Kapitel tu

Gi Yehovah glori leki a wan-enkri tru Gado

1. Suma na a wan-enkri tru Gado?

BIJBEL e taki dati aladi furu sma noso sani de di sma e si leki gado, toku „gi wi trutru wán Gado nomo de, a Tata” (1 Korentesma 8:5, 6). A „wán Gado” dati na Yehovah, a Mekiman fu ala sani (Deuteronomium 6:4; Openbaring 4:11). Yesus ben taki fu en leki „mi Gado nanga un Gado” (Yohanes 20:17). A ben agri nanga Moses, di ben taki wan leisi: „Yehovah na a tru Gado; nowan tra gado de boiti en” (Deuteronomium 4:35). Yehovah hei moro iniwan sma noso sani di sma e anbegi, soleki popki, libisma di den e gi glori, noso en feanti Satan Didibri, „a gado fu a seti fu sani disi” (2 Korentesma 4:3, 4). Heri tra fasi leki ala den gado disi, Yehovah na „a wan-enkri tru Gado”, soleki fa Yesus ben kari en.​—Yohanes 17:3.

2. Fa den sani di wi e kon sabi fu Gado musu meki wi kenki wi libi?

² Sma di abi warderi gi Gado e kon lobi en te den e kon sabi den tumusi moi fasi fu En, èn te den e kon sabi den sani di A du èn di a o du gi wi ete. O moro den e kon lobi Yehovah, o moro den wani gi en glori. Fa den e du dati? Wán fasi fa den e du dati na fu fruteri trawan fu en. Na Romesma 10:10 skrifi: „Nanga a mofo, wan sma e meki bekènti na publiki fa fu kisi frulusu.” Wan tra fasi fa den e du dati na fu de leki Gado na ini den sani di den e taki èn e du. Efeisesma 5:1 e taki: „Waka na baka na eksempre  fu Gado leki lobi pikin.” Fu man du dati moro bun, dan a de fanowdu taki wi kon sabi sortu sma Yehovah de trutru.

3. San na den prenspari fasi fu Gado?

³ Na ini a heri Bijbel furu bijbeltekst de di e sori wi san na den tumusi moi fasi fu Gado. Den fo prenspari fasi fu en na koni, retidu, krakti, nanga lobi. ’Na en, koni de’ (Yob 12:13). „Ala den pasi fu en na retidu” (Deuteronomium 32:4). A abi „tumusi bigi krakti” (Yesaya 40:26). „Gado na lobi” (1 Yohanes 4:8). Ma sortuwan fu den fo prenspari fasi fu Gado e kon moro krin na fesi? Sortuwan fu den e sori wi krinkrin sortu Gado a de?

„Gado na lobi”

4. Sortuwan fu den fasi fu Gado ben de tumusi prenspari di a meki hemel nanga grontapu nanga ala libisani?

⁴ Prakseri fu san ede Yehovah ben meki hemel nanga grontapu, den yeye na hemel di abi frustan, èn sosrefi libisma. A de so taki a du dati fu di a koni, noso fu di a abi krakti? Nôno. Aladi Gado ben gebroiki a koni nanga a krakti fu en, toku a no de so taki a meki ala sani, soso fu sori taki a koni noso taki a abi krakti. A no de so tu taki Gado ben musu gi trawan libi, soso fu di a de wan Gado fu retidu. Na presi fu dati, fu di Gado lobi libisma so te, meki a gi den na okasi tu fu prisiri fu a libi. Lobi meki taki a ben wani dati den sma di e gi yesi na en musu libi fu têgo na ini wan Paradijs (Genesis 1:28; 2:15). Lobi meki tu taki a seti sani fu puru a sondu di Adam ben tyari kon tapu libisma.

5. San na a moro prenspari fasi fu Yehovah soleki fa Bijbel e fruteri, èn fu san ede dati de so?

⁵ Sobun, fu ala den fasi di Gado abi, dan a lobi fu en na a wan di de moro krin fu si. Lobi na a moro prenspari  fasi fu Gado. A koni, a retidu, nanga a krakti fu en de prenspari, ma Bijbel noiti no e taki dati Yehovah na wan fu den sani dati. Na a tra sei, Bijbel e taki dati Yehovah na lobi. Iya, ensrefi na lobi. Te Gado e sori lobi, dan a no e meki den firi fu en basi en, ma a e hori ensrefi na den gronprakseri fu en. Te A e sori a lobi disi, dan a e hori ensrefi na san tru èn na san regtfardiki. Disi na a moro hei fasi fu lobi, fu di Yehovah Gado srefi e sori a lobi dati. Gado e sori nanga disi taki a e prakseri a tanbun fu trawan doronomo, èn a lobi fu en de fu si ala ten na den sani di a e du.

6. San e meki taki wi man sori den fasi fu Gado, aladi a hei moro wi?

⁶ Na fu di Gado e sori a tumusi moi lobi disi, dati meki wisrefi man sori den fasi fu En. A kan taki wi leki sondu sma di e meki fowtu, e denki taki noiti wi no sa man du sani soifri soleki fa Gado e du sani. Ma ete wan sani de di e sori taki Yehovah lobi wi srefisrefi: A sabi san wi man du èn san wi no man du, èn a no e fruwakti fu wi taki wi e du sani sondro fu meki fowtu. A sabi taki now wi no de volmaakti kwetikweti (Psalm 51:5). Fu dati ede Psalm 130:3, 4 e taki: „Efu na fowtu yu ben musu luku, o Yah, o Yehovah, dan suma ben kan tan tanapu? Bika na yu e gi pardon trutru.” Iya, Yehovah na ’wan Gado di abi sari-ati nanga switifasi, di no e atibron esi-esi èn di abi lobi bun-ati pasa marki’ (Exodus 34:6). „Yu, o Yehovah, bun èn de klariklari fu gi pardon” (Psalm 86:5). Disi e gi wi trowstu trutru! A switi srefisrefi fu dini a bigi Gado disi èn fu firi taki a e sorgu wi na wan lobi-ati fasi èn nanga furu sari-ati!

7. Fa wi kan si a lobi fu Yehovah na den sani di a meki?

⁷ Wi kan si a lobi fu Yehovah sosrefi na den sani di a  meki. Prakseri den furu bun sani di Yehovah gi wi so taki wi kan prisiri fu den, soleki den moi bergi, busi, liba, nanga se. A gi wi someni difrenti sani di switi fu nyan èn di e gi wi krakti. Boiti dati, Yehovah meki someni moi bromki nanga den switi smeri fu den, èn a meki kefalek moi meti tu. A meki sani di ben o gi libisma prisiri, aladi a no ben abi fu du dati. A tru taki wi no man prisiri dorodoro fu den sani di a meki, fu di wi e libi na ini wan ogri grontapu èn fu di wi de nanga sondu now (Romesma 8:22). Ma prakseri nomo san Yehovah sa du gi wi na ini a Paradijs! A psalm skrifiman e gi wi a dyaranti: „Yu e opo yu anu èn e meki ala libisani kisi den [bun] sani di den wani.”​—Psalm 145:16.

8. San na a moro moi fasi fa Yehovah sori lobi gi wi?

⁸ San na a moro moi fasi fa Yehovah sori lobi gi libisma? Bijbel e fruteri wi: „Gado ben lobi grontapu so te, taki a gi wi en wan-enkri Manpikin, so taki ala sma di sori taki den e bribi na ini en, no ben sa dede, ma taki den kan kisi têgo libi” (Yohanes 3:16). Yehovah du disi fu di libisma bun so? Romesma 5:8 e piki: „Gado ben sori fa a lobi wi, fu di Krestes dede gi wi, aladi wi ben de sondari ete.” Iya, Gado ben seni en volmaakti Manpikin kon na grontapu fu gi en libi leki wan frulusu-ofrandi fu frulusu wi fu sondu nanga dede (Mateyus 20:28). Disi meki taki den sma di lobi Gado kan kisi têgo libi. Wi de nanga tangi na ati taki Gado sori lobi gi ala sma di de klariklari fu du a wani fu en, fu di Bijbel e fruteri wi: „Gado no lobi a wan sma moro leki a trawan, ma na ini ibri nâsi a man di e frede en èn e du san de regtfardiki, bun gi en.”​—Tori fu den Apostel 10:34, 35.

9. San wi musu du fu di wi sabi taki Yehovah gi en Manpikin leki wan lusu-paiman gi wi?

⁹ Fu di Yehovah gi en Manpikin leki wan lusu-paiman  gi wi, meki wi kan kisi têgo libi. Fa a sani disi musu abi krakti tapu a fasi fa wi e gebroiki wi libi now? A musu meki wi kisi moro lobi gi a tru Gado, Yehovah. Na a srefi ten, a musu meki wi wani arki Yesus, di de a takiman fu Gado. „[Yesus] dede gi ala sma, so taki den wan di e libi, no musu libi gi densrefi moro, ma gi a sma di dede gi den” (2 Korentesma 5:15). A e gi prisiri fu waka baka Yesus, fu di a ben sori lobi nanga sari-ati na a srefi moi fasi fa Yehovah du dati! Disi de fu si na san Yesus ben taigi den sma di ben wani arki en: „Un kon na mi, unu alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti.”​—Mateyus 11:28-30.

Fa fu sori lobi gi trawan

10. San na wan tu fasi fa wi kan sori lobi gi wi Kresten brada nanga sisa?

¹⁰ Fa wi kan sori taki wi abi a srefi sortu lobi gi wi Kresten brada nanga sisa leki san Yehovah nanga Yesus abi gi wi? Luku den difrenti fasi fa wi kan du disi: „Lobi abi langa pasensi èn a abi switifasi. Lobi no e dyarusu, a no e dyaf, a no abi bigifasi, no e tyari ensrefi na wan fasi di no e fiti, no e suku en eigi bun, no e kisi atibron. A no e memre na ogri fu trawan. A no e prisiri fu onregtfardikifasi, ma a e prisiri nanga waarheid. A e frudrage ala sani, e bribi ala sani, e howpu ala sani, e teki ala sani. Lobi no e misi noiti.”​—1 Korentesma 13:4-8; 1 Yohanes 3:14-18; 4:7-12.

11. Gi suma moro wi musu sori lobi, èn fa wi musu du dati?

¹¹ Gi suma moro wi musu sori lobi, èn fa wi musu du dati? Yesus ben taki: „Fu dati ede, go na ala kondre  èn meki sma tron disipel, èn dopu den na ini a nen fu a Tata, fu a Manpikin èn fu a santa yeye. Un musu leri den fu du ala san mi taigi unu” (Mateyus 28:19, 20). Disi wani taki dati wi musu prati a bun nyunsu fu Gado en nyun paradijs grontapu di e kon, nanga den sma di no de wi Kresten brada nanga sisa ete. Yesus ben sori krin taki wi no musu sori lobi nomo gi den wan di abi a srefi bribi leki wi, fu di a ben taki: „Efu unu lobi [soso] den sma di lobi unu, sortu bun unu du dan? Den sma di e teki belasting moni gi lanti no e du a srefi sani tu? Efu na soso den brada fu unu, unu e gi odi, dan sortu spesrutu sani unu du dan? Den tra pipel no e du a srefi sani tu?”​—Mateyus 5:46, 47; 24:14; Galasiasma 6:10.

„Waka na ini a nen fu Yehovah”

12. Fu san ede Gado en nen e fiti en wawan?

¹² Wan tra prenspari fasi fa wi kan gi a tru Gado glori na te wi sabi a nen fu en, te wi e gebroiki en, èn te wi e leri trawan na aparti nen fu en, namku Yehovah. A psalm skrifiman ben fruteri san a ben winsi srefisrefi: „Taki sma kan sabi taki yu, di nen na Yehovah, yu wawan na a Moro Heiwan na heri grontapu” (Psalm 83:18). A nen Yehovah wani taki „A e meki sani du kon”. En na a Gran Sma di ala ten e du san a abi na prakseri èn san a e pramisi. Soso a wan-enkri tru Gado abi a reti fu tyari a nen dati, fu di libisma noiti no kan gi a dyaranti taki den muiti fu den sa abi bun bakapisi (Yakobus 4:13, 14). Yehovah wawan kan taki dati den sani di a e taki ’sa abi bun bakapisi fu tru’ (Yesaya 55:11). Furu sma e prisiri te den e si fu a fosi tron na ini den Bijbel fu den san na a nen fu Gado èn san a nen dati wani taki (Exodus 6:3). Ma den sa kisi wini fu den sani di den e kon sabi soso te den e „waka na ini a nen fu Yehovah . . . fu têgo”.​—Mika 4:5.

13. San a wani taki fu sabi a nen fu Yehovah èn fu waka na ini a nen fu en?

 ¹³ Psalm 9:10 e taki fu a nen fu Gado: „Den sma di sabi yu nen sa frutrow tapu yu.” Disi wani taki moro leki fu sabi a nen Yehovah nomo. Te wan sma sabi a nen fu Gado, dan dati no wani taki ete dati a sma e frutrow na en tapu. Fu sabi a nen fu Gado wani taki dati wi e frustan sortu Gado Yehovah de. A wani taki tu dati wi e lespeki en leki tiriman, taki wi e gi yesi na den komando fu en, èn taki wi e frutrow tapu en na ini ala sani (Odo 3:5, 6). Na so a de tu te wi e waka na ini a nen fu Yehovah. Disi wani taki dati wi e du ala san Yehovah e aksi wi èn taki wi e tyari en nen leki wan anbegiman fu en. A wani taki dati wi e gebroiki wi libi trutru soleki fa Gado wani (Lukas 10:27). Yu e du dati?

14. Boiti taki wi e si en leki wan plekti fu dini Yehovah, dan san moro de fanowdu fu man dini en fu têgo?

¹⁴ Efu wi wani dini Yehovah fu têgo, dan wi no musu du dati nomo fu di a de wi plekti. Aladi Timoteyus ben e dini Yehovah furu yari kaba, toku na apostel Paulus ben gi en a rai disi: „Yu musu wroko tranga fu sreka yusrefi, so taki yu kan dini Gado fayafaya” (1 Timoteyus 4:7). Te wi abi furu warderi gi wan sma, dan wi de klariklari fu du ala sani gi a sma dati. Sobun, te wi abi furu warderi nanga lespeki gi Yehovah, dan wi sa wani „dini en fayafaya”. Wi e sori taki wi lobi Yehovah fu di wi abi furu lespeki gi en èn gi den markitiki fu en. A lespeki disi di wi abi gi Gado e meki taki wi wani fu ala sma hori en nen hei. A de prenspari taki wi e kisi lobi nanga lespeki gi Gado efu wi wani waka fu têgo na ini a nen fu Yehovah, a wan-enkri tru Gado.​—Psalm 37:4; 2 Petrus 3:11.

15. Fa wi kan sori taki wi e dini Gado wawan?

¹⁵ Fu man dini Gado na wan fasi di a feni bun, dan wi  musu anbegi en wawan, fu di a de „wan Gado di wani taki sma e dini en wawan” (Exodus 20:5). Wi no kan lobi Gado èn na a srefi ten lobi na ogri grontapu di abi Satan leki gado (Yakobus 4:4; 1 Yohanes 2:15-17). Yehovah sabi heri bun sortu sma ibriwan fu wi e pruberi fu de (Yeremia 17:10). Efu wi lobi regtfardikifasi trutru, dan a e si dati èn a sa yepi wi fu kakafutu gi den aladei problema fu wi. A e horibaka gi wi nanga a krakti santa yeye fu en, so taki wi kan wai pasi gi den ogridu di lai na ini a grontapu disi (2 Korentesma 4:7). A sa yepi wi sosrefi fu tan hori a tranga howpu di wi abi fu libi fu têgo na tapu wan paradijs grontapu. Dati na wan tumusi moi howpu fu tru! Wi musu abi bun furu warderi gi a howpu dati èn wi musu de klariklari tu fu dini a tru Gado, Yehovah, di e gi wi na okasi fu kisi têgo libi.

16. San yu musu du, makandra nanga milyunmilyun tra sma?

¹⁶ Milyunmilyun sma na heri grontapu prisiri taki den teki a kari fu a psalm skrifiman di skrifi: „Gi Yehovah glori makandra nanga mi, un pipel, èn meki wi alamala makandra hei a nen fu en” (Psalm 34:3). Yehovah e gi yu a kari fu gi en glori makandra nanga a grupu fu sma di e gro dei fu dei na ini ala kondre.

Takimakandra fu luku baka san wi leri

• Sortu sma Yehovah de? Fa wi e kisi wini te wi e kon leri sabi den fasi fu en moro bun?

• Fa wi kan sori lobi gi tra sma?

• San a wani taki fu sabi a nen fu Yehovah èn fu waka na ini a nen fu en?

[Aksi fu a tori disi]

 [Prenki na tapu bladzijde 14]

Fu di Yehovah lobi sma so te, meki a ’sa opo en anu èn meki ala libisani kisi den sani di den wani’