Trobi e kon foe Jesus ede
Kapitel 41
Trobi e kon foe Jesus ede
SJATOE baka di Jesus go na a oso foe Simon leki wan fisitiman, a e bigin nanga en di foe toe preikiwaka na Galilea. A fosi leisi di a ben waka ini a kontren, den fosi disipel foe en, Petrus, Andreas, Jakobus nanga Johanes, ben go nanga en. Ma now den twarfoe apostel e go nanga en, èn so srefi wan toe oemasma. Makandra nanga den joe abi Maria Magdalena, Susana, nanga Johana, di a masra foe en na wan lantiman di e wroko gi kownoe Herodes.
O moro a diniwroko foe Jesus e kisi moro krakti, o moro a trobi ini a tori foe a wroko foe en, e kon moro bigi toe. Sma e tjari wan man kon na Jesus, di ogri jeje de na en tapoe, di breni toe èn di no man taki. Te Jesus e dresi a man, so taki ogri jeje no abi en moro na ini den makti èn taki a kan taki èn si, dan den ipi sma no de foe hori. Den e bigin taki: „Disi a no a Manpikin foe David kande?”
Den ipi sma e kon makandra na ini so bigi groepoe lontoe na oso pe Jesus e tan, taki en nanga den disipel foe en no kan njan pikinso srefi. Boiti den sma di e denki taki en na kande a pramisi „Manpikin foe David”, joe abi den leriman foe Wet nanga den Fariseiman toe, di kon te foe Jerusalem foe meki sma tweifri na a makti foe Jesus. Te den famiriman foe Jesus e jere foe a djoegoedjoegoe di e kon foe Jesus ede, den e kon foe graboe en. Foe san ede?
We, srefi den eigi brada foe Jesus no e bribi ete, taki en na a Manpikin foe Gado. Èn a fajafaja kesekese nanga a trobi di doe kon na poebliki foe Jesus ede, krinkrin no e fiti den eigifasi foe a Jesus di den ben sabi di a ben e gro kon bigi na Nasaret. Foe dati ede den e bribi taki wan sani no boen srefisrefi nanga Jesus froestan. „A lasi en froestan”, den e taki, èn den wani graboe en èn tjari en gowe.
Tokoe boeweisi e sori krin taki Jesus ben dresi a man di ben abi ogri jeje na en tapoe. Den leriman foe Wet nanga den Fariseiman sabi taki den no kan taki, dati disi no ben pasa troetroe. So boen, foe meki sma tweifri na a makti di Jesus abi, den e taigi den sma: „A sma disi e poeroe den ogri jeje na sma tapoe soso nanga jepi foe Be-elsebub, a tiriman foe den ogri jeje.”
Foe di Jesus sabi san den leriman foe Wet nanga den Fariseiman e denki, meki a e kari den kon na en èn a e taki: „Ibri kownoekondre di prati teige ensrefi, e kon pori, èn ibri foto noso ibri oso di prati teige ensrefi, no sa horidoro. So boen, te Satan e jagi Satan poeroe, dan a prati teige ensrefi; fa a kownoekondre foe en sa horidoro dan?”
Ai, a krin fasi disi foe taki, e poeroe ala sani na pasi di den Fariseiman ben taki! Foe di den Fariseiman e taki dati den eigi sma poeroe ogri jeje na sma tapoe, meki Jesus e aksi toe: „Efoe mi e poeroe ogri jeje na sma tapoe nanga jepi foe Be-elsebub, nanga jepi foe soema dan, oen manpikin e poeroe ogri jeje na sma tapoe?” Nanga tra wortoe, a srefi sani di den e kragi Jesus nanga dati, a srefi sani dati e fiti den toe. Dan Jesus e warskow: „Ma efoe mi e poeroe ogri jeje na sma tapoe nanga jepi foe a jeje foe Gado, dan a kownoekondre foe Gado e kon troetroe na wan onfroewakti fasi na oen tapoe.”
Foe agersi taki a trowe di a e trowe ogri jeje go na doro, na wan boeweisi foe a makti di a abi tapoe Satan, Jesus e taki: „Fa wan sma kan go na ini na oso foe wan tranga man èn foefoeroe en ososani, efoe a no e tai a tranga man fosi? Èn dan a sa foefoeroe den sani poeroe foe en oso. A sma di no de na mi sei, de teige mi, èn a sma di no e tjari sani kon makandra nanga mi, e panja sani.” A de krin, taki den Fariseiman de teige Jesus foe di den e sori taki den na wrokosani foe Satan. Den e panja den Israèlsma, foe di den e meki den Israèlsma drai den baka gi Jesus.
Foe dati ede Jesus e warskow den gensman disi di de leki Satan, taki ’sma no sa kisi pardon te den e pori a nen foe a jeje’. A e tjari kon na krin: „Foe eksempre, efoe wan sma e taki wan wortoe teige a Manpikin foe libisma, a sa kisi pardon; ma efoe wan sma e taki wan wortoe teige a santa jeje, a no sa kisi pardon, nôno, no ini a seti foe sani disi, no ini a wan di e kon.” Den leriman foe Wet nanga den Fariseiman dati doe a sondoe di no kan kisi pardon, foe di den ben taki na wan ogri-ati fasi taki na Satan doe den sani, ala di a de krin taki a de wan wondroe wroko foe a santa jeje foe Gado. Mateus 12:22-32; Markus 3:19-30; Johanes 7:5.
▪ Fa a di foe toe waka foe Jesus na Galilea de tra fasi leki a fosiwan?
▪ Foe san ede den famiriman foe Jesus e proeberi foe graboe en?
▪ Fa den Fariseiman e proeberi foe meki sma tweifri na a makti di Jesus abi foe doe wondroe, èn fa Jesus e sori taki den no abi leti?
▪ Foe sortoe sani den Fariseiman abi fowtoe èn foe san ede?