Kapitel 87

Sorgoe nanga boen koni gi a ten di e kon

DIDJONSRO Jesus kaba froeteri wan ipi sma a tori foe a manpikin di ben lasi. Na ini na ipi sma joe ben abi so srefi den disipel foe en, bidrigi belastingman nanga tra takroe barinen sondari, nanga leriman foe Wet nanga Fariseiman. Now a e taki nanga den disipel foe en, èn a e froeteri wan agersitori foe wan goedoeman di no ben kisi foe jere wan boen sani foe en dinari noso basja di ben loekoe en oso.

Soleki fa Jesus taki, dan a goedoeman e kari a basja foe en kon na en èn a e froeteri en taki a o poeroe en na wroko. „San mi moesoe doe, now di mi e si taki mi meester sa poeroe a wroko foe hori ai na tapoe sani, na mi anoe?”, a basja e aksi ensrefi. „Mi no tranga nofo foe go diki gron, mi e sjen foe go begi. Ai! Mi sabi san mi o doe, so taki te mi lasi a wroko leki basja, dan den sma sa teki mi na den oso.”

San a basja abi na prakseri foe doe? A e kari den sma kon, di moesoe pai a meester foe en. „Omeni joe moesoe pai?”, a e aksi.

A fosiwan e piki: ’2200 liter olijf-oli.’

’Teki a kroederi di joe skrifi na tapoe papira, baka èn go sidon èn esi-esi skrifi 1100’, a e taigi en.

Wan trawan a e aksi: ’Èn joe, omeni joe moesoe pai?’

A e taki: ’220 hectoliter [22.000 liter] tarwe.’

’Teki a kroederi di joe skrifi na tapoe papira, baka èn skrifi 176.’

A basja abi a reti foe saka a moni di sma moesoe pai a meester foe en, foe di a e doe den moni afersi foe en meester ete. Foe di a e saka a moni, dan a e kon tron mati nanga den sma, di kan doe en wan boen baka, te a lasi en wroko.

Te a meester jere san pasa, dan a e froewondroe. Te joe loekoe en boen, dan a „e prèise a basja, ala di a ben de onregtfardiki, foe di a ben handri nanga boen koni”. Ija, èn Jesus e taki moro fara: „Den manpikin foe a seti foe sani disi, na ini na aladei libi koni moro den manpikin foe a leti, te den e handri nanga sma foe den eigi geslakti.”

Now Jesus e leri den disipel foe en sortoe sani den kan leri foe disi, èn a e gi den a deki-ati: „Meki mati gi oensrefi nanga jepi foe onregtfardiki goedoe, so taki, te dati gowe libi oenoe, den kan teki oenoe na ini den têgo libipresi.”

Jesus no e prèise a basja foe na onregtfardiki fasi foe en, ma foe di a ben abi a koni foe si sani na fesi, foe a boen koni foe en. Nofo tron, „den manpikin foe a seti foe sani disi” e gebroiki den moni noso a posisi foe den na wan koni fasi, foe tron mati nanga den sma di kan doe den wan boen baka. Foe dati ede, den foetoeboi foe Gado, „den manpikin foe a leti”, so srefi moesoe gebroiki den materia goedoe foe den, den „onregtfardiki goedoe” foe den, na wan koni fasi so taki densrefi e kisi wini foe dati.

Ma soleki fa Jesus e taki, dan a de nanga jepi foe den goedoe disi, taki den moesoe tron mati foe den sma di kan teki den „na ini den têgo libipresi”. Gi den memre foe a pikin ipi, den presi disi de na hemel; gi den „tra skapoe” den de na ini a Paradijs na grontapoe. Foe di na Jehovah Gado nanga En manpikin wawan kan teki sma na ini den presi disi, meki wi moesoe de fajafaja foe kweki wan matifasi nanga den, foe di wi e gebroiki ala „onregtfardiki goedoe” di wi ben sa abi, foe horibaka gi den Kownoekondre afersi. Dan te wi no abi den materia goedoe moro noso te den pori, san sa pasa seiker, dan wi abi wan djaranti gi wan têgo tamara.

Jesus e taki moro fara dati sma di e sorgoe getrow gi srefi den materia sani disi, noso gi den moro mendri sani disi, sa de getrow te den moesoe sorgoe gi afersi di de moro prenspari. „Foe dati ede,” a e go moro fara, „efoe oenoe no sori taki oenoe de getrow ini a tori foe den onregtfardiki goedoe, dan soema sa gi oenoe a troetroe sani, [dati wani taki, den afersi na jejefasi, noso Kownoekondre afersi]? Èn efoe oenoe no sori taki oenoe de getrow ini a tori foe san de foe wan trawan [den Kownoekondre afersi di Gado gi den foetoeboi foe en], dan soema sa gi oenoe san de foe oensrefi [a pai foe kisi libi na ini den têgo libipresi]?”

So boen, wi no kan de troetroe foetoeboi foe Gado now èn na a srefi ten de srafoe foe onregtfardiki goedoe, materia goedoe, soleki fa Jesus e bosroiti: „No wan osoknekti kan de wan srafoe foe toe meester, bika a no sa wani si a wán na ai èn lobi a trawan, noso tai hori na a wán èn wisiwasi a trawan. Oenoe no kan de srafoe foe Gado èn foe a Goedoe.” Lukas 15:1, 2; 16:1-13; Johanes 10:16.

▪ Fa a basja na ini na agersitori foe Jesus e tron mati foe den sma di kan jepi en baka ten?

▪ San na „onregtfardiki goedoe”, èn fa wi kan meki mati gi wisrefi nanga jepi foe dati?

▪ Soema kan teki wi na ini „den têgo libipresi”, èn sortoe presi na disi?