Fa wi sabi taki wi e libi na ini „den lasti dei”
Pisi 9
Fa wi sabi taki wi e libi na ini „den lasti dei”
1, 2. Fa wi kan sabi efoe wi e libi na ini den lasti dei?
FA WI kan de seiker taki wi e libi na ini a ten pe Gado en Kownoekondre sa doe wan sani nanga a disiten seti disi foe libisma tiri? Fa wi kan sabi taki wi de kefalek krosibei na a ten pe Gado o tjari wan kaba kon na ala godelowsoefasi nanga pina?
2 Den disipel foe Jesus Krestes ben wani sabi den sani dati. Den ben aksi en san ben sa de „a marki” foe en denoja ini Kownoekondre makti èn „foe a bosroiti foe a seti foe sani” (Mateus 24:3). Ini a piki di Jesus ben gi, a ben taki finifini foe sani di ben o pasa èn di ben o seki grontapoe, èn foe situwâsi di makandra ben sa sori taki a libisma famiri go na ini „a ten foe a kaba”, „den lasti dei” foe a seti foe sani disi (Danièl 11:40; 2 Timoteus 3:1). Wi si a marki disi di de ini difrenti pisi, na ini a jarihondro disi? Ija, wi si en srefisrefi!
Grontapoefeti
3, 4. Fa den feti foe a jarihondro disi e kroederi nanga a profeititori foe Jesus?
3 Jesus ben taki na fesi taki ’nâsi sa opo go feti nanga nâsi èn kownoekondre nanga kownoekondre’ (Mateus 24:7). Na ini 1914, grontapoe ben kon kisi foe doe nanga wan feti pe den ben sreka nâsi nanga kownoekondre gi a feti na wan fasi di ben de tra fasi leki iniwan feti na fesi. Foe erken taki disi ben de so, meki historia skrifiman na a ten dati ben kari a feti dati a Bigi Feti. A ben de a fosi feti na ini en sortoe na ini a historia, a fosi grontapoefeti. So wan 20.000.000 sroedati nanga borgoe ben lasi den libi, foeroe moro leki na iniwan feti na fesi.
4 A Fosi Grontapoefeti ben marki a bigin foe den lasti dei. Jesus ben taki dati a sani disi nanga tra sani di ben o pasa, ben sa de „wan bigin foe pen foe banawtoe” (Mateus 24:8). Dati ben sori taki a de wan troe sani, foe di a di foe Toe Grontapoefeti ben kiri moro sma srefi, so wan 50.000.000 sroedati nanga borgoe ben lasi den libi. Na ini a di foe 20 jarihondro disi, moro leki 100.000.000 sma dede na ini feti, moro leki fo tron so foeroe leki na ini den 400 jari na fesi te joe sa poti den makandra! Disi e kroetoe libisma tiri srefisrefi!
Tra boeweisi
5-7. San na wan toe tra boeweisi taki wi e libi na ini den lasti dei?
5 Jesus ben kari tra sani toe di ben o pasa na ini den lasti dei: „Bigi gronseki sa de, èn na a wan presi baka a trawan pestsiki [siki di e panja esi-esi go na ala sei] nanga mankeri foe njanjan” (Lukas 21:11). Den sani di pasa sensi 1914 kroederi boen nanga dati, foe di den banawtoe di e kon foe den sortoe rampoe dati kon moro foeroe srefisrefi.
6 Bigi gronseki na sani di e pasa doronomo èn foeroe sma e lasi den libi. A Spanjoro griep wawan ben kiri so wan 20.000.000 sma baka a Fosi Grontapoefeti — son sma e taki foe 30.000.000 sma noso moro. AIDS [SIDA] ben teki hondrohondro doesoen libi èn ben kan teki miljoenmiljoen libi moro na ini a krosibei tamara. Ibri jari miljoenmiljoen sma e dede foe ati-siki, kanker nanga tra siki. Miljoenmiljoen sma moro e dede a safrisafri dede foe angri ede. Tweifri no de taki sensi 1914 den ’asi-tjariman foe na Apocalyps’ nanga den feti, mankeri foe njanjan, nanga siki foe den di panja esi-esi go na ala sei, koti bigi nomroe foe a libisma famiri poeroe. — Openbaring 6:3-8.
7 Jesus ben taki na fesi toe foe ogridoe di kon moro foeroe, èn di ala kondre e ondrofeni. A ben taki: „Bika kroektoedoe sa kon moro foeroe, meki a lobi foe moro foeroe sma sa kon kowroe.” — Mateus 24:12.
8. Fa a profeititori na ini 2 Timoteus kapitel 3 e kroederi nanga wi ten?
8 Moro fara, bijbel profeititori ben taki na fesi foe a go di boen gwenti nanga wet e go kefalek na baka èn di de foe si na heri grontapoe na ini a ten disi: „Na ini den lasti dei moeilek ten sa kon, di tranga foe pasa. Bika sma sa lobi densrefi nomo, sma sa lobi moni, de asranti, abi heimemre, de blasfemiasma, de trangajesi na papa nanga mama, de sondro tangi, no sa de loyaal, no sa abi natuurlijk firi foe lobi, no sa de klariklari foe meki kroederi, de ogri-ati leiman, de sondro foe man dwengi densrefi, sa abi wan krasi fasi foe doe sani, de sondro lobi gi boen sani, de toriman, no sa ke foe noti, sa abi [bigimemre], sa lobi prisiri moro leki den lobi Gado, sa abi wan fasi foe a gi di den e gi densrefi na ini a dini foe Gado, ma di no sa sori foe abi a krakti foe dati . . . Godelowsoesma nanga bedrigisma sa kon moro ogri” (2 Timoteus 3:1-13). Wi si nanga wi eigi ai fa ala den sani dati kon troe.
Wan tra sani
9. San ben pasa na hemel a srefi ten leki a bigin foe den lasti dei na grontapoe?
9 Wan tra sani de di de frantiwortoe foe a bigi gro ini a pina di sma e pina na ini a jarihondro disi. Wan sani di ben pasa na a srefi ten leki a bigin foe den lasti dei na ini 1914, ben poti a libisma famiri srefi na ini moro bigi kefar. Soleki fa wan profeititori na ini a lasti boekoe foe bijbel e froeteri, dan na a ten dati „feti ben broko na hemel: Mikaèl [Krestes na ini hemel makti] nanga den engel foe en ben feti nanga a draak [Satan], èn a draak nanga den engel foe en [den ogri jeje] ben feti, ma a no ben wini, so srefi no wan presi no ben feni moro gi den na ini hemel. Foe dati ede den ben fringi a bigi draak go na ondro, a fosi sneki, a wan di den e kari Didibri nanga Satan, di e kori heri grontapoe pe sma e libi; den ben fringi en go na grontapoe, èn den engel foe en den ben fringi go na ondro makandra nanga en.” — Openbaring 12:7-9.
10, 11. Fa a ben abi krakti tapoe a libisma famiri di Satan nanga den ogri jeje foe en ben iti go na grontapoe?
10 San ben de a bakapisi gi a libisma famiri? A profeititori e go moro fara: „Heloe foe grontapoe nanga se, bika Didibri saka kon na oenoe, èn a abi bigi atibron, foe di a sabi taki a abi wan sjatoe pisi ten nomo.” Ija, Satan sabi taki a seti foe en e doro en kaba, foe dati ede a e doe ala san a kan foe drai libisma poeroe foe Gado bifo den poeroe en nanga en grontapoe na pasi (Openbaring 12:12; 20:1-3). Den jeje kriatoeroe disi lagi densrefi troetroe, bika den ben gebroiki a fri wani foe den na wan fowtoe fasi! A situwâsi na grontapoe kon takroe troetroe na ondro a krakti foe den, spesroetoe sensi 1914!
11 A no de wan froewondroe sani, taki Jesus ben taki na fesi foe a ten foe wi: „Kefalek ogri sani sa de foe si èn na hemel bigi marki.” — Lukas 21:11.
A kaba foe a tiri foe libisma nanga ogri jeje de krosibei
12. San na wan foe den lasti profeititori di tan abra èn di moesoe kon troe ete, bifo a seti disi kon na wan kaba?
12 Omeni bijbel profeititori moesoe kon troe ete bifo Gado e pori a disiten seti disi? Wan toe nomo! Wan foe den lastiwan skrifi na ini 1 Tesalonikasma 5:3, di e taki: „Ala di den e taki foe vrede nanga seikerfasi, wantronso rampoe naki den” (The New English Bible). Disi e sori taki a kaba foe a seti disi sa bigin „ala di den e taki”. Sondro foe grontapoe sa si dati na fesi, a pori sa kon te sma no froewakti en srefisrefi, te a prakseri foe libisma de na a vrede nanga seikerfasi di den e howpoe na tapoe.
13, 14. Foe sortoe ten foe problema Jesus ben taki na fesi, èn fa a sa kon na wan kaba?
13 Foeroe ten no de moro gi a grontapoe disi di de na ondro a krakti foe Satan. Heri esi a sa kon na en kaba na ini wan ten foe problema di Jesus ben taki foe en: „Na a ten dati wan bigi banawtoe sa de, soleki fa no ben pasa ete foe sensi a bigin foe grontapoe te now, nôno, èn no sa pasa moro toe.” — Mateus 24:21.
14 Gado en feti foe Armagedon sa de a heimarki foe a „bigi banawtoe”. Dati na a ten di a profeiti Danièl taki foe en te Gado sa „broko ala den kownoekondre disi na pisipisi èn tjari wan kaba kon na den”. Disi sa wani taki a kaba foe ala disiten tiri foe libisma di de aparti foe Gado. Dan En Kownoekondre tiri foe hemel sa teki a heri tiri abra foe ala libisma afersi. Danièl ben taki na fesi, taki noiti moro a makti foe tiri no sa gi „na no wan tra pipel”. — Danièl 2:44; Openbaring 16:14-16.
15. San sa pasa nanga a krakti di Satan nanga den ogri jeje foe en abi tapoe sma?
15 Na a ten dati, ala krakti di Satan nanga den ogri jeje abi tapoe sma, sa kon na wan kaba toe. Den jeje kriatoeroe dati di ben meki oproeroe sa poeroe na pasi, so taki den no kan „kori den nâsi moro” (Openbaring 12:9; 20:1-3). A dedestrafoe leisi gi den èn den e wakti foe kisi pori. A sa de troetroe wan froelekti gi a libisma famiri foe de fri foe a lagi krakti di den abi tapoe sma!
Soema sa tan na libi? Soema no sa tan na libi?
16-18. Soema sa tan na libi te a seti disi kon na wan kaba èn soema no sa tan na libi?
16 Te Gado e tjari strafoe kon na tapoe a grontapoe disi, soema sa tan na libi? Soema no sa tan na libi? Bijbel e sori taki den wan di wani a tiri foe Gado sa kisi kibri èn sa tan na libi. Den wan di no wani a tiri foe Gado no sa kisi kibri, ma sa kisi pori makandra nanga a grontapoe foe Satan.
17 Odo 2:21, 22 e taki: „Den opregtiwan [den wan di saka densrefi na ondro a tiri foe Gado] na den wan di sa tan na grontapoe, èn den wan sondro fowtoe na den wan di sa tan abra na tapoe. Foe a sei foe den godelowsoewan [den wan di no saka densrefi na ondro a tiri foe Gado], den sa koti poeroe foe grontapoe; èn foe a sei foe den feradelekwan, den sa hari den poeroe foe en.”
18 Psalm 37:10, 11 e taki toe: „Ete wan sjatoe pisi ten moro èn a godelowsoewan no sa de moro . . . Ma den safri-atisma sa abi grontapoe leki a goedoe foe den, èn den sa feni troetroe switi prisiri na ini vrede pasa marki.” Vers 29 e taki toe: „Na den regtfardiki sma sa abi grontapoe leki a goedoe foe den, èn den sa libi na tapoe foe têgo.”
19. Sortoe rai wi moesoe teki na ati?
19 Wi moesoe poti prakseri tapoe a rai foe Psalm 37:34, di e taki: „Howpoe tapoe Jehovah èn hori a pasi foe en, èn en sa hei joe so taki joe kan kisi grontapoe. Te den sa koti godelowsoewan poeroe, dan joe sa si disi.” Vers 37 nanga 38 e taki: „Loekoe a wan di no abi fowtoe èn poti joe ai na tapoe na opregtiwan, bika a tamara foe a man dati sa de nanga vrede. Ma den sma di pasa a wet foe Gado, den dati seiker sa kisi pori makandra; a tamara foe den godelowsoe sma seiker sa koti poeroe.”
20. Foe san ede wi kan taki dati wi e libi na ini span ten?
20 A e gi wi trowstoe, ija, krakti foe sabi taki Gado troetroe e broko en ede nanga wi èn taki heri esi a sa tjari wan kaba kon na godelowsoefasi nanga pina! Na wan span tori foe sabi taki a kontroe foe den kefalek moi profeititori dati no de fara moro!
[Aksi foe a tori disi]
[Prenki na tapoe bladzijde 20]
Bijbel taki na fesi sortoe sani ben o pasa, di ben sa de „a marki” foe den lasti dei
[Prenki na tapoe bladzijde 22]
Heri esi, na Armagedon, den sa koti den wan poeroe di no saka densrefi na ondro a tiri foe Gado. Den wan di saka densrefi sa tan na libi èn go na ini wan regtfardiki njoen grontapoe
