Soema na Jesus troetroe?
Kapitel 59
Soema na Jesus troetroe?
TE A boto, di Jesus nanga den disipel foe en e sidon na ini, e tapoe na wan lanpresi na Betsa-ida, dan den sma e tjari wan breniman kon na en èn den e begi en foe fasi a man èn foe dresi en. Jesus e teki a man na en anoe èn a e tjari en go dorosei foe a dorpoe èn, baka di a spiti na tapoe den ai foe a man, a e aksi: „Joe e si wan sani?”
„Mi e si sma,” a man e piki, „bika mi e si sani di gersi bon, ma den e waka lontoe.” Jesus e poti den anoe foe en na tapoe den ai foe a man, èn a e meki den ai foe en kon boen baka, so taki a e si krin. Dan Jesus e seni a man go na oso nanga a komando foe no go na ini a foto.
Now Jesus e gowe nanga den disipel foe en foe go na den dorpoe foe Cesarea Filipi, te na a moro fara pisi noordsei foe Palestina. Den e kren wan boen langa pasi, di e teki so wan 50 kilometer, foe go na a moi presi pe Cesarea Filipi de, di hei 350 meter moro a se. A waka e teki kande wan toe dei.
Na pasi Jesus e go na wan presi foe de en wawan foe begi. Soso neigi noso tin moen libi ete bifo a dede foe en, èn a e broko en ede nanga den disipel foe en. Foeroe foe den no e waka moro na en baka. A sori leki trawan broeja èn taki a froewakti foe den no kon troe, foe di a ben weigri di a pipel ben proeberi foe meki en tron kownoe, èn foe di a no ben gi wan marki foe hemel foe boeweisi taki en na wan kownoe, di den feanti foe en ben tjalensi en. Soema den apostel foe en e bribi a de? Te den kon na a presi pe Jesus e begi, a e aksi: „Soema den ipi sma e taki, mi de?”
„Son sma e taki dati joe na Johanes a Dopoeman,” den e piki, „trawan e taki dati joe na Elia èn trawan baka, e taki dati joe na Jeremia noso wan foe den profeiti.” Ija, den sma e denki taki Jesus na wan foe den man disi èn taki a ben opo baka na dede!
„Ma soema oenoe e taki mi de?”, Jesus e aksi.
Esi-esi Petrus e piki: „Joe na a Krestes, a Manpikin foe a libilibi Gado.”
Baka di Jesus taki dati a piki foe Petrus ben boen, a e taki: „Mi e taigi joe: Joe na Petrus, èn na tapoe a stonbergi disi mi sa bow mi gemeente, èn den doro foe Hades no sa wini en.” Fosi tron Jesus e meki bekènti dja, taki a sa bow wan gemeente èn taki srefi dede no sa hori den memre foe en na ini katibo, baka a getrow waka nanga libi foe den na grontapoe. Dan a e taigi Petrus: „Mi sa gi joe den sroto foe a kownoekondre foe hemel.”
Na so Jesus e tjari kon na krin, taki Petrus sa kisi spesroetoe grani. Nôno, Petrus no e kisi a fosi presi na mindri den apostel, èn a no e tron a fondamenti toe foe a gemeente. Jesus srefi na a Stonbergi pe a gemeente foe en sa bow na tapoe. Ma Petrus e kisi dri sroto, di nanga den a sa opo, foe taki en so, na okasi gi difrenti groepoe sma foe go na ini a Kownoekondre foe hemel.
Petrus ben sa gebroiki a fosi sroto na a Pinksterfesa foe 33 G.T., foe sori den djoe di abi berow, san den ben moesoe doe foe kisi froeloesoe. Sjatoe baka disi, a ben sa gebroiki a di foe toe sroto foe opo na okasi gi Samariasma di e bribi, foe go na ini a Kownoekondre foe Gado. Baka dati, na ini 36 G.T., a ben sa gebroiki a di foe dri sroto, foe opo a srefi okasi gi heiden di no ben besnij, Cornelius nanga den mati foe en.
Jesus e go doro nanga a takimakandra di a abi nanga den apostel foe en. A no e meki a froewakti foe den kon troe, foe di a e froeteri den taki heri esi a sa kisi pina na Jerusalem èn taki dede e wakti en. Petrus, di no e froestan taki Jesus sa opo baka foe kisi libi na hemel, e teki Jesus go na wan sei. „De boen gi joesrefi, Masra”, a e taki. „A sani disi no sa pasa nanga joe kwetikweti.” Jesus e drai en baka gi Petrus, èn a e piki: „Komoto na mi fesi, Satan! Joe de leki wan ston gi mi foe naki foetoe, bika joe no e denki den prakseri foe Gado, ma di foe libisma.”
A de krin, taki boiti den apostel, tra sma e teki waka makandra nanga Jesus, so boen, a e kari den kon na en now, foe tjari kon na krin taki a no sa de wan makriki sani foe de wan bakaman foe en. „Efoe wan sma wani waka na mi baka,” na so a e taki, „dan a moesoe drai en baka gi ensrefi èn a moesoe teki en pina-postoe èn waka doronomo na mi baka. Bika a sma di wani froeloesoe en sili, sa lasi en; ma a sma di e lasi en sili foe mi ede èn foe a boen njoensoe ede, sa froeloesoe en.”
Ija, den bakaman foe Jesus moesoe de nanga deki-ati èn den sa moesoe òfer densrefi foe sori taki den warti foe Jesus feni den boen. A e taki: „Bika a sma di e sjen gi mi èn gi den wortoe foe mi, ini a sondoe geslakti disi di e doe soetadoe, a Manpikin foe libisma sa sjen toe gi en, te a sa kon ini a glori foe en Tata nanga den santa engel.” Markus 8:22-38; Mateus 16:13-28; Lukas 9:18-27.
▪ Foe san ede Jesus e broko en ede nanga den disipel foe en?
▪ Sortoe prakseri den sma abi na ini a tori foe soema na Jesus?
▪ Sortoe sroto Petrus e kisi, èn fa a sa gebroiki den?
▪ Sortoe piri-ai Petrus e kisi, èn foe san ede?