Kapitel tin

Wan Kownukondre „di noiti no sa kisi pori”

1. Te wi e luku den sani di pasa na grontapu na ini den dusundusun yari sensi libisma de, dan san dati e sori krin?

DEN sani di e pasa na grontapu e sori krin taki libisma no de koloku fu di den e weigri fu teki a tiri fu a moro hei tiriman Yehovah èn fu di den e pruberi fu tiri sani soleki fa den wani. Nowan fu den tirimakti fu libisma ben tyari wini kon gi ala sma. Aladi libisma go na fesi srefisrefi tapu a kontren fu sabidensi, toku den no ben man sorgu taki siki no de moro, èn den no ben man puru dede gi nowan sma srefi. Libisma tirimakti no tyari wan kaba kon na orloku, ogri di sma e du nanga tranga, takrudu, krukafasi, noso pôtifasi. Na ini furu kondre a de so ete taki tirimakti e basi den borgu fu den na wan ogri-ati fasi (Preikiman 8:9). A fasi fa sma e gebroiki den sani di koniman meki, a gridifasi fu sma, èn a sabi di sma no sabi son sani, abi leki bakapisi taki a gron, a watra, nanga a loktu e kon doti. Fu di tiriman no e tiri den moni afersi fu den kondre na wan yoisti fasi, meki furu sma no man kisi den moro prenspari sani di den abi fanowdu fu man tan na libi. Den sani di pasa na ini den dusundusun yari fu libisma tiri e sori taki den wortu disi tru: „A sma fu grontapu no man luku gi ensrefi sortu pasi a musu waka. Wan man di e waka no man luku pe a musu poti en futu srefi.”​—Yeremia 10:23.

2. San na a wan-enkri sani di kan lusu den problema fu libisma?

² San kan lusu den problema disi? Dati na a Kownukondre  fu Gado, fu san Yesus ben leri den bakaman fu en fu begi: „Yu kownukondre musu kon. Yu wani musu du na grontapu leki fa a e pasa na hemel” (Mateyus 6:9, 10). A buku 2 Petrus 3:13 e kari a hemel Kownukondre fu Gado den „nyun hemel”, di sa tiri a „nyun grontapu”, dati na a libimakandra fu regtfardiki sma. A hemel Kownukondre fu Gado de so prenspari taki dati ben de a moro prenspari sani fu san Yesus ben e preiki (Mateyus 4:17). A ben sori sortu presi a Kownukondre musu abi na ini wi libi, di a ben gi wi a rai: „Fu dati ede, tan suku a kownukondre nanga en regtfardikifasi fosi.”​—Mateyus 6:33.

3. Fu san ede a de tumusi prenspari now taki wi e kon sabi san na a Kownukondre fu Gado?

³ A de tumusi prenspari now taki wi e kon sabi san na a Kownukondre fu Gado, fu di heri esi a Kownukondre dati sa puru den tiriman fu a grontapu disi fu ala ten. Danièl 2:44 e taigi wi na fesi: „Na ini den dei fu den kownu dati [den tirimakti di e tiri now], a Gado fu hemel sa opo wan kownukondre [na ini hemel] di noiti no sa kisi pori. Èn a kownukondre srefi no sa gi na nowan tra pipel [libisma no sa tiri grontapu noiti moro]. A sa broko ala den kownukondre disi [di de now] na pisipisi èn tyari wan kaba kon na den, èn ensrefi sa tan te ten di no skotu.” Sobun, na a kaba fu den lasti dei a Kownukondre sa pori a heri ogri seti disi di de now. A bakapisi fu dati sa de taki a hemel Kownukondre wawan sa tan abra fu tiri. Wi musu de nanga furu tangi na ati taki a Kownukondre disi sa puru ala den problema gi wi heri esi!

4. San ben pasa na hemel na ini 1914 di a Kownukondre ben seti, èn fu san ede dati de prenspari gi wi?

⁴ Na ini 1914, Krestes Yesus ben poti leki Kownu èn a ben kisi a makti fu „tiri na mindri den feanti fu [en]”  (Psalm 110:1, 2). „Den lasti dei” fu na ogri grontapu disi bigin na ini a srefi yari dati tu (2 Timoteyus 3:1-5, 13). Na a srefi ten, den sani di Danièl ben si na ini wan fisyun ben e pasa trutru na ini hemel. „A Graniwan”, Yehovah Gado, ben gi a Manpikin fu libisma, Yesus Krestes, „tirimakti nanga wartifasi nanga wan kownukondre, so taki den pipel, den grupu fu ala kondre nanga tongo, den alamala ben sa dini en”. Baka di Danièl si a fisyun disi, dan a skrifi: „En tirimakti na wan tirimakti di e tan go doro te ten di no skotu èn a no sa pasa gowe, èn en kownukondre na wan di no sa kisi pori” (Danièl 7:13, 14). Krestes Yesus sa de a tiriman fu a hemel Kownukondre. Nanga yepi fu a Kownukondre disi, Gado sa gi den sma di lobi regtfardikifasi na okasi fu nyan bun fu den furu bun sani di a ben wani gi a fosi libisma papa nanga mama fu wi, di a ben poti den na ini a Paradijs.

5. San wi musu kon sabi fu a Kownukondre, èn fu san ede dati de fanowdu?

⁵ Yu wani tron wan getrow borgu fu a Kownukondre?  Efu yu wani dati, dan yu sa musu sabi fa a hemel tiri disi orga èn fa a e wroko. Yu sa musu sabi tu san a e du now, san a sa du na ini a ten di e kon, èn san a e fruwakti fu yu. Te yu e ondrosuku a Kownukondre finifini, dan yu sa kisi moro warderi gi dati. Te yu e saka yusrefi na ondro a tiri fu a Kownukondre fu Gado, dan yu sa man fruteri trawan moro bun fu den tumusi moi sani di a sa du gi den libisma di e gi yesi na en.​—Psalm 48:12, 13.

Den tiriman fu a Kownukondre fu Gado

6. (a) Fa Bijbel e sori suma na a moro hei tiriman fu a Mesias Kownukondre? (b) San wi musu du te wi e kon sabi moro fu a Kownukondre?

⁶ Wan fu den fosi sani di wi e kon si te wi e ondrosuku sani moro fini, na disi: nanga a Mesias Kownukondre disi, Yehovah e sori taki en na a moro hei tiriman. Na Yehovah ben gi en Manpikin „tirimakti nanga  wartifasi nanga wan kownukondre”. Baka di a Manpikin fu Gado ben kisi a makti fu tiri leki Kownu, dan wan sten ben de fu yere na ini hemel di ben taki nanga reti: „A kownukondre fu grontapu kon tron a kownukondre fu wi Masra [Yehovah Gado] èn fu a Krestes fu en, èn a [Yehovah] o tiri leki kownu fu têgo, iya, fu ala ten” (Openbaring 11:15). Sobun, ala san wi e kon sabi fu a Kownukondre disi èn fu den sani di a e du, kan meki wi kisi wan tranga banti nanga Yehovah. Den sani di wi e kon sabi musu meki wi saka wisrefi na ondro a tiri fu en fu têgo.

7. Fu san ede a de prenspari gi wi taki Yehovah poti Yesus Krestes fu tiri gi En?

⁷ Hori na prakseri tu taki Yehovah poti Yesus Krestes na tapu a kownusturu fu tiri gi En. Yesus ben de a Tumusi Bun Wrokoman di Gado ben gebroiki fu meki grontapu nanga libisma, èn fu dati ede Yesus sabi moro bun leki iniwan fu wi san wi abi fanowdu. Boiti dati, sensi di libisma de, Yesus ben sori taki a ’lobi den manpikin fu libisma trutru’ (Odo 8:30, 31; Kolosesma 1:15-17). A lobi libisma so te, taki a kon na grontapu èn a gi en libi leki wan lusu-paiman gi wi (Yohanes 3:16). Na so fasi a sorgu taki wi man kon fri fu sondu nanga dede, èn a gi wi na okasi fu kisi têgo libi.​—Mateyus 20:28.

8. (a) Fu san ede a tiri fu Gado sa tan fu ala ten te wi e agersi dati nanga den libisma tirimakti? (b) San „a getrow èn koni srafu” abi fu du nanga a hemel tirimakti?

⁸ A Kownukondre fu Gado no e degedege, èn a de wan tirimakti di sa tan fu ala ten. Wi kan de seiker taki a sa tan fu ala ten fu di Yehovah srefi no kan dede (Psalm 146:3-5, 10). Heri tra fasi leki libisma kownu, dan Yesus Krestes di ben kisi makti fu Gado fu de kownu, no man dede tu (Romesma 6:9; 1 Timoteyus 6:15, 16). Makandra  nanga Krestes, dan 144.000 tra sma sa tiri nanga en na ini hemel. Den na getrow futuboi fu Gado di komopo fu „ibri lo nanga tongo nanga pipel nanga kondre”. Den sma disi e kisi na okasi tu fu libi sondro fu man dede (Openbaring 5:9, 10; 14:1-4; 1 Korentesma 15:42-44, 53). Furu fu den de na ini hemel kaba, èn den wan di de na grontapu ete na a „getrow èn koni srafu” grupu fu a ten disi. Den sma disi e sorgu na wan getrow fasi gi den afersi fu a Kownukondre dati dyaso na grontapu.​—Mateyus 24:45-47.

9, 10. (a) Sortu takru sani di e tyari pratifasi kon, a Kownukondre sa puru? (b) Efu wi no wani tron feanti fu a Kownukondre fu Gado, dan gi sortu trapu wi musu wai pasi?

⁹ Dyonsro, te a ten fu Yehovah doro, dan A sa gebroiki den hemel legre fu en fu krin grontapu. Den hemel legre dati sa strafu libisma di e weigri fu espresi fu lespeki Yehovah leki a moro hei tiriman. Den sa pori den wan di e wisiwasi den sani di Gado seti na wan lobi-ati fasi nanga yepi fu Yesus Krestes (2 Tesalonikasma 1:6-9). Dati sa de a dei fu Yehovah, a dei pe a sa buweisi fu ala ten taki en na a Moro Heiwan fu hemel nanga grontapu. „Luku! A dei fu Yehovah e kon, na wan ogri-ati fasi nanga atibron èn nanga faya atibron, . . . fu a kan wai den sondari fu a kondre puru” (Yesaya 13:9). „A dei dati na wan dei fu atibron, wan dei fu banawtu nanga bigi frede, wan dei fu bigi winti nanga pori, wan dei fu dungru nanga blaka dungru, wan dei fu wolku nanga bigi dungru.”​—Sefanya 1:15.

¹⁰ Ala falsi bribi èn ala den libisma tirimakti nanga den legre fu den di na ogri tiriman fu a grontapu disi e basi, sa kisi pori fu têgo. Ala sma di e du den sani fu a grontapu disi fu di den e prakseri densrefi nomo, fu di den e du  kruka sani èn fu di den no e tyari densrefi na wan fasi di fiti, sa kisi pori. Gado sa fringi Satan nanga den ogri yeye fu en go na ini wan dipi peti dusun yari langa, so taki den no sa abi krakti moro tapu den sma di sa libi na grontapu. Te dati pasa, dan a Kownukondre fu Gado wawan sa tiri ala sani na grontapu. Dati sa de wan kefalek switi ten gi den wan di lobi regtfardikifasi!​—Openbaring 18:21, 24; 19:11-16, 19-21; 20:1, 2.

Fa a Kownukondre sa du den sani di a poti leki marki

11. (a) Fa a Mesias Kownukondre sa du ala den sani di Yehovah abi na prakseri fu du nanga grontapu? (b) San a Kownukondre tiri sa wani taki gi den sma di o libi na grontapu na a ten dati?

¹¹ A Mesias Kownukondre sa du ala den sani di Gado ben abi na prakseri nanga grontapu sensi a bigin (Genesis 1:28; 2:8, 9, 15). Te nanga a dei fu tide, libisma no horibaka gi den sani di Yehovah abi na prakseri fu du nanga grontapu. Ma ’a grontapu pe sma e libi èn di musu kon ete’ sa de na ondro a tiri fu a Manpikin fu libisma, dati na Yesus Krestes. Ala sma di sa tan na libi baka te Yehovah krutu na ogri grontapu disi, sa wroko na ini wánfasi na ondro a Kownu Krestes. Den sa prisiri fu du ala san a e taigi den, so taki heri grontapu sa kon tron wan paradijs (Hebrewsma 2:5-9). Ala libisma sa prisiri nanga a wroko di den sa du, èn den sa nyan bun fu den furu nyanyan di sa gro na grontapu.​—Psalm 72:1, 7, 8, 16-19; Yesaya 65:21, 22.

12. Fa den borgu fu a Kownukondre sa kon de volmaakti dorodoro?

¹² Di Gado ben meki Adam nanga Efa, dan den no ben abi sondu. Gado ben wani taki grontapu ben musu kon furu nanga den bakapikin fu den, di ben o de volmaakti  dorodoro. A sani disi sa kon tru na wan kefalek moi fasi te a Kownukondre sa tiri. Disi wani taki dati wan sma sa musu puru ala den bakapisi fu sondu gi wi, èn dati meki Krestes no e dini leki Kownu wawan, ma sosrefi leki Granpriester. Nanga pasensi a sa yepi den getrow borgu fu en fu kisi wini fu na ofrandi fu en eigi libisma libi di e puru sondu.

13. Sortu wondru sani o pasa nanga a skin fu sma te a Kownukondre sa tiri?

¹³ Na ondro a Kownukondre tiri, wondru sani o pasa nanga a skin fu den sma di sa libi na grontapu. „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede” (Yesaya 35:5, 6). Den sma di kon owru, noso di abi wan siki di pori a skin fu den, sa kisi wan skin di moi moro leki di fu wan yongu pikin. Den sma di kon swaki fu di den e siki seryusu sa kon gosontu èn den sa kisi krakti baka. „Meki a skin fu en kon moro moi leki na ini a yongu yari; meki a drai go baka na den dei fu en yongu krakti” (Yob 33:25). A dei sa kon te nowan sma sa abi fu taki: „Mi siki.” Fu san ede? Fu di den libisma di e frede Gado sa kon fri fu sondu èn fu den takru bakapisi fu dati (Yesaya 33:24; Lukas 13:11-13). Iya, Gado „o figi ala watra puru na den ai; dede no sa de moro, èn nowan sari noso krei noso pen no sa de moro. Den fositen sani pasa gowe.”​—Openbaring 21:4.

14. San a kon di wi sa kon de volmaakti wani taki tu?

¹⁴ A kon di wi sa kon de volmaakti no wani taki nomo taki wi no sa abi nowan mankeri na wi skin noso na wi frustan. A wani taki tu dati wi sa man sori den fasi fu Yehovah heri bun, fu di Gado ben meki wi ’akruderi  a prenki fu en, soleki fa en de’ (Genesis 1:26). Fu man du dati, dan wi sa musu kisi furu leri. „Regtfardikifasi o tan” na ini a nyun grontapu. Dati meki, soleki fa Yesaya ben taki na fesi, „regtfardikifasi na san den sma di e libi na tapu a fatu gron sa leri trutru” (2 Petrus 3:13; Yesaya 26:9). Regtfardikifasi e tyari vrede kon. Wi sa abi vrede nanga sma fu ala sortu kondre, nanga den sma di wi sabi bun, nanga den sma na ini wi osofamiri, èn spesrutu nanga Gado srefi (Psalm 85:10-13; Yesaya 32:17). Den wan di e leri regtfardikifasi sa kon sabi safrisafri san Gado e fruwakti fu den. O moro den e kon lobi Yehovah, o moro den sa wani hori densrefi na den markitiki fu en na ini ala afersi fu den libi. Neleki Yesus den sa man taki: ’Ala ten mi e du san e plisi a Tata fu mi’ (Yohanes 8:29). A libi sa de wan prisiri sani trutru te ala libisma sa du dati!

Den sani di a Kownukondre du kaba

15. Gebroiki den aksi na ini a paragraaf disi fu poti krakti tapu den sani di a Kownukondre du, èn sori san wi musu du now.

¹⁵ A Kownukondre fu Gado nanga den borgu fu en du kefalek bigi sani kaba. Den aksi nanga den bijbeltekst di e kon now sa yepi yu fu memre wan tu fu den sani disi. Den sa yepi yu tu fu poti prakseri baka na den sani di ala borgu fu a Kownukondre kan èn musu du now.

San na a fosi sani di a Kownukondre ben du, èn san ben de a bakapisi fu dati? (Openbaring 12:7-10, 12)

Sensi a ten di Krestes ben poti leki Kownu, Gado e tyari den lastiwan fu wan spesrutu grupu kon makandra. Sortu grupu na dati? (Openbaring 14:1-3)

Sortu wroko Yesus sa du baka te a bigi banawtu e bigin, soleki fa Mateyus 25:31-33 ben taki na fesi?

Sortu wroko e du now bifo na ogri grontapu e kisi  pori? Suma e teki prati na a wroko disi? (Psalm 110:3; Mateyus 24:14; Openbaring 14:6, 7)

Fu san ede politiek tiriman nanga sma fu kerki no ben man tapu a preikiwroko? (Sakaria 4:6; Tori fu den Apostel 5:38, 39)

Fa a libi fu sma kon kenki fu di den e saka densrefi na ondro a tiri fu a Kownukondre? (Yesaya 2:4; 1 Korentesma 6:9-11)

Wan Kownukondre di sa tiri dusun yari

16. (a) O langa Krestes sa tiri? (b) Sortu tumusi moi sani o pasa na ini a pisi ten dati, èn san o pasa baka dati?

¹⁶ Baka di Gado sa fringi Satan nanga den ogri yeye fu en go na ini wan dipi peti, dan Yesus Krestes nanga den 144.000 sma sa tiri makandra leki kownu nanga priester dusun yari langa (Openbaring 20:6). Na ini a pisi ten dati, libisma sa kon de volmaakti; sondu nanga dede di Adam ben tyari kon na wi tapu, no sa de moro. Na a kaba fu a Dusun Yari Tiri, te Yesus kaba du en wroko leki a Mesias Kownu-Priester na wan bun fasi, dan a sa „gi a kownukondre abra” na en Tata, „so taki Gado kan de ala sani gi ibriwan sma” (1 Korentesma 15:24-28). Na a ten dati, Satan sa kon fri fu wan syatu pisi ten fu tesi den libisma di kisi frulusu, fu si efu den sa tan horibaka gi Yehovah leki a moro hei tiriman fu hemel nanga grontapu. Baka a lasti tesi dati, Yehovah sa pori Satan nanga den sma di teki en sei (Openbaring 20:7-10). Den wan di horibaka gi a tiri fu Yehovah, sa sori krin taki den de getrow na en awinsi san e pasa. Dan Yehovah sa meki den kisi wan bun banti baka nanga En fu di a sa teki den leki en manpikin nanga umapikin. Fu di Gado feni den bun, meki den sa kisi têgo libi.​—Romesma 8:21.

17. (a) San o pasa nanga a Kownukondre na a kaba fu den dusun yari? (b) Fu san ede wi kan taki dati a Kownukondre „noiti no sa kisi pori”?

 ¹⁷ Sobun, a wroko di Yesus nanga den 144.000 sma sa du baka den dusun yari, sa kenki. San den sa du dan? Bijbel no e fruteri wi dati. Ma efu wi e tan horibaka na wan getrow fasi gi a tiri fu Yehovah, dan wi sa de na libi na a kaba fu a Dusun Yari Tiri fu si san Yehovah abi na prakseri gi den. Wi sa man si tu san a sa du nanga den furu moi sani di a meki na hemel nanga grontapu. Toku a de so taki a dusun yari tiri fu Krestes sa „tan go doro te ten di no skotu” èn a Kownukondre fu en „no sa kisi pori” (Danièl 7:14). Fu san ede wi kan taki dati? Na a fosi presi, a makti fu tiri no sa gi na nowan sma di abi tra sani na prakseri, fu di Yehovah srefi sa de Tiriman. Boiti dati, a Kownukondre „noiti no sa kisi pori”, fu di den sani di a seti sa tan fu têgo (Danièl 2:44). A de so tu taki a Mesias Kownu-Priester nanga den kownu-priester di tiri makandra nanga en sa kisi grani fu têgo, fu di den dini Yehovah getrow.

Takimakandra fu luku baka san wi leri

• Fu san ede a Kownukondre fu Gado na a wan-enkri sani di kan lusu den problema fu libisma? O ten a Kownu fu a Kownukondre fu Gado bigin tiri?

• San yu feni moi fu a Kownukondre èn fu den sani di a sa du?

• San na wan tu sani di a Kownukondre du èn di wi man si nownow kaba? Fa wi abi wan prati na den sani disi?

[Aksi fu a tori disi]

[Prenki na tapu bladzijde 92, 93]

Na ondro a Kownukondre fu Gado, ala sma sa leri regtfardikifasi