Kapitel 85

Soekoe a sani di lasi

JESUS angri srefisrefi foe go soekoe den sma di wani dini Gado na wan sakafasi. Foe dati ede a e go soekoe den sortoe sma disi èn a e taki nanga ala sma foe a Kownoekondre, so srefi nanga takroe barinen sondari toe. Den sortoe sma disi e kon na en now foe arki en.

Te den Fariseiman nanga den leriman foe Wet e si disi, dan den e kroetoe Jesus foe feni fowtoe na en, foe di a e boemoei nanga sma di den e si leki soso-sma. Den e knoroe: „A man disi e teki sondari èn a e njan nanga den.” Disi na troetroe wan lagi sani gi den! Den Fariseiman nanga den leriman foe Wet e handri nanga a gewoon pipel leki a doti na ondro den foetoe. Foe taki en leti, den e gebroiki a Hebrew wortoe ‛am ha·’aʹrets, „sma foe a [gron]”, foe sori fa den e tegoe den sortoe sma disi.

Na a tra sei a de so, taki Jesus e handri nanga ala sma na wan lespekifasi, na wan switifasi èn nanga sari-atifasi. A bakapisi de, taki foeroe foe den sma disi di abi sakafasi, makandra nanga den wan di sma sabi foe na ogridoe foe den, angri foe arki en. Ma fa a de nanga a kroetoe di den Fariseiman e kroetoe Jesus foe feni fowtoe na en, foe di a e span ensrefi gi sma di den e si leki soso-sma?

Den sma no e agri nanga a tori èn foe dati ede Jesus e piki den, foe di a e gebroiki wan agersitori. A e taki foe a tori na a fasi fa den Fariseiman srefi e si en, leki den na regtfardiki sma èn den abi wan boen posisi na ini na ipi foe Gado, ala di den lagi ‛am ha·’aʹrets lasi pasi èn den lasi. Arki te a e aksi:

„Soema foe oenoe di abi wánhondro skapoe, te a lasi wán, no sa libi den neigitenti-na-neigi skapoe na baka na ini a sabana èn go soekoe a wán di lasi te leki a feni en? Èn te a feni en, a e poti en na tapoe en skowroe èn a e prisiri. Èn te a doro oso, a e kari en mati nanga den sma foe en birti kon èn a e taigi den: ’Prisiri nanga mi, bika mi feni mi skapoe di ben lasi.’”

Baka dati, Jesus e froeteri san a tori foe en wani taki: „Mi e taigi oenoe taki na so a sa de toe, dati moro prisiri sa de na hemel foe wán sondari ede di abi berow, leki foe neigitenti-na-neigi regtfardikiwan di no abi berow fanowdoe.”

Den Fariseiman e si densrefi leki regtfardiki sma èn foe dati ede den no abi berow fanowdoe. Wan toe jari pasa kaba, di wan toe foe den ben kroetoe Jesus foe feni fowtoe na en, foe di a ben njan nanga belastingman èn nanga sondari, a ben taigi den: „Mi no ben kon foe kari regtfardiki sma, ma sondari.” Den Fariseiman di e si densrefi leki regtfardiki sma, èn di no e si taki den moesoe abi berow, no e meki prisiri kon na hemel. Ma sondari di abi troetroe berow e meki prisiri kon na hemel.

Foe di Jesus wani sori moro krin, taki te lasi sondari e kon boen baka, dan dati e meki bigi prisiri kon, meki a e froeteri ete wan agersitori. A e taki: „Sortoe oema di abi tin moni foe wan drakmo, no e leti wan lampoe te a lasi wán moni foe wan drakmo èn e sibi en oso èn e go soekoe finifini, te leki a feni en? Èn te a feni en, a e kari den mati nanga den sma foe en birti kon, èn a e taki: ’Prisiri nanga mi, bika mi feni a moni foe wan drakmo di mi ben lasi.’”

Dan Jesus e froeteri san a tori wani taki, neleki fa a ben doe kaba. A e taki moro fara: „Na so, mi e taigi oenoe, prisiri de na den engel foe Gado foe wán sondari ede di abi berow.”

A de troetroe wan toemoesi aparti sani foe si, taki den engel foe Gado e sori na wan lobifasi taki den abi belangstelling gi a tori taki lasi sondari e kon boen baka! Èn spesroetoe foe di den lagi ‛am ha·’aʹrets disi di abi sakafasi, te foe kaba sa kisi a grani foe de wan memre foe Gado hemel Kownoekondre. A bakapisi de, taki den e kisi wan posisi na hemel, di hei moro di foe den engel srefi! Ma na presi foe den engel e djaroesoe noso e kisi a firi taki den poti den na wan sei, den e erken na wan sakafasi taki den sondoe libisma disi ondrofeni èn wini situwâsi na ini a libi, di sa meki den wroko leki sari-ati hemel kownoe nanga priester di e firi gi libisma. Lukas 15:1-10; Mateus 9:13; 1 Korentesma 6:2, 3; Openbaring 20:6.

▪ Foe san ede Jesus e boemoei nanga takroe barinen sondari, èn fa den Fariseiman e kroetoe en foe feni fowtoe na en?

▪ Fa den Fariseiman e si a gewoon pipel?

▪ Sortoe agersitori Jesus e gebroiki, èn san wi kan leri foe den?

▪ Foe san ede a de wan toemoesi aparti sani foe si taki den engel e prisiri?