Kapitel dri

Tan hori faste na a Wortu fu Gado

1. (a) Fa Israel fu owruten ben ondrofeni taki Gado wortu tru? (b) Fu san ede dati de prenspari gi wi?

„UNU sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu” (Yosua 23:14-16). Disi na san Yosua ben taigi den owruman fu Israel, baka di den go tan na ini a Pramisi Kondre. Iya, den ben kan poti frutrow trutru na ini den pramisi fu Yehovah. A tori dati, èn sosrefi ala den tra tori na ini Bijbel, ben kibri bun gi wi so taki „wi ben sa abi howpu”.​—Romesma 15:4.

2. (a) Na sortu fasi „Gado srefi ben meki sma skrifi” Bijbel? (b) Sortu frantwortu wi abi fu di wi sabi taki Bijbel e kon fu Gado?

² Aladi Yehovah gebroiki sowan 40 libisma fu skrifi Bijbel, toku ensrefi na a Gran Skrifiman fu en. A de so taki ensrefi taigi den ala sani di den ben musu skrifi na ini? Iya. Yehovah ben gebroiki en krakti santa yeye, a wroko krakti fu en, fu du dati. Na apostel Paulus ben abi leti di a ben taki: „Na Gado srefi ben meki sma skrifi ala den Santa Buku . . . so taki a sma fu Gado kan kon bun dorodoro èn a kan de srekasreka fu du ibri bun wroko.” Sma na ala sei di abi na overtoigi disi e poti prakseri na Bijbel, èn den e libi akruderi den sani di den e leri fu Bijbel.​—2 Timoteyus 3:16, 17; 1 Tesalonikasma 2:13.

 Yepi trawan fu frustan èn fu warderi Bijbel

3. San na a moro bun fasi fa wi kan yepi furu sma di no e bribi taki Bijbel na a Wortu fu Gado?

³ Furu sma nanga suma wi e taki no abi a srefi overtoigi leki wi, taki Bijbel na a Wortu fu Gado. Fa wi kan yepi den sma disi? Furu tron, a moro bun fasi fu du dati na fu opo a Bijbel èn fu sori den san skrifi na ini. „A wortu fu Gado de na libi, a abi krakti èn a srapu moro wan feti-owru di e koti na tu sei, . . . a man si krin san sma e prakseri èn san de ini den ati” (Hebrewsma 4:12). „A wortu fu Gado” a no soso wan buku nanga tori fu owruten di wi no man gebroiki moro na ini a ten fu wi. Nôno, a abi krakti! Den pramisi na ini Bijbel sa kon tru seiker. A boskopu na ini Bijbel e naki wan sma ati moro leki iniwan sani di wisrefi ben sa kan taki fu gi a sma deki-ati.

4. Sortu tru tori fu Bijbel meki taki son sma kon denki tra fasi fu Bijbel, èn fu san ede dati de so?

⁴ Furu sma go ondrosuku Bijbel moro bun di den si taki a nen fu Gado skrifi na ini. Trawan teki a bosroiti fu studeri Bijbel fu di sma sori den na ini a Bijbel san na a marki fu a libi, fu san ede Gado e gi pasi taki ogri de, èn san den sani di e pasa now wani taki. Den kon sabi tu taki sma kan libi fu têgo na tapu wan paradijs grontapu. Na ini son kondre, den sani di sma ben e du na ini na anbegi fu den meki taki ogri yeye ben e trobi den. Di den sma disi yere taki Bijbel e fruteri fa den problema disi e kon èn fa den kan kon fri fu den ogri yeye disi, dan den ben wani sabi moro. Fu san ede den sani disi e naki na ati fu opregti sma? Disi de so fu di Bijbel na a wan-enkri buku di den kan frutrow trutru te den wani kon sabi moro fu den sortu prenspari afersi disi.​—Psalm 119:130.

5. (a) Fu san ede son sma e taki dati den no e bribi na ini Bijbel? (b) Fa wi kan yepi den sortu sma disi?

⁵ Ma fa a de efu sma e taigi wi taki den no e bribi na ini  Bijbel? Wi musu tapu a takimakandra dan? Wi no musu du dati efu den wani taki-go-taki-kon fu a tori. A kan de so taki den e si Bijbel leki wan buku fu Krestenhèit. Na ini den hondrohondro yari di pasa, den kerki fu Krestenhèit kisi a nen taki den abi hoigrifasi, den e bumui nanga politiek, èn den e aksi moni ala ten. A kan taki den sani disi meki taki den sma kisi wan takru denki fu Bijbel. Fu san ede yu no e aksi den sma efu den sani dati meki taki den no e bribi na ini Bijbel? Te wi e fruteri den taki Bijbel e krutu a grontapu fasi fa den kerki fu Krestenhèit e tyari densrefi, dan dati kan meki taki den sa wani sabi moro fu Bijbel. Wi kan taki nanga den sosrefi fu wan tu sani di e sori taki den leri fu den kerki fu Krestenhèit e difrenti krinkrin fu san a tru Krestendom e leri.​—Mika 3:11, 12; Mateyus 15:7-9; Yakobus 4:4.

6. (a) Fu san ede yusrefi abi na overtoigi taki Bijbel na a Wortu fu Gado? (b) Sortu tra buweisi wi kan tyari kon na fesi fu yepi sma frustan taki Bijbel e kon fu Gado trutru?

⁶ Wi kan yepi tra sma fu kisi warderi gi Bijbel te wi e tyari buweisi kon na fesi di e sori taki Bijbel komopo fu Gado. Fu san ede yu e bribi taki Bijbel e kon fu Yehovah Gado? Yu e bribi disi fu di Bijbel srefi e taki fu pe a komopo? Noso yu e bribi disi fu di Bijbel lai nanga profeititori di e sori finifini san o pasa na ini a ten di e kon? Yu kon si taki den profeititori disi ben musu fu komopo na wan sma di hei moro libisma? (2 Petrus 1:20, 21) Yu e bribi taki Bijbel e kon fu Gado fu di den tori e fiti moi na makandra, aladi 40 sma skrifi en na ini wan pisi ten fu sowan 1600 yari? Noso na fu di Bijbel e fruteri soifri fa ala sani meki, aladi dati no de so nanga tra sani di sma skrifi na a ten dati? Yu e bribi disi fu di den skrifiman no ben hori noti na baka te den ben e fruteri sani fu densrefi? Noso na fu di Bijbel de  ete aladi sma du tranga muiti fu pori en? Ala sani di ben naki yu ati, yu kan gebroiki tu fu yepi tra sma. *

A leisi di wi e leisi Bijbel

7, 8. (a) San wi musu du nanga Bijbel? (b) San moro wi abi fanowdu boiti taki wi e leisi Bijbel? (c) Fa yusrefi kon frustan san Yehovah abi na prakseri?

⁷ Boiti taki wi e yepi trawan fu bribi na ini Bijbel, dan wisrefi musu teki ten fu leisi en doronomo. Yu e du dati? A buku disi na a moro prenspariwan fu ala den buku di oiti ben meki. A de krin taki disi no wani taki dati wi no abi noti moro fanowdu te wi e leisi Bijbel wi wawan. Bijbel e warskow wi taki wi no musu hori wisrefi aparti fu trawan. Wi no musu denki taki wi sa man frustan ala sani te wi e ondrosuku sani sondro a yepi fu trawan. Boiti taki wisrefi e studeri, dan a de prenspari tu taki wi e go na den konmakandra fu a pipel fu Gado doronomo, so taki wi kan de Kresten di e si sani na a yoisti fasi.​—Odo 18:1; Hebrewsma 10:24, 25.

⁸ Bijbel e taki fu a sani disi ini a tori fu wan tiriman fu Etiopia di ben e leisi a profeititori fu Yesaya. Wan engel ben taigi Filipus, wan Kresten preikiman fu a bun nyunsu, fu go na a man dati fu aksi en: „Yu e frustan trutru san yu e leisi?” Na Etiopiaman piki en nanga sakafasi: „Fu tru, fa mi ben sa man du dati dan, efu nowan sma e leri mi?” A begi Filipus fu fruteri en a pisi tori fu Bijbel. We, Filipus no ben de wan man di ben e leisi Bijbel en wawan nomo, èn a no ben e fruteri sma fa ensrefi ben denki fu den Buku fu Bijbel. A ben tan abi krosibei demakandra nanga Gado en organisâsi na grontapu. Fu dati ede a ben kan yepi na Etiopiaman fu kisi wini fu a leri di Yehovah ben e gi den  anbegiman fu en nanga yepi fu na organisâsi dati (Tori fu den Apostel 6:5, 6; 8:5, 26-35). Na so a de tu na ini a ten fu wi. Sondro a yepi fu trawan, nowan sma man frustan soifri san na den prakseri fu Yehovah. Wi alamala abi a yepi fanowdu di Yehovah e gi wi na wan lobi-ati fasi nanga yepi fu en organisâsi na grontapu.

9. Sortu sani seti so taki wi alamala kan kisi wini fu a leisi di wi e leisi Bijbel?

⁹ Fu yepi wi frustan Bijbel, dan na organisâsi fu Yehovah e tyari tori fu Bijbel kon na krin na wan tumusi bun fasi na ini difrenti publikâsi. Boiti dati, wi musu leisi wan pisi fu Bijbel ibri wiki gi a Theokrasia Diniwroko-skoro di e hori na ini ala den gemeente fu Yehovah Kotoigi na heri grontapu. Wi kan kisi furu wini te wisrefi e meki muiti fu ondrosuku den Santa Buku fu Bijbel (Psalm 1:1-3; 19:7, 8). Du muiti spesrutu fu leisi Bijbel doronomo. Awinsi yu no e frustan ala sani so bun, toku yu sa kisi wini te yu e frustan a moro prenspari tori fu a heri Bijbel. Fu eksempre, te yu e leisi fo noso feifi bladzijde ibri dei, dan yu kan kaba leisi a heri Bijbel na ini wán yari so.

10. (a) O ten yu e leisi Bijbel? (b) Nanga suma moro yu musu leisi Bijbel, èn fu san ede a de prenspari fu du dati doronomo?

¹⁰ O ten yu kan leisi Bijbel? Awinsi yu e teki 10 noso 15 miniti wan dei fu leisi Bijbel, toku yu sa kisi furu wini fu dati. Efu yu no man du dati, dan pruberi fu poti wan faste ten ibri wiki fu leisi Bijbel, èn tan hori yusrefi na a ten dati. Efu yu trow, dan yu nanga yu patna kan prisiri fu leisi Bijbel gi makandra nanga wan tranga sten. Efu yu abi pikin di man leisi kaba, dan ibriwan fu den kan leisi wan pisi nanga wan tranga sten. A leisi di yu e leisi Bijbel musu de wan gwenti yu heri libi langa, neleki fa yu gwenti fu nyan ibri dei. Soleki fa yu sabi, dan wan sma di no e nyan bun sa kon siki te fu kaba. Sobun, efu wi wani frustan den sani di abi fu du nanga Gado èn efu wi wani kisi têgo libi te fu  kaba, dan wi musu abi a gwenti tu fu gi yesi doronomo na „ibri wortu di Yehovah mofo taki”.​—Mateyus 4:4.

A marki di wi musu suku fu doro

11. Sortu marki wi musu suku fu doro te wi e leisi Bijbel?

¹¹ Sortu marki wi musu suku fu doro te wi e leisi Bijbel? A marki fu wi no musu de soso fu leisi wan tu bladzijde. Wi musu abi leki marki fu kon sabi Gado moro bun, so taki wi kan kisi moro lobi gi en èn wi sa dini en na wan fasi di a feni bun (Yohanes 5:39-42). Wi musu abi a srefi denki neleki a Bijbel skrifiman di ben taki: „Meki mi kon sabi den pasi fu yu, o Yehovah; leri mi den pasi fu yu.”​—Psalm 25:4.

12. (a) Fu san ede a de fanowdu fu kisi „soifri sabi”? Te wi e leisi, dan sortu muiti wi musu meki fu kisi a sabi dati? (b) San na den fo penti di kan yepi wi fu frustan moro bun san wi e leisi na ini Bijbel? (Luku a faki na tapu bladzijde 30.) (c) Piki den aksi na ini a paragraaf disi, aladi yu e gebroiki den penti disi. Suku den bijbeltekst di kari.

¹² Fu di a de so taki den sani di wi e leri e komopo na Yehovah, meki wi musu angri fu kisi „soifri sabi”. Efu wi no abi a sabi dati, dan fa wi sa man fiti Gado Wortu na wan bun fasi na ini wi libi? Fa wi sa man fruklari trawan na wan bun fasi san den sani na ini Gado Wortu wani taki? (Kolosesma 3:10; 2 Timoteyus 2:15) Fu man kisi soifri sabi, dan wi musu leisi bun san skrifi. Efu wan pisi tori de muilek fu frustan, dan a kan taki wi musu leisi a pisi tori dati moro leki wán leisi fu frustan san a wani taki. Wi sa kisi wini tu te wi e teki ten fu denki dipi fu den sani di wi leisi, èn te wi e prakseri fu difrenti fasi fa wi kan gebroiki den. Na tapu bladzijde 30 wi e si fo prenspari penti di wi kan ondrosuku te wi e leisi wan tori. Te wi e gebroiki wán noso moro fu den penti dati, dan dati kan yepi wi fu frustan furu pisi na ini Bijbel moro bun. Te yu e piki den aksi na tapu den bladzijde di e kon, dan yu sa frustan fa dati de so.

 (1) Furu tron, a pisi di yu e leisi na ini Bijbel kan fruteri yu pikinso fu a fasi fa Yehovah de. Fu eksempre, na ini Psalm 139:13, 14 wi e kon sabi fa Gado e broko en ede srefisrefi nanga den pikin di no gebore ete: „Yu ben kibri mi na ini a bere fu mi mama. Mi sa prèise yu fu di yu meki mi na wan tumusi fruwondru fasi di e gi lespeki frede. Den wroko fu yu na wondruwroko, dati mi sili sabi heri bun.” Den wondru sani di Yehovah meki na moi sani fu tru! A fasi fa libisma meki e sori krin taki a lobi wi srefisrefi.

Te wi e leisi Yohanes 14:9, 10 èn te wi e luku fa Yesus ben libi nanga trawan, dan wi e si trutru san Yehovah srefi ben o du. Nanga dati na prakseri, dan san wi kan taki fu Yehovah te wi e leisi den tori di skrifi na ini Lukas 5:12, 13 nanga Lukas 7:11-15?

(2) Luku san a tori abi fu du nanga a moro prenspari tori na ini Bijbel, namku: Yehovah sa sori taki en abi a reti fu tiri ala sani, èn a sa santa en nen nanga yepi fu a Kownukondre na ondro a tiri fu Yesus Krestes, a Siri di Gado ben pramisi.

Fa Esekièl nanga Danièl ben poti krakti tapu a moro prenspari tori na ini Bijbel? (Esekièl 38:21-23; Danièl 2:44; 4:17; 7:9-14)

Fa Bijbel e sori krin taki Yesus na a Siri di Gado ben pramisi? (Galasiasma 3:16)

San Openbaring e taki fu den prenspari sani di a Kownukondre sa du te fu kaba? (Openbaring 11:15; 12:7-10; 17:16-18; 19:11-16; 20:1-3; 21:1-5)

(3) Luku fa yusrefi kan gebroiki den sani di yu e leisi. Fu eksempre, na ini Exodus te nanga Deuteronomium wi e leisi taki den Israelsma ben e du hurudu èn taki den ben opo densrefi teige den wan di ben e teki fesi. Wi e leri taki a fasi fa den sma disi ben e denki èn den sani di den ben e du, ben abi takru bakapisi. Fu dati ede wi musu wani du san  Yehovah feni bun, èn wi kan du dati te wi no e teki a takru eksempre fu Israel. „Den sani disi now, ben tan pasa nanga den leki eksempre èn den ben skrifi den leki wan warskow gi wi, di doro a kaba fu den seti fu sani.”​—1 Korentesma 10:11.

San wi kan leri fu a tori di e taki fu a kiri di Kain ben kiri Abel? (Genesis 4:3-12; Hebrewsma 11:4; 1 Yohanes 3:10-15; 4:20, 21)

Te Bijbel e gi rai na den Kresten di abi a howpu fu libi na hemel, dan dati e fiti sosrefi na den wan di abi a howpu fu libi fu têgo na grontapu? (Numeri 15:16; Yohanes 10:16)

Fu san ede wi musu tan luku san wi kan du moro fu fiti den rai fu Bijbel na ini wi libi, awinsi wi abi wan bun nen kaba na ini a Kresten gemeente? (2 Korentesma 13:5; 1 Tesalonikasma 4:1)

(4) Prakseri fa yu kan gebroiki den sani di yu e leisi fu yepi trawan.  Ala sma e broko den ede nanga a gosontu fu den. Sobun, wi kan leisi nanga den san Yesus ben du, èn na so wan fasi wi kan sori den san a sa du moro fara te a sa tiri leki wan makti Kownu na ini a Kownukondre fu Gado: „Furu sma kon na en, èn den tyari lanman kon, sosrefi malengri sma, breni sma, babaw sma, nanga furu trawan; . . . èn a ben meki den kon betre.”​—Mateyus 15:30.

Suma wi ben sa kan yepi nanga a tori di abi fu du nanga na opobaka fu na umapikin fu Yairus? (Lukas 8:41, 42, 49-56)

13. Sortu bakapisi wi sa abi te wi e tan leisi èn e studeri Bijbel makandra nanga Yehovah en organisâsi?

¹³ Wi e kisi furu wini trutru fu a leisi di wi e leisi Bijbel te wi e poti prakseri na den fo penti di kari na tapusei! A tru taki a de wan tyalensi fu leisi Bijbel. Ma a kan meki wi kisi wini wi heri libi langa, bika te wi e leisi den Buku fu Bijbel, dan wi sa kon sabi Gado nanga den leri fu en moro bun. Te wi e leisi Bijbel doronomo, dan wi sa kon abi wan moro tranga banti nanga wi lobi-ati Tata, Yehovah, èn nanga wi Kresten brada nanga sisa. A sa yepi wi fu gi yesi na a rai fu tan „hori faste na a wortu fu libi”.​—Filipisma 2:16.

[Futuwortu]

Takimakandra fu luku baka san wi leri

• Fu san ede Gado ben meki sma skrifi Bijbel èn kibri en te na ini a ten fu wi?

• Fa wi kan yepi trawan fu frustan èn fu warderi Bijbel?

• Fu san ede a bun fu leisi Bijbel gi wisrefi doronomo? San na den fo penti di kan yepi wi fu frustan moro bun san wi e leisi?

[Aksi fu a tori disi]

[Faki/​Prenki na tapu bladzijde 30]

TE YU E LEISI WAN PISI FU BIJBEL, DAN PRAKSERI

San a e fruteri yu fu a fasi fa Yehovah de

San a abi fu du nanga a moro prenspari tori na ini Bijbel

Fa yu musu fiti dati na ini yu eigi libi

Fa yu kan gebroiki dati fu yepi trawan