Kapitel 39

Sma di abi bigimemre nanga sma di abi sakafasi

BAKA DI Jesus taki foe den boen eigifasi foe Johanes a Dopoeman, a e poti a prakseri na tapoe den bigimemre sma di de na en lontoe, èn di noiti no sabi san den wani. „A geslakti disi”, na so a e froeklari, „gersi jongoe pikin di sidon na den wowojo, e bari gi den mati foe den, ala di den e taki: ’Wi ben prei a froiti gi oenoe, ma oenoe no ben dansi; wi ben bari krei, ma oenoe no ben sari.’”

San Jesus wani taki? A e tjari kon na krin: „Johanes ben kon, a no ben e njan, èn a no ben e dringi, èn tokoe sma e taki: ’A abi wan ogri jeje na en tapoe’; a Manpikin foe libisma ben kon, ala di a ben e njan èn ben e dringi, èn ete sma e taki: ’Loekoe! Wan sma di de wan tapala èn di de wan srafoe foe a dringi foe win, wan mati foe belastingman nanga sondari.’”

No wan sani no kan doe foe plisi den sma. Noiti den de tevrede. Johanes libi wan tranga libi ala di a ben drai en baka gi ensrefi, èn ben libi leki wan Nasireisma. Na so fasi a ben hori ensrefi na san na engel ben froeklari dati „a no moesoe dringi win nanga sopi srefisrefi”. Èn tokoe den sma e taki dati a abi wan ogri jeje na en tapoe. Jesus, na a tra sei, e libi leki ala tra sma, sondro foe hori ensrefi tranga na sani leki foe no dringi win, noso foe e njan èn den e kragi en taki a e gi ensrefi abra pasa marki na den sani dati.

Fa a de wan moeilek sani foe plisi den sma! Den de neleki son pikin di e prei, di no wani dansi te tra pikin e prei a froiti gi den noso di e weigri foe sari efoe den mati foe den e sari. Ma tokoe ete, na so Jesus e taki: „A koni e kon regtfardiki nanga den wroko foe en.” Ija, a boeweisi — den wroko — e sori krin, taki a kragi di sma ben kragi Johanes nanga Jesus, na falsi kragi.

Dan Jesus e bigin kroetoe den dri foto Korasin, Betsa-ida nanga Kaperna-um, pe a doe moro foeroe foe den krakti wroko foe en. Efoe a ben doe den wroko disi na den Foenisia foto Tirus nanga Sidon, na so Jesus e taki, dan den foto disi ben sa abi berow ini saka nanga asisi. Jesus e kroetoe Kaperna-um, di, soleki fa a sori, ben de en tanpe, a pisi ten foe en diniwroko. Jesus e froeklari: „Na a Kroetoedei a sa de moro makriki gi a kondre foe Sodom foe tjari, leki gi oenoe.”

Baka dati, Jesus e prèise en hemel Tata na poebliki. San e meki en doe disi, na foe di Gado ben kibri diri waarheid na jejefasi gi den koniwan nanga den sma di abi kabesa, ma a e tjari den kefalek moi sani disi kon na krin gi den sakafasi sma, gi pikin-nengre, foe taki en so.

Te foe kaba Jesus e gi a switi kari di e hari sma: „Kon na mi, alamala di e wroko tranga èn di abi hebi lai, èn mi sa gi oenoe kowroe-ati. Teki mi tjatjari na oenoe tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti.”

Fa Jesus e gi kowroe-ati? Dati a e doe, foe di a e tjari fri kon gi den sma di de na ini katibo foe den gwenti ede di den relisi fesiman poti na a pipel tapoe leki wan hebi, soleki foe eksempre, den seti foe hori Sabadei di e skotoe sma foe doe sani. Jesus e sori a pasi toe foe tjari froelekti kon gi den sma di e firi a hebi foe den politiek makti di e hori den na ondro èn di e masi den. A de so srefi gi den sma di e firi a hebi foe den sondoe foe den, foe di a konsensi e kwinsi den. A e tjari kon na krin gi den sortoe sma disi di e kisi kwinsi, fa den kan kisi pardon foe den sondoe foe den èn fa den kan njan boen foe wan diri matifasi nanga Gado.

A safoe tjatjari di Jesus e gi, na wan tjatjari foe a gi di wi e gi wisrefi na a dini foe Gado krinkrin, so taki wi man dini wi hemel Tata di abi sari-ati nanga sma. Èn a lekti lai di Jesus e gi den sma di e kon na en, na a lai foe a gi di wan sma e gi jesi na den sani di Gado e aksi, so taki a sma dati kan kisi libi. Den sani di Gado e aksi, na den gebod foe En, di skrifi na ini bijbel. A no wan hebi kwetikweti, te wan sma e gi jesi na den gebod disi. Mateus 11:16-30; Lukas 1:15; 7:31-35; 1 Johanes 5:3.

▪ Fa den bigimemre sma foe Jesus geslakti, di noiti no sabi san den wani, de leki pikin-nengre?

▪ Foe san ede Jesus e firi foe prèise en hemel Tata?

▪ Na sortoe fasi sani de leki wan hebi gi den sma, èn sortoe froelekti Jesus e gi?