Kapitel 45

Srefi en e tron wan disipel

JESUS e si wan sani di e frede sma troetroe, te a e go na sjoro! Toe aparti sortoe wilder man e komoto na a beripe di no de fara foe drape èn den e lon go na Jesus. Ogri jeje de na den tapoe. Foe di wán foe den ogri moro leki a trawan kande èn foe di a pina moro langa foe a de di a de na ini a makti foe den ogri jeje, meki ala prakseri e poti na en tapoe.

Langa ten kaba, a man disi, di de foe sari, e libi soso-skin na mindri den grebi. Doronomo, dei nanga neti, a e bari èn a e koti ensrefi boen dipi nanga ston. A ogri so kefalek, taki no wan sma abi a deki-ati foe waka pasa a pasi dati. Sma ben proeberi foe tai en nanga boei, ma a e hari den keti broko èn a e broko na isri poeroe na en foetoe. No wan sma abi a krakti foe hori en na ondro.

Te a man e waka go na Jesus èn e fadon na Jesus foetoesei, den ogri jeje di abi en na ini den makti, e meki a man e bari: „San mi abi foe doe nanga joe, Jesus, Manpikin foe a Moro Hei Gado? Mi e meki joe sweri na Gado foe no pina mi.”

„Komoto na ini a man, jeje di no krin”, Jesus e taki ibri tron baka. Ma dan Jesus e aksi: „Fa joe nen?”

„Mi nen Legioen, bika wi de nanga foeroe”, na a piki. Ogri jeje feni en wan prisiri sani foe si fa sma, di den man kisi ini den makti, e pina. Soleki fa a sori, dan den e feni en wan prisiri sani foe trobi sma na wan lagifasi nanga wan heri ipi ogri jeje makandra. Ma now di den toeka nanga Jesus, den e begi en foe a no seni den go na ini a peti di no abi gron. Agen wi e si, taki Jesus ben abi foeroe makti; a ben man basi srefi den boen takroe, ogri jeje. Nanga disi e kon na krin toe, taki den ogri jeje sabi san na a kroetoe foe Gado te foe kaba, taki a sa sroto den na ini a peti di no abi gron, makandra nanga Satan Didibri, a fesiman foe den.

No so fara foe drape, wan groepoe foe so wan 2000 agoe e njan grasi na tapoe a bergi. Foe dati ede den ogri jeje e taki: „Seni wi go na ini den agoe, so taki wi kan go na ini den.” A de krin, taki den ogri jeje abi wan freimde sortoe ogri-ati prisiri foe teki a skin abra foe libisma èn foe meti. Te Jesus e gi den pasi foe go na ini den agoe, dan ala den 2000 agoe e trowe densrefi foe a leti-opoe pisi foe a bergi go dede na ini a se.

Te den man, di e loekoe den agoe, e si disi, den e lon gowe foe froeteri a njoensoe na ini a foto èn na ini kontren dorosei foe a foto. Ne den sma e kon loekoe san pasa. Te den doro drape, den e si a man di den ogri jeje ben komoto na ini en. Èn loekoe, a weri krosi èn a e sidon na Jesus foetoesei, ala di a de nanga en krin froestan!

Sma di si nanga den eigi ai san ben pasa, e froeteri fa a man ben kon betre. Den e froeteri den sma toe foe a freimde fasi fa den agoe dede. Te den sma e jere disi, den e kon frede srefisrefi, èn den e aksi Jesus tranga foe gowe libi a kontren foe den. So boen, a e doe san den e aksi èn e go na ini a boto. A man, di fosi ogri jeje ben de na en tapoe, e begi Jesus foe kan go nanga en. Ma Jesus e taigi en: „Go na oso na den famiri foe joe, èn froeteri den ala sani di Jehovah doe gi joe èn foe a sari-ati di a ben sori joe.”

Moro foeroe Jesus e taigi den sma di a e dresi, foe no taki nanga no wan sma foe a tori. A no wani taki sma kon na bosroiti, foe di den jere span tori. Ma a fiti taki a no e doe so a leisi disi, bika a man di ben abi ogri jeje na en tapoe fosi, sa kotoigi na sma, di Jesus no sa man doro moro now kande. Boiti dati, a de di a man de drape, sa de wan kotoigi foe a makti di Jesus abi foe doe boen sani. Na a fasi disi a sa meki ala njoensoe, di sma ben sa froeteri kande ini a tori foe a lasi di den agoe lasi gowe, kon tron wan heri tra sani.

A man di fosi, ben abi ogri jeje na en tapoe, e gowe, soleki fa Jesus ben taigi en foe doe. Na ala pe na ini a Dekapolis a e bigin meki ala sani bekènti di Jesus ben doe gi en, èn den sma e froewondroe srefisrefi. Mateus 8:28-34; Markus 5:1-20; Lukas 8:26-39; Openbaring 20:1-3.

▪ San na a reide kande, taki ala prakseri e poti na tapoe wán man di abi ogri jeje na en tapoe, ala di toe foe den man de?

▪ San e sori taki den ogri jeje sabi taki ini a ten di e kon, wan peti di no abi gron e wakti den?

▪ Foe san ede, soleki fa a sori, ogri jeje lobi foe go na ini a skin foe libisma èn di foe meti?

▪ Foe san ede a leisi disi Jesus e taigi a man, di ogri jeje na en tapoe fosi, foe froeteri tra sma san A ben doe gi en?