A strei di abi fu du nanga wi alamala
Kapitel siksi
A strei di abi fu du nanga wi alamala
1, 2. (a) Sortu strei Satan bigin na ini Eden? (b) Fa den sani di Satan ben taki e sori taki a ben strei nanga Gado?
YU ABI fu du nanga a moro prenspari strei di oiti ben de. A sei di yu e teki na ini a strei disi sa sori te fu kaba efu yu sa kisi têgo libi na ini a ten di e kon. A strei disi bigin di Adam nanga Efa ben opo densrefi teige Gado na ini Eden. Na a ten dati, Satan ben aksi Efa: „A de so trutru, taki Gado ben taki dati unu no musu nyan fu ibri bon fu a dyari?” Efa piki en taki Gado ben taki fu wán bon: „Unu no musu nyan fu dati . . . so taki unu no dede.” Wantewante Satan ben kragi taki Yehovah ben e lei gi Adam nanga Efa; a ben e taki dati a no de fanowdu taki den gi yesi na Gado fu man tan na libi. Satan ben taki dati Gado ben e hori wan bun sani na baka gi den sma di a meki, namku a koni fu bosroiti gi densrefi san bun èn san ogri. Satan ben taki: „Gado sabi taki na a srefi dei di unu e nyan fu en, un ai sa kon opo seiker èn seiker unu sa de leki Gado, unu sa sabi bun nanga ogri.”—Genesis 3:1-5.
2 Te yu luku en bun, dan Satan ben e taki dati sani ben o waka moro bun nanga libisma te den ben o teki den eigi bosroiti, na presi taki den gi yesi na den wet fu Gado. Nanga disi, Satan sori taki a no e agri nanga a fasi fa Gado e tiri. Na so Satan bigin strei nanga Gado efu Gado abi a reti fu tiri ala sani na hemel nanga grontapu leki a moro heiwan. Na aksi ben opo kon: San moro bun gi libisma? A moro bun te Yehovah e tiri, noso te libisma e tiri sondro a yepi fu en? We, Yehovah ben kan pori Adam nanga Efa wantewante, ma dati no ben o buweisi kwetikweti suma abi a reti fu tiri. Te Gado ben o gi libisma na okasi fu seti a libimakandra fu den, dan a ben kan sori krin san na den bakapisi te libisma e tiri sondro fu gi yesi na en èn na den wet fu en.
3. Fu sortu tra tori Satan bigin strei nanga Gado?
3 Satan no ben kaba strei nanga Yehovah di a ben taki na ini Eden taki Yehovah no abi a reti fu tiri. A ben taki sosrefi taki trawan no ben o tan getrow na Yehovah tu. Disi ben de wan tra tori di abi furu fu du nanga a strei di Satan bigin. A ben taki dati den bakapikin fu Adam nanga Efa, sosrefi ala den yeye manpikin fu Gado, èn srefi a fosi gebore Manpikin di Yehovah lobi srefisrefi, no ben o tan getrow. Fu eksempre, na ini a ten fu Yob, dan Satan ben e taki dati den wan di e dini Yehovah no e du dati fu di den lobi Gado, noso fu di den lobi a fasi fa a e tiri, ma fu di den e suku den eigi wini nomo. A ben taki dati te problema ben o miti den, dan den alamala ben o prakseri densrefi nomo.—Yob 2:1-6; Openbaring 12:10.
San wi kon si na ini den yari di pasa
4, 5. Te wi e prakseri den sani di feni presi na ini den hondrohondro yari di pasa, dan san na den bakapisi fu a waka di libisma waka den eigi pasi?
4 Wan tumusi prenspari sani na ini a strei di abi fu du nanga suma abi a reti fu tiri, na disi: Gado no meki libisma fu libi sondro a tiri fu en èn toku kisi bun bakapisi fu dati. Gado meki den na so wan fasi taki den abi den regtfardiki wet fu en fanowdu fu meki sani waka bun. A profeiti Yeremia ben agri, a ben taki: „Mi sabi heri bun, o Yehovah, taki a sma fu grontapu no man luku gi ensrefi sortu pasi a musu waka. Wan man di e waka no man luku pe a musu poti en futu srefi. Poti mi na a reti pasi baka, o Yehovah” (Yeremia 10:23, 24). Dati meki Gado Wortu e gi wi a rai: „Frutrow tapu Yehovah nanga yu heri ati èn no frutrow tapu yu eigi frustan” (Odo 3:5). Soleki fa Gado ben poti wet gi libisma so taki den kan tan na libi, na so a ben meki tra wet tu di ben e sori den fa den ben musu tyari densrefi. Te den ben o gi yesi na den wet disi, dan ala sani ben o waka bun na ini a libimakandra fu den.
5 A de krin, taki Gado ben sabi taki libisma noiti no ben o abi bun bakapisi te den ben o du sani sondro a tiri fu en. Libisma pruberi fu seti sani na wan bun fasi sondro a tiri fu Gado, ma den no ben abi bun bakapisi. Den seti difrenti sortu tiri na politiek sei, na ekonomia sei, èn na kerki sei. Den difrenti disi meki taki sma kisi problema nanga makandra doronomo, èn a bakapisi fu dati ben de ogridu, orloku, nanga dede. „A wan libisma tiri a tra libisma nanga ogri bakapisi gi en” (Preikiman 8:9). Dati na soifri san libisma ondrofeni na ini den hondrohondro yari di pasa. Soleki fa Gado Wortu ben taki na fesi, dan ogri sma nanga bedrigiman „kon ogri moro nanga moro” (2 Timoteyus 3:13). Boiti dati, na ini den lasti hondro yari di pasa, sani ben waka heri bun nanga libisma tapu a kontren fu sabidensi nanga bisnis, ma den kisi fu du tu nanga den moro ogri rampu di miti libisma. Den wortu fu Yeremia 10:23 de tru — libisma no meki fu luku gi densrefi sortu pasi den musu waka.
6. Fa Gado sa tyari wan kaba kon heri esi na a tiri di libisma e tiri sondro a yepi fu en?
6 Fu di libisma no teki a tiri fu Gado, meki takru sani pasa di gi sma furu sari fu wan langa pisi ten. Disi e sori krin taki a tiri fu libisma noiti no kan abi bun bakapisi. Gado wawan kan tiri wi na wan fasi di e tyari koloku nanga wánfasi kon, èn di kan meki sma de gosontu èn kisi libi. Gado Wortu e sori tu taki Yehovah no sa gi pasi moro taki libisma e du sani sondro a tiri fu en (Mateyus 24:3-14; 2 Timoteyus 3:1-5). Heri esi a sa kon na ini den afersi fu libisma fu sori taki na en abi a reti fu tiri grontapu. Wan Bijbel profeititori e taki: „Na ini den dei fu den kownu dati [den libisma tirimakti di de now], a Gado fu hemel sa opo wan kownukondre [na ini hemel] di noiti no sa kisi pori. Èn a kownukondre srefi no sa gi na nowan tra pipel [noiti moro libisma sa tiri grontapu]. A sa broko ala den kownukondre disi [di de now] na pisipisi èn tyari wan kaba kon na den, èn ensrefi sa tan te ten di no skotu.”—Danièl 2:44.
Fa fu kon na ini a nyun grontapu fu Gado
7. Suma sa tan na libi te Gado sa tyari wan kaba kon na a tiri fu libisma?
7 Suma sa tan na libi te Gado sa tyari wan kaba kon na a tiri fu libisma? Bijbel e piki: „Den opregti sma [den sma di e agri taki Gado abi a reti fu tiri] na den wan di sa libi na grontapu, èn den wan sondro fowtu na den wan di sa tan abra na en tapu. Fu taki fu den ogri sma [den sma di no e agri taki Gado abi a reti fu tiri], den sa koti den puru fu grontapu srefi” (Odo 2:21, 22). A psalm skrifiman ben taki a srefi sani: „Ete wan syatu pisi ten èn na ogri sma no sa de moro . . . Na den regtfardiki sma srefi sa abi grontapu leki a gudu fu den, èn den sa libi na tapu fu têgo.”—Psalm 37:10, 29.
8. Fa Gado sa buweisi taki na en abi a reti fu tiri?
8 Baka te a seti fu Satan kisi pori, dan Gado sa tyari a nyun grontapu fu en kon. A sa tyari wan kaba kon na ala den sani di ben e trobi libisma dusundusun yari langa, soleki ogri di sma e du nanga tranga, orloku, pôtifasi, pina, siki, nanga dede. Bijbel e fruteri na wan heri moi fasi sortu blesi e wakti den sma di e gi yesi na Gado: „[Gado] o figi ala watra puru na den ai; dede no sa de moro, èn nowan sari noso krei noso pen no sa de moro. Den fositen sani pasa gowe” (Openbaring 21:3, 4). Nanga yepi fu a hemel Kownukondre na ondro a tiri fu Krestes, Gado sa buweisi taki na En abi a reti fu de wi Tiriman.—Romesma 16:20; 2 Petrus 3:10-13; Openbaring 20:1-6.
A fasi fa son sma sori sortu sei den teki na ini a strei
9. (a) San den sma di tan getrow na Yehovah ben e du te a ben taki wan sani? (b) Fa Noa sori taki a ben de getrow na Gado, èn san wi kan leri fu na eksempre fu en?
9 Na ini ala den hondrohondro yari di pasa, wan tu man nanga uma ben de di ben de getrow na Yehovah èn di ben e lespeki en leki Tiriman. Den ben sabi taki efu den ben wani tan na libi, dan den ben musu arki en èn den musu gi yesi na en. Noa ben de so wan man. Dati meki Gado ben taigi Noa: „A kaba fu ala skin kon na fesi mi . . . Meki wan ark gi yusrefi.” Noa ben saka ensrefi na ondro a tiri fu Yehovah. Tra sma di ben libi na ini a ten dati tu, ben e tan go doro nanga den aladei sani fu den leki noti no ben o pasa, aladi den ben kisi warskow. Ma Noa ben e bow wan kefalek bigi ark èn a ben e tan fruteri trawan fu den regtfardiki pasi fu Yehovah. A tori e taki moro fara: „Noa ben du ala san Gado ben komanderi en. A ben du leti so.”—Genesis 6:13-22; Hebrewsma 11:7; 2 Petrus 2:5.
10. (a) Fa Abraham nanga Sara ben horibaka gi a tiri fu Yehovah? (b) San wi kan leri fu na eksempre fu Abraham nanga Sara?
10 Abraham nanga Sara ben de moi eksempre tu fu sma di ben e horibaka gi a tiri fu Yehovah, fu di den ben e du ala san Yehovah ben taigi den. Den ben e libi na ini a foto Ur fu den Kaldeasma. A foto disi ben gudu srefisrefi. Ma di Yehovah taigi Abraham taki a ben musu go na wan tra kondre, wan kondre di a no ben sabi, dan Abraham ben du „soleki fa Yehovah ben taigi en”. A no de fu taki dati Sara ben abi wan switi libi. A ben abi wan oso, mati, nanga famiri. Toku a ben saka ensrefi na ondro Yehovah èn na ondro en masra, èn a ben go na a kondre Kanan, aladi a no ben sabi fa a libi ben o de drape.—Genesis 11:31–12:4; Tori fu den Apostel 7:2-4.
11. (a) Na ini sortu situwâsi Moses ben e horibaka gi a tiri fu Yehovah? (b) San wi kan leri fu na eksempre fu Moses?
11 Wan tra sma di ben e horibaka gi a tiri fu Yehovah ben de Moses. A ben e du disi na ini tumusi muilek situwâsi, soleki di a ben musu taki nanga Farao fu Egepte. Moses no ben de seiker fu ensrefi efu a ben o man du dati. Fu taki en leti, a ben denki taki a no ben o sabi fa fu taki nanga Farao. Toku a ben gi yesi na Yehovah. Nanga a krakti fu Yehovah èn nanga a yepi fu en brada, Aron, dan Moses ben taki a wortu fu Yehovah ibri tron baka na fesi a tranga-ede Farao. Srefi wan tu fu den manpikin fu Israel ben e krutu Moses na wan ogri-ati fasi. Toku Moses ben du ala san Yehovah ben taigi en, èn Yehovah ben gebroiki en fu frulusu Israel komoto na ini Egepte.—Exodus 7:6; 12:50, 51; Hebrewsma 11:24-27.
12. (a) San e sori taki getrowfasi na Yehovah wani taki moro leki fu gi yesi na den wet fu Gado di ben skrifi kaba? (b) Te wi e frustan san a wani taki fu de getrow na Gado, dan fa dati kan yepi wi fu fiti 1 Yohanes 2:15?
12 Den sma di ben de getrow na Yehovah no ben abi a denki taki den ben musu gi yesi soso na den wet fu Gado di ben skrifi kaba. Di a wefi fu Potifar ben pruberi fu kori Yosef fu du sutadu nanga en, dan Gado no ben gi nowan wet di ben taki dati sma no musu du sutadu. Ma Yosef ben sabi taki Yehovah ben seti a trowlibi na ini Eden. A ben sabi heri bun taki Gado no ben o feni en bun efu a ben abi seks nanga a wefi fu wan tra man. Yosef no ben wani luku o fara Gado ben o gi en pasi fu du sani leki den Egeptesma. Yosef ben e prakseri dipi fu den sani di Gado du gi libisma èn fu den sani di Gado taigi den. Boiti dati, te Yosef ben kon sabi san ben de a wani fu Gado, dan a ben e meki muiti trutru fu fiti dati na ini en libi. Na so a ben man tyari ensrefi na wan fasi di Yehovah feni bun.—Genesis 39:7-12; Psalm 77:11, 12.
13. (a) Fa Yob sori taki Didibri na wan leiman? (b) Fa den dri Hebrewsma sori dati?
13 Den sma di sabi Yehovah trutru no sa drai den baka gi en, awinsi hebi tesi e miti den. Satan ben taki dati Yob srefi, a sma di Yehovah ben feni bun, ben o drai en baka gi Gado efu a ben lasi den furu gudu fu en, noso efu a ben kon siki. Ma Yob buweisi taki Didibri na wan leiman, aladi Yob srefi no ben sabi fu san ede hebi tesi ben e miti en (Yob 2:9, 10). Furu hondro yari baka dati, Satan ben e pruberi ete fu buweisi taki a abi leti. Satan ben meki taki wan kownu fu Babilon di ben kisi bigi atibron, ben tapu skreki gi dri yongu Hebrewsma. A kownu ben taki dati a ben o kiri den na ini wan faya onfu efu den no ben o boigi fu anbegi a bigi popki di a ben meki. Den dri yongu sma ben musu piki en wantewante efu den ben o gi yesi na a komando fu a kownu, noso na a wet fu Yehovah di ben e krutu na anbegi fu popki. Nanga wan fasti bosroiti den meki ala sma kon sabi taki den ben e dini Yehovah èn taki en ben de a Moro Hei Tiriman fu den. Getrowfasi na Gado ben de moro prenspari gi den leki den eigi libi!—Danièl 3:14-18.
14. Fa wi leki sondu sma kan sori taki wi de getrow na Yehovah trutru?
14 Te wi e luku den eksempre disi, dan a de so taki wan sma musu de volmaakti fu man de getrow na Yehovah? Noso a de so taki wan sma di e meki wan fowtu no de getrow na Yehovah? Dati no de so kwetikweti! Bijbel e fruteri wi taki son leisi Moses ben e meki fowtu. Aladi den sani dati no ben prisiri Yehovah, toku a no drai en baka gi Moses. Den apostel fu Yesus Krestes ben abi swakifasi tu. Fu di Yehovah sabi taki wi na sondu sma, meki a e prisiri te wi no e trangayesi en fu espresi. Efu swakifasi meki taki wi du wan sani di no bun, dan a de fanowdu taki wi sori trutru berow èn wi musu luku bun taki wi no e du na ogri sani ibri tron baka. Na a fasi disi wi e sori taki wi lobi trutru san Yehovah feni bun, èn taki wi e tegu fu den sani di a no lobi kwetikweti. Te wi e sori bribi na ini a srakti-ofrandi fu Yesus di e puru sondu, dan wi kan dini Gado nanga wan krin konsensi.—Amos 5:15; Tori fu den Apostel 3:19; Hebrewsma 9:14.
15. (a) Suma na a wan-enkri libisma di ben tan getrow dorodoro na Gado, èn san disi e sori wi? (b) San wi kan leri fu den sani di Yesus ben du?
15 Ma a de so taki libisma noiti no man gi yesi dorodoro na Yehovah leki Tiriman? A piki tapu na aksi disi ben de leki wan „santa kibritori” 4000 yari langa (1 Timoteyus 3:16). Gado ben meki Adam leki wan volmaakti sma, ma Adam no ben gi wan bun eksempre fa fu de getrow dorodoro na Gado. Suma ben kan du dati dan? A de krin taki nowan fu den sondu bakapikin fu en ben man du dati. A wan-enkri man di ben man du dati ben de Yesus Krestes (Hebrewsma 4:15). Yesus ben hori en soifri retifasi. Disi e sori taki Adam, di ben de na ini moro bun situwâsi, ben kan tan hori en soifri retifasi tu efu a ben wani dati. A no de so taki Gado ben meki fowtu di a meki libisma. Sobun, te wi wani hori wisrefi na den wet fu Gado èn te wi wani sori taki wi de getrow na Yehovah, a Moro Hei Tiriman fu hemel nanga grontapu, dan wi musu teki Yesus Krestes leki eksempre.—Deuteronomium 32:4, 5.
Sortu sei wisrefi e teki na ini a strei?
16. Fu san ede wi musu de na ai ala ten aladi wi e horibaka gi a tiri fu Yehovah?
16 Na ini a ten disi, ibriwan fu wi musu sori suma wi e teki leki wi tiriman. Efu wi taki krin taki wi de na a sei fu Yehovah, dan Satan sa pruberi fu meki wi drai baka gi Yehovah. A e suku ala sortu fasi fu tesi wi, èn a sa tan du disi te na a kaba fu na ogri grontapu fu en. Wi musu de na ai ala ten (1 Petrus 5:8). A fasi fa wi e tyari wisrefi e sori efu wi e agri taki na Yehovah abi a reti fu tiri, èn sosrefi efu wi e tan getrow na Gado awinsi tesi e miti wi. Wi no kan abi a denki fu den sma fu grontapu di no e si en leki wan prenspari sani fu tan getrow. Efu wi wani tan getrow, dan wi musu meki muiti fu hori wisrefi na den regtfardiki markitiki fu Yehovah na ini ala afersi fu wi libi.
17. Te wi e prakseri fu suma lei nanga fufuru e komopo, dan fu san ede wi musu luku bun taki wi no e du den sani disi?
17 Fu gi wan eksempre, wi no kan du leki Satan, di de „a tata fu leitori” (Yohanes 8:44). Ala ten wi musu taki sani di de tru. Na ini a grontapu fu Satan, furu tron yongu sma e lei gi a papa nanga mama fu den. Ma Kresten yonguwan e luku bun taki den no e du dati. Na so wan fasi den e sori taki Satan no ben abi leti, di a taki dati a pipel fu Gado no ben o hori den soifri retifasi te tesi miti den (Yob 1:9-11; Odo 6:16-19). Boiti dati, son sma di e drai wan bisnis e du sani di ben sa kan sori taki den de na a sei fu „a tata fu leitori”, na presi taki den de na a sei fu a Gado fu tru tori. Wi e wai pasi gi den sortu sani disi (Mika 6:11, 12). Noiti a de wan bun sani tu te wan sma e fufuru, awinsi a sma de na nowtu, noso awinsi a e fufuru wan sani fu wan gudusma (Odo 6:30, 31; 1 Petrus 4:15). Srefi te a sani disi e pasa furu tron na ini a birti pe wi e tan, noso te a sani di wan sma e fufuru na wan pikin sani nomo, toku den wet fu Gado e krutu a fufuru di sma e fufuru.—Lukas 16:10; Romesma 12:2; Efeisesma 4:28.
18. (a) Sortu tesi sa miti ala libisma na a kaba fu a Dusun Yari Tiri fu Krestes? (b) Sortu gwenti wi musu pruberi fu abi now?
18 Na ini a Dusun Yari Tiri fu Krestes, dan Satan nanga den ogri yeye fu en sa de na ini a dipi peti; den no sa man abi krakti tapu libisma. Dati sa de wan switi ten fu tru! Ma baka den dusun yari, Satan nanga den ogri yeye fu en sa kon lusu fu wan syatu pisi ten. Satan nanga den bakaman fu en sa tesi den libisma di kon volmaakti èn di e tan hori a soifri retifasi fu den na Gado (Openbaring 20:7-10). Efu wi e kisi a grani fu libi na a ten dati, dan suma wi sa teki leki wi tiriman? Ala libisma sa de volmaakti na a ten dati. Sobun, wan sma di no de getrow na Gado na a ten dati e du dati fu espresi, èn leki bakapisi fu dati a sa kisi pori fu têgo. A de tumusi prenspari taki wi abi a gwenti now fu du ala san Yehovah e taigi wi, awinsi a e du dati nanga yepi fu en Wortu noso nanga en organisâsi! Te wi e du disi, dan wi e sori taki wi de getrow na en leki a Moro Hei Tiriman fu hemel nanga grontapu.
Takimakandra fu luku baka san wi leri
• San na a strei di abi fu du nanga wi alamala? Fa wi kon abi fu du nanga a strei disi?
• Na sortu tumusi moi fasi man nanga uma fu owruten sori taki den ben de getrow na Yehovah?
• Fu san ede a de tumusi prenspari taki wi e gi Yehovah grani na ini a fasi fa wi e tyari wisrefi ibri dei?
[Aksi fu a tori disi]
