Kapitel tinaneigi

Tan preiki a Wortu fu Gado sondro frede

1. (a) Sortu bun nyunsu den disipel fu Yesus ben meki bekènti, ma san sonwan fu den Dyu du di den yere a nyunsu dati? (b) Sortu aksi wi kan poti?

SOWAN 2000 yari pasa, Gado ben salfu en Manpikin, Yesus Krestes, leki a Kownu di o tiri heri grontapu. Kerki gensman ben meki taki tra sma kiri Yesus, ma Yehovah ben gi en wan opobaka na dede. Nanga yepi fu Yesus, sma ben man kisi têgo libi now. Ma di den disipel fu Yesus ben meki a bun nyunsu disi bekènti, dan den ben bigin kisi frufolgu. Sonwan fu den ben poti na strafu-oso èn den ben kisi fonfon srefi nanga tiki noso wipi. Den ben kisi a komando tu fu no taki fu Yesus moro (Tori fu den Apostel 4:1-3, 17; 5:17, 18, 40). San den ben o du? San yu ben o du? Yu ben o tan gi kotoigi sondro frede?

2. (a) Sortu tumusi moi nyunsu musu meki bekènti na ini a ten disi? (b) Suma abi a frantwortu fu preiki a bun nyunsu?

² Na ini 1914 Gado ben poti Yesus Krestes leki Kownu fu en Kownukondre na ini hemel fu tiri ’na mindri den feanti fu en’ (Psalm 110:2). Baka dati, a fringi Satan nanga den ogri yeye fu en go na grontapu (Openbaring 12:1-5, 7-12). Den lasti dei fu a disiten ogri grontapu bigin na ini a yari dati. Te a pisi ten disi kaba, dan Gado sa pori a heri grontapu di de na ondro a makti fu Satan (Danièl 2:44; Mateyus 24:21). Den sma di e tan na libi baka a pori disi, sa abi a howpu fu libi fu têgo na ini wan grontapu di sa tron wan paradijs. Efu yu e bribi trutru na ini a bun  nyunsu disi, dan yu sa wani prati en nanga tra sma (Mateyus 24:14). Ma san yu kan fruwakti? San sma o du te den e yere a nyunsu disi?

3. (a) San sma e du te den e yere a nyunsu fu a Kownukondre? (b) San wi musu aksi wisrefi?

³ Te yu e preiki a bun nyunsu fu a Kownukondre, dan a kan taki wan tu sma de klariklari fu gi yesi, ma furu sma no sa wani arki srefi (Mateyus 24:37-39). Son sma sa spotu yu, noso den sa gens yu. Yesus ben warskow taki a gens disi ben kan komopo fu yu eigi famiri (Lukas 21:16-19). Yu ben sa kan kisi gens tu na yu wrokopresi, noso na skoro. Na ini wan tu kondre na grontapu, lanti tapu a preikiwroko fu Yehovah Kotoigi. Te yu e kisi fu du nanga den sortu situwâsi disi, dan san yu o du? Yu o tan preiki a wortu fu Gado sondro frede? Yu sa tan ’tanapu kánkan na ini a bribi’?​—1 Korentesma 16:13.

Wi no e frutrow tapu wi eigi krakti

4. (a) San na wan prenspari sani di wi musu du fu sori taki wi de getrow futuboi fu Gado? (b) Fu san ede den Kresten gemeente konmakandra prenspari so?

⁴ Wan prenspari sani di wi musu du fu sori taki wi de getrow futuboi fu Yehovah, na fu gebroiki den bun sani di a seti gi wi. Wan fu den sani disi na den gemeente konmakandra. Bijbel e gi wi a deki-ati fu no misi den konmakandra (Hebrewsma 10:23-25). Den wan di tan dini leki getrow Kotoigi fu Yehovah, e meki muiti fu de na den konmakandra doronomo makandra nanga tra anbegiman fu En. Na den konmakandra disi wi e kisi moro sabi fu Bijbel. A kan taki wi sabi wan tu tru tori heri bun kaba, ma na den konmakandra wi e kon frustan den moro krin. Boiti dati, wi e kisi a koni fu si fa wi kan gebroiki den. Wi e kisi wan moro tranga banti nanga wi Kresten brada nanga sisa di e anbegi Gado makandra nanga wi, èn wi e kisi  deki-ati fu du a wani fu Gado. A yeye fu Yehovah e tiri wi na ini a gemeente, èn nanga yepi fu a yeye disi, Yesus de na wi mindri.​—Mateyus 18:20; Openbaring 3:6.

5. Te lanti tapu a wroko fu Yehovah Kotoigi, dan fa den e du nanga den konmakandra?

⁵ Yu e go na ala den konmakandra doronomo? San yu e du nanga den sani di yu yere drape? Yu e gebroiki den na ini yu libi? Son leisi, te lanti tapu a preikiwroko fu Yehovah Kotoigi, dan a de fanowdu fu hori den konmakandra na ini pikin grupu na den oso fu sma. A kan taki den konmakandra e hori na difrenti presi èn tapu difrenti yuru. Boiti dati, a no makriki ala ten fu go na den konmakandra, bika sonwan fu den e hori lati na neti. Ma awinsi a no makriki fu go na den konmakandra èn awinsi kefar de, toku getrow brada nanga sisa e meki tranga muiti fu de na ibri konmakandra.

6. Fa wi e sori taki wi e frutrow tapu Yehovah? Fa disi kan yepi wi fu tan taki sondro frede?

⁶ Wi e leri fu frutrow tapu Yehovah te wi e taki na wan opregti fasi nanga en na ini begi, fu di wi e frustan taki wi abi yepi fu Gado fanowdu. Yu e du dati? Yesus ben e begi furu di a ben e du en diniwroko na grontapu (Lukas 3:21; 6:12, 13; 22:39-44). A neti bifo sma ben spikri en na wan postu, dan a taigi den disipel fu en: „Un tan na ai èn begi, so taki unu no e kisi tesi” (Markus 14:38). Te wi e si taki sma no wani arki a Kownukondre boskopu, dan a kan taki wi no wani du so furu moro na ini a diniwroko. Te sma e spotu wi, noso te den e frufolgu wi, dan a kan taki wi wani tapu nanga a preikiwroko soso fu no kisi problema nanga sma. Ma te wi e begi Gado na wan opregti fasi fu en yeye yepi wi fu taki sondro frede, dan den tesi dati no sa meki wi lasi-ati.​—Lukas 11:13; Efeisesma 6:18-20.

 Wan tori di e sori fa sma ben e gi kotoigi sondro frede

7. (a) Fu san ede a bun fu poti prakseri na a pisi tori na ini a buku Tori fu den Apostel? (b) Piki den aksi di de na a kaba fu a paragraaf disi, èn sori krin fa den sani dati kan yepi wi.

⁷ A bun taki wi alamala e poti prakseri na a pisi tori na ini a buku Tori fu den Apostel. A e fruteri wi fu den apostel nanga den fosi disipel. Den ben de sma di ben abi den srefi firi leki wi. Den sma disi ben kakafutu gi problema èn den ben e taki sondro frede leki getrow kotoigi fu Yehovah. Meki wi ondrosuku wan pisi fu a tori dati nanga yepi fu den aksi nanga den bijbeltekst di e kon now. Aladi wi e du dati, dan luku fa yusrefi kan kisi wini fu san yu e leisi.

Den apostel ben de sma di kisi hei skoroleri? A de so taki den ben de sma di no ben e frede noti, awinsi san ben pasa? (Yohanes 18:17, 25-27; 20:19; Tori fu den Apostel 4:13)

San meki taki Petrus ben man taki sondro frede na fesi a krutubangi fu den Dyu di ben krutu Gado en eigi Manpikin? (Mateyus 10:19, 20; Tori fu den Apostel 4:8)

San den apostel ben e du na ini a pisi ten bifo sma ben tyari den go na fesi a Sanhedrin? (Tori fu den Apostel 1:14; 2:1, 42)

Di den tiriman ben gi den apostel a komando fu no preiki moro na ini a nen fu Yesus, dan san Petrus nanga Yohanes piki den? (Tori fu den Apostel 4:19, 20)

Di den apostel ben kon fri, dan na suma den ben suku yepi baka? Den ben e begi Gado fu sma no frufolgu den moro, noso den ben aksi en wan tra sani? (Tori fu den Apostel 4:24-31)

 Na sortu fasi Yehovah yepi den di gensman pruberi fu tapu a preikiwroko? (Tori fu den Apostel 5:17-20)

Fa den apostel sori taki den ben frustan fu san ede Gado frulusu den? (Tori fu den Apostel 5:21, 41, 42)

Aladi furu fu den disipel ben panya go na difrenti presi fu di den ben kisi frufolgu, toku san den ben tan du? (Tori fu den Apostel 8:3, 4; 11:19-21)

8. Sortu kefalek moi bakapisi a diniwroko fu den fosi disipel ben abi? Fa wi kon abi wan prati na a srefi diniwroko disi?

⁸ A preikiwroko fu a bun nyunsu no ben de fu soso. Sowan 3000 disipel ben teki dopu na a Pinksterfesa fu 33 G.T. „Moro nanga moro man nanga uma ben e kisi bribi na ini Masra” (Tori fu den Apostel 2:41; 4:4; 5:14). Baka wan pisi ten, wan sma di ben e frufolgu a pipel fu Gado na wan ogri-ati fasi, ben tron wan Kresten tu èn a ben bigin taki fu a waarheid sondro frede. A sma disi ben de Saulus fu Tarsus. Sma ben kon sabi en leki na apostel Paulus (Galasiasma 1:22-24). A wroko di ben bigin na ini a fosi yarihondro no kaba ete. Na ini den lasti dei disi, a wroko disi e go na fesi moro nanga moro èn a e du na heri grontapu now. Wi abi a grani fu teki prati na a wroko disi èn aladi wi e du dati, dan wi kan leri wan sani fu na eksempre fu den getrow kotoigi di ben e dini Gado fosi wi.

9. (a) Sortu okasi Paulus ben gebroiki fu gi kotoigi? (b) Na sortu fasi yu e tyari a Kownukondre boskopu gi tra sma?

⁹ San Paulus du di a ben kon leri sabi suma na Yesus Krestes trutru? „Wantewante a bigin preiki fu Yesus . . . taki na En na a Manpikin fu Gado” (Tori fu den Apostel 9:20). A ben abi furu warderi gi a lobi bun-ati di Gado ben sori gi en, èn a ben frustan taki ala sma ben musu yere a bun nyunsu di ensrefi ben kisi fu yere. Paulus ben de wan Dyu, èn soleki fa a gwenti ben de na ini a ten dati, dan  a ben go na den snoga fu gi kotoigi. A ben e preiki oso fu oso tu èn a ben e taki-go-taki-kon nanga den sma na a wowoyo. Boiti dati, a ben de klariklari fu go na tra kontren fu preiki a bun nyunsu.​—Tori fu den Apostel 17:17; 20:20; Romesma 15:23, 24.

10. (a) Fa Paulus, di no ben frede fu taki, ben sori koni te a ben e gi kotoigi na difrenti sortu sma? (b) Fa wi kan de neleki Paulus te wi e gi kotoigi na famiriman, na sma na wrokope, noso na skoromati?

¹⁰ Paulus ben taki sondro frede, ma a ben sori koni tu te a ben e preiki gi difrenti sortu sma, èn wi musu du a srefi. Fu man doro na ati fu den Dyu, dan Paulus ben taki nanga den fu den sani di Gado ben pramisi den fositen tata fu den. Te a ben taki nanga den Grikisma, dan a ben taki fu sani di den sma dati ben sabi bun. Son leisi a ben fruteri sma san ensrefi ben ondrofeni di a ben kon sabi a waarheid, soso fu kan gi den sma kotoigi. A ben taki: „Mi e du ala sani gi a bun nyunsu, so taki mi kan teki prati na en nanga trawan.”​—1 Korentesma 9:20-23; Tori fu den Apostel 22:3-21.

11. (a) San Paulus ben du fu no kisi trobi nanga gensman ibri tron baka? (b) O ten a ben o de wan bun sani fu teki na eksempre fu Paulus, èn fa wi kan du dati? (c) Suma e gi wi a krakti fu tan taki sondro frede?

¹¹ Te sma ben gens Paulus, dan a ben feni en moro bun fu go preiki na ini wan tra kontren fu wan pisi ten. Disi a ben du fu di a no ben wani kisi trobi nanga gensman ibri tron baka (Tori fu den Apostel 14:5-7; 18:5-7; Romesma 12:18). Ma noiti Paulus ben syen fu taki fu a bun nyunsu (Romesma 1:16). Paulus no ben lobi na asranti fasi noso na ogri-atifasi fa den gensman ben e handri nanga en, ma ’Gado yepi en fu kisi deki-ati’ fu tan preiki go doro. A ben taki: „Masra ben tan na mi sei èn a ben gi mi krakti, so taki nanga yepi fu mi a preikiwroko ben kan du  dorodoro” (1 Tesalonikasma 2:2; 2 Timoteyus 4:17). Na Edeman fu a Kresten gemeente, Yesus, e tan gi wi a krakti di wi abi fanowdu fu du a preikiwroko di ben o du na ini a ten fu wi.​—Markus 13:10.

12. Fa wi e sori taki wi leki Kresten no frede fu taki, èn fu san ede wi no abi fu frede?

¹² Fu tru, wi musu tan preiki a wortu fu Gado sondro frede, soleki fa Yesus nanga den tra getrow futuboi fu Gado ben du dati na ini a fosi yarihondro. Disi no wani taki dati wi e preiki gi sma sondro fu hori den firi fu den na prakseri, noso taki wi e dwengi sma fu arki a boskopu te den no wani dati. Ma wi e tan go doro nanga a preikiwroko aladi sma no wani arki, èn wi no e tapu wi mofo te sma e gens wi. Neleki Yesus, wi e sori sma taki Gado Kownukondre na a wan-enkri tirimakti di abi a reti fu tiri heri grontapu. Wi e taki nanga overtoigi fu di wi e taki gi Yehovah, a Moro Hei Tiriman fu hemel nanga grontapu. Boiti dati, a boskopu di wi e meki bekènti no e komoto fu wi, ma fu Yehovah. Èn a lobi di wi lobi Yehovah musu de a moro prenspari sani di e meki taki wi e prèise en.​—Filipisma 1:27, 28; 1 Tesalonikasma 2:13.

Takimakandra fu luku baka san wi leri

• Fu san ede wi musu pruberi fu tyari a Kownukondre boskopu gi ala sma, ma san wi musu fruwakti?

• Fa wi kan sori taki wi no e frutrow tapu wi eigi krakti fu dini Yehovah?

• Sortu warti sani wi e leri fu a buku Tori fu den Apostel?

[Aksi fu a tori disi]

 [Prenki na tapu bladzijde 173]

Na ini a ten disi, den futuboi fu Yehovah e taki Gado wortu sondro frede, soleki fa den ben du dati na ini owruten