Kapitel tinafo

Fa Yehovah e tiri na organisâsi fu en?

1. San Bijbel e tyari kon na krin fu na organisâsi fu Yehovah, èn fu san ede dati de prenspari gi wi?

GADO abi wan organisâsi? Den Buku fu Bijbel di skrifi nanga yepi fu santa yeye e sori wi taki a abi wan organisâsi trutru. Wan pisi fu na organisâsi disi de na ini hemel. Na ini en Wortu, Gado e meki wi kon sabi pikinso fu a kefalek bigi organisâsi disi (Esekièl 1:1, 4-14; Danièl 7:9, 10, 13, 14). Aladi wi no kan si a pisi disi fu na organisâsi nanga wi ai, toku a abi furu krakti tapu tru anbegiman na ini a ten disi (2 Kownu 6:15-17). Na organisâsi fu Yehovah abi wan tra pisi tu di wi man si, èn disi de na grontapu. Bijbel e yepi wi fu frustan san na a pisi disi èn fa Yehovah e tiri en.

San na a pisi di wi man si?

2. Sortu nyun gemeente Gado ben seti?

² A nâsi Israel ben de a gemeente fu Gado 1545 yari langa (Tori fu den Apostel 7:38). Ma Israel no ben hori ensrefi na den wet fu Gado èn a no ben gi yesi na Gado en eigi Manpikin. Leki bakapisi fu dati, Yehovah drai en baka gi a gemeente dati èn a gowe libi en. Yesus ben taigi den Dyu: „Luku! Gado o gowe libi na oso gi unu” (Mateyus 23:38). Baka dati, Gado ben seti wan nyun gemeente nanga san a ben meki wan nyun frubontu. A gemeente disi ben o abi 144.000 sma di Gado ben o teki fu libi na ini hemel makandra nanga en Manpikin.​—Openbaring 14:1-4.

3. San ben pasa na a Pinksterfesa fu 33 G.T., èn fa dati e sori krin taki Gado ben e gebroiki wan nyun gemeente now?

 ³ Den fosi sma fu a nyun gemeente dati ben kisi salfu nanga a santa yeye fu Yehovah na a Pinksterfesa fu 33 G.T. Bijbel e taki fu a tumusi aparti sani disi di ben pasa: „Tapu a dei fu a Pinksterfesa den alamala ben de makandra na wán presi, èn wantronso wan babari komoto fu hemel leki te wan tranga winti e wai, èn a ben de fu yere na ini a heri oso pe den ben e sidon na ini. Ne den si tongo di ben de leki faya èn den tongo disi go sidon tapu na ede fu ibriwan fu den sma drape; ne den alamala kisi santa yeye” (Tori fu den Apostel 2:1-4). Na so wan fasi a yeye fu Gado sori krin taki disi ben de a grupu sma now, di Gado ben o gebroiki fu du san a ben abi na prakseri. Den ben o du dati na ondro a tiri fu Yesus Krestes di de na ini hemel.

4. Suma na den memre fu na organisâsi fu Yehovah na grontapu?

⁴ Na ini a ten disi, soso wan fikapisi fu den 144.000 de na grontapu. Ma soleki fa Bijbel profeititori ben taki na fesi, dan „wan bigi ipi” fu milyunmilyun „tra skapu”, tyari kon makandra nanga a salfu fikapisi. Yesus, a Bun Skapuman, tyari den tra skapu disi kon na wán nanga a fikapisi, so taki den tron wán ipi nomo na ondro Yesus, a wán Skapuman fu den (Openbaring 7:9; Yohanes 10:11, 16). Ala den sma disi makandra de wán gemeente, èn dati na a organisâsi fu Yehovah na grontapu.

Wan organisâsi di Gado e tiri

5. Suma e tiri na organisâsi fu Gado, èn fa dati e pasa?

⁵ Bijbel e taki fu „a gemeente fu a libi Gado”. Den wortu disi e sori krin suma e tiri a gemeente. Na organisâsi na wan theokrasia organisâsi. Dati wani taki dati Gado e tiri en. Yehovah e sorgu taki a pipel fu en e kisi tiri fu Yesus di de na ini hemel. En na a sma di Gado poti leki Edeman fu a  gemeente. Boiti dati, Gado e tiri a pipel fu en tu nanga yepi fu en eigi Wortu, Bijbel.​—1 Timoteyus 3:14, 15; Efeisesma 1:22, 23; 2 Timoteyus 3:16, 17.

6. (a) Fa wi kan si taki a gemeente ben kisi tiri komoto fu hemel na ini a fosi yarihondro? (b) San e sori taki Yesus na a Edeman fu a gemeente ete?

⁶ A tiri disi ben de krin fu si na a Pinksterfesa (Tori fu den Apostel 2:14-18, 32, 33). A ben de krin fu si di na engel fu Yehovah ben taigi sma fu go preiki a bun nyunsu na ini Afrika. A tiri disi ben de fu si tu di a sten fu Yesus ben taigi Saulus fu Tarsis san a ben musu du di a ben teki a Kresten bribi. Èn a ben de fu si di Petrus bigin preiki gi sma di no ben de Dyu (Tori fu den Apostel 8:26, 27; 9:3-7; 10:9-16, 19-22). Ma baka wan pisi ten, sma no ben yere nowan sten moro di ben komoto fu hemel, sma no ben si engel moro, èn den no ben kisi santa yeye na wan wondru fasi moro. Toku Yesus ben pramisi: „Mi sa de nanga unu ala dei te na a kaba fu a grontapu disi” (Mateyus 28:20; 1 Korentesma 13:8). Na ini a ten disi, Yehovah Kotoigi e agri taki Yesus e tiri a gemeente. Awinsi sma e gens a preikiwroko fu den na wan ogri-ati fasi, toku den man meki a Kownukondre boskopu bekènti. Sondro a tiri fu Yesus, den no ben o man du dati kwetikweti.

7. (a) Suma na „a getrow èn koni srafu”, èn fu san ede dati de so? (b) Sortu wroko a „srafu” ben kisi fu du?

⁷ Wan syatu pisi ten bifo Yesus dede, dan a ben fruteri den disipel fu en fu „a getrow èn koni srafu”. Yesus di ben de a Masra fu a „srafu” disi, ben o gi en spesrutu frantwortu. A srafu ben o de na grontapu te a Masra ben go na hemel, èn a ben o tan wroko tranga ete te Krestes drai kon baka leki Kownu fu a Kownukondre. Wi no kan taki dati a „srafu” disi na wán sma nomo, bika wán sma no ben o man du a wroko dati. Ma a salfu gemeente fu Krestes ben o man fu du dati. Yesus ben kari a gemeente disi en „srafu”  fu di a ben bai en nanga en brudu. A ben gi den sma fu a gemeente dati a komando fu meki disipel èn fu gi den nyanyan doronomo, noso fu gi den „[yeye] nyanyan na a reti ten”.​—Mateyus 24:45-47; 28:19; Yesaya 43:10; Lukas 12:42; 1 Petrus 4:10.

8. (a) Sortu frantwortu a srafu grupu abi now? (b) Fu san ede wi musu poti prakseri na a fasi fa wi e si den rai di Gado e gi wi nanga yepi fu a srafu grupu?

⁸ Na ini 1914, a Masra drai kon baka sondro taki libisma ai ben man si en. Na a ten dati, a srafu grupu ben e du a wroko fu En na wan getrow fasi ete. Buweisi de taki den ben kisi moro bigi frantwortu na ini 1919. Sensi a ten dati den preiki fu a Kownukondre na heri grontapu, èn den e tyari wan bigi grupu anbegiman fu Yehovah kon makandra fu yepi den fu kisi frulusu fu a bigi banawtu (Mateyus 24:14, 21, 22; Openbaring 7:9, 10). Den sma disi abi yeye nyanyan fanowdu tu, èn den e kisi a nyanyan dati fu a srafu grupu. Fu dati ede, efu wi wani prisiri na ati fu Yehovah, dan wi musu teki den rai di a e gi wi nanga yepi fu a srafu grupu disi èn wi musu fiti den rai dati tu.

9, 10. (a) Sortu seti na ini a fosi yarihondro ben yepi den Kresten fu preiki a bun nyunsu èn fu lusu afersi di ben abi fu du nanga sani di den ben e leri? (b) Sortu seti de now fu orga a wroko fu a pipel fu Yehovah na ini a ten disi?

⁹ Son leisi, aksi e opo kon di abi fu du nanga den sani di wi e leri èn nanga a fasi fa sani seti. San e pasa dan? Tori fu den Apostel kapitel 15 e fruteri wi fa den ben lusu wan tori di ben abi fu du nanga sma di no ben de Dyu èn di ben tron Kresten. Den ben go na Yerusalem fu tyari a tori go na fesi den apostel nanga den owruman, di ben e dini leki wan tiri skin. A no de so taki den man dati noiti no ben e meki fowtu, ma toku Gado ben gebroiki den. Den ben luku bijbeltekst di ben abi fu du nanga a tori. Den ben luku den buweisi tu di ben sori taki a yeye fu Gado ben seni sma fu  go preiki gi den sma di no ben de Dyu. Baka dati, den ben teki wan bosroiti. Gado ben blesi a seti dati (Tori fu den Apostel 15:1-29; 16:4, 5). A tiri skin dati ben poti sma na wroko èn ben seni den fu preiki a Kownukondre go doro.

¹⁰ Na ini a ten fu wi den memre fu a Tiri Skin fu na organisâsi fu Yehovah na grontapu, na brada fu difrenti kondre di salfu nanga santa yeye. A Tiri Skin disi de na a edekantoro fu Yehovah Kotoigi. Na ondro a tiri fu Yesus Krestes, a Tiri Skin e orga a preikiwroko fu Yehovah Kotoigi na ini den tin dusundusun gemeente fu den, èn na so fasi a e yepi fu seti a soifri anbegi na ini ala kondre. Den brada fu a Tiri Skin abi a srefi denki leki na apostel Paulus di ben skrifi den Kresten brada nanga sisa fu en: „A no de so taki wi na basi fu un bribi, ma wi e wroko makandra nanga unu, so taki unu kan de nanga prisiri, bika a bribi fu unu e meki taki unu e tanapu.”​—2 Korentesma 1:24.

11. (a) Fa brada e kisi a frantwortu fu dini leki owruman nanga dinari ini a diniwroko? (b) Fu san ede wi musu wroko makandra nanga den brada di kisi spesrutu frantwortu na ini a gemeente?

¹¹ Yehovah Kotoigi na heri grontapu e frutrow taki a Tiri Skin sa teki brada di man tyari frantwortu. Den brada disi e kisi a frantwortu fu poti owruman nanga dinari ini a diniwroko fu sorgu den gemeente. Bijbel e sori san na den markitiki di den brada musu doro fu man dini leki owruman noso leki dinari ini a diniwroko. Ma Bijbel e sori tu taki den man disi no de volmaakti èn taki den e meki fowtu. Den owruman di e luku sortu brada doro den markitiki fu kisi wan spesrutu frantwortu na ini a gemeente, èn den owruman di e poti brada na wroko, e tyari wan seryusu frantwortu na fesi Gado (1 Timoteyus 3:1-10, 12, 13; Titus 1:5-9). Dati meki den e begi Gado fu a santa yeye yepi den, èn den e suku rai na ini a Wortu fu En (Tori fu den  Apostel 6:2-4, 6; 14:23). Meki wi sori warderi gi den ’libisma disi di a gi wi leki presenti’ èn di e yepi wi fu kon „de wán na ini a bribi”.​—Efeisesma 4:8, 11-16.

12. Fa Yehovah e gebroiki umasma na ini a theokrasia seti?

¹² Bijbel e sori taki mansma abi a frantwortu fu teki fesi na ini a gemeente. Disi no wani taki dati umasma no de prenspari, fu di sonwan fu den sa de memre fu a Kownukondre na ini hemel, èn den e du a moro bigi pisi fu a preikiwroko (Psalm 68:11). Boiti dati, te umasma e sorgu den osofamiri ala ten, dan na so fasi den e meki a gemeente kisi  wan moro bun nen (Titus 2:3-5). Ma a de so taki den wan di musu gi leri na ini a gemeente na mansma, fu di na den kisi a frantwortu fu du dati.​—1 Timoteyus 2:12, 13.

13. (a) Fa owruman musu si a frantwortu fu den, soleki fa Bijbel e gi den leki rai? (b) Sortu grani wi alamala abi?

¹³ Na ini a grontapu disi, trawan e si den sma di abi biginen leki prenspari sma, ma na ini na organisâsi fu Gado a de heri tra fasi. Bijbel e taki: „A sma di e tyari ensrefi leki a moro lagiwan fu un alamala, na a sma dati bigi” (Lukas 9:46-48; 22:24-26). Bijbel e gi owruman a rai fu no prei basi gi den wan di Gado ben gi den leki wan gudu. Ma na presi fu dati, den musu de eksempre gi den wan di de leki skapu (1 Petrus 5:2, 3). A no de so taki wan pikin grupu nomo abi a grani fu taki fu a Moro Hei Tiriman fu hemel nanga grontapu. Ma ala Kotoigi fu Yehovah, mansma nanga umasma, abi a grani fu taki nanga sakafasi na ini a nen fu en èn fu fruteri sma na ala presi fu a Kownukondre fu en.

14. Taki fu den aksi di skrifi na a kaba fu a paragraaf, aladi yu e gebroiki den bijbeltekst di kari.

¹⁴ A bun fu aksi wisrefi: ’Mi e frustan fa Yehovah e tiri na organisâsi fu en na grontapu? Mi abi warderi gi dati trutru? Mi e sori disi na ini a fasi fa mi e denki, den sani di mi e taki, èn den sani di mi e du?’ Te wi e denki dipi fu den penti di e kon now, dan dati kan yepi ibriwan fu wi fu ondrosuku wisrefi.

Efu mi e saka misrefi trutru na ondro Krestes leki na Edeman fu a gemeente, dan san mi sa du soleki fa den bijbeltekst dyaso e sori? (Mateyus 24:14; 28:19, 20; Yohanes 13:34, 35)

Te mi e sori warderi gi den sani di a srafu grupu nanga a Tiri Skin e seti fu gi wi yeye nyanyan, dan gi suma mi e sori lespeki? (Lukas 10:16)

 Fa ibri sma na ini a gemeente, spesrutu den owruman, musu tyari densrefi te den e wroko nanga makandra? (Romesma 12:10)

15. (a) San wi e sori nanga a fasi fa wi e si na organisâsi fu Yehovah na grontapu? (b) Na sortu fasi wi kan sori taki Didibri na wan leiman èn fa wi kan prisiri na ati fu Yehovah?

¹⁵ Yehovah e tiri wi na ini a ten disi nanga yepi fu en organisâsi na grontapu, èn Krestes na a Edeman. A fasi fa wi e denki fu a seti disi e sori suma wi e si leki a sma di abi a reti fu tiri wi (Hebrewsma 13:17). Satan e taki dati wi e broko wi ede nanga wisrefi nomo. Ma wi e sori taki Didibri na wan leiman te wi de klariklari fu du iniwan sani di abi fu du nanga a diniwroko fu Gado, èn te wi no e du sani di e meki sma poti tumusi furu prakseri na wi tapu. Wi e prisiri na ati fu Yehovah te wi lobi èn e lespeki den sma di e teki fesi na wi mindri, ma wi musu weigri fu ’prèise sma soso fu kan kisi wini fu dati’ (Yudas 16; Hebrewsma 13:7). Te wi de getrow na a organisâsi fu Yehovah, dan wi e sori taki Yehovah na wi Gado èn taki wi e anbegi en na ini wánfasi.​—1 Korentesma 15:58.

Takimakandra fu luku baka san wi leri

• San na a organisâsi fu Yehovah na grontapu na ini a ten disi? San na a marki fu na organisâsi disi?

• Suma na a Edeman fu a gemeente, èn sortu sani a seti na grontapu fu tiri wi na wan lobi-ati fasi?

• Sortu bun fasi wi musu kweki fu man handri na wan yoisti fasi nanga den sma na ini na organisâsi fu Yehovah?

[Aksi fu a tori disi]

[Prenki na tapu bladzijde 133]

Yehovah e tiri wi nanga yepi fu en organisâsi na grontapu, èn Krestes na a Edeman