Kapitel tinadri

Wan bigi ipi na fesi a kownusturu fu Yehovah

1. (a) Bifo den 144.000 sma nanga den futuboi fu Gado di ben libi fosi a ten fu den Kresten e kisi a pai fu den, dan san musu pasa nanga den fosi? (b) Sortu howpu „wan bigi ipi” abi di e libi na ini a ten disi?

SENSI a ten fu Abel te na a ten fu Yohanes a Dopuman, getrow futuboi fu Gado ben e poti a wani fu Gado tapu a fosi presi na ini den libi. Ma ala den sma disi dede èn den e wakti fu kisi wan opobaka fu libi na ini a nyun grontapu fu Gado. Den 144.000 sma di sa tiri makandra nanga Krestes na ini a hemel Kownukondre, musu dede tu bifo den kan kisi a pai fu den. Ma Openbaring 7:9 e sori taki na ini den lasti dei disi „wan bigi ipi” ben o de, di komopo fu ala kondre. Den sma disi no ben o dede, ma den ben o abi a howpu fu libi fu têgo na grontapu. Yu na wan fu den sma disi?

Suma na a bigi ipi?

2. San ben yepi wi fu frustan krin suma na a bigi ipi fu Openbaring 7:9?

² Na ini 1923 den futuboi fu Yehovah ben kon si taki „den skapu” fu na agersitori fu Yesus na ini Mateyus 25:31-46 èn den „tra skapu” fu san Yesus ben taki na ini Yohanes 10:16, na den sma di ben o abi na okasi fu libi fu têgo na grontapu. Esekièl 9:1-11 e taki dati sma e kisi wan marki na tapu den fesi-ede. Na ini 1931, den kon frustan taki den sma disi na den srefi sma di abi a howpu fu libi na grontapu. Te fu kaba, na ini 1935 den kon frustan  taki a bigi ipi na den tra skapu fu suma Yesus ben taki. Now a bigi ipi disi na wan grupu fu milyunmilyun sma di Gado feni bun.

3. Te Bijbel e taki fu wan grupu sma di „e tanapu na fesi a kownusturu”, dan fu san ede dati no wani taki dati a grupu de na ini hemel?

³ Te wi e leisi Openbaring 7:9, dan a tekst no e sori taki a bigi ipi de na ini hemel. A ’tanapu di den e tanapu na fesi a kownusturu’ fu Gado no wani taki dati den musu fu de na ini hemel. A wani taki nomo dati Gado e si den (Psalm 11:4). A bigi ipi „di nowan sma ben man teri”, no de wan grupu na ini hemel. Fu san ede wi kan taki dati? We, Bijbel no e taki o bigi a grupu disi de. Ma disi de heri tra fasi leki san skrifi na ini Openbaring 7:4-8 nanga Openbaring 14:1-4. Den tekst disi e tyari kon na krin omeni sma teki fu grontapu fu libi na ini hemel, èn dati na 144.000 sma.

4. (a) San na „a bigi banawtu” fu san a bigi ipi e kisi frulusu? (b) Suma e si san a bigi ipi e du èn e anbegi Gado makandra nanga den, soleki fa Openbaring 7:11, 12 e sori?

⁴ Openbaring 7:14 e taki fu a bigi ipi: „Disi na den sma di komoto na ini a bigi banawtu.” Den e kisi frulusu fu a moro takru ten di noiti ben miti libisma ete na ini den hondrohondro yari di pasa (Mateyus 24:21). Te den e taki Gado nanga Krestes tangi fu a frulusu di den kisi, dan ala getrow yeye na ini hemel sa taki makandra nanga den: „Amen! Na wi Gado musu kisi blesi nanga glori nanga koni nanga tangi nanga grani nanga makti nanga krakti fu têgo, iya, fu ala ten. Amen.”​—Openbaring 7:11, 12.

Den musu sori taki den warti fu kisi frulusu

5. Fa wi kan kon sabi san wi musu du fu tron wan fu den sma fu a bigi ipi?

⁵ A bigi ipi sa kisi frulusu fu a bigi banawtu efu den  e hori densrefi na den regtfardiki markitiki fu Yehovah. Bijbel e sori krin san wan sma musu du fu kisi frulusu èn sortu fasi wan sma musu abi. Sobun, den sma di lobi regtfardikifasi kan du wan sani now fu sori taki den warti fu kisi frulusu. San den sma disi musu du?

6. Fu san ede a fiti fu agersi a bigi ipi nanga skapu?

⁶ Skapu abi safrifasi èn den e gi yesi. Sobun, di Yesus ben taki dati a ben abi tra skapu di no ben de fu a hemel grupu, dan a ben taki fu sma di ben wani libi fu têgo na grontapu, ma den ben o gi yesi tu na den leri fu en. „Mi skapu e arki mi sten èn mi sabi den èn den e waka na mi baka”, na so a ben taki (Yohanes 10:16, 27). Disi na sma di e arki Yesus trutru èn den e gi yesi na san a e taki. Na so fasi den e tron disipel fu en.

7. Sortu fasi den bakaman fu Yesus musu abi?

⁷ Sortu tra fasi ibriwan fu den bakaman disi fu Yesus musu abi? Gado Wortu e piki: „Un musu puru a fasi fa unu ben de fosi, di ben de a fasi fa unu ben gwenti tyari unsrefi èn . . . un musu tron wan nyun sma neleki te wan sma weri wan nyun krosi, èn so taki unu e kon de soleki fa Gado wani, nanga trutru regtfardikifasi èn loyaalfasi” (Efeisesma 4:22-24). Den e kisi fasi di e yepi den fu tyari wánfasi kon na mindri den futuboi fu Gado. Den fasi disi na „lobi, prisiri, vrede, langa pasensi, bun-ati, bunfasi, bribi, safri-ati, dwengi yusrefi”.​—Galasiasma 5:22, 23.

8. Nanga san a bigi ipi sa kisi fu du te den e horibaka gi a fikapisi?

⁸ A bigi ipi e horibaka gi a pikin grupu fu sma di abi a howpu fu libi na hemel èn di e teki fesi na ini a preikiwroko (Mateyus 24:14; 25:40). Den tra skapu e gi den a yepi disi, aladi den sabi taki den o kisi gens, fu di na a bigin fu den lasti dei disi, Krestes Yesus nanga den engel fu en ben trowe Satan nanga den ogri yeye fu en komoto fu hemel.  Disi ben wani taki „helu fu grontapu . . . bika Didibri saka kon na unu èn a abi bigi atibron fu di a sabi taki a no abi furu ten moro” (Openbaring 12:7-12). Fu dati ede Satan e du moro muiti fu gens den futuboi fu Gado aladi a kaba fu a grontapu disi e kon moro krosibei.

9. Sortu bun bakapisi den futuboi fu Gado abi te den e preiki a bun nyunsu, èn fu san ede dati de so?

⁹ Awinsi sma e pruberi na wan ogri-ati fasi fu gens a preikiwroko, toku a wroko disi e tan go na fesi. Na a kaba fu a Fosi Grontapufeti, wan tu dusun Kownukondre preikiman nomo ben de. Ma now den de nanga  milyunmilyun preikiman, fu di Yehovah ben pramisi: „Nowan fetisani di den sa meki teige yu sa abi bun bakapisi” (Yesaya 54:17). Srefi wan memre fu a hei krutubangi fu den Dyu ben sabi taki nowan sma ben kan tapu wan wroko di komopo fu Gado. Na ini a fosi yarihondro, a ben taigi den Fariseiman a sani disi fu den disipel: „Libi den; (bika efu a prakseri disi, noso a wroko disi e komoto fu libisma, dan a no sa tan; ma efu a e komoto fu Gado, dan unu no sa man puru en na pasi;) bika unu musu luku bun taki unu no e feti nanga Gado.”​—Tori fu den Apostel 5:38, 39.

10. (a) San „a marki” na tapu den sma fu a bigi ipi wani taki? (b) Fa den futuboi fu Gado e gi yesi na a ’sten di komopo fu hemel’?

¹⁰ Bijbel e taki dati den sma fu a bigi ipi kisi wan marki so taki den kan kisi frulusu (Esekièl 9:4-6). „A marki” na wan buweisi taki den gi densrefi abra na Yehovah èn taki den teki dopu leki disipel fu Yesus. A wani taki tu taki den e meki muiti fu tyari densrefi soleki fa Krestes ben tyari ensrefi. Den e gi yesi na a ’sten di komopo fu hemel’. A sten dati e taki fu a seti fu falsi bribi di Satan abi na heri grontapu: „Komoto fu drape, mi pipel, efu unu no wani abi prati nanga en na den sondu fu en èn efu unu no wani meki den plaag fu en kon na un tapu tu.”​—Openbaring 18:1-5.

11. Na sortu prenspari fasi den sma fu a bigi ipi e sori taki den na futuboi fu Yehovah?

¹¹ Boiti dati, Yesus ben taigi den bakaman fu en: „Na a fasi disi ala sma o sabi taki unu na mi disipel, te unu lobi makandra” (Yohanes 13:35). Tra fasi leki dati, sma fu den kerki fu grontapu e kiri tra sma fu a srefi kerki na ini orloku, èn furu tron den e du dati soso fu di den de fu difrenti  kondre! Gado Wortu e taki: „Na a fasi disi sma kan sabi suma na den pikin fu Gado èn suma na den pikin fu Didibri: Ibri sma di no abi a gwenti fu du regtfardiki sani, no komoto fu Gado; na so a de tu nanga a sma di no lobi en brada. . . . Wi musu lobi makandra. Wi no musu de leki Kain, di ben komoto fu na ogriwan èn di ben kiri en brada.”​—1 Yohanes 3:10-12.

12. San Yehovah sa du na ini a bigi banawtu nanga den kerki fu grontapu di no e meki bun froktu?

¹² Yesus ben taki: „Ibri bun bon e meki bun froktu, ma ibri bon di no bun no e meki bun froktu; wan bun bon no kan meki pori froktu, èn wan bon di no bun, no kan meki bun froktu. Ibri bon di no e meki bun froktu, musu koti trowe èn iti go ini faya. Sobun, na den froktu fu den, unu sa man si suma na den man dati trutru” (Mateyus 7:17-20). Den froktu di den kerki fu a grontapu disi e meki e sori taki den na ’bon’ di no bun èn taki heri esi Yehovah sa pori den na ini a bigi banawtu.​—Openbaring 17:16.

13. Fa a bigi ipi e sori taki den e „tanapu na fesi a kownusturu” fu Yehovah na ini wánfasi?

¹³ Openbaring 7:9-15 e poti prakseri na sani di sa yepi a bigi ipi fu kisi frulusu fu a bigi banawtu. A tekst e sori taki den „e tanapu na fesi a kownusturu” fu Yehovah na ini wánfasi. Disi wani taki dati den e lespeki En leki a moro heiwan fu hemel nanga grontapu. Den „wasi den langa krosi fu den, meki den kon weti na ini a brudu fu a Pikin Skapu”. Nanga dati den e sori taki den e bribi taki a srakti-ofrandi fu Yesus e puru sondu (Yohanes 1:29). Den teki dopu na ini watra fu sori taki den gi densrefi abra na Gado. Sobun, Gado e si den leki sma di de krin, soleki fa den weti krosi fu den e sori, èn den e ’du santa  diniwroko gi en dei nanga neti’. Wan tu sani de ete di yu musu du fu libi soleki fa e taki dyaso?

Den wini di wi e kisi now

14. San na wan tu moi wini di den futuboi fu Yehovah e kisi nownow kaba?

¹⁴ Kande yu si kaba sortu moi wini den futuboi fu Yehovah e kisi nownow kaba. Fu gi wan eksempre: di yu ben kon leri sabi den regtfardiki sani di Yehovah abi na prakseri, dan yu ben frustan taki wi kan abi wan tumusi moi tamara. Sobun, now yu abi wan marki na ini a libi trutru, èn dati na fu dini a tru Gado. Yu abi a kefalek moi howpu tu fu libi fu têgo na ini wan paradijs grontapu. Iya, a Kownu Yesus Krestes „o tyari [a bigi ipi] go na fonten di abi libi watra”.​—Openbaring 7:17.

15. Fa Yehovah Kotoigi e kisi wini fu di den e hori densrefi na Bijbel gronprakseri te den abi fu du nanga politiek afersi? Fa den e kisi wini te den e tyari densrefi na wan fasi di fiti?

¹⁵ A bigi ipi e kisi wan tra tumusi moi wini. Leki futuboi fu Yehovah na heri grontapu, den e sori lobi gi makandra, den abi wánfasi, èn den e wroko heri bun nanga makandra. Fu di wi alamala e kisi a srefi yeye nyanyan, meki wi alamala e gi yesi na den srefi wet nanga gronprakseri di de fu feni na ini Gado Wortu. Fu dati ede wi no e teki prati na politiek afersi èn wi no feni taki a kondre fu wi moro bun leki wan trawan, èn a sani disi e meki taki pratifasi no de na wi mindri. Boiti dati, wi e hori wisrefi na den hei markitiki fu Gado, di e fruwakti fu en pipel taki den e tyari densrefi na wan fasi di fiti (1 Korentesma 6:9-11). Dati meki a pipel fu Yehovah no e kisi fu du nanga den feti, a pratifasi, nanga a doti fasi fu libi fu a grontapu disi. Ma na presi fu dati, wi kan taki dati den de na ini wan paradijs na yeye fasi. Luku fa Yesaya 65:13, 14 e taki fu dati.

16. Sortu howpu a bigi ipi abi aladi den e kisi fu du nanga den problema fu a libi?

 ¹⁶ Den libisma futuboi fu Yehovah no de volmaakti. Nôno. Den e kisi fu du tu nanga den problema fu a libi na ini a grontapu disi, soleki muilek ten na ekonomia sei, noso den e ondrofeni takru bakapisi te kondre e feti nanga makandra. Boiti dati, den e kisi fu du nanga siki, pina, nanga dede. Ma den e bribi taki wan nyun grontapu sa kon, pe Gado „o figi ala watra puru na den ai; dede no sa de moro, èn nowan sari noso krei noso pen no sa de moro”.​—Openbaring 21:4.

17. Sortu moi howpu anbegiman fu a tru Gado abi, awinsi san e pasa nanga wi now?

¹⁷ Awinsi yu e lasi yu libi now fu di yu kon owru, yu kon siki, yu kisi wan onkoloku, noso yu kisi frufolgu, toku Yehovah sa gi yu wan opobaka fu libi na ini a Paradijs (Tori fu den Apostel 24:15). Dan yu sa man tan prisiri fu a yeye nyanyan di yu sa kisi na ini a Dusun Yari Tiri fu Krestes. A lobi di yu abi gi Gado sa kon moro tranga te yu e si fa den prakseri fu en kon tru na wan tumusi moi fasi. Èn a meki di Yehovah sa meki sma kon betre na a ten dati, sa meki yu kon lobi en moro srefi (Yesaya 25:6-9). Fu tru, a pipel fu Gado abi wan tumusi moi howpu!

Takimakandra fu luku baka san wi leri

• Sortu tumusi aparti sani o pasa nanga a bigi ipi, soleki fa Bijbel e sori?

• San wi musu du now efu trutru wi wani de wan fu den sma fu a bigi ipi di Gado feni bun?

• Fa yu e si den blesi di a bigi ipi e kisi now èn di den sa kisi ete na ini a nyun grontapu fu Gado?

[Aksi fu a tori disi]

[Prenki na tapu bladzijde 123]

Milyunmilyun sma fu a bigi ipi e anbegi a tru Gado na ini wánfasi