Kapitel feifi

Den anbegiman fu Yehovah de fri

1, 2. (a) San na a fri di Gado ben gi a fosi man nanga uma? (b) Kari wan tu fu den wet di ben abi krakti tapu a wroko fu Adam nanga Efa.

DI Yehovah ben meki a fosi man nanga uma, dan den ben fri fu den furu sani di libisma e ondrofeni na ini a ten disi. A tanpresi fu den ben de a Paradijs, a moi Dyari fu Eden. Fu di den ben abi wan volmaakti frustan nanga wan volmaakti skin, meki nowan siki ben pori a switi libi fu den. Dede no ben o tyari wan kaba kon na a libi fu den, neleki fa dati e pasa nanga ala libisma sensi a ten dati. Boiti dati, den no ben de leki robot, taki den e du sani sondro fu denki, ma den ben kisi wan kefalek moi sani, wan fri wani. Disi wani taki dati den ben fri fu teki den eigi bosroiti. Ma efu den ben wani tan fri, dan den ben abi fu lespeki den wet fu Gado.

² Fu gi wan eksempre, prakseri den wet di Gado poti gi ala sani di a meki. Soleki fa a sori, dan Gado no poti den wet disi finifini na tapu papira, ma A ben meki Adam nanga Efa na so wan fasi taki den ben o sabi taki den ben musu gi yesi na den wet. Te den ben abi angri, dan den ben sabi taki den ben musu nyan. Te watra ben kiri den, dan den ben sabi taki den ben musu dringi, èn te son ben e dongo, dan den ben sabi taki den ben musu sribi. Yehovah ben gi den wan wroko fu du sosrefi. Te yu luku en bun, dan a wroko dati ben de wan wet, fu di a ben o abi krakti tapu den sani di den ben o du. Den ben musu  meki pikin, den ben musu tiri den furu difrenti sani di ben e libi na grontapu, èn den ben musu meki heri grontapu kon tron wan Paradijs (Genesis 1:28; 2:15). A wet disi ben bun gi den srefisrefi! A ben gi den wan wroko di ben e gi den prisiri trutru, èn den ben kisi na okasi tu fu gebroiki ala a krakti nanga koni fu den na wan yoisti fasi. Boiti dati, den ben de fri fu bosroiti fa den ben o du a wroko fu den. Sobun, Yehovah ben gi den ala sani di den ben abi fanowdu.

3. Fa Adam nanga Efa ben kan leri fu gebroiki a fri fu den na wan koni fasi, so taki den ben man teki bun bosroiti?

³ A no de fu taki, dati aladi Adam nanga Efa ben kisi a grani fu teki bosroiti, toku disi no ben wani taki dati iniwan bosroiti di den ben o teki, ben o abi bun bakapisi. Den ben de fri fu teki bosroiti, ma te den ben o du dati, dan den ben musu poti prakseri na den wet nanga den gronprakseri fu Gado. Fa den ben kan kon sabi den wet nanga den gronprakseri disi? Den ben musu arki a Mekiman fu den èn den ben musu poti prakseri na den sani di a meki. Gado ben gi Adam nanga Efa a koni di den ben abi fanowdu fu du san den ben leri. Fu di Gado ben meki den leki volmaakti sma, meki den ben o abi a firi fu sori den srefi fasi fu Gado te den ben e teki bosroiti. Iya, den ben o meki muiti fu du dati efu den ben abi warderi trutru gi den sani di Gado ben du gi den èn efu den ben wani prisiri na ati fu en.​—Genesis 1:26, 27; Yohanes 8:29.

4. (a) A de so taki Adam nanga Efa no ben fri moro di den ben kisi a komando fu no nyan a froktu fu wan spesrutu bon? (b) Fu san ede a fiti taki a wet disi ben de?

⁴ Sobun, Gado ben abi a reti fu luku efu den ben o tan getrow na en leki a Sma di ben gi den libi, èn efu den ben de klariklari fu hori densrefi na den wet di a ben poti gi  den. Yehovah ben gi Adam a komando disi: „Fu ibri bon fu a dyari yu mag nyan te yu bere furu. Ma fu a bon fu sabi bun nanga ogri, fu dati yu no musu nyan, bika na a dei di yu sa nyan fu dati, yu sa dede nomonomo” (Genesis 2:16, 17). Baka di Gado ben meki Efa, dan Efa srefi ben kon sabi fu a wet disi tu (Genesis 3:2, 3). A de so taki den no ben fri moro di den ben kisi a wet disi? Kwetikweti. Den ben abi someni difrenti switi nyanyan, sondro taki den ben abi fu nyan fu a froktu fu a wán bon dati (Genesis 2:8, 9). A no de fu taki dati den ben musu frustan taki grontapu na fu Gado, fu di na en ben meki grontapu. Sobun, a abi a reti fu meki wet di e yepi en fu du san a abi na prakseri èn di e tyari wini kon gi libisma.​—Psalm 24:1, 10.

5. (a) Fa a du kon taki Adam nanga Efa no ben fri moro? (b) San ben pasa nanga Adam nanga Efa di den no ben fri moro, èn san kon de a bakapisi gi wi?

⁵ Ma san ben pasa? Wan engel di ben e feti fu kisi makti, gebroiki a fri wani fu en na wan fowtu fasi. Na so na engel disi kon tron Satan, èn dati wani taki „Gensman”. A ben kori Efa fu di a ben meki a bribi wan sani di Gado no ben taki srefisrefi (Genesis 3:4, 5). Adam ben pasa a wet fu Gado makandra nanga Efa. Fu di den ben teki wan sani di no ben de fu den, meki den no ben fri moro; den ben lasi a tumusi moi grani disi di den ben abi. Sondu ben tron a basi fu den, èn te fu kaba den dede, soleki fa Gado ben warskow den. A sondu fu den kon tapu den bakapikin fu den, èn disi de krin fu si fu di den bakapikin e gebore nanga a firi fu du sani di no bun. Sondu meki tu taki den kon swaki, èn leki bakapisi fu dati den e kon siki, den e kon owru, èn den e dede. Satan du furu sani fu meki a firi di sma abi fu du ogri, kon moro tranga. Na so a du kon taki na ini den furu yari di pasa, libisma sori  bita-ati gi trawan, den du ogri nanga tranga, den kwinsi trawan, èn milyunmilyun sma dede na ini orloku. Trutru, disi de heri tra fasi leki a libi di Gado ben gi libisma na a bigin pe den ben de fri fu den sani dati!​—Deuteronomium 32:4, 5; Yob 14:1, 2; Romesma 5:12; Openbaring 12:9.

Fa wi kan kon fri

6. (a) Fa wi kan kon fri trutru? (b) Fa sma sa kon fri soleki fa Yesus ben taki?

⁶ Te wi e prakseri den takru sani di e pasa na ala presi na ini a ten disi, dan a no de fu fruwondru taki sma e angri fu kon fri. Ma fa sma kan kon fri trutru? Yesus ben taki: „Efu unu e tan du den sani di mi taki, dan unu de mi disipel trutru, unu o sabi a waarheid èn a waarheid o meki unu kon fri” (Yohanes 8:31, 32). A tekst disi no e taki fu a sortu fri di libisma e howpu fu kisi te den e puru wan tiriman noso wan tirimakti èn e poti wan trawan na ini a presi fu en. Na presi fu dati, sma sa de fri trutru, fu di Yesus sa puru a sani di e tyari problema kon gi libisma. A sani di Yesus ben taki fu en, na taki libisma ben o kon fri fu sondu (Yohanes 8:24, 34-36). Sobun, efu wan sma e tron wan tru disipel fu Yesus Krestes, dan a e si wan bigi kenki na ini en libi. A e kon fri trutru!

7. (a) Na sortu fasi wi kan de fri fu sondu now? (b) San wi musu du fu man de fri na a fasi dati?

⁷ Disi no wani taki dati den sondu firi di libisma abi sensi den gebore no abi krakti moro tapu tru Kresten na ini a ten disi. Fu di den abi sondu, meki den musu tan feti nanga den firi dati ete (Romesma 7:21-25). Ma efu wan sma e fiti den leri fu Yesus na ini en libi trutru, dan a no sa de wan srafu moro fu sondu. Sondu no sa de leki wan basi gi en moro di e komanderi en nomo san a musu du. A no sa libi sondro fu abi wan marki na ini a libi èn a  no sa kisi konsensi fonfon fu a fasi fa a e libi. A sa abi wan krin konsensi na fesi Gado, fu di a sori bribi na ini a srakti-ofrandi fu Krestes èn a kisi pardon fu den sondu di a ben du fosi. Son leisi a kan taki a sma sa wani du sondu. Ma te a e dwengi ensrefi fu no du dati, fu di a e prakseri den leri fu Krestes fu libi wan krin libi, dan a e sori taki a no de wan srafu fu sondu moro.​—Romesma 6:12-17.

8. (a) Fa tru Krestendom e meki wi kon fri? (b) Fa wi musu si den tiriman fu grontapu?

⁸ Luku na sortu fasi wi leki Kresten de fri. Wi kon fri fu a krakti di falsi leri abi tapu sma, wi kon fri fu kruktubribi, èn wi no de srafu moro fu sondu. Den tumusi moi tru tori di e sori wi san e pasa nanga den dedewan èn san na a opobaka, e yepi wi fu no frede moro gi dede. Fu di wi sabi taki a regtfardiki Kownukondre fu Gado sa kon na ini a presi fu den tirimakti fu sondu libisma, meki wi no de sondro howpu moro (Danièl 2:44; Mateyus 6:10). Ma disi no wani taki dati wi no abi fu lespeki den tirimakti nanga den wet fu den.​—Titus 3:1, 2; 1 Petrus 2:16, 17.

9. (a) Fa Yehovah e yepi wi na wan lobi-ati fasi fu de fri nownow kaba? (b) Fa wi kan teki koni bosroiti?

⁹ Yehovah no e meki wi leri nanga tranga san na a moro bun fasi fu libi. Yehovah sabi fa wi meki, a sabi san e gi wi trutru koloku, èn a sabi san o meki wi kisi wini fu têgo. A sabi sortu fasi fu denki nanga sortu fasi fu libi kan pori a banti di wan sma abi nanga En èn nanga tra libisma, sani di kan meki srefi taki a sma dati no man go na ini a nyun grontapu. Na wan lobi-ati fasi Yehovah e gebroiki Bijbel nanga en organisâsi na grontapu fu fruteri wi ala den sani disi (Markus 13:10; Galasiasma 5:19-23; 1 Timoteyus 1:12, 13). A frantwortu de na wi now fu gebroiki a fri wani di wi kisi fu Gado fu bosroiti san wi sa du nanga den sani di a e leri wi. Te wi e du sani heri tra fasi leki  Adam, fu di wi e poti prakseri na san Bijbel e taigi wi, dan wi sa teki koni bosroiti. Wi sa sori taki a moro prenspari sani na ini wi libi na fu abi wan bun banti nanga Yehovah.

Son sma wani de fri fu du tra sortu sani

10. Na sortu tra fasi wan tu Kotoigi fu Yehovah wani de fri?

¹⁰ Sontron a kan de so taki wan tu yongusma di de Yehovah Kotoigi, èn sosrefi wan tu bigisma, wani de fri fu du tra sortu sani. Den sani fu a grontapu kan gersi tumusi moi, èn a kan gersi leki den e gi sma furu prisiri. O moro den e prakseri fu den sani disi, o moro den e angri fu du den pôpi sani fu a grontapu di no fiti gi Kresten. Kande den sma disi no e prakseri fu gebroiki drugs, fu dringi sopi te fu drungu, noso fu du hurudu. Ma den e bigin abi demakandra nanga sma di no de tru Kresten, fu di den wani taki den sma disi musu lobi den. Den kan  bigin srefi fu tyari densrefi leki den sma dati na ini a fasi fa den e du èn e taki.​—3 Yohanes 11.

11. Suma e gi trawan deki-ati son leisi fu du ogri?

¹¹ Son leisi, wan sma di e taki dati a e dini Yehovah, e gi trawan deki-ati fu du sani di no fiti gi Kresten. Na dati ben pasa nanga wan tu Kresten fu owruten, èn a srefi sani kan pasa tu na ini a ten fu wi. Furu tron, den sortu sma dati wani du sani di den e si leki prisiri sani, ma den sani di den wani du de teige den wet fu Gado. Den e gi trawan deki-ati fu abi pikinso „prisiri” soleki fa den e kari en. Den ’e pramisi trawan taki den sa kon fri, toku densrefi de srafu fu porifasi’.​—2 Petrus 2:19.

12. San na den takru bakapisi te wan sma e tyari ensrefi tra fasi leki san den wet nanga den gronprakseri fu Gado e taki?

¹² A suku di sma e suku fu de fri na so wan fasi abi takru bakapisi ala ten, fu di den sma di e du disi e pasa den wet fu Gado. Fu eksempre, te wan sma abi seks sondro fu trow, dan dati kan meki a sari noso bruya srefisrefi te fu kaba, noso a kan siki, a kan dede, a kan kisi bere sondro taki a ben wani dati, èn a ben kan meki wan trowlibi broko (1 Korentesma 6:18; 1 Tesalonikasma 4:3-8). Te wan sma e gebroiki drugs, dan a bakapisi fu dati kan de taki a e atibron esi-esi, a no man taki sani soifri, a no man si krin, a e kisi drai-ede, a no man bro bun, a e si freimde sani, èn a kan dede srefi. So wan sma kan tron wan srafu fu drugs, èn dati kan meki taki a o du ogri fu man pai a drugs di a gwenti fu gebroiki. Den srefi sani disi kan pasa te wan sma e dringi tumusi furu sopi (Odo 23:29-35). Den sma di e tyari densrefi na so wan fasi e denki kande taki den fri, ma den e kon si tumusi lati taki den tron srafu fu sondu. Èn sondu na wan takru basi srefisrefi! Te wi e prakseri dipi fu den sani disi now, dan dati kan yepi wi fu kibri wisrefi gi den takru sani dati.​—Galasiasma 6:7, 8.

 Fa problema e bigin?

13. (a) San furu tron e meki taki sma e kisi a lostu fu du sani di e tyari problema kon? (b) Na suma wi musu suku rai fu man frustan san na „takru kompe”? (c) Te yu e piki den aksi na ini paragraaf 13, dan poti krakti tapu a fasi fa Yehovah e si a tori.

¹³ Prakseri fa problema e bigin furu tron. Bijbel e fruteri wi: „Ibri sma e kisi tesi fu di en eigi lostu e hari en èn e kori en. Dan te a lostu gro kon lepi, a e meki sondu; te a sondu du kaba, dan a e tyari dede kon” (Yakobus 1:14, 15). San e wiki a lostu fu wan sma? Na den sani di a sma e prakseri. Furu tron a e kisi den prakseri disi te a abi demakandra nanga trawan di no e hori densrefi na Bijbel gronprakseri. A no de fu taki dati wi alamala sabi taki wi musu wai pasi gi „takru kompe” (1 Korentesma 15:33). Ma suma na wan takru kompe? Fa Yehovah e si a tori disi? Te wi e poti prakseri na den aksi di e kon now èn te wi e suku den bijbeltekst di kari, dan dati sa yepi wi fu frustan den sani dati krin.

A de so taki fu di trawan e lespeki son sma, meki wi kan tron mati fu den sma dati? (Genesis 34:1, 2, 18, 19)

A de so taki den tori fu san den e taki, kande den lafutori, e sori efu a bun fu abi krosibei demakandra nanga den? (Efeisesma 5:3, 4)

Fa Yehovah e firi te wi e suku fu abi krosibei demakandra nanga sma di no lobi en? (2 Kroniki 19:1, 2)

A kan taki wi e wroko noso e go na skoro nanga sma di no abi a srefi bribi leki wi. Ma fu san ede wi musu tan luku bun? (1 Petrus 4:3, 4)

Te wi e luku telefisi nanga felem, te wi e gebroiki na Internet, èn te wi e leisi buku, tijdschrift, nanga koranti, dan na den fasi dati wi abi demakandra nanga trawan.  Nanga sortu tori di wi e si noso e leisi wi musu luku bun? (Odo 3:31; Yesaya 8:19; Efeisesma 4:17-19)

Fa Yehovah kan si na den mati di wi e teki sortu sma wi de? (Psalm 26:1, 4, 5; 97:10)

14. Na sortu fasi sma sa de fri na ini a ten di e kon te den e gi yesi now na a rai fu Gado Wortu?

¹⁴ A nyun grontapu fu Gado de leti na wi fesi. Nanga yepi fu a hemel Kownukondre tiri fu Gado, libisma sa kon fri fu a krakti fu Satan èn fu en heri ogri seti fu sani. Safrisafri, Gado sa puru ala den sani di sondu tyari kon tapu libisma. Leki bakapisi fu dati, wi sa kon abi wan volmaakti frustan nanga wan volmaakti skin, so taki wi sa man prisiri fu têgo fu a libi na ini Paradijs. Te fu kaba ala sani di Gado meki sa de fri, fu di den sa abi a „yeye fu Yehovah” (2 Korentesma 3:17). A no de wan koni sani fu lasi ala den sani disi, soso fu di wi no wani teki den rai fu Gado Wortu, a no so? Meki wi gebroiki a fri wani di wi abi leki Kresten na wan koni fasi na ini a ten disi. Te wi e du dati, dan wi alamala e sori krin taki a sani di wi wani trutru na „a glori fri fu den pikin fu Gado”.​—Romesma 8:21.

Takimakandra fu luku baka san wi leri

• Na sortu fasi a fosi man nanga uma ben de fri? Fa disi ben de heri tra fasi leki san libisma e ondrofeni now?

• Fa tru Kresten de fri? Fa disi e difrenti fu a fri di grontapu sma wani?

• Fu san ede a de so prenspari fu wai pasi gi takru kompe? Tra fasi leki Adam, dan suma wi e arki te wi wani sabi san ogri?

[Aksi fu a tori disi]

[Prenki na tapu bladzijde 46]

Gado Wortu e gi wi a warskow: „No kori unsrefi. Takru kompe e pori bun gwenti”