Kapitel 13

Teki leri foe den tesi foe Jesus

WANTEWANTE baka a dopoe foe Jesus, a jeje foe Gado e tjari en go na a gran sabana foe Judea. A abi foeroe sani foe go prakseri, bika di a ben dopoe, „hemel ben kon opo”, so taki a ben kan froestan sani foe hemel krin. Ija, a abi foeroe sani foe go denki dipi foe den!

Fotenti dei nanga fotenti neti Jesus e tan na ini a gran sabana èn a no e njan noti na ini a ten dati. Dan, te angri e kiri Jesus srefisrefi, Didibri e kon na en foe tesi en. A e taki: „Efoe joe na wan manpikin foe Gado, dan taigi den ston disi foe tron brede.” Ma Jesus sabi taki a no boen foe gebroiki a makti di a abi foe doe wondroe, foe satisferi en eigi lostoe. So boen, a no e gi Satan pasi foe tesi en.

Ma Didibri no kaba nanga a tori. A e proeberi en na wan tra fasi. A e tjalensi Jesus foe djompo foe den skotoe foe a tempel, so taki den engel foe Gado sa kon jepi en. Ma Jesus no e meki Satan kori en foe go doe so wan sani di e hari sma prakseri èn di e tjari sekiseki kon. Jesus e gebroiki tekst foe den Boekoe foe bijbel foe sori taki a no boen foe tesi Gado na a fasi disi.

Leki wan di foe dri moeiti di Didibri e doe foe tesi Jesus, a e sori Jesus na wan wondroe fasi ala den kownoekondre foe grontapoe èn a e taki: „Ala den sani disi mi sa gi joe, efoe joe fadon na doti èn doe wan sani foe anbegi mi.” Ma agen Jesus e weigri foe saka ensrefi na a tesi foe doe wan sani di no boen, èn a e froekisi foe tan getrow na Gado.

Wi kan teki leri foe den tesi disi foe Jesus. Den e sori wi foe eksempre, taki a no de so kwetikweti taki Didibri na a ogri na ini ala libisma, neleki fa son sma e taki, ma a de wan troetroe sma di wi no kan si. A tesi di Didibri ben tesi Jesus e sori wi toe, taki ala den tiri foe grontapoe na a goedoe foe Didibri. Bika fa a pristeri di Didibri ben pristeri den na Krestes, ben kan de wan troetroe tesi efoe den no ben de troetroe foe en?

Èn prakseri foe disi: Didibri ben taki dati a ben de klariklari foe pai Jesus, efoe Jesus ben sa doe wán sani foe anbegi en, ija, taki a ben sa gi en ala den kownoekondre foe grontapoe srefi. Kande Didibri sa proeberi toe foe tesi wi na wan srefi fasi, kande foe di a e hori den toemoesi moi okasi na wi fesi foe kisi grontapoe goedoe, makti, noso wan hei posisi. Ma fa a sa de wan koni sani foe wi sei, efoe wi e waka baka na eksempre foe Jesus, foe di wi e tan getrow na Gado, o sortoe tesi wi e kisi toe! Mateus 3:16; 4:1-11; Markus 1:12, 13; Lukas 4:1-13.

▪ Foe sortoe sani Jesus e prakseri dipi na ini den 40 dei di a de na ini a gran sabana?

▪ Fa Didibri e proeberi foe tesi Jesus?

▪ San wi kan leri foe den tesi foe Jesus?