1, 2. (a) Sortoe agersitori Jesus ben gi foe tjari kon na fesi taki den djoe relisi fesiman no ben de getrow? (b) Sortoe penti di abi foe doe nanga den tini, wi kan leri foe na agersitori foe Jesus?

WAN toe dei bifo a dede foe en, Jesus ben aksi wan groepoe foe djoe relisi fesiman wan aksi di ben moesoe meki den denki. A ben taki: „San oenoe e prakseri? Wan mansma ben abi toe pikin. A ben go na a fosiwan èn ben taki: ’Mi pikin, go wroko na ini a droifi-djari tide.’ A wan disi ben piki: ’Mi o go, masra’, ma a no ben go. Ne a ben go na a di foe toe wan èn a ben taki a srefi sani. A wan disi ben piki: ’Mi no wani.’ Baka ten, en ati ben sari èn a ben go. Sortoe wan foe den toe ben doe a wani foe en  papa?” Den djoe fesiman ben piki: „A lastiwan.” — Mateus 21:28-31.

² Djaso Jesus ben tjari kon na fesi taki den djoe fesiman no ben de getrow. Den ben de leki a fosi manpikin, foe di den ben e pramisi foe doe a wani foe Gado èn dan den no ben e hori densrefi na a pramisi foe den. Ma foeroe papa nanga mama sa kon froestan taki na agersitori foe Jesus ben gron na tapoe a froestan di a ben froestan heri boen fa na osofamiri libi de. Soleki fa Jesus ben sori heri boen, nofo tron a moeilek foe sabi san jongoe sma e denki noso foe taki na fesi san den sa doe. Wan jongoe sma kan meki foeroe problema kon na ini en tini jari, èn baka dati, a e tron wan bigisma di sabi en frantiwortoe èn di sma e lespeki. Disi na wan sani di wi moesoe hori na prakseri te wi e taki foe a problema foe tini di e meki oproeroe.

3. Foe san ede papa nanga mama no moesoe de esi foe taki dati a pikin foe den na wan oproeroe pikin?

³ Wanwan leisi joe e jere kande foe tini di e meki oproeroe langalanga nanga den papa nanga mama foe den. Kande joesrefi sabi wan osofamiri di abi wan tini di gersi taki den no man basi en srefisrefi. Ma a no ala ten a makriki foe kon sabi efoe wan pikin troetroe na wan oproeroeman. Boiti dati, a kan de wan moeilek sani foe froestan foe san ede wan toe pikin e meki oproeroe èn trawan — di de foe a srefi osofamiri srefi — no e meki oproeroe. Efoe papa nanga mama e denki taki wán foe den pikin foe den kande e tron wan krinkrin oproeroeman, san den moesoe doe dan? Foe gi piki na tapoe disi, wi moesoe taki fosi san na wan oproeroeman.

4-6. (a) San na wan oproeroeman? (b) San papa nanga mama moesoe hori na prakseri efoe a tini foe den no e gi jesi wanwan leisi?

⁴ Foe taki en makriki, wan oproeroeman na wan sma di foe espresi èn doronomo e trangajesi noso e kakafoetoe gi èn e feti nanga wan moro hei makti. A no de foe taki, dati ’donfasi de na ini na ati foe wan pikin’ (Odo 22:15). So boen, ala pikin e kakafoetoe wanwan leisi gi a makti foe den  papa nanga mama èn gi tra makti. Disi de spesroetoe so na ini a ten te den e gro na skin sei èn na emotioneel sei, di wi sabi leki den tini jari. Wan kenki na ini a libi foe ibri sma sa tjari stress kon, èn den tini jari na wan ten pe foeroe kenki e feni presi. A tini manpikin noso oemapikin foe joe e go foe pikin-nengreten tron bigisma. Foe a sani disi ede, meki na ini a ten foe den tini jari, wan toe papa nanga mama nanga den pikin abi wan moeilek ten foe feni en nanga makandra. Nofo tron, sondro foe den papa nanga mama e prakseri na fesi, den e proeberi foe meki a kenki di den pikin e kenki no go esi, ala di den tini wani meki a kenki go moro esi.

⁵ Wan tini di de wan oproeroeman, e weigri foe teki den markitiki foe en papa nanga mama. Ma hori na prakseri, taki den wan toe leisi te wan pikin e trangajesi, dati no e meki a pikin de wan oproeroeman. Èn te a abi foe doe nanga jeje afersi, a kan taki na ini a bigin wan toe pikin e sori pikinso belangstelling noso no wan belangstelling gi a waarheid foe bijbel, ma a no abi foe de so, taki den de oproeroeman. Joe leki wan papa noso mama, no moesoe de esi foe taki sortoe pikin a pikin foe joe de.

⁶ A de so, taki den tini jari foe ala jongoesma abi leki marki taki den e meki oproeroe nanga a makti foe den papa nanga mama? Kwetikweti. Ija, den boeweisi ben sa sori taki soso wan pikin groepoe foe den tini e meki oproeroe na wan serjoesoe fasi. Ma fa a de nanga wan pikin di e meki oproeroe doronomo na wan tranga-ede fasi? Sortoe sani ben sa kan poesoe en foe meki oproeroe?

7. Fa a libimakandra di de na ondro a makti foe Satan, kan abi krakti na tapoe wan pikin so taki a sa meki oproeroe?

⁷ Wan moro prenspari sani di e meki den pikin e meki oproeroe, na a libimakandra foe a grontapoe disi di de na ondro a makti foe Satan. „Heri grontapoe e didon na ini a makti foe na ogriwan” (1 Johanes 5:19). A grontapoe di de na ondro a makti foe Satan meki wan libimakandra di e  doe ogri, nanga san kresten abi foe feti (Johanes 17:15). Foeroe foe a libimakandra dati moro grofoe, moro kefalek, èn a foeroe nanga moro takroe krakti leki na ini a ten di pasa (2 Timoteus 3:1-5, 13). Efoe papa nanga mama no e leri den pikin foe den, no e warskow den, èn no e kibri den, dan na wan makriki fasi „a jeje di e wroko now na ini den manpikin foe trangajesi” kan basi den jongoewan (Efeisesma 2:2). A druk foe den speri foe den abi foe doe nanga disi. Bijbel e taki: „En di e boemoei nanga donwan, a no sa waka boen nanga en” (Odo 13:20). Na so a de toe, taki a sma di abi demakandra nanga den wan di abi a jeje foe a grontapoe disi, pikinmoro seiker a jeje dati sa abi krakti na en tapoe. Jongoewan abi doronomo jepi fanowdoe efoe den moesoe froestan taki, te den e gi jesi na den gronprakseri foe Gado, dan dati na a fondamenti foe a moro boen fasi foe libi. — Jesaja 48:17, 18.

8. San na den sani di ben sa kan meki taki wan pikin e meki oproeroe?

⁸ Wan tra sani di e meki den pikin e meki oproeroe, ben sa kan de a situwâsi na ini na oso. Foe eksempre, efoe a papa noso a mama na wan sopiman, e gebroiki drug na wan fowtoe fasi, noso e doe ogri nanga tranga na a patna, dan a fasi fa a tini e si a libi kan kon kroektoe. Srefi na ini oso pe broeja no de te joe teki den gersi tra oso, wan pikin kan meki oproeroe te a e feni taki en papa nanga mama no abi belangstelling gi en. Ma na oproeroe di tini e oproeroe, no e kon ala ten foe krakti di e kon foe dorosei. Wan toe pikin e drai den baka gi den markitiki foe den papa nanga mama ala di den abi papa nanga mama di e gebroiki den gronprakseri foe Gado èn di e kibri den gi wan bigi pisi foe a grontapoe di de lontoe den. Foe san ede? Kande bika foe wan tra roetoe foe den problema foe wi — na onvolmaaktifasi foe libisma. Paulus ben taki: „Sondoe ben kon ini grontapoe nanga jepi foe wán man [Adam] èn nanga sondoe dede, èn na so fasi dede panja go na ala sma, bika den alamala ben sondoe” (Romesma 5:12). Adam ben de wan oproeroeman di ben prakseri en eigi boen nomo,  èn a ben libi wan takroe sani na baka gi ala den pikin foe en. Son jongoewan e froekisi foe meki oproeroe, neleki fa a fositen tata foe den ben doe.

9. Sortoe toe fasi fa wan pikin kan kweki pasa marki, ben sa kan poesoe wan pikin foe meki oproeroe?

⁹ Wan tra sani di meki taki tini e oproeroe, na a fasi fa a papa nanga mama e si a kweki foe wan pikin na wan fasi di no de ini balansi (Kolosesma 3:21). Wan toe opregti papa nanga mama e skotoe den pikin foe den toemoesi èn e gi den tranga leri na wan toemoesi strak fasi. Trawan e gi den pikin toemoesi foeroe primisi, foe di den no e gi den tirilin di ben sa kibri den tini foe den di no abi ondrofeni. A no ala ten a makriki foe hori wan balansi fasi na mindri den toe sani disi di e go pasa marki. Èn difrenti pikin abi difrenti sani fanowdoe. Kande a wan abi moro tiri fanowdoe leki wan trawan. Ma toe bijbel eksempre sa jepi foe sori den kefar foe skotoe den pikin toemoesi noso foe gi den toemoesi foeroe primisi.

10. Foe san ede Eli ben de wan swaki papa, ala di soleki fa a sori, a ben de wan getrow heipriester?

¹⁰ A fositen heipriester foe Israèl, Eli, ben de wan papa. A ben dini 40 jari langa, èn sondro tweifri, a ben sabi a Wet foe Gado heri boen. Soleki fa a sori, Eli ben doe den priester wroko foe en di a ben moesoe doe ibri dei, na wan getrow fasi èn kande a leri den manpikin foe en, Hofni nanga Pinehas, a Wet foe Gado finifini toe. Ma Eli ben gi den manpikin foe en toemoesi foeroe primisi. Hofni nanga Pinehas ben dini leki priester di ben poti na wroko, ma den ben de „man di no ben warti noti”, di ben abi belangstelling soso foe satisferi a tranga lostoe foe den foe doe sani di de teige boen gwenti nanga wet. Ma di den ben doe tegoe sani na tapoe santa gron, Eli no ben abi a deki-ati foe poeroe den leki priester di ben poti na wroko. A ben piri-ai gi den na wan swaki fasi nomo. Foe di Eli ben gi toemoesi foeroe primisi, a ben sori moro grani gi den manpikin  foe en leki gi Gado. Leki wan bakapisi foe dati, den manpikin foe en ben oproeroe nanga a krin anbegi foe Jehovah èn a heri osofamiri foe Eli ben ondrofeni rampoe. — 1 Samuèl 2:12-17, 22-25, 29; 3:13, 14; 4:11-22.

11. San papa nanga mama kan leri foe a fowtoe eksempre foe Eli?

¹¹ Den pikin foe Eli ben de bigisma kaba di den sani disi ben feni presi, ma a tori disi e poti krakti na tapoe a kefar di de te tranga leri no gi. (Teki gersi Odo 29:21.) Kande son papa nanga mama e broeja lobi nanga a gi di den e gi toemoesi foeroe primisi, foe di den no e poti wet; wet di de krin foe froestan, di no e kenki, di de reidelek, èn foe di den no e sorgoe taki den pikin e hori densrefi na den wet disi. Den no e gi tranga leri na wan lobi fasi, srefi te den pikin e pasa den gronprakseri foe Gado. Bika den papa nanga mama e gi toemoesi foeroe primisi, a kan taki den pikin foe den no sa poti prakseri na tapoe a makti foe den noso na wan tra sortoe makti. — Teki gersi Preikiman 8:11.

12. Sortoe fowtoe Rehabeam ben meki na a fasi fa a ben gebroiki makti?

¹² Rehabeam gi na eksempre foe a tra fasi fa sma e gebroiki makti na wan toemoesi aparti fasi. A ben de a lasti kownoe foe a kownoekondre foe Israèl di ben de wán, ma a no ben de wan boen kownoe. Rehabeam ben kisi wan kondre leki erfenis èn den sma foe a kondre no ben prisiri srefisrefi, bika a papa foe en, Salomo, ben poti hebi na den tapoe. Rehabeam ben sori taki a e froestan den? Nôno. Di wan groepoe foe den sma ben aksi en foe poeroe wan toe foe den wet di ben kwinsi den, a no ben gi jesi na a koni rai foe den moro owroe raiman foe en èn a ben gi a komando taki a tjatjari foe a pipel ben moesoe meki kon moro hebi. A heimemre fasi foe en ben meki taki den tin lo foe noordsei ben meki oproeroe, èn a kownoekondre ben priti na ini toe pisi. — 1 Kownoe 12:1-21; 2 Kroniki 10:19.

13. San papa nanga mama kan doe foe no meki a fowtoe foe Rehabeam?

¹³ Papa nanga mama kan leri wan toe prenspari lès foe a bijbel tori foe Rehabeam. Den moesoe „soekoe Jehovah”  na ini begi èn den moesoe ondrosoekoe a fasi fa den e kweki den pikin nanga gronprakseri foe bijbel na prakseri (Psalm 105:4). „Soso a kwinsi di den e kwinsi wan koniwan, kan meki a handri na wan law fasi”, na so Preikiman 7:7 e taki. Te den papa nanga mama e gi tirilin di den ben prakseri heri boen foe den, dan dati e gi den tini na okasi foe gro èn na a srefi ten a e kibri den gi ogri. Ma den pikin no moesoe libi na ini wan situwâsi di de so strak èn di e kwinsi den, taki dati e tapoe den foe kweki wan reidelek marki foe froetrow na ini den sani di den man doe èn foe abi froetrow na ini densrefi. Te papa nanga mama e doe moeiti foe abi wan balansi na mindri a fri di den e gi den pikin èn den steifi skotoe di den e poti na wan krin fasi, dan moro foeroe foe den tini no sa wani foe meki oproeroe.

14, 15. Fa papa nanga mama moesoe si a gro di a pikin foe den e gro?

¹⁴ Ala di papa nanga mama e prisiri foe si taki den jongoewan foe den e gro foe beibi kon tron wan bigisma na  skin sei, tokoe den kan firi broeja te a tini pikin foe den e bigin kenki foe wan sma di abi den fanowdoe, kon tron wan sma di abi froetrow ini den sani di ensrefi man doe now, na wan fasi di fiti. Na ini a pisi ten disi pe sani e kenki, no froewondroe efoe wanwan leisi a tini foe joe tranga-ede noso efoe a no e wroko makandra nanga joe. Hori na prakseri taki a marki foe kresten papa nanga mama moesoe de foe kweki wan kresten di lepi, di no e degedege èn di sabi en frantiwortoe. — Teki gersi 1 Korentesma 13:11; Efeisesma 4:13, 14.

¹⁵ Awansi o moeilek a kan de, tokoe papa nanga mama moesoe tapoe nanga a gwenti di den abi foe piki negatief na tapoe ala sani di a tini foe den e aksi foe kisi moro srefidensi. Na wan boen fasi, wan pikin moesoe gro leki wan sma. Ija, na ini den jongoe jari kaba, son tini e bigin si sani na a fasi fa bigisma e si sani. Foe eksempre, bijbel e taki  foe a jongoe Kownoe Josia: „Ala di a ben de wan boi ete [foe so wan 15 jari], a ben bigin foe soekoe a Gado foe David.” A ben de krin taki a toemoesi aparti tini disi ben de wan sma di sabi en frantiwortoe. — 2 Kroniki 34:1-3.

16. Te den pikin e kisi moro frantiwortoe, san den moesoe froestan?

¹⁶ Ma fri e tjari frantiwortoe kon. Foe dati ede, gi a pikin foe joe di tron wan bigisma na okasi foe ondrofeni den bakapisi foe wan toe foe den bosroiti foe en èn foe den sani di a e doe. A gronprakseri, „san wan sma e sai, na dati a sa koti toe”, e fiti gi tini èn so srefi gi bigisma (Galasiasma 6:7). Oenoe no kan kibri den pikin foe ala ten. Ma fa a de te a pikin foe joe wani doe wan sani di joe no kan feni boen srefisrefi? Leki wan papa noso mama di sabi en frantiwortoe, joe moesoe taki „nôno”. Èn ala di joe kan froeklari foe san ede joe piki na so wan fasi, tokoe noti moesoe kenki a taki di joe taki „nôno”, kon tron „ija”. (Teki gersi Mateus 5:37.) Ma proeberi tokoe foe taki „nôno” na wan bedari fasi èn na wan reidelek fasi, foe di „wan piki di safoe e kowroe atibron”. — Odo 15:1.

17. San na wan toe sani di wan tini abi fanowdoe èn di wan papa noso mama moesoe sorgoe gi?

¹⁷ Jongoewan abi a seikerfasi fanowdoe di den e kisi foe tranga leri di gi doronomo, srefi efoe a no ala ten den e agri wantewante nanga den skotoe èn den wet. A de wan froeferi sani efoe ibri tron baka den wet e kenki akroederi a fasi fa wan papa noso mama e firi na a momenti dati. Boiti dati, efoe den tini e kisi deki-ati nanga jepi, na a fasi fa den abi en fanowdoe, foe man kakafoetoe gi a froetrow di den no e froetrow na ini densrefi noso gi sjen, dan a kan taki den sa gro leki sma di no e degedege. Den tini e warderi en toe te a papa nanga mama foe den e froetrow den foe di den froedini dati. — Teki gersi Jesaja 35:3, 4; Lukas 16:10; 19:17.

18. San na wan toe troetori di e gi deki-ati èn di abi foe doe nanga tini?

¹⁸ Papa nanga mama kan feni trowstoe foe sabi taki te vrede de, te degedege no de èn te lobi de na ini na osofamiri, dan moro foeroe a de so, taki a sa go boen nanga den  pikin (Efeisesma 4:31, 32; Jakobus 3:17, 18). Ija, foeroe jongoewan gro pasa srefi wan takroe situwâsi na oso èn den gro kon tron heri boen bigisma, ala di den kon foe osofamiri di abi sopiman, pe ogri e doe nanga tranga, noso di abi tra sani di abi wan takroe krakti na den tapoe. Foe dati ede, efoe oenoe e sorgoe gi wan oso pe den tini foe oenoe e firi densrefi seiker èn den sabi taki den sa kisi lobi, waran-ati èn taki sma sa poti prakseri na den tapoe — srefi efoe a jepi dati de makandra nanga reidelek skotoe nanga tranga leri di de akroederi bijbel gronprakseri — dan a kan de moro foeroe so, taki den sa gro tron bigisma gi soema oenoe sa prodo. — Teki gersi Odo 27:11.

19. Ala di den papa nanga mama moesoe leri wan boi a pasi di a moesoe go, sortoe frantiwortoe e didon na tapoe a pikin?

¹⁹ A e jepi troetroe efoe papa nanga mama e kweki den pikin na wan boen fasi. Odo 22:6 e taki: „Leri wan boi akroederi a pasi foe en; srefi te a kon owroe, a no sa drai baka foe en.” Ma fa a de nanga pikin di abi serjoesoe problema ala di den abi boen papa nanga mama? Disi na wan sani di kan? Ija. Wi moesoe froestan den wortoe foe na odo nanga tra tekst na prakseri di e poti krakti na tapoe a frantiwortoe foe a pikin foe „arki” en papa nanga mama èn foe gi jesi na den (Odo 1:8). A papa nanga a mama nanga a pikin moesoe wroko makandra foe gebroiki den bijbel gronprakseri efoe den wani meki wánfasi de na ini na osofamiri. Efoe papa nanga mama nanga den pikin no e wroko makandra, dan problema sa de.

20. Te pikin e meki fowtoe foe di den no ben denki, san ben sa de wan koni fasi fa den papa nanga mama moesoe handri?

²⁰ Fa papa nanga mama moesoe handri te wan tini e meki fowtoe èn e kon na ini problema? Spesroetoe na a ten dati, a jongoewan abi jepi fanowdoe. Efoe a papa nanga mama e hori na prakseri taki den abi foe doe nanga wan jongoewan di no abi ondrofeni, dan a sa de moro makriki gi den foe kakafoetoe gi a firi foe handri pasa marki. Paulus ben gi den lepi sma na ini a gemeente a rai: „Srefi  efoe wan sma e meki wan fowtoe stap bifo a sabi dati, dan oenoe di abi jejefasi, proeberi ini wan jeje foe safrifasi foe meki so wan sma kon boen baka” (Galasiasma 6:1). Papa nanga mama kan waka na baka a srefi fasi disi te den abi foe doe nanga wan jongoe sma di doe wan fowtoe sani bika a no ben denki. Ala di a papa nanga mama moesoe tjari kon na krin foe san ede a fasi disi fa a jongoewan ben tjari ensrefi ben fowtoe èn san a kan doe foe no meki a srefi fowtoe disi baka, tokoe a papa nanga mama moesoe meki a de krin taki a fasi fa a jongoewan ben tjari ensrefi, de takroe, a no a jongoewan takroe. — Teki gersi Judas 22, 23.

21. Fa papa nanga mama moesoe handri efoe den pikin foe den e doe wan serjoesoe sondoe, efoe den wani waka baka na eksempre foe a kresten gemeente?

²¹ Ma fa a de te na ogri di a jongoewan doe, de serjoesoe srefisrefi? Na ini a kefal dati, a pikin abi spesroetoe jepi nanga koni tiri fanowdoe. Te wan memre foe a gemeente e doe wan serjoesoe sondoe, dan a e kisi a deki-ati foe abi berow èn foe go na den owroeman foe soekoe jepi (Jakobus 5:14-16). Te a abi berow, dan den owroeman e wroko nanga en foe meki a kon boen baka na jejefasi. Na ini na osofamiri, a de a frantiwortoe foe a papa nanga mama foe jepi a tini di meki wan fowtoe, ala di kande a papa nanga mama wani foe taki foe na afersi nanga den owroeman. Den no moesoe proeberi srefisrefi foe kibri iniwan serjoesoe sondoe di wan foe den pikin foe den ben doe, gi a skin foe owroeman.

22. Sortoe fasi den papa nanga mama sa proeberi foe tan abi te a pikin foe den e doe wan serjoesoe fowtoe, efoe den wani waka baka na eksempre foe Jehovah?

²² Wan serjoesoe problema di abi foe doe nanga den eigi pikin foe wan sma, na wan hebi tesi. Foe di den papa nanga mama broeja na emotioneel sei, a kan taki den e firi foe pramisi a trangajesi pikin na ini atibron, foe doe en ogri; ma disi ben sa kan meki a pikin kisi bita-ati nomo. Hori na prakseri taki a tamara foe a jongoe sma disi e  anga foe a fasi fa sma e handri nanga en na ini a toemoesi moeilek ten disi. Hori na prakseri toe taki Jehovah ben de klariklari foe gi en pipel pardon di den ben drifi gowe foe san ben boen — efoe den ben sa abi berow nomo. Arki na den wortoe foe en di a taki na wan lobi fasi: „’Kon now oen pipel, èn meki wi poti afersi kon reti na wi mindri’, na so Jehovah e taki. ’Awansi den sondoe foe oenoe ben sa de leki redi kloroe, tokoe den sa kon weti neleki snew; awansi den ben sa redi leki redilaken, den sa tron srefi leki katoen’” (Jesaja 1:18). Disi na troetroe wan toemoesi moi eksempre gi papa nanga mama!

23. Fa a papa nanga mama moesoe handri te wan foe den pikin foe den doe wan serjoesoe sondoe, èn san den no moesoe doe?

²³ Foe dati ede, proeberi foe gi a trangajesi pikin a deki-ati foe kenki a pasi foe en. Soekoe boen rai na papa nanga mama di abi ondrofeni èn na den gemeente owroeman (Odo 11:14). Proeberi foe no handri esi na tapoe den firi foe joe èn no taki noso doe sani di ben sa meki a de moeilek gi a pikin foe joe foe drai kon baka na joe. No kisi atibron nanga bitafasi di joe no man basi (Kolosesma 3:8). No gi abra esi (1 Korentesma 13:4, 7). Ala di joe no wani si takroe na ai, tokoe joe no moesoe de sondro firi gi a pikin foe joe èn no sori bita-ati gi en. Moro prenspari, papa nanga mama moesoe doe moeiti foe gi wan toemoesi boen eksempre èn foe hori a bribi foe den tranga na ini Gado.

24. Sortoe sari situwâsi de son tron na ini wan kresten osofamiri, èn fa wan papa noso wan mama moesoe handri?

²⁴ Na ini wan toe kefal a de krin foe si, taki wan jongoewan teki wan fasti bosroiti foe meki oproeroe èn foe trowe den kresten markitiki krinkrin. Dan joe moesoe poti prakseri foe hori noso foe bow na osofamiri libi foe den tra pikin baka. Loekoe boen foe no gi ala joe krakti na a oproeroeman, so taki joe no e frigiti den tra pikin. Na presi foe kibri a problema gi den trawan foe na osofamiri, taki nanga den foe na afersi na wan fasi di fiti èn na wan fasi di e gi den froetrow baka. — Teki gersi Odo 20:18.

25. (a) Soleki fa a kresten gemeente gi na eksempre, fa papa nanga mama moesoe handri kande efoe wan pikin tron wan dorodoro oproeroeman? (b) San papa nanga mama moesoe hori na prakseri efoe wan foe den pikin foe den e meki oproeroe?

 ²⁵ Na apostel Johanes ben taki foe wan sma di e tron wan oproeroeman na ini a gemeente èn di no wani kenki: „Noiti teki en na ini den oso foe oenoe noso no gi en odi” (2 Johanes 10). Papa nanga mama kan feni taki a de fanowdoe foe doe a srefi sani disi nanga na eigi pikin foe den te a pikin doro a libimarki di lanti poti foe de wan bigisma èn e meki oproeroe dorodoro. (Teki gersi Deuteronomium 21:18-21.) Awansi o moeilek so wan fasi foe handri kan de èn awansi a e tjari prati kon, son tron a de prenspari so taki den trawan foe na osofamiri kan kisi kibri. Na osofamiri foe joe abi kibri foe joe fanowdoe nanga tiri di e gi doronomo. Foe dati ede, tan poti skotoe di de krin foe froestan, ma di de reidelek, di abi foe doe nanga a fasi fa den moesoe tjari densrefi. Abi komunikâsi nanga den tra pikin. Abi belangstelling gi a fasi fa den e doe na skoro èn na ini a gemeente. Taigi den so srefi, taki ala di joe no lobi a fasi fa na oproeroe pikin e handri, tokoe a no de so taki joe no wani si en na ai. Kroetoe a takroe sani di a pikin doe, na presi foe kroetoe a pikin. Di den toe manpikin foe Jakob ben tjari problema kon na tapoe na osofamiri, foe di den ben doe wan toemoesi ogri sani, Jakob ben floekoe na ogri di den ben doe na ini atibron, a no ben floekoe den manpikin srefi. — Genesis 34:1-31; 49:5-7.

26. Foe sortoe sani opregti papa nanga mama kan feni trowstoe efoe wan foe den pikin foe den e meki oproeroe?

²⁶ Kande joe feni taki joe de frantiwortoe gi den sani di pasa na ini joe osofamiri. Ma efoe joe, leki wan papa noso mama, ben doe ala sani di joe ben man na ondro begi, èn joe ben gebroiki a rai foe Jehovah na a fasi fa joe ben man doe dati, dan a no de fanowdoe foe kroetoe joesrefi na wan fasi di no reidelek. Teki trowstoe foe a troetori taki no wan sma kan de wan volmaakti papa noso mama, ma joe ben proeberi opregti foe de wan boen papa noso mama. (Teki gersi Tori foe den Apostel 20:26.) A e gi foeroe sari foe abi  wan krinkrin oproeroeman na ini na osofamiri, ma efoe disi moesoe pasa nanga joe, joe kan abi a djaranti taki Gado e froestan a situwâsi èn noiti a sa gowe libi den foetoeboi foe en di e gi densrefi na ini a dini foe en (Psalm 27:10). So boen, abi a fasti bosroiti foe meki joe oso de wan lanpe na jejefasi, di e gi kibri na den tra pikin.

27. Te a papa nanga mama foe wan pikin di e meki oproeroe ala ten, e prakseri foe na agersitori foe a manpikin di ben lasi, foe san den kan howpoe ala ten?

²⁷ Boiti dati, noiti joe moesoe lasi howpoe. Den moeiti di joe ben doe fosi foe gi den pikin a joisti leri, kan abi krakti na tapoe na ati foe a pikin di lasi pasi èn dati kan meki a kisi en froestan baka te foe kaba (Preikiman 11:6). Wan toe kresten osofamiri ben abi a srefi ondrofeni leki joe, èn wan toe foe den si den trangajesi pikin foe den drai kon baka, neleki fa a papa na ini Jesus en agersitori foe a manpikin di ben lasi, ben si en manpikin drai kon baka (Lukas 15:11-32). A srefi sani kan pasa nanga joe.