Kapitel fo

A sma fu suma ala den profeiti ben kotoigi

1. San den tru tori di abi fu du nanga a libi fu Yesus bifo a ben gebore leki libisma, e sori fu a banti di a ben abi nanga Yehovah?

„A TATA lobi en Manpikin èn a e sori en pikin ala den sani di a e du” (Yohanes 5:20). A Manpikin ben abi wan heri bun banti nanga en Tata, Yehovah! Den ben kisi a krosibei banti dati na a ten di Yehovah ben meki en, dusundusun yari bifo a ben gebore leki libisma. A ben de Gado en wan-enkri Manpikin, a wan-enkri sma di Yehovah srefi ben meki, sondro a yepi fu trawan. Ala tra sani na ini hemel èn na grontapu ben meki nanga yepi fu a fosi gebore Manpikin dati di Gado ben lobi trutru (Kolosesma 1:15, 16). Boiti dati, a ben e dini leki a Wortu, noso a Takiman, fu Gado. Nanga yepi fu En, trawan ben kon sabi a wani fu Gado. A sma disi, a Manpikin di Gado ben lobi moro ala tra sani, ben tron a man Yesus Krestes.​—Odo 8:22-30; Yohanes 1:14, 18; 12:49, 50.

2. O furu den Bijbel profeititori taki fu Yesus?

² Bifo Maria ben kon de nanga bere na wan wondru fasi fu a fosi gebore Manpikin fu Gado, dan Gado meki sma skrifi furu profeititori fu en. Na apostel Petrus ben kotoigi gi Kornelius: „Ala den profeiti e kotoigi fu en” (Tori fu den Apostel 10:43). Bijbel ben taki so furu fu a frantwortu di Yesus ben o abi, taki wan engel ben taigi na apostel Yohanes: „Na fu di sma e kotoigi fu Yesus, meki den e taki profeititori” (Openbaring 19:10). Den profeititori dati ben sori krin taki en ben de a Mesias. Den ben poti  prakseri na den difrenti sani di Yesus ben o du fu meki den prakseri fu Gado kon tru. A de prenspari taki wi poti furu prakseri na den sani disi na ini a ten fu wi.

San den profeititori ben tyari kon na krin

3. (a) Suma a sneki e prenki na ini a profeititori fu Genesis 3:15? Suma na ’a uma’? Suma na a ’siri fu a sneki’? (b) Fu san ede a ben o de wan prenspari sani gi den futuboi fu Yehovah taki wan sma ben o ’masi na ede fu a sneki’?

³ Yehovah ben taki a fosi profeititori di abi fu du nanga Yesus, baka di Adam nanga Efa opo densrefi teige Gado na ini Eden. Yehovah ben taigi a sneki: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na a ede èn yu sa masi en na a bakafutu” (Genesis 3:15). Fu taki en leti, di Yehovah ben taki a profeititori dati, dan a ben e taki nanga Satan, a sma di a sneki ben e prenki. „Na uma” na a loyaal organisâsi fu Yehovah na ini hemel, di de leki wan getrow wefi gi En. A ’siri fu a sneki’ na ala den engel nanga libisma di e tyari densrefi leki Satan, noso den wan di e opo densrefi teige Yehovah èn teige En pipel. A ’masi di wan sma sa masi na ede fu a sneki’ wani taki dati a trangayesi Satan sa kisi pori te fu kaba, fu di a ben taki lei fu Yehovah èn a meki libisma kon de nanga furu sari. Ma suma na a moro prenspari pisi fu a „siri” di ben o masi na ede fu a sneki? Dati ben tan wan „santa kibritori” hondrohondro yari langa.​—Romesma 16:20, 25, 26.

4. Fa sma ben kan si na den famiri fu Yesus taki en ben de a Siri di Gado ben pramisi?

⁴ Sowan 2000 yari baka di Yehovah meki libisma, dan A bigin fruteri moro fini sani. A ben taki dati a Siri ben o komopo na ini a famiri fu Abraham (Genesis 22:15-18). A no de so taki sma ben o sabi na fesi fu suma na ini a famiri fu Abraham a Siri ben o komopo, ma Gado srefi  ben o tyari kon na krin fu suma a ben o komopo. Awinsi fa Abraham ben lobi en manpikin Ismael di Hagar ben meki, toku Yehovah taigi en: „Mi sa meki mi frubontu nanga Isak, di Sara sa meki gi yu” (Genesis 17:18-21). Bakaten, a frubontu dati ben meki, ma a no ben meki nanga Isak en fosi gebore manpikin, Esau. Gado ben meki a frubontu nanga Yakob, fu suma den 12 lo fu Israel komopo (Genesis 28:10-14). Baka wan pisi ten, a kon na krin taki a Siri ben o gebore na ini a lo Yuda, na ini a famiri fu David.​—Genesis 49:10; 1 Kroniki 17:3, 4, 11-14.

5. Sortu buweisi ben sori krin taki Yesus ben de a Mesias, di a bigin du en diniwroko na grontapu?

⁵ Sortu tra sani ben yepi sma fu kon sabi suma na a Siri? Moro leki 700 yari na fesi, Bijbel ben taki dati Betlehem ben o de a presi pe a Siri di Gado ben pramisi, ben o gebore. Bijbel e sori tu taki a Siri ben de kaba sensi „den dei fu ten di no skotu”, dati wani taki sensi a ten di Gado ben meki en na hemel (Mika 5:2). A profeiti Danièl ben taki soifri tu o ten a ben o sori ensrefi na grontapu leki a Mesias (Danièl 9:24-26). Boiti dati, tapu a dei di Yesus ben kisi salfu nanga santa yeye, dan a tron a Mesias fu Yehovah, èn Gado srefi ben taki komoto fu hemel taki Yesus ben de En Manpikin (Mateyus 3:16, 17). A ben kon na krin suma ben de a Siri! Fu dati ede Filipus ben kan taki nanga overtoigi: „Wi feni a sma di Moses skrifi fu en na ini a Wet nanga den Profeiti; en na Yesus, a manpikin fu Yosef fu Nasaret.”​—Yohanes 1:45.

6. (a) San den bakaman fu Yesus ben kon frustan soleki fa Lukas 24:27 e sori? (b) Suma na a moro prenspari pisi fu a ’siri fu na uma’? San a wani taki dati a sa masi na ede fu a sneki?

⁶ Baka dati, den bakaman fu Yesus ben kon frustan taki den Santa Buku fu Bijbel ben lai nanga profeititori di ben taki na fesi fu en (Lukas 24:27). Den ben kon si moro krin  srefi taki Yesus ben de a moro prenspari pisi fu a ’siri fu na uma’, a sma di sa masi na ede fu a sneki, noso di sa pori Satan krinkrin. Nanga yepi fu Yesus, Gado sa gi libisma ala san a pramisi den èn a sa gi wi ala san wi e angri fu kisi.​—2 Korentesma 1:20.

7. San na wan tra sani di wi musu frustan, boiti taki wi e kon sabi suma na a Sma di den profeititori e taki fu en?

⁷ San wi musu du fu di wi kon sabi den sani disi? Bijbel e taki fu wan eunuch fu Etiopia di ben leisi wan tu fu den profeititori disi. Den profeititori ben taki fu a Sma di ben o kon leki Frulusuman nanga Mesias. Fu di na eunuch no ben sabi fu suma a profeititori ben taki, meki a aksi Filipus, wan preikiman fu a bun nyunsu: „Fu suma a profeiti e taki a sani disi?” Ma na eunuch no ben kaba nanga a tori di a kisi a piki tapu na aksi fu en. Baka di a arki heri bun san Filipus fruteri en, dan a man disi kon si taki a ben musu du wan sani fu di a kon frustan a profeititori disi di kon tru. A ben frustan taki a ben musu teki dopu (Tori fu den Apostel 8:32-38; Yesaya 53:3-9). Wi e du a srefi sani disi tu?

8. (a) San a muiti di Abraham ben meki fu òfer Isak ben sori? (b) Fu san ede Yehovah ben taigi Abraham taki ala kondre ben o blesi densrefi nanga yepi fu a Siri, èn san disi wani taki gi wi na ini a ten disi?

⁸ Poti prakseri tu na a moi tori di e sori fa Abraham ben meki muiti fu òfer Isak, en wan-enkri manpikin di a ben kisi nanga Sara (Genesis 22:1-18). A tori dati ben sori san Yehovah srefi ben o du, namku a ben o òfer en wan-enkri Manpikin: „Gado ben lobi grontapu so te, taki a gi wi en wan-enkri Manpikin, so taki ala sma di sori taki den e bribi na ini en, no ben sa dede, ma taki den kan kisi têgo libi” (Yohanes 3:16). Disi e gi wi a dyaranti taki soleki fa Yehovah ben gi en wan-enkri Manpikin fu du san a ben abi na  prakseri, na so a sa „gi wi ala tra sani na wan switi fasi” tu (Romesma 8:32). San wi musu du fu wi sei? Soleki fa a skrifi na Genesis 22:18, dan Yehovah ben taigi Abraham taki ala kondre ben o blesi densrefi nanga yepi fu a Siri, „fu di [Abraham ben] arki [Gado] sten”. Wi tu musu arki Yehovah nanga a Manpikin fu en: „A sma di e sori taki a e bribi na ini a Manpikin, e kisi têgo libi; a sma di no e gi yesi na a Manpikin, no sa kisi libi, ma a bigi atibron fu Gado e tan na en tapu.”​—Yohanes 3:36.

9. San wi sa du te wi abi warderi gi a howpu fu têgo libi di wi kisi fu di Yesus gi ensrefi leki wan srakti-ofrandi?

 ⁹ Fu di Yesus gi ensrefi leki wan srakti-ofrandi gi wi, meki wi kisi a howpu fu têgo libi. Te wi e warderi a howpu disi, dan wi sa du den sani di Yehovah taigi wi nanga yepi fu Yesus. Wi sa du den sani disi fu di wi lobi Gado èn fu di wi lobi tra sma (Mateyus 22:37-39). Yesus ben sori taki lobi gi Yehovah ben o meki wi leri trawan „fu du ala san [Yesus] taigi [wi]” (Mateyus 28:19, 20). Wi wani sori a lobi dati tu gi tra futuboi fu Yehovah fu di wi e „kon makandra” nanga den doronomo (Hebrewsma 10:25; Galasiasma 6:10). Boiti dati, te wi e du den sani di Gado nanga en Manpikin e aksi fu wi, dan wi no musu denki taki den e fruwakti fu wi taki wi e du sani na wan volmaakti fasi. Hebrewsma 4:15 e taki dati Yesus, a Granpriester fu wi, kan „frustan den swakifasi fu wi”. Dati e gi wi trowstu trutru, spesrutu te wi e begi Gado na ini a nen fu Krestes fu yepi wi fu basi den swakifasi fu wi!​—Mateyus 6:12.

Sori taki yu e bribi na ini Krestes

10. Fu san ede nowan tra sma boiti Yesus Krestes man gi wi frulusu?

¹⁰ Baka di na apostel Petrus ben sori a hei krutubangi fu den Dyu na ini Yerusalem taki den profeititori fu Bijbel kon tru na ini Yesus, dan a taki na wan krakti fasi: „Nowan tra sma de di kan gi frulusu, bika nowan tra nen de na ondro hemel di gi na libisma, èn di musu gi wi frulusu” (Tori fu den Apostel 4:12). Fu di ala den bakapikin fu Adam abi sondu, dati meki den no man gi den libi leki wan lusu-paiman gi nowan sma. Ma Yesus ben de volmaakti, èn a libi fu en ben warti fu gi leki wan srakti-ofrandi (Psalm 49:6-9; Hebrewsma 2:9). A lusu-paiman di a ben gi Gado ben warti a srefi leki a volmaakti libi di Adam ben lasi (1 Timoteyus 2:5, 6). Fu di a du dati, meki  a gi wi na okasi fu kisi têgo libi na ini a nyun grontapu fu Gado.

11. Fruteri fa wi kan kisi furu wini fu a srakti-ofrandi fu Yesus.

¹¹ Fu di Yesus pai a lusu-paiman, meki now srefi wi man kisi tra wini tu. Fu eksempre, aladi wi na sondari, toku a srakti-ofrandi fu Yesus e meki taki wi man abi wan krin konsensi fu di wi e kisi pardon fu den sondu fu wi. A srakti-ofrandi fu Yesus warti moro ala den meti-ofrandi di den Israelsma ben musu tyari fu aksi pardon gi sondu, soleki fa a Wet fu Moses ben taki (Tori fu den Apostel 13:38, 39; Hebrewsma 9:13, 14; 10:22). Ma efu wi wani kisi pardon fu sondu, dan wi musu bribi nanga wi heri ati taki wi abi a srakti-ofrandi fu Krestes fanowdu: „Efu wi e taki: ’Wi no abi sondu’, dan wi e kori wisrefi èn a waarheid no de na ini wi. Efu wi e taki krin san na den sondu fu wi, dan Gado de getrow èn a de regtfardiki, so taki a e gi wi pardon fu den sondu fu wi èn a e krin wi fu ala den sani di no reti.”​—1 Yohanes 1:8, 9.

12. Fu san ede wan sma musu teki dopu na ini watra fu man kisi wan bun konsensi na fesi Gado?

¹² Fa sondu sma kan sori taki den e bribi na ini Krestes èn na ini a srakti-ofrandi fu en? Di sma fu a fosi yarihondro ben tron bribiman, dan den ben meki tra sma kon sabi dati. Fa den ben e du dati? Den ben e teki dopu. Fu san ede? Fu di Yesus ben gi a komando taki ala den disipel fu en musu teki dopu (Mateyus 28:19, 20; Tori fu den Apostel 8:12; 18:8). Wan sma no sa draidrai fu teki dopu te a abi trutru warderi gi san Yehovah seti gi wi na wan lobi-ati fasi nanga yepi fu Yesus. A sma sa tyari den kenki kon di de fanowdu, a sa gi ensrefi abra na Gado na ini begi, èn a sa sori taki a gi ensrefi abra fu di a e teki dopu na ini watra. Fu di a e sori bribi na a fasi disi, meki a e ’aksi Gado wan bun konsensi’.​—1 Petrus 3:21.

13. Te wi kon frustan taki wi du wan sondu, dan san wi musu du, èn fu san ede?

 ¹³ A no de fu taki dati wi sa tan abi sondu firi, srefi baka te wi teki dopu. San wi musu du dan? Na apostel Yohanes ben taki: „Mi e skrifi unu den sani disi, so taki unu no e du wan sondu. Ma toku, efu wan sma e du wan sondu, dan wi abi wan yepiman na a Tata, dati na Yesus Krestes, wan regtfardiki sma. En na wan ofrandi di e meki wi kon bun baka nanga Gado” (1 Yohanes 2:1, 2). Ma disi wani taki dati wi sa kisi pardon fu iniwan sondu di wi e du, efu wi e begi Gado nomo fu gi wi pardon? Dati no abi fu de so. Wan prenspari sani fu man kisi pardon na taki wi musu abi trutru berow. A kan taki wi abi yepi fanowdu tu fu moro owru sma na ini a Kresten gemeente di abi moro ondrofeni. Wi musu frustan taki a sani di wi ben du, no bun kwetikweti. Wi musu sori tu taki wi e sari trutru fu a fowtu di wi meki, so taki wi sa du seryusu muiti fu no meki a srefi fowtu baka (Tori fu den Apostel 3:19; Yakobus 5:13-16). Te wi e du dati, dan wi kan de seiker taki Yesus sa yepi wi èn wi sa kisi a bun-ati fu Yehovah baka.

14. (a) Fruteri na sortu prenspari fasi a srakti-ofrandi fu Yesus meki wi kisi wini. (b) San wi sa du te wi abi bribi trutru?

¹⁴ Fu di Yesus gi ensrefi leki wan srakti-ofrandi, meki wan „pikin ipi”, a tra pisi fu a siri di kari na ini Genesis 3:15, kisi na okasi fu libi fu têgo na ini hemel (Lukas 12:32; Galasiasma 3:26-29). Boiti dati, milyardmilyard tra libisma kisi na okasi fu libi fu têgo na tapu wan paradijs grontapu (Psalm 37:29; Openbaring 20:11, 12; 21:3, 4). Têgo libi na „wan presenti fu Gado . . . nanga yepi fu Krestes Yesus, wi Masra” (Romesma 6:23; Efeisesma 2:8-10). Te wi e bribi na ini a presenti dati èn te wi e warderi a fasi fa wi kisi en, dan wi sa sori a bribi nanga a  warderi dati. Te wi e frustan fa Yehovah gebroiki Yesus na wan tumusi moi fasi fu du En wani, èn te wi e frustan o prenspari a de taki wi alamala waka soifri baka Yesus, dan wi sa meki a Kresten diniwroko tron wan fu den moro prenspari wroko na ini wi libi. Sma sa si a bribi fu wi te wi e fruteri den nanga overtoigi fu a kefalek moi presenti disi di wi kisi fu Gado.​—Tori fu den Apostel 20:24.

15. Fa bribi na ini Yesus Krestes e tyari wánfasi kon?

¹⁵ A moi fu si fa a bribi na ini Yesus Krestes e tyari wánfasi kon! A bribi disi e meki wi kisi wan moro krosibei banti nanga Yehovah, nanga en Manpikin, èn sosrefi nanga trawan na ini a Kresten gemeente (1 Yohanes 3:23, 24). A e meki wi prisiri taki Yehovah gi en Manpikin „a nen di hei moro ibri tra nen, so taki ala den wan di de na hemel, nanga den wan di de na grontapu nanga den wan di de na ondro gron, musu boigi den kindi na ini a nen fu Yesus, èn ibri tongo sa taki krin dati Yesus Krestes na Masra, so taki Gado a Tata kan kisi glori”.​—Filipisma 2:9-11.

Takimakandra fu luku baka san wi leri

• Fu san ede den sma di ben bribi trutru na ini Gado Wortu ben sabi krin suma ben de a Mesias?

• San na wan tu sani di wi musu du fu sori taki wi e warderi a srakti-ofrandi fu Yesus?

• Na sortu fasi wi kisi wini kaba fu a srakti-ofrandi fu Yesus? Fa disi e yepi wi te wi e begi Yehovah fu gi wi pardon fu sondu?

[Aksi fu a tori disi]

[Prenki na tapu bladzijde 36]

Yesus ben taigi den bakaman fu en taki den musu leri trawan fu gi yesi na den komando fu Gado