Pisi 11

A fondamenti foe a njoen grontapoe e meki nownow

1, 2. San wi e si e pasa leki wan kontroe foe bijbel profeititori?

WAN sani di de toemoesi moi toe, na a troe tori taki a fondamenti foe Gado en njoen grontapoe e meki nownow, ala di na owroe grontapoe foe Satan e go na baka. Nanga wi eigi ai wi e si fa Gado e tjari sma foe ala nâsi kon makandra èn e meki den tron a fondamenti foe wan njoen libimakandra na grontapoe di heri esi sa kon ini a presi foe a grontapoe foe a ten disi di prati. Den e kari a njoen libimakandra disi na ini bijbel, na ini 2 Petrus 3:13, „wan njoen grontapoe”.

² Wan bijbel profeititori e taki toe: „Na ini den kaba pisi foe den dei [a ten pe wi e libi na ini nownow] . . . , foe troe, foeroe pipel sa go èn taki: ’Kon, meki wi opo go na a bergi foe Jehovah [en troe anbegi], . . . èn a sa leri wi foe den pasi foe en, èn wi sa waka na tapoe den foetoepasi foe en.’” — Jesaja 2:2, 3.

3. (a) Na mindri soema a profeititori foe Jesaja e kon troe? (b) Fa a lasti boekoe foe bijbel e taki foe disi?

³ A profeititori dati e kon troe now na mindri den wan di e saka densrefi na ondro ’den pasi foe Gado èn e waka na tapoe den foetoepasi  foe en’. A lasti boekoe foe bijbel e taki foe na internationaal libimakandra foe sma disi di lobi vrede, leki „wan bigi ipi . . . di komoto na ala nâsi nanga lo nanga pipel nanga tongo”, wan troe bradafasi na heri grontapoe di e dini Gado ini wánfasi. Èn bijbel e taki toe: „Disi na den sma di komoto na a bigi banawtoe.” Dati wani taki, den sa pasa a kaba foe na ogri seti foe sani disi libilibi. — Openbaring 7:9, 14; Mateus 24:3.

Wan troe internationaal bradafasi

4, 5. Foe san ede a bradafasi foe Jehovah Kotoigi na heri grontapoe na wan sani di kan?

⁴ Miljoenmiljoen Kotoigi foe Jehovah e proeberi na wan opregti fasi foe libi akroederi den leri nanga den pasi foe Gado. A howpoe foe den tapoe têgo libi ankra na ini Gado en njoen grontapoe. Foe di den e gi jesi na den wet foe Gado ini a fasi fa den e tjari a libi foe den ala dei, dan den e sori en taki den wani saka densrefi na ondro a fasi fa a e tiri, now èn na ini a njoen grontapoe. Na ala sei, awansi foe sortoe nationaliteit noso ras den de, den e gi jesi na den srefi markitiki — den wan di Gado poti na ini en Wortoe. Dati meki den de wan troe internationaal bradafasi, wan njoen grontapoe libimakandra di Gado meki. — Jesaja 54:13; Mateus 22:37, 38; Johanes 15:9, 14.

⁵ Jehovah Kotoigi no e teki a grani gi densrefi taki den de wan aparti bradafasi na heri grontapoe. Den sabi taki disi na a bakapisi foe a krakti jeje foe Gado di e wroko tapoe sma di e saka densrefi na ondro den wet foe en (Tori foe den Apostel 5:29, 32; Galasiasma 5:22, 23). A de wan wroko di Gado e doe. Soleki fa Jesus ben taki, dan „den sani di no kan na libisma, na sani di kan na Gado” (Lukas 18:27). So boen, a Gado di ben meki taki na universum di e tan, na wan sani di kan, na a sma di e meki taki a njoen grontapoe libimakandra di e tan, na wan sani di kan toe.

6. Foe san ede wi kan kari a bradafasi foe Jehovah Kotoigi wan disiten wondroe?

⁶ Foe dati ede, a fasi fa Jehovah o tiri na ini a njoen grontapoe, wi kan si kaba na ini den sani di a e doe na a fondamenti di e seti nownow gi a njoen grontapoe. Èn san a doe nanga den Kotoigi foe en, na wan fasi, de wan disiten wondroe. Foe san ede? Bika a orga Jehovah Kotoigi na ini wan troe bradafasi na heri grontapoe, wan bradafasi di afersi foe nâsi, ras noso relisi di e tjari pratifasi kon, no kan broko noiti. Ala di a nomroe foe den Kotoigi doro miljoenmiljoen kaba èn den e libi na ini moro leki 200 kondre, tokoe den tai kon na wán ini wan banti di no kan broko. A bradafasi disi di de na heri grontapoe èn di de wan aparti sani na ini a heri historia, na troetroe wan disiten wondroe — wan wroko foe Gado. — Jesaja 43:10, 11, 21; Tori foe den Apostel 10:34, 35; Galasiasma 3:28.

Kon sabi a pipel foe Gado

7. Fa sma ben sa kan kon sabi den troe bakaman foe Jesus, soleki fa a ben taki?

⁷ Fa sma kan kon sabi moro fara soema na den sma di Gado e gebroiki leki a fondamenti foe en njoen grontapoe? We, soema e meki den wortoe foe Jesus na ini Johanes 13:34, 35 kon troe? A ben taki: „Mi e gi oenoe wan njoen komando, foe oenoe lobi makandra; neleki fa mi ben lobi oenoe, foe oenoe lobi makandra toe. Nanga disi ala sma sa sabi taki oenoe na mi disipel, efoe oenoe abi lobi na oen mindri.” Jehovah Kotoigi e bribi den wortoe foe Jesus èn e handri akroederi den. Den „abi tranga lobi gi makandra”, soleki fa a Wortoe foe Gado e leri (1 Petrus 4:8). Den „weri lobi [gi densrefi], bika a de wan volmaakti banti foe wánfasi” (Kolosesma 3:14). So boen, brada lobi na a „lijm” di e hori den na makandra na heri grontapoe.

8. Fa 1 Johanes 3:10-12 e meki sma kon sabi a pipel foe Gado moro fara?

⁸ Na ini 1 Johanes 3:10-12 tanapoe toe: „Den pikin foe Gado nanga den pikin foe Didibri de krin foe si na a fasi disi: Ibriwan sma di no doe san regtfardiki, no e komoto na Gado, neleki a sma di no lobi en brada. Bika disi na a boskopoe di oenoe jere sensi a bigin, taki wi moesoe abi lobi gi makandra; no leki Kain, di komoto na a godelowsoewan èn ben kiri en brada.” So boen, a pipel foe Gado na wan bradafasi di de na heri grontapoe èn di no e doe ogri nanga tranga.

 Wan tra sani foe kan kon sabi den

9, 10. (a) Sortoe wroko ben sa meki sma kon sabi den foetoeboi foe Gado na ini den lasti dei? (b) Fa Jehovah Kotoigi meki Mateus 24:14 kon troe?

⁹ Wan tra fasi de foe kon sabi den foetoeboi foe Gado. Na ini en profeititori di e taki foe a kaba foe grontapoe, Jesus ben taki foe foeroe sani di ben sa marki a pisi ten disi leki den lasti dei. (Loekoe Pisi 9.) Wan fondamenti pisi foe en profeititori de foe feni na ini den wortoe foe en na ini Mateus 24:14: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon.”

¹⁰ Wi si a profeititori dati kon troe? Ija. Sensi den lasti dei ben bigin na ini 1914, Jehovah Kotoigi preiki a boen njoensoe foe Gado en Kownoekondre na heri grontapoe na a fasi fa Jesus ben komanderi foe doe dati, namkoe, na den oso foe den sma (Mateus 10:7, 12; Tori foe den Apostel 20:20). Miljoenmiljoen Kotoigi go na sma na ibri nâsi foe taki nanga den foe a njoen grontapoe. Disi abi leki bakapisi taki joe kisi a brochure disi, foe di a wroko foe Jehovah Kotoigi abi na ini toe a druk di den e druk èn a prati di den e prati miljardmiljard boekoe di e taki foe a Kownoekondre foe Gado. Joe sabi tra sma di e preiki a Kownoekondre foe Gado oso foe oso na heri grontapoe? Èn Markus 13:10 e sori taki a wroko disi foe preiki èn foe leri sma moesoe doe „fosi”, bifo a kaba kon.

Gi piki tapoe a di foe toe bigi strei

11. Sortoe tra sani Jehovah Kotoigi e meki kon troe foe di den e saka densrefi na ondro a tiri foe Gado?

¹¹ Foe di Jehovah Kotoigi e saka densrefi na ondro den wet nanga den gronprakseri foe Gado, dan den e meki wan tra sani kon troe. Den e sori taki Satan ben de wan leiman di a ben taki dati libisma no ben kan tan getrow na Gado te den kisi tesi, èn na so wan fasi den gi piki tapoe a di foe toe bigi strei, di abi foe doe nanga a soifri retifasi foe libisma (Job 2:1-5). Foe di den Kotoigi na wan libimakandra foe miljoenmiljoen sma foe ala nâsi, meki den e sori, leki wán skin, taki den de loyaal na a tiri foe Gado. Ala di den de onvolmaakti libisma, tokoe den e hori a sei foe Gado hei ini a tori foe a strei di abi foe doe nanga universeel soevereiniteit, awansi den kisi druk foe Satan.

12. Na baka soema den Kotoigi e waka nanga a bribi foe den?

¹² Na ini a ten disi, den miljoenmiljoen Kotoigi foe Jehovah disi e poti a boeweisi di den e gi, na tapoe di foe wan lo tra kotoigi foe a ten di pasa, di ben sori taki den de loyaal na Gado. Son wan foe den wan disi ben de Abel, Noa, Job, Abraham, Sara, Isak, Jakob, Debora, Rut, David nanga Danièl, foe kari soso wan toe (Hebrewsma kapitel 11). Den de wan ’bigi wolkoe foe getrow kotoigi’, soleki fa bijbel e taki (Hebrewsma 12:1). Den wan disi nanga trawan, so srefi den disipel foe Jesus, ben hori a soifri retifasi foe den na Gado. Èn Jesus srefi ben gi a moro bigi eksempre, foe di a ben hori na en volmaakti soifri retifasi.

13. Sortoe wortoe foe Jesus ini a tori foe Satan sori taki a troe?

¹³ Disi e sori taki san Jesus ben taigi den relisi fesiman ini a tori foe Satan, de troe: „Ma now oenoe e soekoe foe kiri mi, wan sma di froeteri oenoe a waarheid, di mi ben jere foe Gado. . . . Oenoe na foe oen tata Didibri, èn oenoe wani foe doe den winsi foe oen tata. En ben de wan kiriman di a ben bigin, èn a no ben tanapoe steifi na ini waarheid, bika waarheid no de na en ini. Te a e froeteri wan lei, a e froeteri soleki fa ensrefi de, bika a de wan leiman èn a tata foe lei.” — Johanes 8:40, 44.

Sortoe sei joe e teki?

14. San e pasa nanga a fondamenti foe a njoen grontapoe nownow?

¹⁴ A fondamenti foe a njoen grontapoe di Gado e meki nownow na ini na internationaal libimakandra foe Jehovah Kotoigi, e kon tranga moro nanga moro. Ibri jari hondrohondro doesoen sma e gebroiki a fri wani foe den di gron tapoe soifri sabi, foe teki a tiri foe Gado. Den tron wan pisi foe a njoen grontapoe libimakandra, den e hori a sei foe Gado hei ini a tori foe a strei di abi foe doe nanga universeel soevereiniteit èn den e sori taki Satan na wan leiman.

15. Sortoe pratiwroko sa doe na ini a ten foe wi?

 ¹⁵ Foe di den e teki a sei foe a tiri foe Gado, meki den sa boen nofo foe den poti den na a „reti-anoe” foe Krestes ala di a e prati „den skapoe” foe „den bokoboko”. Na ini en profeititori foe den lasti dei, Jesus ben taki na fesi: „Ala den nâsi sa tjari kon makandra na en fesi, èn a sa prati sma foe makandra, neleki fa wan herder e prati den skapoe foe den bokoboko. Èn a sa poti den skapoe na en reti-anoe, ma den bokoboko na en kroektoe-anoe.” Den skapoe na sma di abi sakafasi, di moksi densrefi nanga den brada foe Krestes èn e horibaka gi den, èn e saka densrefi na ondro a tiri foe Gado. Den bokoboko na tranga-ede sma di weigri foe teki den brada foe Krestes èn di no doe noti foe horibaka gi a tiri foe Gado. Nanga sortoe bakapisi? Jesus ben taki: „Den disi [den bokoboko] sa go na ini a têgo koti poeroe, ma den regtfardikiwan [den skapoe] na ini a têgo libi.” — Mateus 25:31-46.

16. San joe moesoe doe efoe joe wani libi na ini a Paradijs di moesoe kon ete?

¹⁶ Foe troe, Gado e broko en ede nanga wi! Heri esi a sa sorgoe foe wan toemoesi moi paradijs na grontapoe. Joe wani libi na ini a Paradijs dati? Efoe dati de so, dan sori a warderi di joe abi gi den sani di Jehovah seti, foe di joe e leri foe en èn e handri akroederi den sani di joe leri. „Soekoe Jehovah, oen pipel, ala di oenoe kan feni en. Kari en, ala di a sori taki a de krosibei. Meki a godelowsoe sma libi en pasi, èn a sma foe takroedoe den prakseri foe en; èn meki a drai go baka na Jehovah, di sa sori en sari-ati.” — Jesaja 55:6, 7.

17. Foe san ede wi no kan lasi ten foe teki a bosroiti soema wi wani dini?

¹⁷ Wi no kan lasi ten. A kaba foe na owroe seti disi de kefalek krosibei. A Wortoe foe Gado e gi a rai: „No lobi grontapoe noso den sani na ini grontapoe. Efoe wan sma lobi grontapoe, dan a lobi foe a Tata no de na en ini . . . Boiti dati, grontapoe e pasa gowe èn so srefi a lostoe foe en, ma a sma di e doe a wani foe Gado, e tan foe têgo.” — 1 Johanes 2:15-17.

18. Sortoe fasi foe handri sa meki taki joe man loekoe nanga froetrow go na fesi foe libi na ini a toemoesi moi njoen grontapoe foe Gado?

¹⁸ A pipel foe Gado e kisi leri now foe libi foe têgo na ini a njoen grontapoe. Den e leri den koni na jejefasi nanga tra koni di de fanowdoe foe meki wan paradijs. Wi e gi joe a deki-ati foe teki a sei foe Gado leki Tiriman èn foe horibaka gi a wroko di e kibri libi èn di a e meki sma doe na heri grontapoe na ini a ten disi. Studeri bijbel nanga Jehovah Kotoigi, èn leri sabi a Gado di e broko en ede troetroe nanga joe èn di sa tjari wan kaba kon na pina. Na a fasi disi joe toe kan tron wan pisi foe a fondamenti foe a njoen grontapoe. Dan joe kan loekoe nanga froetrow go na fesi foe kisi a boen-ati foe Gado èn libi foe têgo na ini a toemoesi moi njoen grontapoe dati.

[Aksi foe a tori disi]

[Prenki na tapoe bladzijde 31]

Jehovah Kotoigi abi wan troe internationaal bradafasi

 [Prenki na tapoe bladzijde 32]

A fondamenti foe Gado en njoen grontapoe e meki nownow