Gado e froeteri wi foe den prakseri foe en
Pisi 4
Gado e froeteri wi foe den prakseri foe en
1, 2. Fa wi doe sabi taki Gado e gi piki na den sma di na wan opregti fasi e aksi foe dati?
WAN lobi-ati Gado foe troe e tjari den prakseri foe en kon na krin gi opregti sma di e soekoe en. A e gi piki tapoe aksi di sma di lobi ondrosoekoe sani, e aksi, soleki foe san ede a gi pasi meki pina de.
2 Bijbel e froeklari: „Efoe joe e soekoe [Gado], a sa meki joe feni en.” „Wan Gado de na hemel di de wan Sma di e tjari kibritori kon na krin.” „A Soeverein Masra Jehovah no sa doe noti, sondro foe tjari en froetrow afersi kon na krin gi den foetoeboi foe en, den profeiti.” — 1 Kroniki 28:9; Danièl 2:28; Amos 3:7.
Pe wi kan feni den piki?
3. Pe wi kan kon sabi foe san ede Gado e gi pasi meki pina de?
3 Den piki tapoe den aksi soleki foe san ede Gado e gi pasi meki pina de èn san a sa doe nanga dati, de foe feni na ini a tori di a meki sma skrifi na ondro a krakti foe a santa jeje, foe a boen foe wi. A tori dati na en Wortoe, bijbel. „Na Gado ben meki den skrifi ala den Boekoe foe bijbel nanga jepi foe en santa jeje èn den boen foe gi leri, foe piri-ai gi sma, foe poti sani kon reti, foe gi tranga leri ini regtfardikifasi, so taki a sma di de foe Gado kan koni dorodoro, de srekasreka dorodoro gi ibri boen wroko.” — 2 Timoteus 3:16, 17.
4, 5. San e meki bijbel de wan aparti boekoe?
4 Bijbel na troetroe wan aparti boekoe. A abi a moro soifri tori foe a libisma historia na ini èn a e taki srefi foe tori di e go moro fara leki a ten di Gado ben kria libisma. A e taki foe sani foe a ten foe wi toe, bika den profeititori foe en abi foe doe nanga sani di e pasa na ini a ten foe wi èn so srefi na ini a krosibei tamara.
5 No wan tra boekoe abi den sortoe boeweisi disi foe soifri historia. Foe eksempre, soso wan toe boekoe de di prenspari skrifiman foe owroeten ben skrifi nanga anoe. Ma foeroe boekoe foe bijbel de di ben skrifi nanga anoe, foe son wan na pisi foe den de èn foe son wan na a heri boekoe de: so wan 6000 foe den Hebrew Boekoe foe bijbel (den 39 boekoe foe na „Owroe Testamenti”) èn so wan 13.000 foe den kresten Griki Boekoe foe bijbel (den 27 boekoe foe a „Njoen Testamenti”).
6. Foe san ede wi kan de seiker taki na ini a ten disi bijbel moro foeroe de a srefi leki di Gado ben meki den skrifi en na ondro a krakti foe en santa jeje?
6 Na Almakti Gado, di ben meki sma skrifi bijbel na ondro a krakti foe en santa jeje, sorgoe taki na ini den kopi foe den boekoe dati di ben skrifi nanga anoe, a soifrifasi foe a tekst foe bijbel kibri boen, meki noti no pasa nanga en. Dati meki den bijbel foe wi na ini a ten disi, de moro foeroe a srefi leki den boekoe di ben de biginbigin èn di sma ben skrifi na ondro a krakti foe a santa jeje. Wan tra sani di e jepi wi foe froestan disi, na taki wan toe kopi foe den kresten Griki Boekoe foe bijbel di ben skrifi nanga anoe, e go te moro mendri leki wan hondro jari baka di den skrifi den boekoe biginbigin. Den wan toe kopi di de ete foe den boekoe di grontapoe skrifiman foe owroeten ben skrifi nanga anoe, pikinmoro alamala den ben skrifi den foeroe jarihondro baka di den skrifi den boekoe biginbigin.
Wan presenti foe Gado
7. O foeroe bijbel e prati?
7 Bijbel na a boekoe di panja moro foeroe na ini a historia. So wan dri miljard eksemplaar druk. No wan tra boekoe e doro a nomroe dati. Èn a heri bijbel noso pisi foe bijbel, vertaal na ini so wan 2000 tongo. So boen, sma bereken taki 98 procent foe den sma di e libi na a planeiti foe wi ben sa kan abi wan bijbel.
8-10. San na wan toe reide foe san ede bijbel warti foe wi ondrosoekoe en?
8 Seiker, wan boekoe di e taki dati a komoto na Gado èn di abi ala den boeweisi na ini èn foe dorosei taki a de troe, warti foe wi ondrosoekoe en. * A e tjari kon na krin san na a marki foe libi, san den fasi fa sani de na grontapoe wani taki èn san a tamara o tjari kon. No wan tra boekoe kan doe dati.
9 Ija, Gado e taki nanga a libisma famiri nanga jepi foe bijbel. A ben tiri a skrifi foe bijbel nanga jepi foe en wrokokrakti noso jeje, èn so wan 40 sma ben doe a skrifiwroko. Na so wan fasi Gado e taki nanga wi nanga jepi foe en Wortoe, bijbel. Na apostel Paulus ben skrifi: „Di oenoe ben kisi a wortoe foe Gado, di oenoe ben jere foe wi, oenoe no ben teki en leki a wortoe foe libisma, ma, leki san a de troetroe, leki a wortoe foe Gado.” — 1 Tesalonikasma 2:13.
10 Abraham Lincoln, a di foe 16 presidenti foe Amerkankondre, ben kari bijbel „a moro boen presenti di Gado oiti gi libisma . . . Sondro [bijbel] wi no ben sa sabi a difrenti na mindri boen nanga ogri.” We now, san a moro bigi presenti disi e froeteri wi foe a fasi fa pina ben bigin, foe san ede Gado gi pasi meki a de èn san a sa doe nanga dati?
[Foetoewortoe]
^ paragraaf 8 Foe kon sabi moro finifini bodoi taki bijbel troe, loekoe a boekoe De bijbel — Gods woord of dat van mensen?, di a Watchtower Bible and Tract Society of New York, Inc. tjari kon na doro na ini 1989.
[Aksi foe a tori disi]
[Prenki na tapoe bladzijde 10]
Gado e taki nanga a libisma famiri nanga jepi foe bijbel, di a meki sma skrifi na ondro a krakti foe en santa jeje
