moi sani di e leri sma foe dini trawan nanga sakafasi! Den apostel no moesoe soekoe foe teki a fosi presi, èn denki taki den de so prenspari taki ala den trawan moesoe dini den. Den moesoe waka baka na eksempre di Jesus gi. A sani disi no abi foe doe nanga a gwenti foe wasi foetoe. Nôno, ma a abi foe doe nanga a de di wan sma de klariklari foe dini sma sondro foe desko trawan, awansi fa a wroko lagi noso froeferi kande. Mateus 26:20, 21; Markus 14:17, 18; Lukas 22:14-18; 7:44; Johanes 13:1-17.

▪ San de so aparti na a loekoe di Jesus e loekoe Jerusalem, te a e go na ini a foto foe hori a Paska?

▪ Sortoe beker Jesus e meki waka lontoe na den twarfoe apostel na a Paska, soleki fa a sori, baka di a blesi a beker?

▪ Sortoe wroko di e doe gi sma, den ben gwenti foe doe gi fisitiman di Jesus ben de na grontapoe, èn foe san ede disi no ben doe na a Paska di Jesus nanga den apostel ben hori?

▪ San Jesus ben abi na prakseri di a ben doe a lagi wroko foe e wasi den foetoe foe den apostel foe en?