A toemoesi moi presenti foe a fri wani
Pisi 5
A toemoesi moi presenti foe a fri wani
1, 2. Sortoe toemoesi moi presenti de wan pisi foe a fasi fa Gado meki wi?
FOE froestan foe san ede Gado gi pasi meki pina de èn san a sa doe nanga dati, dan wi moesoe froestan fa a ben meki wi. A ben doe moro leki foe kria wi nanga wan skin èn nanga wan ede-tonton nomo. A ben kria wi toe nanga spesroetoe eigifasi na froestan sei èn na a sei foe inisei firi.
2 Wan prenspari pisi foe a fasi fa Gado meki wi na froestan sei èn na a sei foe inisei firi na a fri wani. Ija, Gado ben prani na ini wi na eigifasi foe a fri foe kan teki san wi wani. A ben de troetroe wan toemoesi moi presenti foe en.
Fa Gado meki wi
3-5. Foe san ede wi e warderi a fri wani?
3 Meki wi go loekoe fa fri wani abi foe doe nanga a gi di Gado gi pasi meki pina de. Na a fosi presi, prakseri disi: Joe e warderi en taki joe abi a fri foe bosroiti san joe o doe èn taki, san joe o njan èn weri, sortoe wroko joe o doe, èn pe èn fa joe o libi? Noso joe ben sa wani, taki wan sma e taigi joe ibri momenti foe joe libi san joe moesoe taki èn san joe moesoe doe?
4 No wan enkri normaal sma wani, taki wan sma teki ala bosroiti gi en na ini en libi. Foe san ede? Foe a fasi ede fa Gado ben meki wi. Bijbel e froeteri wi taki Gado ben kria libisma na en ’prenki èn soleki fa en de’, èn wan foe den eigifasi di Gado srefi abi, na a fri foe kan teki san a wani (Genesis 1:26; Deuteronomium 7:6). Di a ben kria libisma, a ben gi den a srefi toemoesi moi eigifasi dati — a presenti foe a fri wani. Dati na wán reide foe san ede a e broeja wi te wi de na ini katibo foe tiriman di e kwinsi wi.
5 So boen, a wani di wi wani de fri, a no wan sani di kon foe ensrefi, bika Gado na wan Gado foe fri. Bijbel e taki: „Pe a jeje foe Jehovah de, na drape fri de” (2 Korentesma 3:17). Foe dati ede, Gado ben gi wi a fri wani leki wan pisi foe a fasi fa a meki wi. Foe di a ben sabi a fasi fa a froestan nanga den inisei firi foe wi ben o wroko, dan a ben sabi taki wi ben sa de moro kolokoe nanga wan fri wani.
6. Fa Gado ben kria na ede-tonton foe wi foe meki a wroko akroederi a fri wani?
6 Foe kan wroko makandra nanga a presenti foe a fri wani, meki Gado ben gi wi a krakti foe denki, foe wegi afersi go-kon, foe teki bosroiti èn foe sabi a difrenti foe boen nanga ogri (Hebrewsma 5:14). So boen, a fri wani ben moesoe gron tapoe a teki di wi e teki nanga wi froestan san wi wani. Gado no ben meki wi leki robot di no abi froestan èn di no abi den eigi wani. Gado no ben kria wi foe handri nanga instinkt neleki den meti. Na presi foe dati, a toemoesi moi ede-tonton foe wi ben seti foe wroko akroederi a fri foe wi foe kan teki san wi wani.
A moro boen bigin
7, 8. Sortoe moi bigin Gado ben gi a fosi papa nanga mama foe wi?
7 Makandra nanga a presenti foe a fri wani, Gado ben gi a fosi papa nanga mama foe wi, Adam nanga Eva, ala sani di wan sma na wan reidelek fasi ben kan wani, foe sori fa a ben de wan lobi-ati Gado. Gado ben poti den na ini wan bigi paradijs di gersi wan park. Den ben abi bogobogo na materia sei. Den ben abi wan volmaakti froestan nanga wan volmaakti skin, so taki den no ben sa abi foe kon owroe noso kon siki noso dede — den ben kan libi foe têgo. Den ben sa kisi volmaakti pikin di ben kan abi wan kolokoe têgo tamara toe. Èn den sma di ben o kon moro foeroe dei foe dei, ben sa kisi a wroko di e gi satisfaksi, foe kenki a heri grontapoe kon tron wan paradijs te foe kaba. — Genesis 1:26-30; 2:15.
8 Foe den sani di Gado ben sorgoe gi, bijbel e taki: „Gado ben si ala sani di a ben meki èn loekoe! a ben de heri boen” (Genesis 1:31). Bijbel e taki toe foe Gado: „Volmaakti en wroko de” (Deuteronomium 32:4). Ija, a Kriaman ben gi a libisma famiri wan volmaakti bigin. Disi no ben kan de moro boen. Gado ben sori troetroe taki a de wan lobi-ati Gado!
Fri di skotoe
9, 10. Foe san ede wet moesoe tiri a fri wani na wan joisti fasi?
9 Ma Gado ben abi na prakseri taki a fri wani ben sa de sondro skotoe? Kon wi taki wan druk foto de sondro iniwan verkeerswet, pe ala sma ben kan rèi go na ala sei èn kan rèi o tranga den wani. Joe ben sa wani rèi na ondro den sortoe situwâsi dati? Nôno, dati ben sa de wan broeja ini a verkeer èn dati seiker ben sa abi foeroe ongolokoe leki bakapisi.
10 Na so a de toe nanga a presenti foe Gado foe a fri wani. Fri sondro skotoe ben sa wani taki broeja na ini a libimakandra. Wet moesoe de foe tiri den doe foe libisma. A Wortoe foe Gado e taki: „Leki fri soema (oen moe libi), ma no so, leki oen teki da fri vo wan djakti vo tapo oen ogridoe” (1 Petrus 2:16, Njoe Testament nanga dem Psalm). Gado wani taki wet moesoe tiri a fri wani foe a boen foe ala sma. A no ben abi na prakseri foe wi abi ala fri, ma foe wi abi fri di skotoe, di de na ondro a tiri foe wet.
Den wet foe soema?
11. Na den wet foe soema wi moesoe gi jesi?
11 Na den wet foe soema wi moesoe gi jesi? Wan tra pisi foe a tekst na ini 1 Petrus 2:16 (Njoe Testament nanga dem Psalm) e taki: „Leki knegti vo Gado.” Disi no wani taki wan katibo di e kwinsi sma, ma na presi foe dati a wani taki dati Gado ben denki fa wi skin ben moesoe seti na so wan fasi taki wi ben sa de moro kolokoe te wi e saka wisrefi na ondro den wet foe Gado (Mateus 22:35-40). Den wet foe en e gi a moro boen tiri, moro leki wet di libisma meki. „Mi, Jehovah, na joe Gado, a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka.” — Jesaja 48:17.
12. Sortoe fri foe kan teki san wi wani, wi abi inisei den wet foe Gado?
12 Na a srefi ten, inisei den skotoe foe den wet foe Gado wi kisi pasi foe abi bigi fri foe kan teki san wi wani. Disi abi difrenti sortoe sani leki bakapisi èn disi e meki a libisma famiri de wan toemoesi moi sani di e hari sma prakseri. Prakseri den difrenti sortoe njanjan, krosi, pokoe, kunst nanga oso na heri grontapoe. Sondro tweifri wi ben sa wani foe kan teki san wi wani ini den sortoe afersi dati, na presi foe meki wan tra sma teki wan bosroiti gi wi.
13. Na sortoe natoeroe wet wi moesoe gi jesi foe a boen foe wi?
13 So boen, Gado ben kria wi na so wan fasi taki wi ben sa de moro kolokoe te wi e saka wisrefi na ondro den wet foe Gado di abi foe doe nanga a fasi fa libisma moesoe tjari densrefi. A de a srefi leki te wi e saka wisrefi na ondro den natoeroe wet foe Gado. Foe eksempre, efoe wi no e gi jesi na a wet foe a zwaartekracht èn djompo komoto na wan hei presi, dan wi sa kisi mankeri noso dede. Efoe wi no e gi jesi na den wet na ini wi skin èn no e njan, dringi watra noso hari bro moro, dan wi o dede.
14. Fa wi sabi taki Gado no ben kria libisma foe libi sondro foe gi En frantiwortoe?
14 Net so seiker leki fa Gado ben kria wi nanga a tranga fanowdoe foe saka wisrefi na ondro den natoeroe wet foe en, na so a ben kria wi nanga a tranga fanowdoe foe saka wisrefi na ondro den wet foe en foe boen gwenti èn foe sociaal afersi (Mateus 4:4). A Mekiman no ben kria libisma foe libi sondro foe gi En frantiwortoe èn sani waka boen gi den. A profeiti Jeremia e taki: „A no de na wan man di e waka srefi foe bepaal pe foe poti en foetoe na pasi. Sori mi tapoe mi fowtoe, o Jehovah” (Jeremia 10:23, 24). So boen, na ini ala fasi libisma ben kria foe libi na ondro a tirimakti foe Gado, no di foe densrefi.
15. Den wet foe Gado ben sa de wan hebi gi Adam nanga Eva?
15 A no ben sa de wan hebi gi a fosi papa nanga mama foe wi foe gi jesi na den wet foe Gado. Na presi foe dati, a ben sa de gi a tanboen foe den èn gi a tanboen foe a heri libisma famiri. Efoe a fosi paar ben tan inisei den skotoe foe den wet foe Gado, dan ala sma ben sa abi en boen. Te joe loekoe en boen, dan nownow wi ben o libi na ini wan toemoesi moi paradijs foe prisiri leki wan lobi-ati libisma famiri di de ini wánfasi! Ogri, pina nanga dede no ben sa de.
[Aksi foe a tori disi]
[Prenki na tapoe bladzijde 11]
A Kriaman ben gi libisma wan volmaakti bigin
[Prenki na tapoe bladzijde 12]
Joe ben sa wani rèi na ini wan druk verkeer efoe verkeerswet no ben de?
