1, 2. (a) Fa Jesus ben poti krakti taki a de prenspari foe meki plan? (b) Na tapoe sortoe kontren spesroetoe a de toemoesi prenspari foe meki plan?

FOE bow wan oso e aksi taki sani moesoe sreka finifini. Bifo a fondamenti poti, wan pisi gron moesoe bai fosi èn den tekening moesoe meki. Ma wan tra sani de toemoesi prenspari. Jesus ben taki: „Soema foe oenoe di wani bow wan toren, no e go sidon fosi foe teri den kostoe, foe si efoe a abi nofo foe kaba a wroko?” — Lukas 14:28.

² Den sani di troe foe bow wan oso, e fiti toe efoe wan sma wani bow wan boen trowlibi. Foeroe sma e taki:  „Mi wani trow.” Ma omeni sma e go sidon foe prakseri boen foe den moeiti di moesoe doe? Ala di bijbel e taki boen foe a trowlibi, tokoe a e poti prakseri toe na tapoe den tjalensi di a trowlibi e tjari (Odo 18:22; 1 Korentesma 7:28). Foe dati ede, den sma di e prakseri foe trow, moesoe si san na den troetroe blesi èn den kostoe foe a trowlibi.

3. Foe san ede bijbel na wan warti jepi gi den sma di wani trow, èn sortoe dri aksi a sa jepi wi foe piki?

³ Bijbel kan gi jepi. A Sma di poti a seti foe a trowlibi, Jehovah Gado, ben meki sma skrifi a rai di de na ini bijbel (Efeisesma 3:14, 15; 2 Timoteus 3:16). Te wi e gebroiki den gronprakseri di de foe feni na ini na owroeten boekoe disi, ma tokoe a boekoe di de troetroe gi a ten disi, meki wi kon si (1) Fa wan sma kan kon sabi efoe a de klariklari foe trow? (2) San wi moesoe soekoe na ini wan patna? èn (3) Fa wi kan hori a ten di wi e hori nanga makandra, krin?

4. San na wan toemoesi prenspari penti foe tan hori wan boen trowlibi, èn foe san ede?

⁴ A kan kostoe foeroe moni foe bow wan oso, ma foe sorgoe wan langa ten gi na oso e kostoe foeroe moni toe. A de a srefi nanga a trowlibi. A kan de wan tjalensi kaba foe trow; ma foe tan hori wan matifasi na ini a trowlibi ibri jari baka, na wan sani di wi moesoe prakseri boen foe en toe. San a wani taki foe tan hori so wan matifasi? Wan toemoesi prenspari penti na taki wi moesoe doe wan pramisi nanga wi heri ati. Disi na a fasi fa bijbel e taki foe a matifasi na ini a trowlibi: „Wan man sa gowe libi en papa nanga en mama èn a moesoe tai hori na en wefi èn den moesoe tron wán skin” (Genesis 2:24). Jesus Krestes ben gi a wan-enkri bijbel gron foe brokotrow èn di e gi na okasi foe trow baka — „hoeroedoe”, dati wani taki, seks di no mag dorosei  foe a trowlibi (Mateus 19:9). Efoe joe e prakseri foe trow, hori den bijbel markitiki disi na prakseri. Efoe joe no de klariklari gi a serjoesoe pramisi disi, dan joe no de klariklari foe trow. — Deuteronomium 23:21; Preikiman 5:4, 5.

5. Ala di a serjoesoe pramisi di e doe gi a trow, e frede son sma, foe san ede den wan di wani trow moesoe si en leki wan toemoesi warti sani?

⁵ Na idea foe wan serjoesoe pramisi e frede foeroe sma. „Di mi kon sabi taki wi ala toe ben doe wan pramisi gi wi heri libi langa, dan disi ben meki mi firi leki wan sma ben poesoe mi go na ini wan oekoe, a tapoe mi lontoe, a sroto mi krinkrin”, na so wan jongoe man ben taki. Ma efoe troetroe joe lobi a sma di joe wani trow, dan a pramisi di joe doe, no sa de leki wan hebi. Na presi foe dati, joe sa si en leki wan sani di e gi seikerfasi. A firi di de, taki wan pramisi doe na ini a trowlibi, sa meki taki wan paar sa wani foe tan na makandra na ini boen ten nanga takroe ten èn taki den sa de wan jepi gi makandra awansi san e pasa toe. A kresten apostel Paulus ben skrifi taki troetroe lobi „e froedrage ala sani” èn „e teki ala sani” (1 Korentesma 13:4, 7). „A pramisi di doe na ini a trowlibi e meki mi firi moro seiker”, na so wan oema e taki. „Mi lobi a trowstoe taki wi taigi wisrefi èn na poebliki, taki wi wani tai hori na makandra.” — Preikiman 4:9-12.

6. Foe san ede a moro boen foe no lon go trow te joe jongoe ete?

⁶ Lepifasi de fanowdoe efoe wan sma wani hori ensrefi na so wan pramisi. Foe dati ede, Paulus e gi a rai taki a moro boen efoe kresten no trow te leki den „pasa a bromki foe den jongoe jari”, a pisi ten te den abi tranga seks firi èn di kan fromoe a fasi fa wan sma e teki bosroiti (1 Korentesma 7:36). Jongoesma e kenki heri esi na ini a gro di den e gro. Foeroe sma di trow di den ben jongoe srefisrefi ete, e si baka wan toe jari nomo,  taki den fanowdoe èn den lostoe foe den, èn so srefi di foe a patna foe den, kenki. Nomroe e tjari kon na krin taki tini di e trow, moro foeroe no sa de kolokoe èn den sa wani brokotrow, moro leki den wan di e wakti te den kon moro owroe. So boen, no lon go trow. Te joe e tan libi wan toe jari leki wan jongoe bigisma di no trow, dan a kan gi joe diri ondrofeni di sa meki joe kon moro lepi èn moro bekwaam foe de wan joisti patna. Te joe e wakti foe trow, dan dati kan jepi joe toe foe kon sabi joesrefi moro boen — disi de fanowdoe efoe joe wani kweki wan boen matifasi na ini joe trowlibi.

7. Foe san ede den sma di e meki plan foe go trow, moesoe ondrosoekoe densrefi fosi?

⁷ Joe feni taki a makriki foe kari den eigifasi di joe wani na ini wan patna? Gi moro foeroe sma a de so. Ma fa a de nanga den eigifasi foe joesrefi? Sortoe eigifasi joe abi di sa jepi joe foe meki wan boen trowlibi? Sortoe masra noso wefi joe sa de? Foe eksempre, joe de klariklari foe erken den fowtoe di joe meki èn foe teki rai, noso a de so, taki ala ten joe e strei te sma wani poti joe reti? Joe de wan sma di moro foeroe de nanga prisiri èn di de positief, noso joe na wan sma di e si ala sani doengroe, èn di e kragi foeroe tron? (Odo 8:33; 15:15) Hori na prakseri, taki a trowlibi no sa kenki den eigifasi foe joe. Efoe joe abi bigifasi, e atibron esi, noso e si ala sani toemoesi doengroe te joe no trow ete, dan joe sa de a srefi te joe trow kaba. Foe di a moeilek foe si wisrefi na a fasi fa tra sma e si wi, a no ben sa boen dan foe aksi wan papa noso mama, noso wan mati di wi e froetrow foe taki na wan eerlijk fasi fa den e denki èn foe kon nanga rai? Efoe joe kon sabi taki kenki de di joe ben kan meki, dan joe moesoe wroko na den bifo joe o doe sani foe go trow.

8-10. Sortoe rai bijbel e gi di sa jepi wan sma foe sreka gi a trowlibi?

 ⁸ Bijbel e gi wi a deki-ati foe meki a santa jeje foe Gado wroko na ini wi, foe meki eigifasi soleki „lobi, prisiri, vrede, langa-pasensi, switifasi, boenfasi, bribi, safoefasi, dwengi joesrefi”. A e taigi wi toe foe „meki kon njoen na ini a krakti di e meki [wi] froestan wroko” èn foe „weri a njoen fasi fa wan sma de di ben meki akroederi a wani foe Gado na ini troetroe regtfardikifasi èn loyaalfasi” (Galasiasma 5:22, 23; Efeisesma 4:23, 24). Te joe e gebroiki a rai disi ala di joe no trow ete, dan a sa de neleki te joe e poti moni na bangi — wan sani di sa abi foeroe waarde baka ten, te joe sa trow.

⁹ Foe eksempre, efoe joe na wan oemasma, leri foe poti moro prakseri na tapoe „na inisei sma di kibri na ini na ati” moro leki na tapoe a fasi fa joe e sori na dorosei (1 Petrus 3:3, 4). Besheidenfasi nanga wan gosontoe froestan sa jepi joe foe abi koni, wan troetroe „moi kownoe-ati” (Odo 4:9; 31:10, 30; 1 Timoteus 2:9, 10). Efoe joe na wan mansma, joe moesoe leri foe handri oemasma na wan switi fasi èn nanga lespeki (1 Timoteus 5:1, 2). Ala di joe e leri foe teki bosroiti èn foe man tjari frantiwortoe, leri toe foe de besheiden èn foe abi sakafasi. Efoe joe abi wan fasi foe basi tra sma, dan dati sa tjari trobi kon na ini wan trowlibi. — Odo 29:23; Mika 6:8; Efeisesma 5:28, 29.

¹⁰ Ala di a no makriki foe kenki a denki foe wi na ini den kontren disi, tokoe a de wan sani di ala kresten moesoe wroko na tapoe. Èn a sa jepi joe foe de wan moro boen trowpatna.

11, 12. Fa toe sma kan kon sabi efoe den e fiti na makandra?

¹¹ A de wan gwenti na a presi pe joe e libi, taki wan sma e soekoe en eigi trowpatna? Efoe na so a de, dan san joe moesoe doe efoe joe feni wan boi noso wan  oemapikin moi? Na a fosi presi, aksi joesrefi: ’Mi wani trow troetroe?’ A de wan ogri sani foe prei nanga den firi foe wan tra sma te a e wiki falsi froewakti na a sma dati (Odo 13:12). Baka dati, aksi joesrefi: ’Mi de srekasreka foe go trow?’ Efoe a piki na tapoe ala toe aksi na ija, dan den sani di joe o doe now sa difrenti akroederi a gwenti foe a presi pe joe e tan. Na son kondre, baka te joe loekoe a sma wan pisi ten kaba, joe ben sa kan go na en èn taigi en taki joe wani kon sabi en moro boen. Efoe a sma no wani, no tan aksi en so taki joe o bigin afrontoe en. Hori na prakseri taki a tra sma abi a reti toe foe teki wan bosroiti ini na afersi. Ma efoe a sma taki ija, dan joe kan sreka sani foe pasa ten nanga en na ini gosontoe aktiviteit. Disi sa gi joe wan okasi foe si efoe a ben sa de wan koni sani foe trow nanga a sma disi. * San joe moesoe soekoe te joe doro so fara?

¹² Foe gi piki na tapoe na aksi dati, prakseri foe toe sani foe prei pokoe, kande wan piano nanga wan gitar. Efoe den stèl boen, dan ibriwan foe den kan gi moi pokoe. Ma san e pasa efoe sma e prei den sani disi makandra? We, den moesoe stèl akroederi makandra. Na so a de toe nanga joe èn wan sma di o tron joe patna. Ibriwan foe oenoe wroko tranga kande foe „stèl” den eigifasi foe ibriwan foe oenoe. Ma na aksi de now: Oenoe de akroederi makandra? Nanga tra wortoe, oenoe man fiti oensrefi?

13. Foe san ede a no de wan koni sani srefisrefi foe hori nanga wan sma di no abi a srefi bribi leki joe?

¹³ A de prenspari taki oen ala toe abi a srefi bribi nanga den srefi gronprakseri. Na apostel Paulus ben skrifi: „No kon na ondro wan srefi tjatjari nanga sma di no de na bribi” (2 Korentesma 6:14; 1 Korentesma 7:39). Soleki fa a sori, dan wánfasi no sa de srefisrefi te joe e  trow nanga wan sma di no abi a srefi bribi leki joe na ini Gado. Na a tra sei, a moro steifi fondamenti gi wánfasi na te ala toe sma e gi densrefi na ini a dini foe Jehovah Gado. Jehovah wani taki joe moesoe de kolokoe èn taki joe moesoe njan boen foe a moro krosibei banti di joe kan abi nanga a sma di joe trow. Jehovah wani foe joe tai na En èn na makandra nanga jepi foe wan dri-pisi banti foe lobi. — Preikiman 4:12.

14, 15. Efoe sma abi a srefi bribi, dan dati na a wan-enkri penti foe abi wánfasi na ini a trowlibi? Froeklari dati.

¹⁴ Ala di na anbegi di wi moesoe anbegi Gado makandra, na a moro prenspari afersi foe wánfasi, tokoe moro de ini a tori. Foe de akroederi makandra, joe nanga a sma di o tron joe patna moesoe abi marki di de a srefi. San na den marki foe oenoe? Foe eksempre, fa oenoe ala toe e prakseri foe abi pikin? Sortoe sani e teki a fosi presi na ini oen libi? * (Mateus 6:33) Na ini wan trowlibi di boen troetroe, den patna na boen mati èn den lobi foe de nanga makandra (Odo 17:17). Foe meki a de so, den moesoe abi belangstelling gi sani di de a srefi. A moeilek foe tan hori wan krosibei matifasi — èn srefi moro moeilek na ini wan trowlibi — te den no abi belangstelling gi sani di de a srefi. Ma tokoe, efoe a sma di o tron joe patna lobi foe doe wan bepaalde sani, soleki koiri, èn joe no lobi dati, a wani taki dan dati oenoe no moesoe trow nanga makandra? A no abi foe de so. Kande tra moro prenspari sani de di oenoe ala toe lobi. Boiti dati, joe ben sa kan gi a sma di o tron joe patna kolokoe, te joe e teki prati na gosontoe aktiviteit, bika a tra sma e prisiri nanga den. — Tori foe den Apostel 20:35.

 ¹⁵ Ija, a de moro foeroe so, taki a fiti di oenoe sa fiti na makandra, e anga foe o foeroe oen ala toe man fiti oensrefi, na presi foe o foeroe oenoe gersi makandra. Na presi foe aksi: „Wi e agri na ini ala sani”, wan toe moro betre aksi ben sa kan de: „San e pasa te wi no e agri nanga makandra? Wi kan taki nanga makandra foe afersi na wan bedari fasi, akroederi a lespeki nanga wartifasi foe makandra? Noso a de so, taki takimakandra foeroe tron e kon tron fajafaja kesekese?” (Efeisesma 4:29, 31) Efoe joe wani trow, loekoe boen nanga wan sma di abi bigifasi èn di e tan hori en eigi denki nomo, di noiti wani gi abra, noso wan sma di e aksi toemoesi foeroe èn e meki plan nomo foe kisi san a wani.

16, 17. San wan man noso wan oema moesoe soekoe te a e prakseri foe wan sma di o tron en trowpatna?

¹⁶ Na ini a kresten gemeente, den wan di kisi frantiwortoe moesoe „tesi fosi foe si efoe den bekwaam” (1 Timoteus 3:10). Joe toe kan gebroiki a gronprakseri disi. Foe eksempre, wan oema di no trow ben sa kan aksi: „Sortoe nen a man disi abi? Soema na den mati foe en? A sabi fa foe dwengi ensrefi? Fa a e handri nanga owroesma? San na a background foe a famiri foe en? Fa en de nanga den famiri foe en? Fa a e denki foe moni? A e gebroiki sopi na wan fasi di no boen? A e atibron esi, noso e doe ogri nanga tranga srefi? Sortoe frantiwortoe a abi na ini a gemeente, èn fa a e doe den? Mi ben kan abi dipi lespeki gi en?” — Lefitikus 19:32; Odo 22:29; 31:23; Efeisesma 5:3-5, 33; 1 Timoteus 5:8; 6:10; Titus 2:6, 7.

¹⁷ Wan mansma di no trow ben sa kan aksi: „Na oema disi e sori lobi nanga lespeki gi Gado? A man sorgoe gi wan oso? San en famiri sa froewakti foe wi? A koni, a lobi wroko, a no e froemorsoe? Foe san a e taki? A abi  troetroe belangstelling gi a boen foe tra sma, noso a e prakseri ensrefi nomo, èn a de wan sma di e boemoei nanga sma tori? A de foe froetrow? A wani foe saka ensrefi na ondro na edeman-wroko, noso a tranga-ede, kande e meki oproeroe srefi?” — Odo 31:10-31; Lukas 6:45; Efeisesma 5:22, 23; 1 Timoteus 5:13; 1 Petrus 4:15.

18. Efoe joe e kon si pikin swakifasi na a ten di oenoe e hori nanga makandra, san joe moesoe hori na prakseri?

¹⁸ No frigiti taki joe abi foe doe nanga wan onvolmaakti bakapikin foe Adam, no nanga wan barinen man noso wan barinen oema foe wan tori na ini wan boekoe. Ibri sma abi swakifasi, èn wi sa abi foe loekoe pasa wan toe foe den sani disi — den di foe joe nanga di foe a sma di o tron joe patna (Romesma 3:23; Jakobus 3:2). Boiti dati, wan swakifasi di joe kon si, kan gi joe na okasi foe gro. Foe eksempre, kon meki wi taki dati na ini a ten di oenoe e hori nanga makandra, oenoe abi wan kesekese. Prakseri: Srefi sma di lobi èn e lespeki makandra, no e agri nanga makandra son tron. (Teki gersi Genesis 30:2; Tori foe den Apostel 15:39.) A ben kan de so, taki oen ala toe moesoe ’dwengi oen firi’ pikinso moro èn moesoe leri fa foe seti den afersi na wan moro vrede fasi? (Odo 25:28) A sma di o tron joe patna e sori taki a wani go na fesi? Joe wani dati toe? Joe ben kan leri foe no span so foeroe nanga sani, èn no atibron so esi? (Preikiman 7:9) Te joe e leri foe loesoe den problema, dan dati kan seti wan gwenti foe eerlijk komunikâsi, di de toemoesi prenspari efoe oenoe wani foe go trow. — Kolosesma 3:13.

19. San ben sa de wan koni sani foe doe, efoe serjoesoe problema e kon na doro na a ten di oenoe e hori nanga makandra?

¹⁹ Ma fa a de te joe si sani di de wan bigi problema gi joe? Joe moesoe ondrosoekoe den sortoe tweifri disi heri boen. Awansi omeni lobi joe abi noso awansi o  fajafaja joe de foe trow, no tapoe joe ai gi serjoesoe fowtoe (Odo 22:3; Preikiman 2:14). Efoe joe abi wan matifasi nanga wan sma di joe abi serjoesoe tweifri foe en, dan a de wan koni sani foe no go doro nanga a matifasi èn foe no doe wan pramisi na a sma dati foe wan langa ten.

20. Fa wan paar di e hori nanga makandra, kan sorgoe taki sjen no e kon tapoe a fasi fa den e tjari densrefi na a sei foe boen gwenti nanga wet?

²⁰ Fa joe kan hori a ten di oenoe e hori nanga makandra, krin? Na a fosi presi, sorgoe taki no wan sjen e kon na a fasi fa joe e tjari joesrefi ini a tori foe boen gwenti nanga wet. A de wan sani di e fiti na ini a birti pe joe e libi, taki wan paar di no trow ete, e hori anoe, e bosi, noso e brasa? Srefi efoe sma no e hari den fesi gi den sortoe fasi disi foe sori lobi, tokoe joe moesoe gi pasi foe dati soso te a matifasi doro a momenti taki oenoe meki plan troetroe foe trow. Loekoe boen taki den fasi foe sori lobi no e go so fara taki oenoe e tjari oensrefi na wan fasi di no krin noso srefi hoeroedoe. (Efeisesma 4:18, 19; teki gersi Heisingi 1:2; 2:6; 8:5, 9, 10.) Bika na ati abi trikifasi, oen ala toe ben sa koni efoe oenoe no ben sa de oen wawan na ini wan oso, wan kamra, wan oto di parkeer, noso iniwan presi di ben sa gi okasi foe tjari oensrefi na wan fowtoe fasi (Jeremia 17:9). Te joe e hori a ten di oenoe e hori nanga makandra, krin na a sei foe boen gwenti nanga wet, dan dati e sori krin taki joe man dwengi joesrefi èn taki joe abi a boen foe a trawan na prakseri, moro leki joe eigi lostoe. A moro prenspari sani, na taki te a ten di oenoe e hori nanga makandra de krin, dan dati sa plisi Jehovah Gado di e komanderi den foetoeboi foe en foe  tan fara foe sani di no krin èn foe hoeroedoe. — Galasiasma 5:19-21.

21. Sortoe eerlijk komunikâsi kan de fanowdoe foe hori a ten di wi meki mofo, krin?

²¹ A di foe toe, a de fanowdoe toe taki wan eerlijk komunikâsi moesoe de foe meki a ten di oenoe e hori nanga makandra, de krin. Te a ten di oenoe e hori nanga makandra e doro so fara taki oenoe o trow, dan a sa de fanowdoe foe taki eerlijk foe wan toe afersi. Pe oenoe sa tan? Oen ala toe sa doe grontapoe wroko? Oenoe wani abi pikin? A de eerlijk toe foe tjari sani kon na krin di ben pasa na ini wan sma libi èn di ben kan abi krakti na tapoe a trowlibi. Disi kan de bigi paiman noso plekti noso gosontoe afersi, soleki wan serjoesoe siki noso wan swaki fasi di joe kan abi. Foe di a no de wantewante foe si na foeroe sma taki den abi HIV (a virus di e gi AIDS), a no ben sa fowtoe efoe wan sma noso efoe a papa nanga mama di broko den ede gi en, e aksi wan sma di ben libi wan jajo sekslibi bifo noso ben gebroiki drug nanga wan nanai, meki a go ondrosoekoe en broedoe foe si efoe a abi AIDS. Efoe na ondrosoekoe e sori taki a sma abi AIDS, dan a sma disi no moesoe dwengi a patna di ben o trow nanga en, foe go doro nanga a matifasi disi, efoe a sma dati wani foe broko a matifasi. Foe troe, ibri sma di libi na wan fasi di kan meki a kisi AIDS, ben sa doe boen foe go foe ensrefi foe ondrosoekoe en broedoe foe si efoe a abi AIDS, bifo a bigin hori nanga wan sma.

22, 23. (a) Fa wan sma ben kan lasi en balansi fasi foe si sani, te a e sreka gi wan trowdei? (b) Sortoe balansi fasi foe si sani wi moesoe tan abi te wi e prakseri foe a trowdei èn a trowlibi?

²² Na ini den lasti moen bifo a trow, dan soleki fa a sori, oenoe ala toe sa abi foeroe foe doe foe sreka sani gi a trowdei. Joe kan poeroe foeroe foe a druk te joe de  besheiden. Wan trowdei di abi foeroe pranpran kan plisi joe famiri nanga joe birtisma, ma a kan meki taki den sma di trow èn den famiri foe den, weri toemoesi èn a kan meki den kon swaki na monisei. A reidelek foe hori wisrefi na wan toe gwenti foe a presi pe wi e libi, ma te wi de na ini katibo foe den gwenti èn kande wi e strei nanga trawan, dan dati kan meki a no de krin foe si san na okasi wani taki èn a kan poeroe a prisiri di joe moesoe abi. Ala di wi moesoe hori den firi foe tra sma na prakseri, tokoe a trowmasra abi a moro bigi frantiwortoe foe bosroiti san o pasa na a trowfesa. — Johanes 2:9.

²³ Hori na prakseri taki a trowdei foe joe de gi wán dei nomo, ma joe trowlibi e tan joe heri libi langa. Loekoe boen foe no poti toemoesi foeroe prakseri na tapoe a trowdei. Na presi foe dati, meki Jehovah tiri joe, èn meki plan na fesi gi wan trowlibi. Dan joe sa sreka boen gi wan boen trowlibi.