Kapitel 57

Sari-atifasi gi den sma di e kisi kwinsi

BAKA DI Jesus kroetoe den Fariseiman foe den gwenti foe den ede, di de foe den eigi boen nomo, a e gowe nanga den disipel foe en. Soleki fa joe sa memre kande, dan no so langa na fesi dati, a no ben man gowe moro nanga den foe go teki bro, foe di den ipi sma ben feni den. Now, nanga den disipel foe en, a e hari gowe na a kontren foe Tirus nanga Sidon, di de foeroe kilometer na noordsei. Soleki fa a sori, dan disi na a wan-enkri waka di Jesus nanga den disipel foe en teki dorosei foe Israèl.

Te den feni wan oso foe kan tan na ini, dan Jesus e taigi den taki a no wani, taki wan sma sabi pe den de. Ma tokoe, srefi na ini a kontren disi di no de wan kontren foe Israèl, Jesus no kan tan sondro foe sma si en. Wan Griki oema, di gebore dja na Foenisia, wan pisi foe Siria, e feni en, èn a e bigin begi en: „Sari foe mi, Masra, Manpikin foe David. Wan ogri jeje de na mi oemapikin tapoe na wan ogri fasi.” Ma Jesus no e gi no wan piki.

Te foe kaba, den disipel foe Jesus e taigi en: „Seni en gowe; bika a e tan bari nomo na wi baka.” Te Jesus e tjari kon na krin, foe san ede a no e jesi na oema, a e taki: „Mi ben seni kon soso gi den lasi skapoe foe na oso foe Israèl.”

Ma na oema no e lasi-ati. A e go na Jesus èn a e saka kindi fadon na Jesus foetoe. A e begi en: „Masra, jepi mi!”

Fa a moesoe seki na ati foe Jesus foe jere a faja begi foe na oema! Ma agen a e sori go na a moro prenspari frantiwortoe foe en: foe wroko gi Gado pipel Israèl. Na a srefi ten, èn soleki fa a sori foe tesi a bribi foe na oema, Jesus e poti prakseri na tapoe a fasi di den djoe abi foe desko sma di de foe wan tra nâsi. A e taki: „A no de wan joisti sani foe teki a brede foe den pikin èn trowe dati gi den pikin dagoe.”

Nanga en sten di e sori sari-ati, èn nanga a fasi fa en fesi de, a de seiker taki Jesus e sori en eigi safoe firi gi sma di no de djoe. A e safoe srefi a fasi fa a e teki den heiden gersi den dagoe, foe di a e taki foe „pikin dagoe”, noso jongoe dagoe. Na presi foe na oema naki foetoe na disi, a e go doro nanga san Jesus taki foe a desko di djoe e desko sma. Na wan sakafasi a e taki: „Ija, Masra; ma den pikin dagoe e njan toe foe den sakasaka di e fadon foe a tafra foe den masra foe den.”

„O oema, a bribi foe joe bigi foe troe”, Jesus e piki. „Meki a pasa soleki fa joe winsi.” Èn disi e pasa toe! Te na oema e drai go baka na en oso, a e feni en oemapikin na tapoe a bedi, èn a betre krinkrin.

Foe a sjoro foe Sidon, Jesus nanga den disipel foe en e go na a kondre foe go na a oposei foe Jordan liba. Soleki fa a sori, dan den e waka pasa a watra foe Jordan liba na wan presi noordsei foe a Se foe Galilea, èn den e doro a kontren foe a Dekapolis na owstoesei foe a se. Drape den e kren wan bergi, ma den ipi sma e feni den èn den e tjari den malengriwan kon na Jesus, so srefi den breniwan nanga babaw-wan èn foeroe sma di siki na a wán noso tra fasi, noso sma di no abi wan pisi foe den skin. Den e trowe den nomo na Jesus foetoe èn a e dresi den. Den sma e froewondroe, te den e si taki den babaw-wan e taki, den malengriwan e waka, den breniwan e si, èn den e prèise a Gado foe Israèl.

Jesus e poti spesroetoe prakseri na tapoe wan man di dofoe èn di pikinmoro no man taki. Nofo tron den dofoesma e sjensjen esi-esi, spesroetoe te den de na ini wan ipi sma. Kande Jesus si taki a man disi e senwe na wan aparti fasi. Dati meki Jesus e teki en na wan sari-atifasi na wan sei, so taki den kan de aparti foe na ipi sma. Te den de den wawan, Jesus e froeteri san a sa go doe gi a man. Jesus e poti en finga na ini den jesi-olo foe a man, èn baka di a spiti, a e fasi en tongo. Dan, te Jesus e loekoe go na hemel, a e soktoe dipi èn a e taki: „Kon opo.” A momenti dati a man jere baka, èn a kan taki leki ibri tra sma.

Te Jesus doe ala den sani disi foe dresi sma, den ipi sma e taki nanga foeroe warderi. Den e taki: „A doe ala sani boen. A e meki den dofoewan e jere srefi èn den babaw-wan e taki.” Mateus 15:21-31; Markus 7:24-37.

▪ Foe san ede Jesus no e dresi a pikin foe a Griki oema wantewante?

▪ Pe Jesus e teki den disipel foe en go baka ten?

▪ Fa Jesus e handri na wan sari-atifasi nanga a dofoe man di pikinmoro no man taki?