San na a bakapisi foe na oproeroe di sma ben meki?
Pisi 7
San na a bakapisi foe na oproeroe di sma ben meki?
1-3. Fa a ten sori taki Jehovah abi leti?
SAN ala den jarihondro disi di libisma tiri aparti foe Gado, sori ini a tori foe a strei di abi foe doe nanga a reti di Gado abi foe tiri? Libisma sori taki den de moro boen tiriman leki Gado? Kwetikweti, efoe wi e loekoe den tori foe den ogri-ati fasi di libisma abi gi makandra.
2 Di a fosi papa nanga mama foe wi ben weigri foe teki a tiri foe Gado, dan rampoe ben de a bakapisi. Den ben tjari pina kon na tapoe densrefi èn na tapoe a heri libisma famiri di ben komoto na den. Èn den no ben kan poti a fowtoe na tapoe no wan tra sma leki na tapoe densrefi. A Wortoe foe Gado e taki: „Den foe den sei, handri na wan pori fasi; den no de en pikin, a mankeri didon na densrefi.” — Deuteronomium 32:5.
3 A historia sori a joistifasi foe a warskow di Gado ben gi Adam nanga Eva, taki efoe den ben komoto na ondro den sani di Gado ben seti, dan den ben o go na baka èn te foe kaba dede (Genesis 2:17; 3:19). Den ben komoto troetroe na ondro a tiri foe Gado èn baka wan pisi ten den ben go na baka èn dede.
4. Foe san ede wi alamala gebore onvolmaakti, èn e kisi foe doe nanga siki èn nanga dede?
4 Romesma 5:12 e froeteri san ben pasa baka ten nanga ala den pikin foe den: „Nanga wán man [Adam, na osofamiri-edeman foe a libisma famiri], sondoe ben kon na grontapoe èn nanga sondoe dede kon, èn na so dede panja go na ala libisma.” So boen, di a fosi papa nanga mama foe wi ben meki oproeroe nanga a tiri foe Gado, dan den ben tron sondari di abi fowtoe. Akroederi den wet di e meki pikin kisi eigifasi foe papa nanga mama, dan na onvolmaaktifasi di ben de a bakapisi, ben de ala san den ben kan gi abra na den pikin foe den. Dati meki wi alamala gebore nanga fowtoe èn kisi foe doe nanga siki èn nanga dede.
5, 6. San a historia sori foe a moeiti di libisma meki foe tjari troe vrede nanga kolokoe kon?
5 Foeroe jarihondro pasa. Grontapoemakti kon èn den gowe. Libisma proeberi ibri sortoe tiri di den denki taki kan boen. Tokoe toemoesi ogri sani pasa nanga a libisma famiri ala ten baka. Wan sma ben sa denki taki baka siksi doesoen jari, libisma ben sa doro so fara taki den meki vrede, geregtighèit nanga kolokoe kon na heri grontapoe èn taki nownow kaba den ben sa basi den boen eigifasi leki boenfasi, sari-ati nanga wrokomakandra.
6 Ma sani de heri tra fasi. No wan enkri sortoe tiri foe libisma di oiti ben meki, tjari troe vrede nanga kolokoe kon gi ala sma. Na ini a di foe 20 jarihondro disi wawan, wi si a kiri foe miljoenmiljoen sma na wan orga fasi na ini a ten foe a Holocaust èn a kiri foe moro leki 100 miljoen sma na ini feti. Na ini a ten foe wi, den pina foeroe sma di joe no man teri, den kiri den èn poti den na ini doengroe-oso, foe di sma no man froedrage makandra èn foe kesekese ede na politiek sei.
A situwâsi na ini a ten disi
7. San wi kan taki foe a situwâsi foe a libisma famiri na ini a ten disi?
7 Boiti foe dati, loekoe a heri situwâsi foe a libisma famiri na ini a ten disi. Takroedoe nanga ogri di doe nanga tranga de na ala sei. A fowtoe gebroiki foe drug e gro pasa marki. Siki di sma e kisi nanga jepi foe seks e panja esi-esi go na ala sei. Miljoenmiljoen sma e kisi a siki AIDS di sma e frede srefisrefi. Foeroe tenti miljoenmiljoen sma e dede foe angri noso foe siki ede ala jari, ala di wan pikin nomroe sma goedoe srefisrefi. Libisma e doti èn e foefoeroe a goedoe foe grontapoe. Na osofamiri libi nanga warti sani na a sei foe boen gwenti nanga wet e go na baka na ala presi. Foe troe, a libi na ini a ten disi e sori a takroe tiri foe ’a gado foe a grontapoe disi’, Satan. A grontapoe di a de a basi foe en, kowroe, ogri pasa marki èn kroeka dorodoro. — 2 Korentesma 4:4.
8. Foe san ede wi kan taki dati den sani di libisma doe, a no troetroe go-na-fesi?
8 Gado gi libisma nofo ten foe doro a heimarki foe a go-na-fesi foe den na sabidensi sei èn na materia sei. Ma sma kan taki foe troetroe go-na-fesi, efoe masjin gon, tank, opolani di e trowe bom, nanga kern raket e kon ini a presi foe a bo nanga peiri? Sma kan taki foe go-na-fesi efoe sma kan rèis go na a kontren foe na universum, ma no kan libi makandra ini vrede na grontapoe? Sma kan taki foe go-na-fesi efoe sma frede foe waka na strati na neti, noso srefi na deiten na son presi?
San a ten sori
9, 10. (a) San den jarihondro di pasa sori krin? (b) Foe san ede Gado no sa teki a fri wani poeroe?
9 A waarheid foe den jarihondro sori taki libisma no man tiri den eigi foetoestap foe den nanga boen bakapisi sondro a tiri foe Gado. Den no man doe dati neleki fa den no man libi sondro foe njan, dringi èn hari blo. A boeweisi de krin: Net so seiker leki fa Gado ben kria wi taki wi no man libi sondro njanjan, watra nanga loktoe, na so A ben meki wi taki wi no man libi sondro a tiri foe a Kriaman.
10 Foe di Gado e gi pasi meki ogridoe de, dan wán leisi gi ala ten A ben sori den sari bakapisi foe a fowtoe gebroiki foe a fri wani. Èn a fri wani na so wan diri presenti, taki na presi foe Gado teki en poeroe na libisma, A gi den pasi foe si san a wani taki foe gebroiki en na wan fowtoe fasi. A Wortoe foe Gado e taki a waarheid te a e taki: „A no de na wan man di e waka srefi foe bepaal pe foe poti en foetoe na pasi.” A troe toe te a e taki: „Libisma tiri tra libisma nanga ogri bakapisi gi en.” — Jeremia 10:23; Preikiman 8:9.
11. Iniwan fasi foe libisma tiri poeroe a pina di sma e pina?
11 A gi di Gado gi pasi meki libisma tiri siksi doesoen jari langa, e sori na wan krakti fasi taki libisma no man tapoe a pina di sma e pina. Na no wan ten libisma man doe dati. Foe eksempre, na ini en ten, kownoe Salomo foe Israèl, nanga ala en koni, goedoe nanga makti, no ben man poeroe a nowtoe di ben de a bakapisi foe libisma tiri (Preikiman 4:1-3). Na a srefi fasi a de, taki fesiman foe grontapoe na ini a ten foe wi no man poeroe a pina di sma e pina, srefi nanga den moro njoen sani foe a tèknik. Moro takroe srefi, a historia sori taki sondro a tiri foe Gado, libisma meki moro pina kon, na presi foe poeroe dati.
A fasi fa Gado e si sani tapoe wan langa pisi ten
12-14. Sortoe winimarki tapoe wan langa pisi ten kon leki wan bakapisi foe a gi di Gado gi pasi meki pina de?
12 A gi di Gado gi pasi meki pina de, na wan hati sani gi wi. Ma a e si sani tapoe wan langa pisi ten èn a sabi den boen bakapisi di sa kon te foe kaba. A fasi fa Gado e si sani sa tjari wini kon gi den kriatoeroe, no soso foe wan toe jari noso wan toe doesoen jari nomo, ma foe miljoenmiljoen jari, ija, foe ala têgo ten.
13 Efoe oiti na ini a ten di de na wi fesi, a situwâsi opo kon taki wan sma gebroiki en fri wani na wan fowtoe fasi foe meki sma tweifri na a fasi fa Gado e doe sani, dan a no ben sa de fanowdoe foe gi a sma ten foe proeberi foe boeweisi a fasi fa a e si sani. Foe di Gado gi pasi meki oproeroeman de doesoendoesoen jari kaba, dan a poti wan eksempre di gron tapoe wet èn di kan gebroiki ini ala têgo ten na ala presi ini na universum.
14 Foe di Jehovah gi pasi meki ogridoe nanga pina de na ini a ten disi, dan nofo boeweisi sa gi kaba taki noti di no e kroederi nanga en, kan abi boen bakapisi. Sondro tweifri a sa kon de krin foe si taki no wan plan di libisma noso jeje kriatoeroe e meki, sondro foe gi Gado frantiwortoe, kan tjari winimarki kon di e tan. Foe dati ede, Gado sa abi ala reti na a ten dati foe pori iniwan oproeroeman esi-esi. „Den godelowsoewan a sa kiri.” — Psalm 145:20; Romesma 3:4.
[Aksi foe a tori disi]
[Prenki na tapoe bladzijde 15]
Baka di a fosi papa nanga mama foe wi bosroiti foe libi sondro foe gi Gado frantiwortoe, dan te foe kaba den kon owroe èn dede
[Prenki na tapoe bladzijde 16]
A tiri di libisma tiri aparti foe Gado sori taki a de wan rampoe
[Sma di abi a reti foe a prenki]
U.S. Coast Guard photo
