Kapitel 79

Wan nâsi e lasi gowe, ma a no ala sma

SJATOE baka a takimakandra di Jesus ben abi nanga den sma di ben kon makandra na dorosei foe na oso foe wan Fariseiman, son sma e froeteri en „foe den Galileasma di a broedoe foe den [a granman, di ben de wan Romesma, Pontius] Pilatus ben moksi nanga den srakti-ofrandi foe den”. Kande disi na den Galileasma di den ben kiri di doesoendoesoen djoe no ben agri taki Pilatus ben gebroiki moni foe a tempel goedoekisi foe bow wan ondrogron kanari di ben moesoe tjari watra go na Jerusalem. Den sma di e froeteri Jesus na afersi disi, wani sori nanga disi kande taki den Galileasma ben kisi a rampoe disi foe den eigi ogridoe ede.

Ma Jesus e meki den sma kisi wan joisti denki, foe di a e aksi: „Oenoe e prakseri taki den Galileasma disi ben de moro takroe sondari leki ala tra Galileasma, foe di den njan pina foe den sani disi ede? Kwetikweti”, Jesus e piki. Ne a e gebroiki a sani disi di ben pasa foe warskow den djoe: „Efoe oenoe no abi berow, dan oenoe alamala sa dede na a srefi fasi.”

Dan Jesus e poti a prakseri na tapoe wan tra rampoe di ben pasa drape, èn di kande ben abi foe doe toe nanga a bow foe na ondrogron kanari. A e aksi: „Noso den tina-aiti sma dati, di a toren na ini Siloam ben fadon na den tapoe, so taki den dede, oenoe e prakseri taki den ben abi moro fowtoe leki ala tra sma di e libi na Jerusalem?” Nôno, Jesus e taki dati den sma disi no ben dede foe a takroedoe foe den ede. Ma moro foeroe a de so, taki „ten nanga sani di e pasa èn di joe no kan si na fesi”, na san e meki nofo tron taki den sortoe rampoe disi e pasa. Ma agen Jesus e gebroiki na okasi foe warskow sma: „Ma efoe oenoe no abi berow, dan oenoe alamala sa dede na a srefi fasi.”

Dan Jesus e gi wan agersitori di fiti èn a e tjari kon na krin: „Wan seiker sma ben abi wan figabon di a ben prani na ini en droifi-djari, èn a ben kon soekoe froktoe na a bon, ma a no ben feni no wan. Ne a ben taigi a sma di ben sorgoe gi a droifi-djari: ’Dri jari mi kon kaba foe soekoe froktoe na a figabon disi, ma mi no feni no wan. Koti en trowe! Foe san ede a ben sa teki a gron foe soso ete?’ A ben gi en leki piki: ’Masra, meki a tan a jari disi ete, te leki mi diki wan olo lontoe en èn poti mèst gi en; èn efoe a e gi froktoe na ini a ten di e kon, dan a boen; ma efoe a no de so, dan joe moesoe koti en trowe.’”

Jesus proeberi moro leki dri jari langa foe kweki bribi na a djoe nâsi. Ma soso wan toe hondro disipel a ben kan teri leki froktoe foe en wroko. Now, na ini a di foe fo jari disi foe en diniwroko, a e meki moro moeiti, foe di na agersifasi a e diki wan olo lontoe a djoe figabon, èn e poti mèst na ini, san a e doe foe di a e preiki fajafaja na Judea nanga Perea èn e gi leri na sma. Ma a de foe soso! A nâsi e weigri foe abi berow èn foe dati ede a e froedini foe kisi pori. Soso wan fikapisi foe a nâsi e teki a boskopoe na wan boen fasi.

Sjatoe baka dati Jesus e gi leri na ini wan snoga na wan Sabadei. Drape a e si wan oema di 18 jari kaba en heri skin beni kron, foe di wan ogri jeje e kwinsi en. Na wan sari-atifasi Jesus e taigi en: „Oema, joe kon fri foe joe swakifasi.” Baka dati a e poti en anoe na a oema tapoe èn wantewante na oema e tanapoe leti-opoe èn a e bigin prèise Gado.

Ma a fesiman dinari foe a snoga ati e bron. „Siksi dei de di sma moesoe wroko”, a e gens taki. „Foe dati ede, kon na tapoe den dei dati èn meki den dresi oenoe èn no na wan sabadei.” Nanga disi a dinari e erken taki Jesus abi a makti foe dresi sma, ma a e kroetoe den sma di e kon na a Sabadei foe kon gosontoe!

„Oen hoigriman,” Jesus e piki, „a no ibriwan foe oenoe e loesoe en kaw noso en boeriki foe a pen na sabadei èn e tjari en go foe a dringi watra? A no ben fiti dan, taki na oema disi di de wan oemapikin foe Abraham, èn di Satan, loekoe! tina-aiti jari ben tai hori, ben kon loesoe foe a banti disi na sabadei?”

We, te den sma di ben gens Jesus, jere disi, den e sjen. Ma na ipi sma e prisiri foe ala den prisiri wroko di den ben si Jesus e doe. Dan Jesus e taki ete wan tron toe profeiti agersitori di abi foe doe nanga a Kownoekondre foe Gado, di so wan wán jari pasa kaba a ben froeteri na ini wan boto tapoe a Se foe Galilea. Lukas 13:1-21; Preikiman 9:11; Mateus 13:31-33.

▪ Foe sortoe rampoe den e taki dja, èn sortoe leri Jesus e teki foe disi?

▪ San wi kan leri foe na agersitori foe a figabon di no e gi froktoe èn a moeiti di ben meki foe meki a bon gi froktoe?

▪ Fa a fesiman dinari e erken taki Jesus man dresi sma, ma fa Jesus e tjari a hoigrifasi foe a man kon na krin?