Kapitel 91

Te Lasarus e kisi wan opobaka

NOW Jesus e doro na a memre-grebi foe Lasarus, makandra nanga den sma di de nanga en. Te joe loekoe en boen, dan disi na wan bergi-olo pe wan ston poti na a mofo. „Poeroe a ston”, Jesus e taki.

Marta no e agri nanga disi, foe di a no e froestan ete san Jesus abi na prakseri foe doe. „Masra”, a e taki, „a moesoe smeri kaba, bika a de fo dei kaba.”

Ma Jesus e aksi: „Mi no ben taigi joe, taki joe ben sa si a glori foe Gado efoe joe ben sa bribi?”

Foe dati ede, den e poeroe a ston. Ne Jesus e loekoe go na hemel èn a e begi: „Tata, mi e taigi joe tangi taki joe jere mi. Troetroe, mi ben sabi taki joe e jere mi alaten; ma foe na ipi sma ede di tanapoe lontoe dja, mi ben taki, so taki den ben sa kan bribi taki joe ben seni mi kon.” Jesus e begi na poebliki, so taki den sma sa sabi taki san a o doe now, a sa doe nanga jepi foe a krakti di a kisi foe Gado. Dan a e bari taki nanga wan tranga sten: „Lasarus, kon na doro!”

Ne Lasarus e kon na doro. En anoe nanga foetoe tai ete nanga grebikrosi, èn en fesi tapoe nanga wan doekoe. „Loesoe en èn meki a go”, Jesus e taki.

Foeroe foe den djoe, di ben kon foe trowstoe Maria nanga Marta, e sori bribi na ini Jesus te den e si a wondroe. Ma trawan e gowe foe froeteri den Fariseiman san pasa. Den disi nanga den granpriester, wantewante e seti sani foe wan konmakandra foe a djoe heikroetoe, a Sanhedrin.

Kajafas, a heipriester foe a ten dati, so boen leki den Fariseiman nanga den Sadoeseiman, den granpriester, nanga den man di ben de heipriester fosi, de na ini a Sanhedrin toe. Den e kragi: „San wi moesoe doe, bika a sma disi e doe foeroe marki? Efoe wi gi en pasi foe go so doro, dan den alamala sa sori bribi na ini en, èn dan den Romesma sa kon èn sa teki wi presi nanga wi nâsi poeroe na wi anoe.”

Ala di den relisi fesiman e erken taki Jesus „e doe foeroe marki”, tokoe den e broko den ede soso nanga den eigi posisi nanga a makti di den abi. Na opobaka foe Lasarus na wan hebi slag spesroetoe gi den Sadoeseisma, foe di den no e bribi na ini na opobaka.

Kajafas, di kande na wan Sadoeseiman, e taki now: „Oenoe no sabi notinoti, èn oenoe no e go prakseri taki na foe oenoe boen ede, wán sma moesoe dede gi a boen foe a pipel èn no taki a heri nâsi e kisi pori.”

Gado ben poti en na ini a prakseri foe Kajafas foe taki disi, bika na apostel Johanes ben skrifi baka ten: „Ma [Kajafas] no ben taki disi foe ensrefi.” San Kajafas ben abi na prakseri troetroe, ben de, taki den ben moesoe kiri Jesus, foe tapoe En foe no gens a posisi foe den moro, foe abi makti nanga krakti tapoe sma. Ma soleki fa Johanes ben taki, ’dan Kajafas ben taki na profeitifasi, dati Jesus no ben moesoe dede gi a nâsi wawan, ma so taki den pikin foe Gado ben sa kan tjari kon na makandra toe’. Èn a de troetroe a prakseri foe Gado taki en Manpikin dede leki wan loesoe-paiman gi ala sma.

Now Kajafas abi boen bakapisi, foe di a ben abi so wan krakti na tapoe a Sanhedrin, taki den bigin meki plan foe kiri Jesus. Ma Jesus, di e jere foe den plan disi, kande foe Nikodeimus, wan memre foe a Sanhedrin di de wan sortoe mati foe en, e gowe foe drape. Johanes 11:38-54.

▪ Foe san ede Jesus e begi na poebliki, bifo a e opo Lasarus baka na dede?

▪ Fa den sma di ben si na opobaka disi e handri?

▪ San e sori na ogrifasi foe den memre foe a Sanhedrin?

▪ San Kajafas ben abi na prakseri, ma Gado ben gebroiki en foe taki sortoe profeititori?