Kapitel 53

Wan tiriman di hei moro libisma èn di ala sma ben sa wani troetroe

TE JESUS e gi den doesoendoesoen sma njanjan na wan wondroe fasi, dan den sma e froewondroe. „Foe troe, disi na a profeiti di ben sa kon na grontapoe”, den e taki. Den e kon na a bosroiti taki Jesus no wawan moesoe de a profeiti di bigi moro Moses, ma taki a ben sa de wan tiriman toe, di ala sma ben sa wani troetroe. Foe dati ede den e meki a plan foe graboe en èn meki en tron kownoe.

Ma Jesus sabi san den sma abi na prakseri foe doe. Dati meki a e handri esi-esi foe sorgoe taki den no meki en tron kownoe nanga tranga. A e seni den ipi sma gowe, èn e komanderi den disipel foe en foe teki a boto foe den, foe drai go baka na Kaperna-um. Baka dati a e go na tapoe a bergi foe begi. A neti dati Jesus de drape en wawan.

Sjatoe bifo dei opo, Jesus e loekoe lontoe foe a hei presi pe a de èn a e si fa wan krakti winti e opo den skwala foe a se go na loktoe. Na ini a leti foe san de pikinmoro foeroe moen, bika Paska de krosibei, Jesus e si taki a boto nanga den disipel foe en, abi boen foeroe moeiti foe pasa den skwala. Den man e lo a boto nanga ala den krakti.

Te Jesus e si disi, dan a e saka foe a bergi èn a e bigin waka na tapoe den skwala foe go pe a boto de. A boto waka so wan feifi te siksi kilometer kaba, te Jesus e doro drape. Ma Jesus e waka go doro neleki a sa waka pasa a boto. Te den disipel e si en, den e bari taki: „Na wan takroe sani!”

Jesus e meki den kon korostoe nanga den wortoe: „Na mi; no frede.”

Ma Petrus e taki: „Masra, efoe na joe, komanderi mi dan foe mi waka na tapoe a watra kon na joe.”

„Kon!”, Jesus e piki.

Ne Petrus e komoto na ini a boto, e waka na tapoe a watra go na Jesus. Ma te Petrus e si fa bigi winti e wai, a e bigin frede, èn te a e bigin soengoe, dan a e bari: „Masra, jepi mi!”

Wantewante Jesus e langa en anoe èn e graboe Petrus hori, ala di a e taki: „Joe di abi pikinso bribi, foe san ede joe bigin tweifri?”

Baka di Petrus nanga Jesus kren go baka na ini a boto, a winti e tapoe foe wai, èn den disipel e froewondroe. Ma te joe loekoe en boen, dan den ben sa moesoe froewondroe? Efoe den ben froestan „san den brede wani taki”, so boen, efoe den ben froestan a bigi wondroe di Jesus ben doe wan toe joeroe pasa, di a ben gi njanjan na doesoendoesoen sma nanga soso feifi brede nanga toe pikin fisi, dan a no ben sa moesoe froewondroe den so, taki Jesus ben man waka na tapoe watra èn ben man komanderi a winti foe tapoe foe wai. Ma now den disipel e gi Jesus grani èn den e taki: „Joe na troetroe a Manpikin foe Gado.”

Sjatoe baka dati, den e doro Genesaret, wan moi lagi presi nanga fatoe gron na Kaperna-um. Drape den e ankra a boto. Ma te den e go na sjoro, sma e si Jesus èn den e waka go na a heri kontren foe go teki den sma di e siki. Te den e tjari den sma disi kon na Jesus na tapoe den bedi foe den èn e fasi soso a franja foe en tapoesei krosi, dan den e kon betre krinkrin.

Disiten, na ipi sma di ben si fa doesoendoesoen sma ben kisi njanjan na wan wondroe fasi, si taki Jesus gowe. Foe dati ede, te pikin boto e kon foe Tiberias, den sma e go na ini den boto disi èn den e go na Kaperna-um foe soekoe Jesus. Te den e feni en, dan den e aksi: „Rabi, o ten joe ben kon djaso?” Jesus e piri-ai gi den, soleki fa wi sa si heri esi. Johanes 6:14-25; Mateus 14:22-36; Markus 6:45-56.

▪ San den sma wani foe doe nanga Jesus, baka di a gi doesoendoesoen sma njanjan na wan wondroe fasi?

▪ San Jesus e si te a de na tapoe a bergi pe a ben go, èn san a e doe baka dati?

▪ Foe san ede den disipel no ben moesoe froewondroe so foe den sani disi?

▪ San e pasa baka di den doro a sjoro?