Pisi 8

A prakseri foe Gado de krosibei foe kon troe

1, 2. Sortoe sani Gado seti foe poeroe pina na pasi?

A TIRI foe oproeroe libisma nanga ogri jeje tjari a libisma famiri foeroe jarihondro langa go na baka. Tokoe Gado no weigri foe poti prakseri tapoe den pina foe wi. Na presi foe dati, na ini ala den jarihondro a seti sani foe froeloesoe libisma poeroe foe a makti foe ogridoe nanga pina.

² Na a ten di na oproeroe ben meki na Eden, Gado ben bigin tjari en prakseri kon na krin foe seti wan tiri di ben sa meki a grontapoe disi tron wan paradijs oso gi sma (Genesis 3:15). Baka ten, Jesus, leki a prenspari takiman foe Gado, ben meki a tiri disi di moesoe kon ete, tron a moro prenspari tori foe a leri foe en. A ben taki dati a ben sa de a wan-enkri howpoe foe libisma. — Danièl 2:44; Mateus 6:9, 10; 12:21.

3. Fa Jesus ben kari a tiri di moesoe kon ete foe tiri grontapoe, èn foe san ede?

³ Jesus ben kari a tiri dati foe Gado di moesoe kon ete „a kownoekondre foe hemel”, foe di a ben o tiri komoto na hemel (Mateus 4:17). A ben kari en „a kownoekondre foe Gado” toe, foe di Gado ben sa de a Mekiman foe en (Lukas 17:20). Na ini den jarihondro di pasa, Gado ben meki den skrifiman foe en skrifi profeititori na ondro a krakti foe a santa jeje, di abi foe doe nanga den wan di ben sa de ini a tiri dati èn san a tiri dati ben sa doe.

A njoen Kownoe foe grontapoe

4, 5. Fa Gado ben sori taki Jesus ben de a Kownoe di a feni boen?

⁴ Pikinmoro toe doesoen jari pasa, dan den foeroe profeititori di e taki foe a sma di ben sa de a Kownoe foe Gado en Kownoekondre, ben kon troe ini Jesus. A ben sori taki a de a sma di Gado ben teki foe de a Tiriman foe a hemel tiri dati di ben o tiri libisma. Èn baka di Jesus dede, Gado opo en baka foe libi na hemel leki wan makti jeje kriatoeroe di no kan dede. Foeroe sma ben si na opobaka foe en. — Tori foe den Apostel 4:10; 9:1-9; Romesma 1:1-4; 1 Korentesma 15:3-8.

⁵ Ne Jesus „ben sidon na a reti-anoe foe Gado” (Hebrewsma 10:12). Drape a ben wakti a ten te Gado ben sa gi en makti foe opo doe wan sani leki Kownoe foe Gado en hemel Kownoekondre. Disi ben meki a profeititori foe Psalm 110:1 kon troe, pe Gado e taigi en, taki: „Go sidon na mi reti-anoe, te leki mi poti den feanti foe joe leki wan foetoebangi gi joe foetoe.”

6. Fa Jesus ben sori taki a ben boen nofo foe de Kownoe foe Gado en Kownoekondre?

⁶ Di Jesus ben de na grontapoe, a ben sori taki a ben boen nofo foe kisi so wan posisi. Awansi a ben kisi froefolgoe, tokoe a ben bosroiti foe tan hori en soifri retifasi na Gado. Nanga dati a ben sori taki Satan ben lei di a ben taki dati no wan libisma ben sa tan getrow na Gado te a kisi tesi. Jesus, wan volmaakti libisma, a ’di foe toe Adam’, ben sori taki Gado no ben meki wan fowtoe di a ben kria volmaakti libisma. — 1 Korentesma 15:22, 45; Mateus 4:1-11.

7, 8. Sortoe boen sani Jesus ben doe di a ben de na grontapoe èn san a ben sori nanga dati?

⁷ Sortoe tiriman oiti ben doe so foeroe boen leki Jesus ben doe na ini den wan toe jari foe  en diniwroko? Nanga a krakti foe Gado en santa jeje, Jesus ben meki den sikiwan, den lanwan, den breniwan, den dofoewan nanga den babaw-wan kon betre. A ben opo srefi den dedewan baka! A ben sori na wan pikin fasi san a ben sa doe gi a libisma famiri na heri grontapoe te a ben sa kon na ini Kownoekondre makti. — Mateus 15:30, 31; Lukas 7:11-16.

⁸ Jesus ben doe so foeroe boen di a ben de na grontapoe, taki en disipel Johanes ben taki: „Foe taki en leti, foeroe tra sani de toe di Jesus ben doe, di, efoe oiti den ben skrifi den finifini, mi denki taki grontapoe srefi no ben sa man teki den lolo di den skrifi.” — Johanes 21:25. *

9. Foe san ede opregti sma ben go ipi-ipi na Jesus?

⁹ Jesus ben abi switifasi nanga sari-ati èn ben abi bigi lobi srefisrefi gi sma. A ben jepi den pôtisma nanga den sma di kisi kwinsi, ma a no ben desko den wan di goedoe noso di abi wan posisi. Opregti sma ben teki a lobi-ati kari di Jesus ben gi di a ben taki: „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati. Teki mi tjatjari na oen tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti” (Mateus 11:28-30). Sma di ben abi frede gi Gado ben go ipi-ipi na en èn ben loekoe go na fesi na a tiri foe en. — Johanes 12:19.

Kompe tiriman

10, 11. Soema sa abi wan prati nanga Jesus foe tiri grontapoe?

¹⁰ Neleki fa libisma tiri abi kompe tiriman, na so Gado en hemel Kownoekondre abi den toe. Trawan boiti Jesus sa abi wan prati foe tiri grontapoe, bika Jesus ben pramisi den krosibei kompe foe en taki den ben sa tiri a libisma famiri leki kownoe makandra nanga en. — Johanes 14:2, 3; Openbaring 5:10; 20:6.

¹¹ Foe dati ede, makandra nanga Jesus, wan pikin nomroe foe sma e kisi wan opobaka toe foe libi na hemel. Makandra den de a Kownoekondre foe Gado di sa tjari têgo blesi kon gi a libisma famiri (2 Korentesma 4:14; Openbaring 14:1-3). So boen, na ini den jarihondro di pasa, Jehovah poti a fondamenti gi wan tiri di sa tjari têgo blesi kon gi a libisma famiri.

Tiri di de aparti foe Gado o kon na wan kaba

12, 13. San a Kownoekondre foe Gado de foe doe now?

¹² Na ini a jarihondro disi, Gado boemoei langalanga nanga den afersi na grontapoe. Soleki fa Pisi 9 foe a brochure disi o tjari kon na fesi, dan bijbel profeititori e sori taki Gado en Kownoekondre na ondro Krestes ben opo na ini 1914 èn nownow a de foe masi a heri seti foe Satan. A Kownoekondre dati de klari foe „go poti na [en]  ondro na mindri foe den feanti foe [Krestes]”. — Psalm 110:2.

¹³ Ini a tori disi a profeititori na ini Danièl 2:44 e taki: „Ma na dem dei vo dem srefi koning [di de nownow] da Gado fo hemel sa hopo wan koningkondre [na hemel], disi no sa broko tee vo teego, en da koningkondre no sa go abra na wan tra piple [noiti moro libisma tiri sa kisi pasi foe tiri]: a [Gado en Kownoekondre] sa massi ala dem tra koningkondre, a sa meki dem tron noti, ma hem srefi sa tan tee vo teego.” — Da Boekoe vo dem Profetie.

14. San na wan toe winimarki di sa kon leki bakapisi foe a kaba di o kon na libisma tiri?

¹⁴ Te ala tirimakti di de aparti foe Gado, poeroe na pasi, dan Gado en Kownoekondre sa tiri a heri grontapoe. Èn foe di a Kownoekondre e tiri komoto na hemel, dan noiti libisma kan pori en. A makti foe tiri sa de drape pe a ben de na ini a bigin, na hemel, na Gado. Èn foe di a tiri foe Gado o tiri a heri grontapoe, meki falsi relisi noso libisma filosofia nanga politiek idea di no e gi satisfaksi, no sa kori no wan sma moro. No wan foe den sani disi sa kisi pasi foe de. — Mateus 7:15-23; Openbaring kapitel 17 te nanga 19.

[Foetoewortoe]

[Aksi foe a tori disi]

[Prenki na tapoe bladzijde 18]

Di Jesus ben de na grontapoe, a ben meki den sikiwan kon betre èn ben opo den dedewan baka foe sori san a o doe na ini a njoen grontapoe

[Prenki na tapoe bladzijde 19]

Gado en hemel Kownoekondre sa masi poeroe ala sortoe fasi foe tiri di de aparti foe en