San wet e gi pasi foe sma doe na Sabadei?
Kapitel 32
San wet e gi pasi foe sma doe na Sabadei?
A DE wan tra Sabadei, te Jesus e go na wan snoga krosibei foe a Se foe Galilea. Drape wan man de nanga wan leti-anoe di ben kon drei. Den leriman foe Wet nanga den Fariseiman e hori Jesus boen na ai foe si efoe a sa dresi a man. Te foe kaba den e aksi: „Wet e gi pasi foe dresi sma na sabadei?”
Den fesiman foe a djoe relisi e bribi taki wet e gi pasi foe dresi wan sma na Sabadei soso te a libi foe a sma de ini kefar. Den e leri foe eksempre, taki na Sabadei, wet no e gi pasi foe seti wan bonjo di broko noso foe tai wan foetoe noso anoe di fersweik. So boen, den leriman foe Wet nanga den Fariseiman e poti na aksi gi Jesus, soso foe gi en fowtoe.
Ma Jesus sabi fa den e denki. A e froestan toe, taki den teki wán fasi nomo foe prakseri abra, di abi foe doe nanga sortoe sani no e kroederi nanga a froeplekti di den poti gi sma taki den no abi pasi foe wroko na Sabadei. A fasi disi foe prakseri, no de foe feni na ini bijbel. Foe dati ede, Jesus e meki a tori waka so, taki a kan toeka nanga den na wan toemoesi spesroetoe fasi, foe di a e taigi a man nanga na anoe di ben kon drei: „Opo èn kon tanapoe na mindrisei.”
Now Jesus e drai loekoe den leriman foe Wet nanga den Fariseiman, èn a e taki: „Soema foe oenoe di abi wán skapoe nomo, no sa graboe en hori èn hari en poeroe efoe a fadon na ini wan peti na sabadei?” Foe di wan skapoe ben wani taki moni, meki den no ben sa libi en na ini a peti te leki a tra dei, pe kande a ben kan kon siki èn ben sa meki den lasi moni. Boiti dati, bijbel e taki: „A regtfardiki sma e sorgoe gi a sili foe na osometi foe en.”
Jesus e agersi a situwâsi disi nanga wan trawan, te a e taki: „Te joe loekoe en boen, omeni wan libisma warti moro wan skapoe! So boen, wet e gi pasi foe doe wan boen wroko na sabadei.” Den relisi fesiman no man taki noti na tapoe a krin fasi èn sari-ati fasi disi foe denki èn den e tan tiri.
Jesus e loekoe lontoe, ala di en ati e bron èn a e sari toe foe a tranga-ede don fasi foe den. Dan a e taigi a man: „Langa joe anoe.” A man e langa en anoe èn en anoe e kon gosontoe.
Na presi foe den Fariseiman prisiri taki na anoe foe a man kon boen baka, den e go na dorosei èn wantewante den e meki plan nanga den partèiman foe Herodes foe kiri Jesus. Soleki fa a sori, dan a politiek partèi disi abi memre na ini toe di de foe a relisi foe den Sadoeseiman. Ini na aladei libi, a politiek partèi disi nanga den Fariseiman e gens makandra na poebliki, ma den e wroko leki wán man makandra foe gens Jesus. Mateus 12:9-14; Markus 3:1-6; Lukas 6:6-11; Odo 12:10; Exodus 20:8-10.
▪ Sortoe situwâsi e meki taki Jesus e toeka na wan toemoesi spesroetoe fasi nanga den fesiman foe a djoe relisi?
▪ San den fesiman disi foe a djoe relisi e bribi ini a tori foe a meki di wan sma e meki kon gosontoe na Sabadei?
▪ Sortoe agersitori Jesus e gebroiki foe sori taki den fowtoe prakseri foe den no boen?