Kapitel 49

Wan tra preikiwaka na ini Galilea

A DE SO, taki Jesus sa doe en safrisafri now èn taki a sa teki en ten foe doe sani, baka di a preiki fajafaja toe jari kaba? Nôno, na presi foe doe dati a e bradi en preikiwroko go moro fara, foe di a bigin ete wan tra waka, wan di foe dri wan na ini Galilea. A e go na ala den foto nanga ala dorpoe na ini a kontren foe gi sma leri na ini den snoga èn foe preiki a boen njoensoe foe a Kownoekondre. San a e si na a waka disi, e gi en na overtoigi moro leki oiti, taki a de fanowdoe foe doe a preikiwroko nanga moro faja.

Ala presi pe Jesus e go, a e si o tranga a de fanowdoe foe dresi den sma na jejefasi èn foe gi den trowstoe. Den de leki skapoe sondro herder, di sma e foefoeroe èn di sma e drifi den go-kon, èn a abi sari-ati nanga den. A e taigi den disipel foe en: „Ija, a kotiwroko bigi, ma a no foeroe wrokoman de. Aksi a Masra foe a kotiwroko foe dati ede, foe seni wrokoman go doe a kotiwroko.”

Jesus abi na prakseri foe hori wan bigi preikiwaka. A e kari den twarfoe apostel di a ben froekisi pikinmoro wán jari pasa kaba, foe kon na en. A e prati den toe na toe, so taki a e kisi siksi paar preikiman, èn a e leri den sani. A e tjari kon na krin: „No koti a pasi go na den nâsi, èn no go na no wan Samaria foto; ma na presi foe dati, go doronomo na den lasi skapoe foe na oso foe Israèl. Preiki na tapoe oen pasi, èn taki: ’A kownoekondre foe hemel kon krosibei.’”

A Kownoekondre disi di den moesoe preiki, na a Kownoekondre di Jesus ben leri den na ini a modelbegi, foe den begi foe dati. A Kownoekondre kon krosibei na a fasi disi taki Jesus Krestes, a Kownoe di Gado ben poti, ma di no e tiri ete, de drape. Foe meki taki den disipel foe en kan sori taki den na sma di e teki presi gi a tiri disi di hei moro libisma tiri, meki Jesus e gi den a makti foe dresi siki sma èn srefi foe gi dedesma wan opobaka. A e gi den a komando foe doe den wroko disi foe soso.

Moro fara a e taigi den disipel foe en taki den no moesoe sreka materia sani gi a preikiwaka foe den. „No soekoe gowtoe noso solfroe noso kopro gi joe monisaka, noso wan njanjan-saka gi a waka noso toe ondro-krosi, noso sandaal noso wan tiki; bika a wrokoman warti en njanjan.” Den sma di abi warderi gi a boskopoe, sa opo doe wan sani èn nanga den friwani den sa gi njanjan nanga wan presi foe tan. Soleki fa Jesus e taki: „Na sortoe foto noso na sortoe dorpoe oenoe e go toe, ondrosoekoe soema de drape di warti en, èn tan drape te leki oenoe gowe.”

Baka dati Jesus e leri den fa den moesoe taki nanga den ososma foe a Kownoekondre boskopoe. „Te oenoe e go na ini na oso,” na so a e leri den, „taki na osofamiri wan odi; èn efoe na oso warti en, meki a vrede di oenoe e winsi en, kon na en tapoe; ma efoe na oso no warti en, dan meki a vrede foe oenoe drai kon baka na oenoe. Efoe wan sma no teki oenoe na ini en oso noso a no e arki den wortoe foe oenoe, libi na oso dan noso a foto dati, èn seki a doti poeroe foe oen foetoe.”

Jesus e tjari kon na krin, taki a kroetoe di wan foto, di e weigri foe arki a boskopoe foe den, sa kisi, sa de wan hebi kroetoe troetroe. A e froeklari: „Foe troe, mi e taigi oenoe: Na a Kroetoedei a sa de moro makriki gi a kondre foe Sodom nanga Gomora foe tjari, leki gi a foto dati.” Mateus 9:35–10:15; Markus 6:6-12; Lukas 9:1-5.

▪ O ten Jesus e bigin na wan di foe dri preikiwaka na ini Galilea, èn foe sortoe sani a e kon kisi na overtoigi?

▪ Sortoe leri a e gi den twarfoe apostel foe en te a e seni den go foe preiki?

▪ Foe san ede a de wan joisti sani taki den disipel ben e leri taki a Kownoekondre kon krosibei?