San a wani taki fu anbegi Gado na ini wánfasi na ini a ten fu wi?
Kapitel wán
San a wani taki fu anbegi Gado na ini wánfasi na ini a ten fu wi?
1, 2. (a) Sortu tumusi moi sani e pasa na ini a ten fu wi? (b) Sortu kefalek moi howpu den opregti sma abi?
NA HERI grontapu wan tumusi moi sani e pasa. Milyunmilyun sma fu ala kondre nanga lo nanga tongo e kon makandra leki wán man fu anbegi Gado. Ibri yari, moro nanga moro sma e kon makandra fu anbegi Gado na ini wánfasi. Bijbel e taki dati den sma disi na „kotoigi” fu Yehovah, èn a e kari den „wan bigi ipi”. Den ’e du santa diniwroko gi Gado dei nanga neti’ (Yesaya 43:10-12; Openbaring 7:9-15). Fu san ede den e du disi? Den e du disi fu di den kon sabi Yehovah leki a wan-enkri tru Gado. Disi e gi den deki-ati fu go libi akruderi den regtfardiki markitiki fu en. Boiti dati, den kon sabi tu taki wi e libi na ini „den lasti dei” fu na ogri grontapu disi, taki Gado sa pori en dyonsro, èn taki a sa tyari wan nyun paradijs grontapu kon na ini a presi fu dati.—2 Timoteyus 3:1-5, 13; 2 Petrus 3:10-13.
2 Gado Wortu e pramisi: „Ete wan syatu pisi ten èn na ogri sma no sa de moro . . . Ma den safri-atisma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki” (Psalm 37:10, 11). „Den regtfardiki sma srefi sa abi grontapu leki a gudu fu den, èn den sa libi na tapu fu têgo” (Psalm 37:29). „[Gado] o figi ala watra puru na den ai; dede no sa de moro, èn nowan sari noso krei noso pen no sa de moro. Den fositen sani pasa gowe.”—Openbaring 21:4.
3. Fa a e du kon taki sma e kon makandra fu anbegi Gado na ini trutru wánfasi?
3 Den sma di e kon na wán now na ini a tru anbegi sa de den fosiwan di o libi na ini a nyun grontapu dati. Den sma disi kon sabi san na a wani fu Gado, èn den e du ala san den man fu du a wani fu en. Yesus ben e sori o prenspari a de fu du dati, di a ben taki: „Efu sma wani kisi têgo libi, dan den musu tan leri fu kon sabi yu, a wan-enkri tru Gado èn a sma di yu seni kon, Yesus Krestes” (Yohanes 17:3). Na apostel Yohanes ben skrifi: „Grontapu e pasa gowe nanga den lostu fu en, ma a sma di e du a wani fu Gado, e tan fu têgo.”—1 Yohanes 2:17.
San a wani taki trutru?
4. (a) San a wani taki trutru dati so furu sma e kon makandra fu anbegi Gado na ini wánfasi na ini a ten fu wi? (b) San Bijbel e taki fu a kon di sma e kon makandra?
4 San a wani taki trutru dati so furu sma e kon makandra na ini a ten fu wi fu anbegi Gado na ini wánfasi? Disi e sori krin taki wi de heri krosibei fu a kaba fu na ogri grontapu disi, èn Gado en nyun grontapu sa kon leti baka dati. Wi e si nanga wi eigi ai fa Bijbel profeititori e kon tru, di ben taki na fesi fu a kon di so furu sma ben o kon makandra. Wan fu den profeititori e taki: „Èn a musu pasa na ini a lasti pisi fu den dei [den lasti dei disi], taki a bergi fu na oso fu Yehovah [a tru anbegi fu en di de hei] sa poti steifi na tapu na ede fu den bergi [a sa hei moro iniwan tra fasi fu anbegi], . . . èn na drape ipi-ipi sma musu go. Èn furu kondre sa go fu tru èn taki: ’Kon, un pipel, èn meki wi go na a bergi fu Yehovah èn na a oso fu a Gado fu Yakob; èn a sa leri wi fu den pasi fu en, èn wi sa waka den pasi fu en.’”—Mika 4:1, 2; Psalm 37:34.
5, 6. (a) Fu san ede wi kan taki dati kondre e go na Yehovah? (b) San wi musu aksi wisrefi?
5 Aladi a no de so taki heri kondre e go na a oso fu Yehovah fu anbegi en, toku milyunmilyun sma fu ala kondre e du dati. Te den e kon sabi a moi prakseri fu Yehovah Gado èn sosrefi den moi fasi fu en, dan dati e naki den ati trutru. Nanga sakafasi den e du muiti fu kon sabi san Gado e fruwakti fu den. Den e begi neleki a psalm skrifiman di ben taki: „Leri mi fu du yu wani, bika yu na mi Gado.”—Psalm 143:10.
6 Yu e si yusrefi na mindri a bigi ipi sma di Yehovah e tyari kon makandra now fu anbegi en na ini wánfasi? San yu e du nanga a leri di yu e kisi fu en Wortu? Den sani di yu e du e sori trutru taki yu e frustan taki a leri dati e kon fu Yehovah? Yu sa „waka den pasi fu en” ala ten?
Fa a wánfasi e du kon?
7. (a) Omeni sma sa kon makandra te fu kaba fu anbegi Gado na ini wánfasi? (b) Fu san ede a de tumusi prenspari taki wi e tron wan anbegiman fu Yehovah now, èn fa wi kan yepi trawan fu du dati?
7 Yehovah wani taki ala mekisani nanga frustan e kon makandra fu anbegi en na ini wánfasi. Fu tru, wi e angri fu si a dei te ala libisma sa anbegi a wan-enkri tru Gado! (Psalm 103:19-22) Ma bifo a sani dati kan pasa, dan Yehovah musu pori ala den wan di e weigri fu du a regtfardiki wani fu en. Fu di Gado abi sari-ati nanga sma, meki a e fruteri den na fesi san a sa du, so taki sma na ala sei kan kisi na okasi fu drai den libi (Yesaya 55:6, 7). Fu dati ede „ala kondre, lo, tongo, nanga pipel” e kisi a seryusu kari disi na ini a ten fu wi: „Un frede Gado èn gi en glori, bika a yuru fu krutu sma doro kaba; fu dati ede, anbegi a Sma di meki hemel nanga grontapu nanga a se nanga den watrafonten” (Openbaring 14:6, 7). Yu teki a kari dati? Efu yu du dati, dan yu abi a grani fu gi tra sma wan kari tu fu kon leri sabi a tru Gado èn fu anbegi en.
8. San wi musu pruberi fu du moro fara baka di wi kon sabi den moro prenspari leri fu Bijbel?
8 Yehovah no wani anbegiman di e tan suku den eigi wini aladi den e taki dati den e bribi na ini en. Gado wani taki sma e „kon sabi a wani fu [en] finifini” èn disi musu de krin fu si na ini a libi fu den (Kolosesma 1:9, 10). Sobun, den sma di e warderi den moro prenspari leri fu Bijbel, e meki muiti fu tron lepi Kresten. Den abi a winsi fu kon leri sabi Yehovah moro bun, den wani frustan a Wortu fu en moro fini, èn den wani fiti dati moro bun na ini den libi. Den e meki muiti fu sori den srefi fasi di a hemel Tata fu wi abi, èn den e pruberi fu si sani soleki fa en e si sani. Disi e gi den deki-ati fu luku fa den kan teki prati na a wroko di Yehovah gi den fu du na grontapu na ini a ten fu wi, so taki sma kan kisi frulusu. Yu abi a winsi dati tu?—Markus 13:10; Hebrewsma 5:12–6:3.
9. Na sortu fasi wi kan abi trutru wánfasi now?
9 Bijbel e sori taki den wan di e dini Yehovah musu dini en leki wán man (Efeisesma 4:1-3). Wi musu abi a wánfasi disi nownow kaba, awinsi wi e libi na ini wan grontapu pe sma e tyari pratifasi kon èn awinsi wi e feti ete nanga den swakifasi di wi abi leki sondu sma. Yesus ben begi nanga en heri ati efu ala den disipel fu en ben kan de wán, noso efu den ben kan abi trutru wánfasi. San ben o de a bakapisi fu disi? Na a fosi presi, den ben o abi wan bun banti nanga Yehovah èn nanga en Manpikin. Leki nomru tu, den ben o de na ini wánfasi nanga makandra (Yohanes 17:20, 21). Fu man kisi a wánfasi dati, dan a Kresten gemeente na a organisâsi di Yehovah e gebroiki fu gi en pipel leri.
San e yepi fu tyari wánfasi kon?
10. (a) Sortu wini wi e kisi te wi e gebroiki a Bijbel fu feni piki tapu aksi di abi fu du nanga wi? (b) Ondrosuku den prenspari sani di e yepi fu tyari wánfasi kon na mindri Kresten fu di yu e piki den aksi di kari na ini a paragraaf disi.
10 Seibi prenspari sani e kari na ondrosei di e yepi fu tyari wánfasi kon. Te yu e piki den aksi na ini a paragraaf disi, dan prakseri fa ibri tori abi krakti tapu a banti di yu abi nanga Yehovah èn nanga den Kresten brada nanga sisa fu yu. Te yu e prakseri fu den prenspari sani disi èn te yu e suku den bijbeltekst di kari, dan dati sa yepi yu fu kisi a koni fu Gado, yu sa leri gebroiki yu frustan bun, èn yu sa kisi a koni fu man si sani krin. Disi na sani di wi alamala abi fanowdu (Odo 5:1, 2; Filipisma 1:9-11). Luku den prenspari sani disi wan-fru-wan.
(1) Wi e agri taki Yehovah abi a reti fu taki san bun èn san no bun. „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.”—Odo 3:5, 6.
Fu san ede wi musu suku a rai nanga a tiri fu Yehovah te wi e teki bosroiti? (Psalm 146:3-5; Yesaya 48:17)
(2) Wi abi Gado Wortu fu tiri wi. „Di unu kisi Gado wortu di unu ben yere fu wi, unu no ben teki a wortu leki a wortu fu libisma, ma leki a wortu fu Gado, èn na dati a de trutru; a wortu dati e wroko tu na ini unu bribiman.”—1 Tesalonikasma 2:13.
San na a kefar te wi e du wan sani soso fu di wi e „firi” taki a bun? (Odo 14:12; Yeremia 10:23, 24; 17:9)
San wi musu du te wi no sabi sortu rai Bijbel e gi fu wan spesrutu afersi? (Odo 2:3-5; 2 Timoteyus 3:16, 17)
(3) Wi alamala e kisi wini fu a srefi yeye nyanyan. „Ala den manpikin fu yu sa de sma di Yehovah gi leri” (Yesaya 54:13). „Meki wi hori makandra na ai, so taki wi kan gi makandra deki-ati fu lobi trawan èn fu du bun wroko; no meki wi lasi a gwenti fu kon makandra, soleki fa son sma lasi a gwenti kaba, ma meki wi gi makandra deki-ati, spesrutu fu di a dei e kon krosibei.”—Hebrewsma 10:24, 25.
Sortu wini sma e kisi te den e gebroiki ala den sani di Yehovah seti fu gi wi yeye nyanyan? (Yesaya 65:13, 14)
(4) Wi no abi libisma leki fesiman, ma Yesus Krestes. „Unu no musu meki sma kari unu Leriman, bika wán sma nomo na un leriman, ma un alamala na brada. Sosrefi, no kari nowan sma na grontapu un tata, bika wán sma nomo na un Tata, dati na a Wan di de na hemel. Unu no musu meki sma kari unu ’fesiman’ tu, bika wán sma nomo na un Fesiman, dati na Krestes.”—Mateyus 23:8-10.
Iniwan fu wi musu denki taki wi hei moro trawan? (Romesma 3:23, 24; 12:3)
(5) Wi e frutrow tapu Gado Kownukondre leki a wan-enkri tiri di sa frulusu libisma. „Fu dati ede unu musu begi so: ’Wi Tata na hemel, yu nen musu kon santa. Yu kownukondre musu kon. Yu wani musu du na grontapu leki fa a e pasa na hemel.’ Fu dati ede, tan suku a kownukondre nanga En regtfardikifasi fosi èn unu sa kisi ala den tra sani tu.”—Mateyus 6:9, 10, 33.
Fa wi e kibri a wánfasi fu wi te wi ’e tan suku a kownukondre fosi’? (Mika 4:3; 1 Yohanes 3:10-12)
(6) Santa yeye e meki taki den anbegiman fu Yehovah e kisi fasi di de tumusi prenspari fu tyari wánfasi kon na mindri Kresten. „Den froktu fu a yeye na lobi, prisiri, vrede, langa-pasensi, bun-atifasi, bunfasi, bribi, safri-atifasi, dwengi yusrefi.”—Galasiasma 5:22, 23.
San wi musu du fu meki a yeye fu Gado wroko na wi tapu, so taki wi kan sori den froktu fu a yeye? (Tori fu den Apostel 5:32)
Te wi abi a yeye fu Gado, dan sortu krakti dati sa abi tapu a banti di wi abi nanga Kresten brada nanga sisa? (Yohanes 13:35; 1 Yohanes 4:8, 20, 21)
(7) Ala tru anbegiman fu Gado e preiki a bun nyunsu fu a Kownukondre fu en. „A bun nyunsu disi fu a kownukondre o preiki na a heri grontapu pe sma e libi, so taki ala kondre kan yere dati, èn dan a kaba o kon.”—Mateyus 24:14.
San musu meki taki wi wani teki prati dorodoro na a preikiwroko disi? (Mateyus 22:37-39; Romesma 10:10)
11. San na a bakapisi te wi e fiti den tru tori fu Bijbel na ini wi libi?
11 Te wi e anbegi Yehovah makandra na ini wánfasi, dan dati e meki wi kon abi wan moro tranga banti nanga en. A e meki tu taki wi man kon makandra nanga tra anbegiman fu Yehovah di e gi wi trowstu nanga deki-ati. Psalm 133:1 e taki: „Luku! O bun èn o switi a de te brada e libi makandra na ini wánfasi!” A switi trutru fu komopo na ini a grontapu disi pe furu sma e prakseri densrefi nomo, e du hurudu èn e du ogri nanga tranga, èn fu kon makandra nanga den wan di lobi Yehovah trutru èn di e hori den wet fu en!
Wai pasi gi sani di e tyari pratifasi kon
12. Fu san ede wi musu wai pasi gi a denki taki sma man libi sondro Gado?
12 Efu wi no wani pori a tumusi warti wánfasi di wi abi na heri grontapu, dan wi musu wai pasi gi sani di e tyari pratifasi kon. Wan fu den sani disi na a denki di sma abi taki den man libi sondro Gado èn sondro den wet fu en. Yehovah e yepi wi fu wai pasi gi a denki disi fu di a e sori wi fu suma a denki disi e komopo, namku fu Satan Didibri (2 Korentesma 4:4; Openbaring 12:9). Satan na a sma di ben sutu faya gi Adam nanga Efa fu no arki san Gado ben taki èn fu teki bosroiti di no ben kruderi nanga a wani fu Gado. Disi ben abi takru bakapisi gi den èn sosrefi gi wi (Genesis 3:1-6, 17-19). A grontapu disi lai nanga sma di e denki taki den man libi sondro Gado èn sondro den wet fu en. Fu dati ede wi musu luku bun taki wi no e kisi a denki dati.
13. Fa wi kan sori taki wi e sreka wisrefi trutru gi a libi na ini a regtfardiki nyun grontapu fu Gado?
13 Fu eksempre, prakseri a tumusi moi pramisi fu Yehovah fu puru a disiten ogri grontapu èn fu poti nyun hemel nanga wan nyun grontapu na ini a presi fu dati, pe „regtfardikifasi sa de” (2 Petrus 3:13). A no de so taki a sani dati musu gi wi deki-ati fu bigin sreka wisrefi fu libi na a ten dati te regtfardikifasi sa de na ala sei? Disi wani taki dati wi musu gi yesi na a rai fu Bijbel di e taki krin: „No lobi grontapu nanga den sani fu grontapu. Efu wan sma lobi grontapu, dan a lobi fu a Tata no de na ini en” (1 Yohanes 2:15). Fu dati ede, wi e wai pasi krinkrin gi a denki fu den sma na ini a grontapu disi di e libi sondro wet, èn wi e tan fara tu fu sma di e poti tumusi furu prakseri na densrefi, di e du hurudu, èn di e du ogri nanga tranga. Wi e meki a tron wan gwenti fu arki Yehovah èn fu gi yesi na en nanga wi heri ati, awinsi a sondu skin fu wi wani du wan tra sani. A heri fasi fa wi e tyari wi libi e sori krin taki wi e denki èn e du sani akruderi a wani fu Gado.—Psalm 40:8.
14. (a) Fu san ede a de prenspari fu gebroiki na okasi now fu leri sabi den markitiki fu Yehovah èn fu gebroiki den na ini wi libi? (b) San den bijbeltekst di kari na ini a paragraaf wani taki gi wi?
14 Te a ten fu Yehovah doro fu pori na ogri seti fu sani disi èn sosrefi ala den sma di lobi a libi fu grontapu, dan a no sa wakti fu du dati. A no sa skoifi a dei fu en poti na wan tra ten. A no sa kenki den markitiki fu en fu yepi den sma di sabi èn e du a wani fu Gado, ma di na a srefi ten wani tan du den sani fu grontapu tu. Now na a ten fu du wan sani! (Lukas 13:23, 24; 17:32; 21:34-36) Fu dati ede a e gi wi prisiri fu si taki a bigi ipi e gebroiki a tumusi moi okasi disi! Den de fayafaya fu teki a leri di Yehovah e gi den nanga yepi fu en Wortu nanga en organisâsi, èn den e waka leki wán man na tapu den pasi fu en go na a nyun grontapu. Èn o moro wi e kon leri sabi Yehovah, o moro wi sa kon lobi en èn wi sa wani dini en.
Takimakandra fu luku baka san wi leri
• Fa Yehovah wani taki wi e anbegi en?
• San wi musu pruberi fu du moro fara, baka di wi kon sabi den moro prenspari leri fu Bijbel?
• San ibriwan fu wi kan du fu anbegi Yehovah na ini wánfasi makandra nanga tra anbegiman fu en?
[Aksi fu a tori disi]
[Prenki na tapu bladzijde 4]
’Den safri-atisma sa abi grontapu leki a gudu fu den, èn den sa feni switi prisiri na ini vrede di sa de pasa marki’
