Kapitel tinasiksi

„Un musu abi tranga lobi gi makandra”

1. San e fruwondru sma furu tron te den e kon fu a fosi leisi na den konmakandra fu Yehovah Kotoigi?

TE SMA e kon na den konmakandra fu Yehovah Kotoigi fu a fosi leisi, dan furu tron den e fruwondru fu a lobi di den Kotoigi e sori drape. Den sma e si a lobi disi te den Kotoigi e gi den wan switikon èn den e prisiri fu a switi demakandra di den abi. Sma di e kon na den kongres fu wi e si a lobi disi tu. Wan nyunsuman ben skrifi disi fu wan kongres: ’Nowan sma e gebroiki drugs nanga sopi. Nowan sma e meki babari. Nowan sma e pusu wan trawan. Nowan sma e taki dotitaki. Nowan sma e taki fisti lafutori. Nowan sma e smoko. Nowan sma e fufuru. Nowan sma e trowe sani na gron. Disi ben de wan aparti sani trutru.’ Ala den sani disi na wan buweisi fu lobi. Disi na a sortu lobi di „no e tyari ensrefi na wan fasi di no fiti, a no e suku en eigi bun nomo”.​—1 Korentesma 13:4-8.

2. (a) Fa tru Kresten musu sori te fu kaba taki den lobi makandra? (b) Efu wi wani teki na eksempre fu Yesus, dan sortu lobi wi musu kweki?

² A marki fu tru Kresten na taki den lobi makandra leki brada (Yohanes 13:35). Te wi e gro na yeye fasi, dan te fu kaba wi e leri fu sori moro lobi gi trawan. Na apostel Paulus ben e begi efu den Kresten brada nanga sisa fu en ben kan sori lobi „moro nanga moro” (Filipisma 1:9). Na apostel Yohanes ben sori taki te wi lobi trawan, dan wi musu de klariklari fu du bun gi trawan sondro fu prakseri wisrefi nomo. A ben skrifi: „Na so wi kon sabi san na lobi, bika [a  Manpikin fu Gado] gi en libi fu a bun fu wi; wi de fruplekti fu gi wi libi fu a bun fu den brada fu wi” (1 Yohanes 3:16; Yohanes 15:12, 13). Wi ben o gi wi libi trutru gi den brada nanga sisa fu wi? Na ini furu situwâsi a no de fanowdu fu du dati. Ma sortu spesrutu muiti wi e meki fu yepi den now, srefi te disi no makriki ala ten?

3. (a) Na sortu fasi wi kan sori moro lobi gi trawan? (b) Fu san ede a de tumusi prenspari taki wi abi tranga lobi gi makandra na ini ten disi?

³ Boiti taki wi musu de klariklari fu du bun gi trawan, dan wi musu sori tu taki wi lobi den brada nanga sisa fu wi na ini a gemeente nanga wi heri ati. Gado Wortu e gi wi a rai: „Lobi makandra leki brada, komoto fu a dipi fu un ati” (Romesma 12:10). Wi alamala lobi son sma neleki na wi eigi brada noso sisa. Ma wi kan leri fu lobi tra sma na a srefi fasi dati tu? Fu di a kaba fu na owru seti disi e kon krosibei, meki a de tumusi prenspari taki wi e kisi wan moro tranga banti nanga wi Kresten brada nanga sisa. Bijbel e taki: „A kaba fu ala sani kon krosibei. . . . Moro furu, un musu abi tranga lobi gi makandra, bika lobi e tapu furu sondu.”​—1 Petrus 4:7, 8.

Te problema e opo kon

4. (a) Fu san ede problema kan opo kon na mindri den sma na ini wan gemeente? (b) Sortu bun bakapisi wi kan kisi te wi e fiti den rai fu Bijbel, aladi wisrefi no wani du dati ala ten?

⁴ A no de fu taki dati solanga wi de sondu sma, dan son leisi wi o du sani di e meki trawan kisi atibron nanga wi. A kan taki den brada nanga sisa fu wi e sondu teige wi tu na difrenti fasi (1 Yohanes 1:8). San yu musu du te so wan sani e pasa nanga yu? Bijbel e sori san wi kan du. Ma a kan taki a sani di Bijbel e taigi wi fu du, no de a srefi sani di wi leki sondu sma wani du (Romesma 7:21-23). Toku, te wi e meki muiti fu fiti a rai fu Bijbel, dan dati e sori taki wi wani  plisi Yehovah trutru. Disi sa yepi wi tu fu sori trutru lobi gi trawan.

5. Te wan sma du wan sani di hati wi, dan fu san ede wi no musu suku fu du a srefi sani nanga a sma?

⁵ Te wan sma du wan sani di hati wi, dan son leisi wi e suku fu meki a sma pai fu san a du. Ma disi e meki a problema kon moro bigi. Efu a de so taki wan sma hati wi, dan wi no musu suku fu du a srefi sani nanga en, ma wi musu libi a tori gi Gado (Odo 24:29; Romesma 12:17-21). Trawan e wai pasi gi a sma di hati den, fu di den no wani taki nanga en. Ma wi no musu du dati nanga den brada nanga sisa fu wi di de anbegiman fu Gado tu, bika wan fu den sani di e meki taki Gado feni na anbegi fu wi bun, na te wi lobi wi brada nanga sisa (1 Yohanes 4:20). Fu dati ede Paulus ben skrifi: „Tan frudrage makandra èn de klariklari fu gi makandra pardon nanga un heri ati efu wan sma abi reti fu kragi fu wan trawan. Soleki fa Yehovah de klariklari fu gi unu pardon nanga en heri ati, na so un musu du tu” (Kolosesma 3:13). Yu man du dati?

6. (a) Omeni leisi wi musu gi wi brada pardon? (b) San wi musu frustan fu wisrefi fosi, efu wi wani sabi san wi musu du te wan sma e sondu teige wi?

⁶ San wi musu du te wan sma e sondu teige wi ibri tron baka, ma a no e du wan seryusu sondu fu san den kan puru en na ini a gemeente? Na apostel Petrus ben aksi Yesus efu a ben musu gi wan sma pardon „te nanga seibi tron” efu a sma no du wan seryusu sondu. Ma Yesus ben taki: „A no te nanga seibi tron, ma te nanga seibitenti na seibi tron.” Yesus ben tyari kon na krin taki den sondu di wi e du teige Gado de moro furu leki ala den sondu di iniwan libisma du teige wi (Mateyus 18:21-35). Ibri dei wi e sondu teige Gado na furu fasi, sondro taki wi sabi srefi taki wi e sondu. Son leisi a sondu kan de wan sani di wi du fu di wi ben prakseri wisrefi nomo, a kan de wan sani di wi taki noso wan sani di  wi prakseri, noso a kan taki wi misi fu du wan sani (Romesma 3:23). Toku Gado e tan sori sari-ati gi wi (Psalm 103:10-14; 130:3, 4). A e fruwakti fu wi taki wi e sori sari-ati tu gi makandra (Mateyus 6:14, 15; Efeisesma 4:1-3). Na so wan fasi wi sa sori a sortu lobi di ’no e tan memre na ogri san trawan du nanga wi’.​—1 Korentesma 13:4, 5; 1 Petrus 3:8, 9.

7. San wi musu du te wan brada abi wan sani teige wi?

⁷ Son leisi wi kan si taki wi brada abi wan sani teige wi, aladi wisrefi no abi noti teige en. Wi kan ’tapu a sondu nanga lobi’, soleki fa 1 Petrus 4:8 e gi wi leki rai. Noso wi kan go taki nanga a brada èn pruberi fu kisi vrede baka nanga en.​—Mateyus 5:23, 24.

8. San wi kan du te wan brada noso sisa e du wan sani di e trobi wi?

⁸ A kan taki wan brada noso wan sisa e du wan sani di e trobi yu, ma di e trobi trawan tu. A no ben o de wan bun sani fu go taki nanga a sma? Kande. Te yu e fruteri en na wan switi fasi san na a problema, dan disi kan abi bun bakapisi. Ma a bun fu aksi yusrefi fosi: ’Trutru a sma e du wan sani di Bijbel e krutu? Noso a kan de so taki mi e si sani tra fasi fu di mi kweki tra fasi leki a brada?’ Yu musu luku bun taki yu no e fruwakti fu sma taki den du sani soleki fa yu wani (Yakobus 4:11, 12). Yehovah lobi iniwan sma di wani anbegi en, awinsi sortu kondre den komopo noso awinsi fa den kweki, èn a abi pasensi nanga den aladi den e gro na yeye fasi.

9. (a) Suma e poti prakseri na sma di du seryusu sondu na ini a gemeente? (b) O ten a de a frantwortu fu a sma di kisi porinen fu go taki nanga a sma di hati en? Nanga sortu prakseri a musu du dati?

⁹ Te wan sma na ini a gemeente e du wan seryusu sondu, soleki hurudu, dan den musu poti prakseri na a sma dati wantewante. Suma musu du dati? Den owruman (Yakobus  5:14, 15). Ma a kan taki wan sma e sondu teige wan trawan, kande na ini wan bisnis afersi, noso kande a taki wan sani di hati a tra sma. Te dati e pasa, dan a sma srefi di ondrofeni den fruferi sani disi musu pruberi fu taki nanga a sma di du den sani disi nanga en (Mateyus 18:15). Efu disi no e yepi fu lusu a tori, dan a sa de fanowdu fu du tra sani, soleki fa skrifi na ini Mateyus 18:16, 17. Efu wi lobi a brada fu wi di meki wan fowtu èn efu wi abi a winsi fu ’wini’ en, dan dati sa yepi wi fu taki na so wan fasi taki wi e doro na ati fu en.​—Odo 16:23.

10. Te wan problema e opo kon, dan san o yepi wi fu si a problema na a yoisti fasi?

¹⁰ Awinsi wi e kisi fu du nanga wan bigi problema noso wan pikin problema, wi sa kisi wini te wi e pruberi fu frustan fa Yehovah e si a tori. Yehovah no e feni nowan sondu  bun. Te sma e tan du seryusu sondu sondro fu sori berow, dan Gado e puru den sortu sma dati fu en organisâsi tapu en reti ten. Ma meki wi no frigiti taki wi alamala e sondu, awinsi wi no e du seryusu sondu, èn wi abi a langa pasensi nanga a sari-ati fu Gado fanowdu. Na so fasi Yehovah e sori wi san wi musu du te sma e sondu teige wi. Te wi e sori sari-ati, dan wi e sori lobi gi trawan soleki fa Gado e du dati.​—Efeisesma 5:1, 2.

Suku fasi fu ’opo yu ati’ gi trawan

11. Fu san ede Paulus ben gi den sma fu Korente a rai fu ’opo den ati’ gi trawan?

¹¹ Wan tu mun langa Paulus ben e tranga a gemeente fu Korente na ini Grikikondre. A ben wroko tranga fu yepi den brada nanga sisa drape, èn a ben lobi den. Ma sonwan fu den no ben lobi en nanga den heri ati. Den ben e krutu en fu ala sortu pikinpikin sani. A ben gi den a rai fu ’opo den ati’ gi trawan, san wani taki dati den ben musu sori moro lobi gi tra sma (2 Korentesma 6:11-13; 12:15). Wi alamala musu prakseri na sortu fasi wi kan sori moro lobi gi trawan èn wi musu luku tu fa wi kan leri sabi moro sma.​—1 Yohanes 3:14.

12. Fa wi kan kisi moro lobi gi ala sma na ini a gemeente?

¹² A de so taki wi e feni en muilek fu abi wan bun banti nanga son sma na ini a gemeente? A no de fu taki dati wi alamala e difrenti fu makandra. Wi wani taki sma e teki wi leki fa wi de. Fu dati ede wi musu du ala san wi man fu teki sma soleki fa den de. Disi sa yepi wi fu kisi wan moro bun banti nanga den. Te wi e poti prakseri na den bun fasi fu den sma, na presi fu den swakifasi fu den, dan dati sa yepi wi fu kisi wan tra denki fu den. A no de fu taki dati te fu kaba wi sa kon lobi den.​—Lukas 6:32, 33, 36.

13. Fa wi kan sori moro lobi gi den sma na ini wi gemeente?

¹³ A tru taki wi no man du ala sani di wi ben sa wani  du gi trawan. A kan taki wi no man gi ala sma odi na ibri konmakandra. Kande wi no man gi ala sma wan kari te wi e aksi wan tu mati fu kon nyan wan sani nanga wi. Ma wan tu sani de di wi kan du fu sori moro lobi gi trawan? Iya. Wi kan taki wan tu miniti nomo nanga wan sma na ini wi gemeente fu kon sabi en moro bun. Noso wanwan leisi, wi kan aksi wan sma di wi no sabi bun, fu go na ini a preikiwroko nanga wi.

14. Te wi de makandra nanga Kresten di wi no ben miti noiti ete, dan fa wi kan sori taki wi abi tranga lobi gi makandra?

¹⁴ Den Kresten kongres na tumusi moi okasi pe wi kan sori lobi gi tra sma tu. Dusundusun sma kan de drape. Wi no kan miti den alamala, ma wi kan tyari wisrefi na wan fasi di e sori taki wi no e luku nomo san moro makriki gi wi, ma taki wi e poti moro furu prakseri na san bun gi trawan. Na ini den pauze, wi kan poti prakseri na wan tu fu den sma lontu wi fu di wi e go taki nanga den. Wan dei, ala den sma di o libi na grontapu sa de brada nanga sisa èn den sa anbegi a tru Gado, a Tata fu ala sma, na ini wánfasi. A sa de wan prisiri sani trutru fu kon sabi makandra! Wi sa wani du dati fu di wi abi tranga lobi gi makandra. Fu san ede yu no e pruberi fu du dati now?

Takimakandra fu luku baka san wi leri

• Te problema e opo kon na mindri Kresten, dan fa den musu lusu den problema dati, èn fu san ede?

• Te wi e gro na yeye fasi, dan na sortu fasi a lobi fu wi musu gro tu?

• Fa wi kan sori tranga lobi gi tra sma tu, boiti gi den bun mati fu wi?

[Aksi fu a tori disi]

[Prenki na tapu bladzijde 148]

Kresten e sori lobi na furu fasi, soleki na den gemeente konmakandra