’A feti di wi musu feti nanga ogri yeye’
Kapitel aiti
’A feti di wi musu feti nanga ogri yeye’
1. Fu san ede a de prenspari taki wi kon sabi san den ogri yeye e du?
FURU sma e spotu te trawan e taigi den taki ogri yeye de. Ma disi a no wan tori di wi musu lafu fu en. Ogri yeye de trutru, awinsi sma wani bribi dati noso den no wani bribi dati. Den ogri yeye disi e pruberi fu tesi ala sma. Den e pruberi fu du disi tu nanga den anbegiman fu Yehovah. Fu taki en leti, den anbegiman fu Yehovah na a moro prenspari grupu sma di den ogri yeye e suku fu tesi. Na apostel Paulus e warskow wi gi dati te a e taki: „Wi no e feti nanga libisma, ma nanga den makti èn nanga den tiriman fu a dungru disi, nanga den ogri yeye na hemel” (Efeisesma 6:12). Na ini a ten disi den ogri yeye e meki ala muiti fu tesi sma, fu di Satan trowe komoto fu hemel, èn a abi bigi atibron fu di a sabi taki a ten fu en kon syatu.—Openbaring 12:12.
2. Fa wi man wini a feti nanga den ogri yeye di makti moro libisma?
2 Wi man wini a feti nanga den ogri yeye di makti moro libisma? Iya, ma wi man du dati soso te wi e frutrow tapu Yehovah dorodoro. Wi musu arki en èn wi musu gi yesi na en Wortu. Te wi e du dati, dan wi kan wai pasi gi furu fu den ogri di e miti den sma di de na ondro a makti fu Satan. Wi sa wai pasi gi a skin-ati nanga a sari di den sma disi e kisi, èn sosrefi gi a doti fasi fu libi di den abi.—Yakobus 4:7.
Tiriman na hemel
3. Suma Satan e frufolgu na wan ogri-ati fasi, èn fa a e du dati?
3 Yehovah e fruteri wi na wan moi fasi fa a situwâsi na grontapu de soleki fa en e si dati komoto fu hemel. A ben gi na apostel Yohanes wan fisyun pe a ben si Satan leki „wan bigi kaiman di ben redi srefisrefi”. Efu Satan ben kisi na okasi, dan a ben o pori a Mesias Kownukondre fu Gado na a momenti di a Kownukondre dati ben seti na hemel na ini 1914. Fu di Satan no ben man du dati, meki na wan ogri-ati fasi a bigin frufolgu den sma na grontapu di e horibaka gi a Kownukondre dati (Openbaring 12:3, 4, 13, 17). Fa Satan ben o feti a feti disi? A ben o gebroiki den sma na grontapu di e horibaka gi en.
4. Suma e gi den libisma tirimakti a krakti fu den, èn fa wi sabi dati?
4 Bakaten, Yohanes ben kisi wan fisyun pe a ben si wan ogri meti di ben abi seibi ede nanga tin tutu, èn a ben abi makti „tapu ibri lo nanga pipel nanga tongo nanga kondre”. A meti dati na a politiek sistema na heri grontapu. Yohanes ben kisi fu yere taki „a bigi kaiman [Satan Didibri] ben gi a meti a krakti nanga a kownumakti nanga a bigi makti fu en” (Openbaring 13:1, 2, 7). Iya, Satan na a sma fu suma den libisma tirimakti e kisi a krakti nanga a makti fu den. Fu dati ede, soleki fa na apostel Paulus ben skrifi, dan den trutru „tiriman” fu grontapu na den „ogri yeye na hemel”, di e basi den libisma tirimakti. Ala sma di wani anbegi Yehovah musu frustan a sani disi heri bun.—Lukas 4:5, 6.
5. Fu san ede den ogri yeye e tyari den politiek tiriman kon makandra now?
5 Aladi furu politiek tiriman e taki dati den e dini Gado, toku nowan fu den kondre e saka densrefi na ondro a tiri fu Yehovah, noso na ondro a tiri fu Yesus Krestes, a Kownu di a poti. Den alamala e feti tranga gi den eigi makti. Na ini a ten disi, soleki fa a pisi tori na ini Openbaring e sori, dan ’den boskopu di komopo fu den ogri yeye’ e tyari den tiriman fu grontapu kon makandra „fu go feti na tapu a bigi dei fu na Almakti Gado” na Armagedon.—Openbaring 16:13, 14, 16; 19:17-19.
6. Fu san ede wi musu luku bun taki sma no e kori wi fu horibaka gi a seti fu Satan?
6 Ibri dei sma e strei nanga makandra fu sani di abi fu du nanga politiek, a libimakandra, na ekonomia, noso kerki afersi, èn disi e tyari pratifasi kon na mindri libisma. Furu tron te sma e kisi fu du nanga den sani disi, dan den e teki sei gi a kondre noso a lo fu pe den komopo, noso den e teki sei gi den sma di e taki a srefi tongo leki den. Sontron den e teki sei tu gi den sma di abi den srefi reti leki den. Son sma e taki sondro draidrai sortu sei den e teki, trawan e sori dati nanga den sani di den e du. Srefi te sma no de na ini wan strei, toku furu tron den e sori taki den lobi a wán grupu moro leki a trawan. Ma awinsi sortu sei den sma e teki, gi suma den e horibaka trutru? Bijbel e taki krin: „Heri grontapu de na ini a makti fu na ogriwan” (1 Yohanes 5:19). Fa wan sma kan sorgu taki trawan no e kori en soleki fa dati pasa nanga furu libisma? A kan du dati soso te a e horibaka dorodoro gi a Kownukondre fu Gado èn te a no e teki sei kwetikweti na ini den feti fu grontapu.—Yohanes 17:15, 16.
Den triki fu na ogriwan
7. Fa wi kan si a trikifasi fu Satan na ini a fasi fa a gebroiki falsi bribi?
7 Na ini ala den hondrohondro yari di pasa, Satan frufolgu sma na difrenti fasi. A meki sma kosi noso spotu den Kresten fu hari den puru fu a tru anbegi èn a meki sma meshandri den tu. A gebroiki tra fasi sosrefi di sma no fruwakti, namku bedrigifasi nanga triki. Na wan triki fasi a gebroiki falsi bribi fu hori bun furu sma na ini dungru, fu di a e meki den denki taki den e dini Gado. A bakapisi fu dati na taki den sma disi no sabi soifri suma na Gado èn den no lobi tru tori tu. Fu dati ede a kan de so taki den lobi fu go na kerki pe sma e du sani kibrikibri èn pe sma e wroko tapu den firi, noso den feni en wan kefalek sani te sma e du wondru (2 Tesalonikasma 2:9, 10). Ma wi e kisi a warskow taki srefi na mindri den wan di ben de na ini a tru anbegi fosi, „son sma o gowe . . . fu di den poti prakseri na sani di ogri yeye taki fu bedrigi sma èn na den leri fu den ogri yeye” (1 Timoteyus 4:1). Fa dati kan pasa?
8. Fa Satan kan kori wi fu go na ini falsi bribi aladi wi e anbegi Yehovah?
8 Na wan triki fasi Didibri e gebroiki den swakifasi fu wi. A de so taki wi e frede libisma ete? Efu dati de so, dan te fu kaba wi ben kan du sani di abi fu du nanga falsi bribi te famiri noso birtisma e dwengi wi. Wi abi bigifasi? Efu dati de so, dan wi ben kan mandi te wi e kisi rai, noso te trawan no e agri nanga a fasi fa wi e denki fu wan tori (Odo 15:10; 29:25; 1 Timoteyus 6:3, 4). Na presi taki wi e du muiti fu si sani soleki fa Krestes ben e si sani, dan a kan taki wi e go arki den sma di ’e switi wi yesi’, fu di den e taki dati a nofo te wi e leisi Bijbel èn te wi no e du ogri (2 Timoteyus 4:3). Satan no e broko en ede efu wi e go na wan tra kerki noso efu wi e hori wisrefi na wi eigi bribi. Satan wani nomo taki wi no e anbegi Yehovah na a fasi fa a e sori wi na ini en Wortu èn nanga yepi fu en organisâsi.
9. Fa Satan e kori sma fu abi seks na wan fasi di no fiti?
9 Wan tra triki di Satan e gebroiki fu kori sma, na taki a e meki den sori den firi fu den na wan fasi di no fiti. A e du dati nanga a firi di libisma abi fu abi seks. Furu sma di no e hori densrefi na den markitiki fu Bijbel, e si seks na mindri sma di no trow leki wan bun fasi fu abi prisiri, noso den e si en leki wan fasi fu sori taki den de bigisma kaba. Fa a de nanga den wan di trow? Furu fu den e du sutadu. Srefi te trowpatna de getrow na makandra, toku bun furu fu den e suku fu broko trow noso fu prati libi, so taki den kan go libi nanga wan tra sma. Satan e pruberi na wan triki fasi fu meki sma du sani di e gi den prisiri nownow. A no wani den fu prakseri sortu bakapisi disi sa tyari kon gi densrefi èn gi trawan te fu kaba. Ma san de moro prenspari, a no wani den fu prakseri sortu krakti a sa abi tapu a banti di den abi nanga Yehovah èn nanga en Manpikin.—1 Korentesma 6:9, 10; Galasiasma 6:7, 8.
10. Fa Satan e pruberi fu meki wi denki tra fasi fu hurudu èn fu ogri di sma e du nanga tranga?
10 Wan tra firi di sma abi na fu abi prisiri. Te wi e du bun sani na ini wi prisiriten, dan dati kan yepi wi fu kisi krakti baka èn fu bro wi ede pikinso, èn a kan meki wi firi korostu tu. Ma san wi e du te Satan e pruberi fu gebroiki a prisiriten fu wi fu meki wi denki tra fasi leki Gado? Wi sabi fu eksempre taki Yehovah no lobi hurudu nanga ogri di sma e du nanga tranga. Ma a de so taki wi e tan sidon luku den sani disi na ini felem, na telefisi, noso na ini komedi-prei? Hori na prakseri tu taki Satan sa sorgu taki den sani disi e kon moro ogri, fu di a ten e doro taki Gado sa fringi en go na ini wan dipi peti. Satan sa meki taki „ogri sma nanga bedrigiman sa kon ogri moro nanga moro; den o kori trawan èn trawan o kori den” (2 Timoteyus 3:13; Openbaring 20:1-3). Fu dati ede wi musu de na ai ala ten gi den triki fu Satan.—Genesis 6:13; Psalm 11:5; Romesma 1:24-32.
11. Fa wan sma kan fadon na ini a trapu fu du afkodrei efu a no de na ai, aladi a sabi san Bijbel e taki fu dati?
11 Wi sabi tu taki Yehovah no wani abi noti fu du nanga sma di e du afkodrei, soleki sma di e du lukuman-wroko nanga obiawroko, noso sma di e pruberi fu taki nanga den dedewan (Deuteronomium 18:10-12). Fu di wi sabi dati, meki wi no ben o pruberi fu suku yepi na den sma di e taki nanga ogri yeye, èn wi no ben o meki den du den afkodrei sani fu den na ini wi oso kwetikweti. Ma wi ben o arki den efu den ben kon tapu telefisi noso tapu Internet? Kande noiti wi ben o aksi wan obiaman fu dresi wi. Ma wi ben o tai wan titei na a anu fu wi beibi fu kibri en gi ogri-ai? Wi sabi taki Bijbel e krutu afkodrei. Ma wi ben o teki wan dresi fu wan sma di e taigi wi taki a dresi no sa wroko te wan umasma fasi en, noso te wi no taki wan mofo fosi wi e gebroiki a dresi?—Galasiasma 5:19-21.
12. (a) Fa Satan e gebroiki poku fu meki wi denki fu sani di wi sabi taki den no bun? (b) Fa den krosi fu wan sma, a fasi fa a koti en wiwiri, noso a fasi fa a e taki, kan sori taki a lobi den sma di e libi na wan fasi di Yehovah no feni bun? (c) San wi musu du efu wi no wani taki Satan kisi wi nanga den triki fu en?
12 Bijbel e taki dati wi no musu taki srefi (nanga takru prakseri) fu hurudu nanga iniwan morsu tori (Efeisesma 5:3-5). Ma fa a de te sma e singi fu den sani disi èn te a poku moi fu dansi noso fu arki? Wi o bigin singi den singi di e sori taki a no fowtu fu abi seks sondro fu trow, fu gebroiki drugs, noso fu du tra sondu? Wi sabi taki wi no musu libi na a srefi fasi leki den sma di e du den sortu sani disi. Ma a de so taki den krosi di wi e weri, a fasi fa wi e koti a wiwiri fu wi, noso a fasi fa wi e taki, e sori taki wi wani de leki den sma dati? Fu tru, Satan e kori sma na kefalek triki fasi fu meki den kisi a srefi kruktu denki leki en! (2 Korentesma 4:3, 4) Efu wi no wani taki Satan kisi wi nanga den triki fu en, dan wi musu luku bun taki wi no e waka a srefi pasi di grontapu sma e waka. Wi musu hori na prakseri suma na „den tiriman fu a dungru disi” èn wi musu feti fu den no abi krakti na wi tapu.—1 Petrus 5:8.
Wi abi ala sani di de fanowdu fu de winiman
13. Fa wi alamala kan wini a grontapu di Satan e tiri, aladi wi de sondu sma?
13 Bifo Yesus dede, dan a ben taigi den apostel fu en: „Hori deki-ati! Mi wini grontapu kaba” (Yohanes 16:33). Densrefi ben kan de winiman tu. Sowan 60 yari baka dati, na apostel Yohanes ben skrifi: „Suma na a sma di e wini grontapu, boiti a sma di e bribi taki Yesus na a Manpikin fu Gado?” (1 Yohanes 5:5) Wi e sori so wan bribi te wi e du san Yesus e taigi wi fu du èn te wi e frutrow tapu Gado Wortu, soleki fa Yesus ben du dati. San wi musu du moro? Wi musu tan krosibei tu fu a gemeente fu san Yesus de na Edeman. Te wi du wan sondu, dan wi musu sori berow trutru èn wi musu aksi Gado pardon nanga yepi fu a srakti-ofrandi fu Yesus. Na a fasi disi wisrefi kan de winiman tu, aladi wi de sondu sma èn e meki fowtu.—Psalm 130:3, 4.
14. Leisi Efeisesma 6:13-17, èn gebroiki den aksi nanga den bijbeltekst na ini a paragraaf disi fu taki fa ibriwan fu den fetisani e yepi wi.
14 Fu man wini a feti, dan wi musu weri ’ala den fetisani di Gado gi wi’. Wi no musu frigiti nowan fu den. Grantangi suku Efeisesma 6:13-17 na ini yu Bijbel, èn leisi san a e taki fu ala den fetisani dati. Baka dati, te yu e piki den aksi na ondrosei, dan luku fa ibriwan fu den fetisani kan kibri yu.
„Weri a waarheid leki wan banti na un mindribere”
A kan taki wi sabi a waarheid, ma fa wi e kisi kibri te wi e studeri doronomo, te wi e denki dipi fu den tru tori fu Bijbel, èn te wi e go na den konmakandra? (1 Korentesma 10:12, 13; 2 Korentesma 13:5; Filipisma 4:8, 9)
„Weri regtfardikifasi leki wan sani di musu kibri a borsu”
Fu a regtfardikifasi fu suma a tekst e taki dyaso? (Openbaring 15:3)
Sori fa wi ben kan pori a banti di wi abi nanga Yehovah te wi no e hori wisrefi na den regtfardiki markitiki fu en (Deuteronomium 7:3, 4; 1 Samuel 15:22, 23).
„Weri a bun nyunsu fu vrede leki susu na un futu”
Fa wi e kisi kibri te wi e tan meki den futu fu wi tyari wi go fu taki nanga sma fu den sani di Gado seti fu tyari vrede kon? (Psalm 73:2, 3; Romesma 10:15; 1 Timoteyus 5:13)
„A bigi skild, dati na a bribi”
Efu wi abi wan tranga bribi, dan san wi sa du te sma e du sani fu meki wi tweifri, noso fu meki wi kon frede? (2 Kownu 6:15-17; 2 Timoteyus 1:12)
„A helm di e gi frulusu”
Fa a howpu fu frulusu e yepi wan sma fu no broko en ede tumusi nanga gudu? (1 Timoteyus 6:7-10, 19)
„A feti-owru fu a yeye”
Tapu san wi musu frutrow ala ten te wi e kakafutu gi sani di kan pori a banti fu wi nanga Gado, noso a banti di trawan abi nanga Gado? (Psalm 119:98; Odo 3:5, 6; Mateyus 4:3, 4)
Sortu tra sani de tumusi prenspari tu fu man wini a feti nanga ogri yeye? O furu wi musu du dati? Gi suma wi musu du dati? (Efeisesma 6:18, 19)
15. Fa wi kan sori taki wi de klariklari fu feti nanga den ogri yeye?
15 Wi leki fetiman fu Krestes, de wan pisi fu wan bigi legre di e feti nanga ogri yeye. Te wi e tan na ai èn te wi e gebroiki ibriwan fu den fetisani di Gado gi wi, dan wi no sa lasi wi libi na ini a feti disi. Na presi fu dati, wi sa de wan bigi yepi gi den wan di e dini Gado makandra nanga wi. Wi sa sori taki wi de klariklari fu feti nanga den ogri yeye, fu di wi sa panya a bun nyunsu fu a Mesias Kownukondre fu Gado, a hemel tiri di Satan e gens na wan tumusi ogri-ati fasi.
Takimakandra fu luku baka san wi leri
• Fu san ede anbegiman fu Yehovah no e teki sei na ini den feti fu grontapu?
• San na wan tu triki di Satan e gebroiki fu pori a banti di Kresten abi nanga Gado?
• Fa den fetisani di Gado gi wi e kibri wi te wi e feti nanga ogri yeye?
[Aksi fu a tori disi]
[Prenki na tapu bladzijde 76]
Den ogri yeye e tyari den kondre nanga pipel kon makandra na Armagedon
