Kapitel tinaseibi

Gi yesi na den wet di Gado poti gi na osofamiri

1. Fa sma kisi wan bun trowlibi fu di den fiti den rai fu Gado Wortu?

YEHOVAH na a Sma di seti a trowlibi, èn a Wortu fu en e gi osofamiri a moro bun rai di den abi fanowdu. Furu sma fiti den rai disi, èn leki bakapisi fu dati den kisi wan bun trowlibi. A moi fu si taki son sma di ben e libi nanga wan tra sma sondro fu trow, kisi a deki-ati fu trow na lanti. Trawan di ben e hori nanga sma dorosei fu den trowlibi, no e du dati moro. Son man ben e meshandri a wefi nanga den pikin fu den, noso den ben e kosi den, ma den kon leri fu sori sari-ati nanga switifasi.

2. Na san wi musu poti prakseri na ini a Kresten osofamiri-libi?

² Na ini a Kresten osofamiri-libi wi musu poti prakseri na furu sani. Fu eksempre: Fa wi e si a trowlibi? O langa wi denki taki trowpatna musu tan nanga makandra? San wi e du fu sorgu wi osofamiri, èn fa wi e libi nanga den sma na ini wi osofamiri? (Efeisesma 5:33–6:4). A kan taki wi sabi san Bijbel e taki fu na osofamiri-libi, ma toku a de wan tra sani te wi musu fiti den rai fu Bijbel. Nowan fu wi wani de leki den sma di Yesus ben e krutu fu di den no ben e du san den wet fu Gado ben taki. Den ben abi a denki taki a ben nofo kaba fu hori densrefi na wan tu sani fu a Wet nomo (Mateyus 15:4-9). Wi no wani de sma di e taki dati den e anbegi Gado, aladi wi no e sori dati na ini wi eigi osofamiri. Na presi fu dati, wi wani de getrow na Gado na ini ala sani. Te wi e du dati, dan wi sa „kisi furu wini” trutru.​—1 Timoteyus 5:4; 6:6; 2 Timoteyus 3:5.

 O langa trowpatna musu tan nanga makandra?

3. (a) San e pasa nanga a trowlibi fu furu sma, ma san musu de wi fasti bosroiti? (b) Gebroiki yu Bijbel fu piki den aksi di skrifi na ondro a paragraaf disi.

³ Na ini a ten disi, moro nanga moro sma e broko trow fu pikinpikin sani ede. Son sma di ben de nanga makandra furu yari langa e bosroiti fu broko trow, èn den e trow nanga wan tra sma. Furu tron wi e yere tu taki yongu sma e prati libi, baka te den trow fu wan syatu pisi ten nomo. Awinsi san tra sma e du, wi musu abi a winsi fu plisi Yehovah. Ma o langa trowpatna musu tan nanga makandra? Meki wi luku den aksi nanga den bijbeltekst di e kon now, fu si san Gado Wortu e taki fu a tori disi.

Te wan man nanga wan uma trow, dan o langa den musu fruwakti fu tan nanga makandra? (Markus 10:6-9; Romesma 7:2, 3)

O ten wawan Gado e gi pasi taki wan sma kan broko trow èn kan trow baka? (Mateyus 5:31, 32; 19:3-9)

Fa Yehovah e feni en te sma e broko trow aladi en Wortu no e gi pasi fu du dati? (Maleaki 2:13-16)

A de so taki Bijbel e gi sma deki-ati fu prati te den kisi problema na ini den trowlibi? (1 Korentesma 7:10-13)

Na ini sortu situwâsi wan sma kan teki a bosroiti fu prati libi? (Psalm 11:5; Lukas 4:8; 1 Timoteyus 5:8)

4. Fu san ede a trowlibi fu son sma e waka bun?

⁴ A trowlibi fu son sma e waka heri bun. Fu san ede? Wán prenspari sani na taki den tu sma musu wakti fu trow teleki den lepi. Ma a de prenspari tu taki wan sma e feni wan patna di e suku fu doro den srefi marki leki en, èn a sma musu man taki fri fu ala sortu sani nanga en patna. Ma wan moro prenspari sani na fu feni wan patna di lobi Yehovah. A musu de wan sma tu di e sori taki a e lespeki  Gado Wortu fu di a e gebroiki en fu lusu problema (Psalm 119:97, 104; 2 Timoteyus 3:16, 17). So wan sma no sa abi a denki taki a kan prati libi, noso taki a kan broko trow te a trowlibi no e waka bun. A no sa sori go na den swakifasi noso den fowtu fu en patna, soso fu di a no wani tyari den frantwortu fu en. Na presi fu dati, a sa poti prakseri na den problema èn a sa suku wan bun fasi fu lusu den.

5. (a) San loyaalfasi na Yehovah abi fu du nanga a trowlibi? (b) Sortu wini wi kan kisi te wi e hori wisrefi na den markitiki fu Yehovah, awinsi wi e kisi gens?

⁵ Satan e taki dati te wi e pina, dan wi no sa gi yesi na den wet fu Yehovah moro (Yob 2:4, 5; Odo 27:11). Ma furu Kotoigi fu Yehovah di nyan pina fu di a patna fu den e gens den, tan hori densrefi na a pramisi di den ben meki na a trowdei fu den. Den e tan loyaal na Yehovah èn na den wet fu en, awinsi san e pasa (Mateyus 5:37). Sonwan fu den di horidoro e prisiri taki now a patna fu den e dini Yehovah tu, aladi a patna ben gens den furu yari langa! (1 Petrus 3:1, 2) Ma son Kresten abi wan patna di no wani kenki, noso a patna fu den gowe libi den fu di den e dini Yehovah. Toku den Kresten disi sabi tu taki Yehovah sa blesi den fu di den e hori densrefi na den markitiki fu En na ini den osofamiri.​—Psalm 55:22; 145:16.

Ibri sma musu du en plekti

6. Gi sortu seti patna musu abi lespeki efu den wani abi wan bun trowlibi?

⁶ A no de fu taki dati wan bun trowlibi wani taki moro leki fu tan nanga makandra nomo. Wan prenspari sani di ibri patna musu abi, na lespeki gi a seti fu Yehovah, namku a posisi fu na edeman. A seti disi e yepi fu meki na osofamiri-libi waka bun èn a e meki den sma na ini na osofamiri firi koloku. Na ini 1 Korentesma 11:3 wi e leisi: „Na ede fu ibri man na Krestes; na ede fu wan uma na a man; na ede fu Krestes na Gado.”

7. Fa na edeman fu na osofamiri musu tyari a frantwortu fu en?

 ⁷ Yu si san a bijbeltekst e kari fosi? Iya, ibri man abi wan Edeman na ondro suma a musu saka ensrefi. Na Edeman dati na Krestes. Disi wani taki dati a masra musu tyari en frantwortu leki edeman soleki fa Yesus e du dati. Krestes e saka ensrefi na ondro Yehovah, a lobi a gemeente trutru, èn a e sorgu gi en (1 Timoteyus 3:15). A „gi ensrefi abra na a gemeente” srefi. Yesus no abi bigifasi, ma ala ten a e hori den firi fu tra sma na prakseri èn a abi „safri-ati nanga sakafasi”. Den sma di e saka densrefi na en ondro e „kisi krakti baka”. Te wan masra e libi na so wan fasi nanga den sma fu en osofamiri, dan a e sori taki a e saka ensrefi na ondro Krestes. Disi sa yepi wan Kresten uma fu frustan taki a sa kisi wini te a e wroko makandra nanga en masra, èn a sa prisiri fu saka ensrefi na ondro en masra leki edeman fu na osofamiri.​—Efeisesma 5:25-33; Mateyus 11:28, 29; Odo 31:10, 28.

8. (a) Fu san ede a kan gersi leki den Kresten markitiki no e wroko na ini son osofamiri? (b) San wi musu du te wi e kisi so wan problema?

⁸ Ma problema sa opo kon. A kan taki son sma na ini na osofamiri no lobi te trawan e taigi den san den musu du. A kan de so taki den ben abi a fasi disi kaba bifo iniwan fu den sma na ini na osofamiri bigin gebroiki den gronprakseri fu Bijbel. Kande wi e aksi den wan sani na wan switi fasi noso wi e taki nanga den na wan lobi-ati fasi, ma a gersi leki a sani dati no e wroko. Wi sabi taki Bijbel e taki dati wi musu puru ala „mandi nanga atibron nanga babari nanga kosikosi” (Efeisesma 4:31). Ma efu wan tu sma fu na osofamiri gwenti fu bari trawan noso efu den e atibron esi, san wi musu du dan? We, Yesus no ben du leki den sma di ben wani du trawan ogri noso di ben e kosi trawan, ma a ben frutrow tapu en Tata (1 Petrus 2:22, 23). Sobun, te  problema e opo kon di kan pori a banti na mindri den sma fu na osofamiri, dan sori taki yu e frutrow tapu Yehovah fu di yu e aksi en na ini begi fu yepi yu, na presi taki yu e go du sani leki den sma fu grontapu.​—Odo 3:5-7.

9. San furu Kresten masra leri fu du, na presi fu suku fowtu na den patna?

⁹ Kenki no e kon esi-esi ala ten, ma te wi abi pasensi èn te wi e fiti den rai fu Bijbel ala ten, dan dati sa abi bun bakapisi trutru. Furu masra kon si taki a trowlibi fu den bigin waka moro bun di den kon frustan fa Krestes e handri nanga a gemeente. A gemeente dati no abi volmaakti sma. Toku Yesus lobi a gemeente, a de wan bun eksempre gi en, èn a e gebroiki den Buku fu Bijbel fu yepi en so taki sani kan waka moro bun. A ben gi en eigi libi gi a gemeente (1 Petrus 2:21). Na eksempre fu Yesus ben gi furu Kresten masra deki-ati fu de wan bun edeman na ini na osofamiri. Den e yepi a patna fu den na wan lobi-ati fasi tu, so taki sani kan waka moro bun na ini a trowlibi fu den. A masra sa abi moro bun bakapisi te a e du den  sani disi leki te a ben o suku fowtu na en patna, noso te a no ben o taki nanga en patna srefisrefi.

10. (a) Fa wan masra noso wan wefi, srefi wan sma di e taki dati en na wan Kresten, kan meki a libi muilek gi trawan na ini na osofamiri? (b) San den kan du fu meki a situwâsi kon bun?

¹⁰ Fa a de te wan masra no e meki muiti fu frustan fa den sma na ini en osofamiri e firi? Fa a de te a no e seti sani fu abi Bijbel takimakandra nanga na osofamiri, noso fu du tra sani makandra? Noso fa a de te wan wefi no e wroko makandra nanga en masra èn te a no e sori sakafasi, soleki fa Gado e fruwakti fu en? Son osofamiri abi bun bakapisi te den e taki na wan lespeki fasi nanga makandra te problema e opo kon (Genesis 21:10-12; Odo 15:22). Ma srefi te sani no e waka soleki fa wi ben fruwakti, toku ibriwan fu wi kan yepi fu meki na osofamiri-libi waka moro bun. Wi kan du dati te wi e sori den froktu fu a yeye fu Gado na ini wi libi, te wi e sori lobi gi den tra sma na ini wi osofamiri èn te wi e hori den firi fu den na prakseri (Galasiasma 5:22, 23). Te wi e wakti fu a tra sma du wan sani fosi, dan wi no sa abi bun bakapisi, ma sani sa waka bun te ibriwan fu wi e du en plekti. Na so fasi wi e sori taki wi e gi yesi na den wet fu Gado.​—Kolosesma 3:18-21.

Pe wi musu suku yepi?

11, 12. San Yehovah gi wi fu yepi wi abi wan bun osofamiri-libi?

¹¹ Sma e suku yepi na someni difrenti presi te den abi rai fanowdu di abi fu du nanga den osofamiri-libi. Ma wi sabi taki a Wortu fu Gado abi den moro bun rai, èn wi breiti taki Gado e sori wi nanga yepi fu en organisâsi na grontapu fa fu fiti den rai dati. Yu e gebroiki den rai dati trutru?​—Psalm 119:129, 130; Mika 4:2.

¹² Boiti taki yu e go na den gemeente konmakandra, dan yu poti wan fasti ten na wan sei tu fu studeri Bijbel nanga  yu osofamiri? Osofamiri di e du dati kan wroko makandra fu anbegi Gado na ini wánfasi. Na osofamiri-libi fu den e kon moro bun te den e fiti Gado Wortu na ini den eigi osofamiri.​—Deuteronomium 11:18-21.

13. (a) Te wi abi wan tu aksi di abi fu du nanga na osofamiri, dan pe wi kan feni bun yepi? (b) San musu de fu si na ini ala den bosroiti di e wi teki?

¹³ Kande yu abi wan tu aksi di abi fu du nanga na  osofamiri. Fu eksempre: fa a de nanga den sani di sma e gebroiki fu no kisi pikin? A de so taki noiti a no bun fu puru bere? Fa a de te wan pikin no lobi yeye afersi? A de so taki a musu teki prati na den sani di na osofamiri e du na ini na anbegi fu Gado? Den buku di Yehovah Kotoigi tyari kon na doro e piki furu fu den sortu aksi disi. Leri fa yu musu gebroiki den buku di e yepi sma fu frustan Bijbel. Fu eksempre, na index kan yepi yu fu feni piki tapu den aksi fu yu. Efu yu no abi den buku di kari na ini na index, dan luku efu den de na ini a bibliotheek fu a Kownukondre zaal. Kande yu kan suku den tapu a computer fu yu. Boiti dati, yu kan taki sosrefi nanga lepi Kresten man nanga uma fu den aksi fu yu. Ma yu no musu fruwakti taki ala ten yu sa feni wan piki di e sori yu krinkrin san yu musu du noso san yu no musu du. Furu tron yusrefi musu teki wan bosroiti, kande yu wawan, noso makandra nanga yu trowpatna. Te yu e teki bosroiti, dan sori taki yu e gi yesi na den wet fu Gado. No du dati nomo te yu de na mindri tra sma, ma du dati sosrefi na ini yu osofamiri.​—Romesma 14:19; Efeisesma 5:10.

Takimakandra fu luku baka san wi leri

• Te wan sma de loyaal na Yehovah, dan fa dati sa yepi en fu de getrow na en trowpatna?

• Te wi e kisi tesi fu di problema de na ini na osofamiri, dan san sa yepi wi fu du san Gado feni bun?

• Fa wi kan meki na osofamiri-libi kon moro bun awinsi trawan na ini na osofamiri abi swakifasi?

[Aksi fu a tori disi]

[Prenki na tapu bladzijde 155]

Wan masra musu tyari en frantwortu leki edeman soleki fa Yesus e du dati

[Prenki na tapu bladzijde 157]

Te yu e studeri Bijbel nanga yu osofamiri doronomo, dan dati e yepi fu tyari wánfasi kon na ini na osofamiri