Foe san ede Gado gi pasi meki pina de
Pisi 6
Foe san ede Gado gi pasi meki pina de
1, 2. Fa a fosi papa nanga mama foe wi ben pori a toemoesi moi bigin di Gado ben gi den?
SAN ben go fowtoe? San ben feni presi di ben pori a toemoesi moi bigin di Gado ben gi a fosi papa nanga mama foe wi na ini a Paradijs foe Eden? Foe san ede godelowsoefasi nanga pina kon so foeroe doesoendoesoen jari kaba, na presi foe a vrede nanga a wánfasi foe a Paradijs?
2 A reide de taki Adam nanga Eva ben gebroiki a fri wani foe den na wan fowtoe fasi. Den no ben poti prakseri tapoe a troe tori taki Gado no ben kria den foe sani waka boen gi den sondro En nanga den wet foe en. Den ben teki a bosroiti foe go libi sondro foe gi Gado frantiwortoe èn den ben denki taki disi ben o meki a libi foe den kon moro boen. Foe dati ede den ben go dorosei foe den skotoe di Gado poti foe a fri wani. — Genesis kapitel 3.
A strei foe universeel soevereiniteit
3-5. Foe san ede Gado no ben kiri Adam nanga Eva èn ben bigin baka nanga wan tra libisma paar?
3 Foe san ede Gado no ben kiri Adam nanga Eva èn ben bigin baka nanga wan tra libisma paar? Bika den ben tjalensi en universeel soevereiniteit, dati wani taki, a reti di a abi foe tiri èn di no wan sma no kan teki poeroe na en anoe.
4 Na aksi ben de: Soema abi a reti foe tiri, èn a tiri foe soema joisti? Taki Gado de almakti èn de a Kriaman foe ala kriatoeroe e gi en a reti foe tiri den. Foe di a abi ala koni, meki a tiri foe en de a moro boenwan gi ala kriatoeroe. Ma now den ben tjalensi a tiri foe Gado. Boiti foe dati, wan sani no ben boen na en kriatoeroe — libisma? Baka ten wi sa ondrosoekoe fa na afersi foe a soifri retifasi foe libisma de ini a tori.
5 Foe di libisma ben go libi sondro foe gi Gado frantiwortoe, dan disi ben tjari wan tra aksi kon: A ben kan go moro boen nanga libisma efoe Gado no ben tiri den? A Kriaman troetroe ben sabi a piki, ma wan seiker fasi fa libisma ben sa kan kon sabi dati, ben de foe gi den ala fri di den ben wani. Den ben teki a fasi dati foe libi nanga den eigi fri wani, èn dati meki Gado ben gi den pasi foe abi a fri dati.
6, 7. Foe san ede Gado gi libisma pasi so langa foe abi ala fri?
6 Foe di Gado ben gi libisma nofo ten foe proeberi nanga ala fri foe loekoe fa sani sa go, dan foe ala ten Gado ben sa sori efoe a e go moro boen nanga libisma na ondro a tiri foe Gado noso te den de tapoe densrefi. Èn a ten di den kisi ben sa moesoe de langa nofo foe gi libisma na okasi foe doro san den e denki na a heimarki foe den sani di den doro na politiek sei, na industrie sei, na sabidensi sei èn na a sei foe dresi sma.
7 Foe dati ede Gado gi libisma pasi meki den abi foeroe fri foe doe san den wani te na a ten foe wi, foe sori sondro iniwan tweifri efoe a tiri foe libisma aparti foe Gado kan tjari boen bakapisi kon. Na so wan fasi libisma kan teki na mindri switifasi nanga takroefasi, na mindri lobi nanga bita-ati, na mindri regtfardikifasi nanga onregtfardikifasi. Ma a kon tanapoe toe na fesi den bakapisi foe san a wani teki: boenfasi nanga vrede noso godelowsoefasi nanga pina.
Na oproeroe foe jeje kriatoeroe
8, 9. (a) Fa oproeroe ben kon na ini a jeje kondre? (b) Soema, boiti Adam nanga Eva, Satan ben tjari go so fara foe meki oproeroe?
8 Wan tra sani de toe di wi moesoe hori na prakseri. A fosi papa nanga mama foe wi no ben de den wan-enkriwan di ben meki oproeroe nanga a tiri foe Gado. Ma soema moro ben de na a ten dati? Jeje kriatoeroe. Bifo Gado ben kria libisma, a ben kria wan moro hei sortoe libi, bigi nomroe foe engel, foe libi na ini hemel kondre. [Gado] ben kria den toe nanga wan fri wani èn so srefi nanga a tranga fanowdoe foe saka densrefi na ondro a tiri foe Gado. — Job 38:7; Psalm 104:4; Openbaring 5:11.
9 Bijbel e sori taki oproeroe ben bigin fosi na ini a jeje kondre. Wan jeje kriatoeroe ben wani ala fri. A ben wani srefi taki libisma anbegi en (Mateus 4:8, 9). A jeje oproeroeman disi ben plèi wan ròl ini na oproeroe di Adam nanga Eva ben meki nanga Gado; a ben taki na wan falsi fasi taki Gado ben hori wan boen sani na baka gi den (Genesis 3:1-5). Foe dati ede den e kari en Didibri (ogri-ati Leiman) nanga Satan (Gensman). Baka ten, a ben tjari tra jeje kriatoeroe go so fara foe meki oproeroe. Sma ben kon sabi den leki ogri jeje. — Deuteronomium 32:17; Openbaring 12:9; 16:14.
10. San ben de a bakapisi foe na oproeroe di libisma nanga jeje kriatoeroe ben meki?
10 Foe di libisma meki oproeroe nanga Gado, dan den ben gi densrefi abra na a krakti foe Satan nanga den ogri jeje foe en. Dati meki bijbel e kari Satan „a gado foe a seti foe sani disi”, di „breni a froestan foe den sma di no e bribi”. Foe dati ede a Wortoe foe Gado e taki dati „a heri grontapoe didon na ini a makti foe a godelowsoewan”. Jesus srefi ben kari Satan „a tiriman foe a grontapoe disi”. — 2 Korentesma 4:4; 1 Johanes 5:19; Johanes 12:31.
Toe strei
11. Ini a tori foe sortoe tra strei Satan ben tjalensi Gado?
11 Satan ben tjari wan tra strei kon na fesi di ben tjalensi Gado. Te joe loekoe en boen, dan a ben kragi Gado, taki a fasi fa En ben kria libisma, no ben boen èn taki no wan sma ben sa wani doe san joisti te den poti na ondro kwinsi. Foe taki leti, a ben taki dati te den ben sa kisi tesi, dan den ben sa floekoe Gado srefi (Job 2:1-5). Na a fasi disi Satan ben tjari a soifri retifasi foe a libisma kriatoeroe kon ini tweifri.
12-14. Fa a ten ben sa tjari a waarheid kon na krin foe den toe strei di Satan ben tjari kon na fesi?
12 Foe dati ede Gado gi nofo ten na ala kriatoeroe di abi froestan, foe si fa a strei disi, so srefi a strei ini a tori foe Gado en soevereiniteit, ben sa loesoe. (Teki gersi Exodus 9:16.) Den sani di te foe kaba ben o pasa na ini a libisma historia, ben sa tjari a waarheid kon na krin ini a tori foe den toe strei disi.
13 Na a fosi presi, san a ten ben sa tjari kon na krin foe a strei ini a tori foe universeel soevereiniteit, a reti di Gado abi foe tiri? Libisma ben kan tiri densrefi moro boen leki Gado? Iniwan seti foe libisma tiri di de aparti foe Gado ben sa kan tjari wan kolokoe grontapoe kon, fri foe feti, takroedoe nanga ongeregtighèit? Iniwan seti ben sa kan poeroe pôtifasi èn sorgoe foe a tanboen foe ala sma? Iniwan seti ben sa kan wini siki, owroedei nanga dede? A tiri foe Gado ben seti foe doe ala den sani dati. — Genesis 1:26-31.
14 Ini a tori foe a di foe toe strei, san a ten ben sa tjari kon na krin foe a waarde di a libisma kriatoeroe abi? A fasi fa Gado ben kria libisma ben fowtoe? Iniwan foe den ben sa handri na a joisti fasi na ondro tesi? Sma ben o de di ben sa sori taki den ben wani a tiri foe Gado na presi foe a tiri foe libisma aparti foe Gado?
[Aksi foe a tori disi]
[Prenki na tapoe bladzijde 13]
Gado gi ten meki libisma doro a heimarki foe den sani di den doe
[Sma di abi a reti foe a prenki]
Shuttle: Disi na wan fowtow foe NASA
