Kapitel twenti na wan

A kefalek moi kontru fu den sani di Yehovah abi na prakseri

1, 2. (a) San Yehovah abi na prakseri gi den engel nanga den libisma di a meki? (b) Suma ben de na ini a famiri fu Gado di e anbegi en na ini wánfasi?

YEHOVAH lobi den engel nanga den libisma di a meki. Fu dati ede a abi wan moi sani na prakseri gi den. A wani taki den alamala e anbegi en na ini wánfasi fu di a de a wan-enkri tru Gado. A wani tu taki den alamala de fri trutru leki pikin fu Gado. Sma di lobi regtfardikifasi wani a srefi sani disi trutru.

² Yehovah ben bigin meki a tumusi moi prakseri disi kon tru di a ben bigin meki sani. A fosi sani di a ben meki ben de wan Manpikin. Sensi na opobaka fu a Manpikin disi, ’sma kan si a glori fu Gado na en, èn en na a soifri prenki di e sori fa Gado srefi de’ (Hebrewsma 1:1-3). A Manpikin disi ben de aparti, fu di Gado wawan ben meki en. Bakaten, Gado ben o gebroiki a Manpikin disi fu yepi en meki ala tra sani, namku: den engel na hemel fosi, èn baka dati den libisma na grontapu (Yob 38:7; Lukas 3:38). Den alamala makandra ben de wán bigi famiri. Yehovah ben de Gado fu den alamala, a ben de a Moro Hei Tiriman fu hemel nanga grontapu, èn a ben de a lobi-ati Tata fu den.

3. (a) San wi alamala kisi fu wi fosi papa nanga mama? (b) Sortu lobi-ati sani Yehovah seti gi den bakapikin fu Adam?

³ Di a fosi libisma papa nanga mama fu wi ben kisi dedestrafu  fu di den ben sondu fu espresi, dan Gado ben puru den na ini Eden èn a no ben wani abi noti fu du nanga den moro. Den no ben de na ini a famiri fu Gado moro soleki fa a ben de fosi (Genesis 3:22-24; Deuteronomium 32:4, 5). Fu di wi alamala na bakapikin fu den, meki wi kon gebore nanga sondu firi. Ma Yehovah ben sabi taki wan tu fu den bakapikin fu Adam nanga Efa ben o lobi regtfardikifasi. Fu dati ede, fu di a lobi den sma disi, meki a seti wan sani gi den, so taki den kan ’kon fri trutru leki pikin fu Gado’.​—Romesma 8:20, 21.

Israel e lasi a spesrutu grani fu en

4. Sortu grani Yehovah ben gi Israel fu owruten?

⁴ Sowan 2500 yari baka di Yehovah ben meki Adam, dan Yehovah ben gi wan tu sma a grani fu abi wan spesrutu banti nanga En. A ben teki Israel leki en pipel èn a ben gi den a Wet fu en (Genesis 12:1, 2). A meki den tron wán nâsi èn a gebroiki den fu du san A ben abi na prakseri (Deuteronomium 14:1, 2; Yesaya 43:1). Ma den ben de srafu ete fu sondu nanga dede. Sobun, den no ben de fri soleki fa Adam nanga Efa ben de fri na a bigin.

5. Fa den Israelsma ben kon lasi a spesrutu banti di den ben abi nanga Gado?

⁵ Toku den Israelsma ben abi wan spesrutu banti nanga Gado. Den sma disi ben abi a frantwortu tu fu lespeki Yehovah leki a Tata fu den èn den sani di den ben e du ben musu kruderi nanga san A ben abi na prakseri. Yesus ben sori krin o prenspari a ben de taki den du a plekti dati (Mateyus 5:43-48). Ma a pipel fu Israel no ben du disi. Den Dyu dati ben taki: „Wi abi wán Tata, dati na Gado.” Aladi den ben taki dati, toku Yesus taigi den taki den sani di den ben du èn den sani di den ben taki, no ben sori taki Gado ben de a Tata fu den (Yohanes  8:41, 44, 47). Na ini 33 G.T., Gado ben tyari wan kaba kon na a Wet, èn Israel no ben abi a spesrutu banti nanga En moro. Ma disi wani taki dati sma noiti no ben o man abi wan bun banti nanga Gado moro?

Gado e tyari „den sani di de na ini hemel” kon makandra

6. San a „tiri” di Paulus ben kari na ini Efeisesma 1:9, 10 sa du?

⁶ Na apostel Paulus ben sori taki son libisma ben kan abi wan spesrutu banti nanga Gado. Fu eksempre, Yehovah seti wan sani fu yepi sma di e sori bribi, fu tron memre fu En famiri. Fu a sani disi Paulus ben skrifi: „[Gado] meki wi kon sabi san na a santa kibritori di abi fu du nanga a wani fu en. A kibritori disi e plisi Gado èn a feni en bun; soleki fa a ben abi na prakseri, dan na a kaba fu a reti ten a o seti wan tiri fu tyari ala sani kon makandra baka na ondro a tiri fu Krestes, dati na den sani di de na ini hemel nanga den sani di de na grontapu” (Efeisesma 1:9, 10). Yesus Krestes na a moro prenspari sma fu a „tiri” disi. Nanga yepi fu en, libisma kan kisi wan bun nen na Gado. Wan pikin grupu fu den abi a howpu fu libi na ini hemel. Ma wan moro bigi grupu fu sma sa libi fu têgo na grontapu.

7. Suma na „den sani di de na ini hemel”?

⁷ Bigin nanga a Pinksterfesa fu 33 G.T., Gado ben poti prakseri fosi na „den sani di de na ini hemel”, dati wani taki den sma di ben o tiri makandra nanga Krestes na ini a hemel Kownukondre. Fu di den ben sori bribi na ini a srakti-ofrandi fu Yesus, meki Gado ben fruklari den regtfardiki (Romesma 5:1, 2). Baka wan pisi ten, Gado ben tyari Dyu èn sosrefi sma di no ben de Dyu kon makandra. Ala nanga ala „den sani di de na ini hemel” ben o de wan grupu fu 144.000 sma (Galasiasma 3:26-29;  Openbaring 14:1). Soso wan fikapisi fu den de na grontapu ete.

Gado e tyari „den sani di de na grontapu” kon makandra

8. Suma na „den sani di de na grontapu”, èn sortu banti den abi nanga Yehovah?

⁸ A srefi tiri dati e tyari „den sani di de na grontapu” kon makandra tu. Gado e tyari milyunmilyun sma kon makandra now èn den abi a howpu fu libi fu têgo na grontapu. Makandra nanga a fikapisi fu den Kownukondre tiriman, den e gi a nen fu Yehovah glori èn den e hori na anbegi fu en hei (Yesaya 2:2, 3; Sefanya 3:9). Boiti dati, den e kari Yehovah a „Tata” fu den fu di den e si en leki a Sma di gi den libi. Den abi wan bun nen tu na Yehovah, fu di den sori bribi na ini a brudu fu Yesus (Openbaring 7:9, 14). Ma fu di den de nanga sondu ete, meki den musu wakti wan pisi ten bifo Gado sa teki den trutru leki en pikin.

9. Sortu pramisi wi e kisi na ini Romesma 8:21?

⁹ Den sma disi di abi a howpu fu libi na grontapu e angri fu a ten te libisma sa „komoto na ini wan katibo di e tyari dede kon” (Romesma 8:21). Den sa komoto na ini a katibo dati, baka te Krestes nanga den hemel legre fu en tyari wan kaba kon na a bigi banawtu, di abi Armagedon leki heimarki. Disi sa wani taki dati a heri ogri grontapu fu Satan sa kisi pori, èn baka dati, Krestes sa tyari blesi kon te a sa tiri leki Kownu na ini a Dusun Yari Tiri fu en.​—Openbaring 19:17-21; 20:6.

10. Sortu prèisesingi den futuboi fu Yehovah o singi?

¹⁰ A sa de wan switi ten trutru te den futuboi fu Yehovah na grontapu sa kon makandra na ini wánfasi. Den sa taki a srefi sani leki den futuboi fu En na ini hemel, di e  meki bekènti nanga prisiri: „Den wroko fu yu bigi èn den moi srefisrefi, Almakti Yehovah Gado. Den pasi fu yu de regtfardiki èn den tru, yu di de Kownu fu têgo. Yehovah, suma no sa frede yu trutru èn suma no sa gi yu nen glori, bika yu wawan de loyaal? Bika ala pipel o kon anbegi yu fu di yu regtfardiki komando kon na krin kaba” (Openbaring 15:3, 4). Iya, ala den futuboi fu Yehovah sa anbegi a wan-enkri tru Gado na ini wánfasi. Srefi den sma di dede sa kisi wan opobaka èn den sa kisi na okasi fu opo den sten fu prèise Yehovah.​—Tori fu den Apostel 24:15.

Wi sa de fri na wan tumusi moi fasi

11. Na sortu tumusi moi fasi den sma di komoto na ini a bigi banawtu sa de fri?

¹¹ Baka di Gado puru ala ogridu na grontapu na ini a bigi banawtu di sa abi Armagedon leki heimarki, dan Satan Didibri no sa de „a gado fu a grontapu disi” moro. Den anbegiman fu Yehovah no sa abi fu feti moro teige Satan di e tesi den fu du ogri (2 Korentesma 4:4; Openbaring 20:1, 2). Falsi kerki no sa fruteri lei moro fu Yehovah èn den no sa tyari pratifasi kon moro na ini a libimakandra. Den futuboi fu a tru Gado no sa kisi fu du moro nanga libisma tirimakti di e handri na wan kruka fasi nanga den. Den sa de fri trutru!

12. Fa ala sma sa kon fri fu sondu èn fu den bakapisi fu dati?

¹² Leki „a Pikin Skapu fu Gado di e puru a sondu fu grontapu”, dan Yesus sa gebroiki a srakti-ofrandi fu en fu puru den sondu fu libisma (Yohanes 1:29). Di Yesus ben de na grontapu, dan a ben gi wan sma pardon fu en sondu, èn a ben dresi a sma disi fu sori taki a ben kisi pardon trutru (Mateyus 9:1-7; 15:30, 31). Na so Krestes Yesus, a Kownu fu Gado en Kownukondre na ini hemel, sa dresi den breniwan tu, sosrefi den babaw-wan, den dofuwan,  den malengriwan, den sma di no de so bun na den ede, èn den sma di abi iniwan tra siki (Openbaring 21:3, 4). „A wet fu sondu” no sa abi krakti moro tapu den sma di e gi yesi na Gado. Leki bakapisi fu dati, den sa prakseri fu sani èn den sa du sani di o gi den prisiri, èn dati sa prisiri na ati fu Gado tu (Romesma 7:21-23). Na a kaba fu den Dusun Yari, den sa de volmaakti libisma akruderi ’a fasi fa a wan-enkri tru Gado de’.​—Genesis 1:26.

13. San Krestes o du na a kaba fu a Dusun Yari Tiri, èn san o de a bakapisi?

¹³ Te Krestes meki libisma kon de volmaakti, dan a sa gi en Tata a makti baka di a ben kisi fu du a wroko disi: „A e gi a kownukondre abra na en Gado èn Tata, . . . te a meki ala makti nanga krakti fu ala den tirimakti kon tron noti. A musu tiri leki kownu teleki Gado poti ala den feanti fu en na ondro en futu” (1 Korentesma 15:24, 25). A Dusun Yari Tiri fu a Kownukondre sa kaba du ala wroko di a ben musu du. Sobun, a Kownukondre tiri disi no sa de fanowdu moro fu meki sani kon bun baka na mindri Yehovah nanga libisma. Boiti dati, sondu nanga dede no sa de moro èn libisma sa kisi frulusu. Fu dati ede, Yesus no sa abi fu dini leki Frulusuman moro. Bijbel e fruklari: „Dan a [Manpikin] o saka ensrefi tu na ondro a Sma di ben poti ala sani na en ondro, so taki Gado de ala sani gi ala sma.”​—1 Korentesma 15:28.

14. San o pasa nanga ala volmaakti libisma, èn fu san ede?

¹⁴ Baka dati, den volmaakti libisma sa kisi na okasi fu sori taki den wani dini a wan-enkri tru Gado fu têgo. Fu dati ede, bifo Yehovah e teki ala den volmaakti libisma disi trutru leki en pikin, dan den sa kisi wan lasti tesi. Satan nanga den ogri yeye fu en sa kon fri fu a dipi peti. Disi sa abi leki bakapisi taki den wan di lobi Yehovah  trutru, sa kisi kwinsi, ma a no sa de fu langa. Na a tra sei, ibri sma di sa meki Satan kori en fu no gi yesi na Yehovah sa kisi pori fu têgo, makandra nanga a fosi engel nanga den ogri yeye fu en di ben opo densrefi teige Gado.​—Openbaring 20:7-10.

15. Sortu situwâsi di ben de fosi, sa de baka na mindri ala den engel nanga libisma di Yehovah meki?

¹⁵ Te fu kaba, Yehovah sa teki ala den volmaakti libisma leki en pikin fu di den horibaka gi a tiri fu en na ini a lasti tesi dati. Bigin nanga a ten dati, den sa kisi wini dorodoro fu di den sa de fri trutru leki pikin fu Gado na ini a bigi famiri fu En na hemel nanga grontapu. Ala den engel nanga libisma di Gado meki sa anbegi en na ini wánfasi soleki fa den ben du dati fosi, fu di en na a wan-enkri tru Gado. Te fu kaba, den sani di Yehovah abi na prakseri sa kon tru na wan kefalek moi fasi! Yu wani de na ini a koloku famiri dati, di sa libi fu têgo? Efu yu wani dati, dan wi e gi yu deki-ati fu gi yesi na san Bijbel e taki na ini 1 Yohanes 2:17: „Grontapu e pasa gowe nanga den lostu fu en, ma a sma di e du a wani fu Gado, e tan fu têgo.”

Takimakandra fu luku baka san wi leri

• Bifo Adam nanga Efa ben opo densrefi teige Yehovah, dan sortu banti ala anbegiman fu Yehovah ben abi nanga En?

• Sortu frantwortu den futuboi fu Gado abi?

• Suma ete sa tron pikin fu Gado, èn fa disi abi fu du nanga a prakseri fu Yehovah fu tyari wánfasi kon na ini na anbegi?

[Aksi fu a tori disi]

 [Prenki na tapu bladzijde 190]

Den libisma di e gi yesi na Gado sa prisiri fu a libi na ini wan paradijs grontapu