Kapitel 73

Wan Samariaman di abi sari-atifasi

KANDE Jesus de krosibei foe Betania, wan pikin dorpoe di de so wan dri kilometer foe Jerusalem. Wan man di sabi a Wet foe Moses heri boen, e kon na en èn a e aksi en na aksi disi: „Leriman, san mi moesoe doe foe kisi têgo libi?”

Jesus e si taki a man, wan sabiman foe wet, no e aksi disi soso foe kon leri moro sani, ma foe di a wani tesi Jesus. Kande a sabiman foe wet wani Jesus gi wan piki na wan fasi di ben sa hati den firi foe den djoe. Foe dati ede Jesus e kisi a sabiman foe wet go so fara foe froeteri san ensrefi e denki. A e aksi: „San skrifi na ini a Wet? Fa joe e leisi?”

Leki piki, a sabiman foe wet, di abi wan aparti sortoe inzicht, e kari den wet foe Gado na Deuteronomium 6:5 nanga Lefitikus 19:​18, èn a e taki: „’Joe moesoe lobi Jehovah, joe Gado nanga joe heri ati èn nanga joe heri sili èn nanga joe heri krakti èn nanga joe heri froestan’, èn: ’a sma na joe sei leki joesrefi.’”

„Joe piki boen”, Jesus e piki. „Tan doe disi èn joe sa kisi libi.”

Ma a sabiman foe wet no de tevrede nanga disi. Gi en, a piki foe Jesus no e taki finifini nofo foe sani. A wani, taki Jesus moesoe taki dati en eigi fasi foe denki de joisti èn foe dati ede a de regtfardiki ini a fasi fa a e handri nanga tra sma. Foe dati ede a e aksi: „Soema na a sma na mi sei dan?”

Den djoe e bribi taki den wortoe „a sma na [den] sei”, abi foe doe nanga kompe djoe wawan, soleki fa a kontekst foe Lefitikus 19:18 gersi foe sori. Foe taki en leti, na apostel Petrus srefi ben taki baka ten: „Oenoe sabi heri boen taki wet no e gi pasi foe wan djoe go moksi ensrefi nanga wan sma foe wan tra ras noso foe go na en.” So boen, a sabiman foe wet, èn kande den disipel foe Jesus toe, e bribi taki den de regtfardiki efoe den sori switifasi gi kompe djoe wawan, foe di, soleki fa den e si en, sma di no de djoe, a no sma na den sei troetroe.

Fa Jesus kan meki den arkiman foe en kisi wan joisti fasi foe denki, sondro foe a afrontoe den? A e froeteri wan tori, di kande abi en gron tapoe wan sani di ben pasa troetroe. „Wan seiker [djoe]”, na so Jesus e tjari kon na krin „ben saka komoto na Jerusalem go na Jerikow èn foefoeroeman ben ròs en, di no wawan ben poeroe en krosi na en skin, ma di ben fon en toe èn ben gowe, e libi en dededede na baka.”

„We, a kon pasa now”, na so Jesus e go moro fara, „taki wan seiker priester ben saka a pasi dati, ma di a ben si en, a ben go waka na a tra sei foe a pasi. Na so wan Leifisma ben doe toe, taki, di a ben kon na a presi èn a ben si en, a ben go waka na a tra sei foe a pasi. Ma wan seiker Samariaman di ben e waka na a pasi dati, ben si en èn a ben sari.”

Foeroe priester nanga den Leifi tempel jepiman foe den, e libi na Jerikow, wan presi di joe kan doro, te joe saka wan pasi pe kefar de na tapoe. A pasi langa 23 kilometer èn a lagi 900 meter moro Jerusalem, pe den e doe diniwroko na ini a tempel. Sma ben sa kan froewakti foe a priester nanga a Leifisma taki den ben sa jepi wan kompe djoe di de na ini problema. Ma den no e doe disi. Na presi foe dati, wan Samariaman e doe disi. A firi di den djoe abi foe no wani si den Samariasma na ai, tranga sote, taki no so langa pasa den ben afrontoe Jesus nanga den moro krakti wortoe, foe di den ben kari en „wan Samariasma”.

San a Samariaman e doe foe jepi a djoe? „A ben go na en”, Jesus e taki, „èn ben tai den soro foe en, ala di a ben kanti oli nanga win na den soro tapoe. Dan a ben opo en poti na tapoe en eigi meti èn a ben tjari en go na wan pansjon èn ben sorgoe gi en. Èn a tra dei a ben teki toe denari [a moni di wan sma e wroko na ini toe dei], èn a gi disi na a eiginari foe a pansjon, èn ben taki: ’Sorgoe gi en, èn efoe joe ben sa gebroiki moro leki disi, mi sa pai joe baka te mi e drai kon baka dja.’”

Baka te Jesus froeteri a tori, a e aksi a sabiman foe wet: „Soema foe den dri sma disi, joe e prakseri, ben meki ensrefi leki a sma di ben de na a man sei, di foefoeroeman ben ròs?”

A sabiman foe wet, di e feni en wan froeferi sani foe taki wan boen sani foe wan Samariasma, e piki nomo: „A sma di ben handri nanga sari-ati gi en.”

„Waka joe pasi èn doe a srefi sani toe”, Jesus e bosroiti.

Efoe Jesus ben sa taigi a sabiman foe wet langalanga, taki sma di no de djoe, ben de sma na den sei toe, dan no wawan a ben sa de so, taki a man no ben o teki disi, ma a moro bigi pisi foe den arkiman ben sa teki a sei foe a sabiman foe wet kande ini a takimakandra di a ben abi nanga Jesus. Ma a troetroe tori disi ben sori krin taki, boiti den sma foe wi eigi ras èn wi eigi nâsi, tra sma toe de sma na wi sei. Ija, Jesus ben gebroiki troetroe wan heri moi fasi foe gi leri na sma! Lukas 10:25-37; Tori foe den Apostel 10:28; Johanes 4:9; 8:48.

▪ Sortoe aksi a sabiman foe wet e poti gi Jesus, èn soleki fa a sori, dan nanga sortoe prakseri a ben aksi disi?

▪ Soleki fa den djoe e prakseri, dan soema na den sma na den sei, èn sortoe reide de foe bribi taki srefi den disipel abi a denki disi?

▪ Fa Jesus e tjari a joisti fasi foe si sani so krin kon na fesi, so taki a sabiman foe wet no kan meki sma tweifri na a tori?