A Kroetoedei èn san e kon baka dati
Kapitel 21
A Kroetoedei èn san e kon baka dati
1. Fa foeroe sma e si a Kroetoedei?
SORTOE PRENKI a Kroetoedei e tjari kon na joe prakseri? Son sma e si na den fesi wan bigi kownoestoeroe èn na fesi foe dati, wan langa lin foe sma di ben kisi wan opobaka na dede. Ibri sma di e kon na fesi a kownoestoeroe, den e kroetoe en akroederi den sani di a ben doe fositen èn di alamala skrifi poti ini a boekoe foe a Kroetoeman. Tapoe a gron foe den sani di a sma ben doe, den e seni en go na hemel noso na wan faja hèl.
2. (a) Soema seti a Kroetoedei? (b) Soema a ben poti leki kroetoeman?
2 Ma bijbel e gi wan heri tra prenki foe a Kroetoedei. A no wan dei di wi moesoe abi skreki-ati gi, noso di wi moesoe frede. Loekoe san bijbel e taki foe Gado: „A poti wan dei pe a abi na prakseri foe kroetoe a grontapoe pe sma e libi, ini regtfardikifasi nanga jepi foe wan man di a poti” (Tori foe den Apostel 17:31). A no de foe taki, dati a kroetoeman disi di Gado ben poti, na Jesus Krestes.
3. (a) Foe san ede wi kan de seiker taki Krestes sa kroetoe sani na wan reti fasi? (b) Tapoe a gron foe sortoe sani den sa kroetoe den sma?
3 Wi kan de seiker taki Krestes sa kroetoe sani na wan reti èn regtfardiki fasi. Wan profeititori di e taki foe Jesus, na ini Jesaja 11:3, 4, e gi wi a djaranti dati. So boen, tra fasi leki fa foeroe sma e prakseri, a no sa kroetoe sma tapoe a gron foe den sondoe di den ben doe fositen, èn di kande foeroe foe den, den ben doe ini don. Bijbel e tjari kon na krin taki te wan sma dede, dan a kon fri foe ala den sondoe di a doe. Bijbel e taki: „A sma di dede, kon fri foe en sondoe” (Romesma 6:7). Disi wani taki, dati te wan sma e kisi wan opobaka, dan den sa kroetoe en tapoe a gron foe san a e doe na ini a ten foe a Kroetoedei, no tapoe a gron foe san a ben doe bifo a dede.
4. (a) O langa a Kroetoedei sa de? (b) Soema sa de kroetoeman nanga Krestes?
4 A Kroetoedei foe dati ede, a no wan troetroe dei foe 24 joeroe. Bijbel e tjari disi kon na krin, te a e taki foe den sma di sa abi wan prati nanga Jesus Krestes na a kroetoewroko (1 Korentesma 6:1-3). „Mi ben si kownoestoeroe,” a bijbel skrifiman e taki, „èn joe ben abi sma di ben go sidon na den tapoe, èn den ben kisi makti foe kroetoe.” Den kroetoeman disi na den getrow salfoe bakaman foe Krestes di, soleki fa bijbel e taki moro fara, „ben kon na libi èn ben tiri leki kownoe nanga a Krestes doesoen jari langa”. So boen, a Kroetoedei sa de 1000 jari langa. A de a srefi pisi ten foe 1000 jari di Krestes nanga den 144.000 getrow salfoe bakaman foe en leki „njoen hemel” sa tiri a „njoen grontapoe”. — Openbaring 20:4, 6; 2 Petrus 3:13.
5, 6. (a) Fa wan psalm singiman foe bijbel ben skrifi foe a Kroetoedei? (b) Fa a libi sa de na grontapoe na ini a ten foe a Kroetoedei?
5 Loekoe den bladzijde disi pikinso. Den e sori joe pikinso o kefalek switi a Kroetoedei sa de gi a libisma famiri. A psalm singiman foe bijbel ben skrifi foe a glori ten dati: „Meki na opo sabana de nanga prisiri pasa marki èn ala sani san de na en tapoe. Na a srefi ten meki ala den bon foe a boesi bari wan prisiri babari na fesi Jehovah. Bika a kon; bika a kon foe kroetoe grontapoe. A sa kroetoe a fatoe gron nanga regtfardikifasi èn den pipel nanga en getrowfasi.” — Psalm 96:12, 13.
6 Na ini a ten foe a Kroetoedei, dan den sma di pasa Armagedon libilibi, sa wroko makandra foe meki grontapoe kon tron wan paradijs. Na ini a paradijs disi den sa gi den dedewan, di sa kisi wan opobaka, wan switikon (Lukas 23:43). Fa a sa de wan kolokoe ten, te famiriman, di dede ben prati den langa ten foe makandra, e tjari kon na makandra baka! Ija, fa a sa switi foe libi ini vrede, foe njan boen foe wan boen gosontoe èn foe kisi leri foe den prakseri foe Gado! Bijbel e taki: „Te kroetoe de, di kon foe joe gi grontapoe, dan na regtfardikifasi den sma di e libi na tapoe a fatoe gron sa leri troetroe” (Jesaja 26:9). Na ini a ten foe a Kroetoedei, ala sma sa leri sabi Jehovah èn den sa kisi ala okasi foe gi jesi na en èn foe dini en.
7. San sa pasa na ini a ten foe a Kroetoedei nanga den sma di e teki a bosroiti foe dini Gado èn nanga den sma di e weigri foe doe disi?
7 Jesus Krestes nanga den 144.000 kompe kownoe foe en, sa kroetoe a libisma famiri na ondro den sortoe paradijs fasi disi fa sani o de. Den sma di teki a bosroiti foe dini Jehovah, sa man foe kisi têgo libi. Ma srefi na ondro den moro boen fasi disi fa sani o de, joe sa abi son sma di sa weigri foe dini Gado. A de soleki fa den Boekoe foe bijbel e taki: „Ala di joe ben sa sori na ogriwan boen-ati, tokoe a no sa leri regtfardikifasi kwetikweti. Ini a kondre foe opregtifasi, a sa doe kroektoe” (Jesaja 26:10). So boen, baka te den ogriwan disi kisi ala okasi foe kenki den pasi foe den èn foe leri regtfardikifasi, dan den sa kisi pori. Den sa kiri sonwan foe den, srefi bifo a Kroetoedei kon na wan kaba (Jesaja 65:20). Den no sa kisi na okasi foe tan e pori a paradijs grontapoe.
8. Fa a fasi foe den man foe Sodom ben de na a sei foe boen gwenti nanga wet?
8 Foe troe, a sa de wan bigi grani foe kisi wan opobaka na grontapoe ini a ten foe a bigi Kroetoedei foe Jehovah. Ma, bijbel e sori taki a no ala sma sa njan boen foe a grani disi. Teki foe eksempre, den sma foe Sodom foe owroeten. Bijbel e taki dati den man foe Sodom ben wani abi seks nanga „den man” di ben go loekoe Lot. A hoeroedoe fasi foe libi foe den ben de so lagi, taki srefi di den ben breni den na wan wondroe fasi, „den ben weri densrefi toemoesi foe proeberi foe feni a doro” foe na oso foe go na inisei, foe abi seks nanga den man di ben go loekoe Lot. — Genesis 19:4-11.
9, 10. San den Boekoe foe bijbel e sori ini a tori foe a froewakti efoe den ogri sma foe Sodom sa kisi wan opobaka?
9 Den kefalek ogri sma disi sa kisi wan opobaka na ini a ten foe a Kroetoedei? Den Boekoe foe bijbel e sori krin, taki den no sa kisi wan opobaka. Foe eksempre, wán foe den disipel foe Jesus di ben kisi santa jeje, Judas, ben skrifi fosi foe den engel di ben libi a presi foe den na hemel foe abi seks nanga den oemapikin foe libisma. Dan a ben taki moro fara: „So toe, Sodom nanga Gomora nanga den foto di ben de lontoe den, baka di den ben doe hoeroedoe pasa marki na a srefi fasi leki den wan di kari dja na fesi, èn den ben go baka skin foe gebroiki dati na wan fasi di no fiti, den e poti den na wi fesi leki wan eksempre foe warskow wi, foe di den e kisi a kroetoe strafoe foe têgo faja” (Judas 6, 7; Genesis 6:1, 2). Ija, foe di den sma foe Sodom nanga den foto di ben de lontoe den ben doe hoeroedoe pasa marki, dan den ben kisi wan pori di sori krin taki den no sa kisi wan opobaka noiti. — 2 Petrus 2:4-6, 9, 10a.
10 Jesus ben sori toe taki kande den Sodomsma no sa kisi wan opobaka. Di a ben taki foe Kaperna-um, wan foe den foto pe a ben doe wondroe, a ben taki: „Efoe den krakti wroko di ben feni presi na joe [Kaperna-um], ben feni presi na Sodom, dan te leki a dei foe tide a ben sa de ete. Foe dati ede mi e taigi oenoe: Na a Kroetoedei a sa de moro makriki gi a kondre foe Sodom foe tjari, leki gi oenoe” (Mateus 11:22-24). Djaso Jesus ben poti krakti na tapoe a fowtoefasi foe den Kaperna-umsma, foe di a ben taki, dati a ben sa de moro makriki gi den Sodomsma foe owroeten foe tjari, di, na ini a prakseri foe den arkiman foe Israèl, no ben warti srefisrefi foe kisi wan opobaka na a Kroetoedei.
11. Foe san ede na a Kroetoedei a sa de moro makriki gi den „regtfardikiwan” leki gi iniwan foe den „onregtfardikiwan”?
11 Dati meki wi moesoe doe ala san wi man foe libi na so wan fasi, so taki wi kan kisi wan opobaka. Ma kande sma sa aksi ete: A sa de moro moeilek gi sonwan foe den dedewan di kisi wan opobaka, foe leri èn foe doe san regtfardiki, leki gi trawan? We, loekoe pikinso san e kon now: Bifo den „regtfardiki” sma leki Abraham, Isak, Job, Debora, Rut nanga Danièl dede, den alamala ben loekoe go na fesi na a kon foe a Mesias. Fa den sa prisiri srefisrefi na ini a ten foe a Kroetoedei foe kon leri sabi moro foe en èn foe kon sabi taki a e tiri na hemel! So boen, na a ten dati a sa de moro makriki srefisrefi gi den „regtfardiki” sma disi foe doe san regtfardiki leki gi iniwan foe den „onregtfardikiwan” di e kisi wan opobaka. — Tori foe den Apostel 24:15.
OPOBAKA FOE KISI „LIBI” ÈN FOE KISI „KROETOE”
12. Soema e kisi wan „opobaka foe kisi libi” èn soema e kisi wan „opobaka foe kisi kroetoe”, soleki fa Johanes 5:28-30 e taki?
12 Di Jesus ben taki foe a situwâsi na a Kroetoedei, a ben taki dati den wan „di de na ini den memre-grebi, sa jere en sten èn sa kon na doro, den wan di ben doe boen sani, foe go ini wan opobaka foe kisi libi, den wan di ben doe tegoe sani, foe go ini wan opobaka foe kisi kroetoe. . . . leki fa mi e jere, na so mi e kroetoe; èn a kroetoe di mi e kroetoe, regtfardiki, bika mi no e soekoe mi eigi wani, ma a wani foe en di ben seni mi kon” (Johanes 5:28-30). San na a „opobaka [disi] foe kisi libi” èn san na a „opobaka foe kisi kroetoe”? Èn soema e kisi dati?
13. San a wani taki gi wan sma foe kisi wan „opobaka foe kisi libi”?
13 Wi si krin kaba taki, te den dedewan e komoto na den grebi kon na doro, dan den no e kroetoe den akroederi den sani di den ben doe fositen. Na presi foe dati, den e kroetoe den tapoe a gron foe san den e doe na ini a ten foe a Kroetoedei. So boen, di Jesus ben taki foe „den wan di ben doe boen sani” èn „den wan di ben doe tegoe sani”, dan a ben poti prakseri na tapoe den boen sani nanga den takroe sani di den ben sa doe na ini a ten foe a Kroetoedei. Leki wan bakapisi foe den boen sani di den e doe, dan foeroe foe den dedewan di o kisi wan opobaka, sa go na fesi dei foe dei, te leki den kisi libisma volmaaktifasi na a kaba foe a 1000-jari Kroetoedei. Na so a drai di den drai komoto na dede, sa sori taki a de wan „opobaka foe kisi libi”, bika den sa kisi volmaakti libi sondro sondoe.
14. San a wani taki gi wan sma foe kisi wan „opobaka foe kisi kroetoe”?
14 Na a tra sei, fa a de nanga den wan ’di ben doe tegoe sani noso ogri sani’ na ini a ten foe a Kroetoedei? A drai di den drai komoto na dede, sa sori taki a de wan „opobaka foe kisi kroetoe”. San disi wani taki? A wani taki wan kroetoe noso strafoe foe dede. So boen, den sma disi sa kisi pori na ini a ten foe a Kroetoedei noso na a kaba foe a Kroetoedei. Foe san ede dati de so, na foe di den e doe ogri sani; den e weigri na wan tranga-edefasi foe leri èn foe doe san regtfardiki.
TE A KROETOEDEI E BIGIN
15. San e pasa leti fesi a Kroetoedei e bigin?
15 Na apostel Johanes ben si na ini wan fisjoen, san e pasa leti fesi a Kroetoedei. A ben skrifi: „Mi ben si wan bigi weti kownoestoeroe nanga a sma di ben sidon na tapoe. Grontapoe nanga hemel ben lon komoto na en fesi, . . . Èn mi ben si den dedewan, den bigiwan nanga den pikinwan, tanapoe na fesi a kownoestoeroe . . . Èn den ben kroetoe den dedewan” (Openbaring 20:11, 12). So boen, bifo a Kroetoedei e bigin, dan a disiten seti foe sani, di de „grontapoe nanga hemel”, sa komoto na pasi. Soso den wan di e dini Gado sa tan na libi, ala di ala den ogri sma e kisi pori na ini Armagedon. — 1 Johanes 2:17.
16. (a) Soema, boiti den dedewan, den sa kroetoe na ini a ten foe a Kroetoedei? (b) Nanga jepi foe san den sa kroetoe den?
16 So boen, a no de soso den „dedewan” di kisi wan opobaka, di den sa kroetoe na ini a ten foe a Kroetoedei. Den sa kroetoe so srefi den „libiwan” di pasa Armagedon libilibi, nanga iniwan pikin di kande den abi (2 Timoteus 4:1). Ini en fisjoen, Johanes ben si fa den e kroetoe den. „Èn boekoelolo ben opo”, a ben skrifi. „Èn den ben kroetoe den dedewan tapoe a gron foe den sani di ben skrifi na ini den boekoelolo, akroederi den sani di den ben doe. Èn a se ben gi den dedewan abra di ben de na en ini, èn dede nanga Hades ben gi den dedewan abra di ben de na den ini, èn den ben kroetoe ibriwan foe den aparti, akroederi den sani di den ben doe.” — Openbaring 20:12, 13.
17. San na den „boekoelolo” di nanga jepi foe den, den sa kroetoe den „libiwan” nanga den „dedewan”?
17 San na den „boekoelolo” di ben opo èn di nanga jepi foe den, den e kroetoe „den dedewan” so boen leki „den libiwan”? A de krin taki den lolo sa de wan sani di poti go moksi nanga a disiten Santa Bijbel foe wi. Den lolo na boekoe di skrifi nanga jepi foe santa jeje èn den abi den wet nanga leri foe Jehovah. Ala sma na grontapoe sa man kon sabi san na a wani foe Gado, te den e leisi den. Dan, tapoe a gron foe den wet nanga leri na ini den „boekoelolo” disi, den sa kroetoe ala sma na grontapoe. Den sma di e hori densrefi na den sani di skrifi na ini den boekoelolo disi, sa kisi den winimarki foe a froeloesoe-ofrandi foe Krestes, èn safrisafri den sa gro kon kisi libisma volmaaktifasi.
18. (a) Fa a situwâsi sa de na a kaba foe a Kroetoedei? (b) Na sortoe fasi den „dedewan” e kon na libi na a kaba foe den 1000 jari?
18 Na a kaba foe a 1000-jari Kroetoedei, no wan sma na grontapoe sa de ini wan fasi taki a o dede leki wan bakapisi foe a sondoe foe Adam. Foe troe, ala sma sa kon na libi dorodoro. Dati na san bijbel e sori na tapoe nanga den wortoe: „Den tra dedewan [den wan di no de foe den 144.000 di e go na hemel] no ben kon na libi te leki den doesoen jari ben kon na wan kaba” (Openbaring 20:5). Dati den e taki dja foe „den tra dedewan”, no wani taki, dati tra sma e kisi wan opobaka na a kaba foe a 1000-jari Kroetoedei. Na presi foe dati a wani taki, dati ala sma e kon na libi na a fasi disi, taki den e doro a marki foe libisma volmaaktifasi te foe kaba. Den sa de ini a srefi volmaakti fasi leki fa Adam nanga Eva ben de na ini a djari foe Eden. San sa pasa baka dati?
BAKA A KROETOEDEI
19. San Krestes e doe na a kaba foe a Kroetoedei?
19 Te Jesus Krestes doe ala sani san Gado gi en foe doe, dan a „e gi a kownoekondre abra na en Gado nanga Tata”. Dati e pasa na a kaba foe a 1000-jari Kroetoedei. Na a ten dati ala feanti sa poeroe na pasi kaba. A lasti feanti na a dede di wi kisi foe Adam. Dati sa kon na wan kaba! Dan a Kownoekondre e tron foe Jehovah Gado. Ensrefi e tiri en leki Kownoe. — 1 Korentesma 15:24-28.
20. (a) San Jehovah sa doe foe bepaal soema nen moesoe skrifi na ini „a boekoe foe libi”? (b) Foe san ede a e fiti taki wan lasti tesi kon na tapoe a libisma famiri?
20 Fa Jehovah sa bepaal soema nen moesoe skrifi na ini a „boekoelolo foe libi” noso „a boekoe foe libi”? (Openbaring 20:12, 15) Dati a sa doe nanga jepi foe wan tesi, tapoe a libisma famiri. Prakseri fa Adam nanga Eva ben fadon gi so wan tesi, èn fa Job, di a ben kisi tesi, ben tan hori en soifri retifasi. Ma moro foeroe sma di e tan na libi te na a kaba foe den 1000 jari, noiti no ben ondrofeni wan tesi tapoe a bribi foe den ete. Bifo den ben kisi wan opobaka, den no ben sabi den prakseri foe Jehovah. Den ben de wan pisi foe na ogri seti foe sani foe Satan; den ben de „onregtfardiki”. Èn baka na opobaka foe den, a no ben de moeilek gi den foe dini Jehovah, foe di den ben libi na ini wan paradijs sondro no wan enkri gens foe a sei foe Didibri. Ma den miljardmiljard sma disi di de volmaakti na a ten dati, sa dini Jehovah efoe Satan kisi na okasi foe proeberi foe tapoe den foe doe disi moro langa? Satan kan doe nanga den san a ben doe nanga a volmaakti Adam nanga Eva?
21. (a) Fa Jehovah sa meki taki tesi kon na tapoe a libisma famiri? (b) San sa pasa nanga ala sma di de ini a tori, te a tesi kon na wan kaba?
21 Foe loesoe den sortoe aksi disi, dan Jehovah e loesoe Satan nanga den ogri jeje foe en foe a peti di no abi gron, pe den ben de na ini foe 1000 jari langa. San na a bakapisi? Bijbel e sori taki a o waka boen gi Satan foe drai son sma poeroe foe a dini foe Jehovah. Den sma disi sa de leki „a santi foe se”, san wani taki, dati wi no sabi omeni den de. Baka te a tesi disi kon na wan kaba, dan den e trowe Satan nanga den ogri jeje foe en èn so srefi den wan di no ben pasa a tesi, go na ini na agersi „se foe faja”, san wani taki, a di foe toe dede noso têgo dede (Openbaring 20:7-10, 15). Ma den wan di den nen skrifi ini „a boekoe foe libi”, sa tan na ini a toemoesi switi grontapoe paradijs. Dati a nen foe den skrifi na ini „a boekoe foe libi”, wani taki, dati Jehovah feni den regtfardiki dorodoro ini ati, froestan nanga skin èn na so fasi a e feni den warti foe libi foe têgo na ini wan paradijs na grontapoe.
A DISITEN KROETOEDEI
22. San wi moesoe pasa libilibi now, efoe wi wani si a Kroetoedei nanga a lasti tesi na tapoe a libisma famiri?
22 So boen, bijbel e gi bodoi foe den sani di o pasa moro leki 1000 jari na ini a ten di de na wi fesi. Èn a e sori taki no wan sani de foe san ede wi moesoe frede san de na wi fesi e kon. Ma na aksi de: Joe sa de drape foe njan boen foe den boen sani di Jehovah Gado abi foe gi? Disi sa anga foe a pasa di joe sa pasa libilibi wan moro froekoe kroetoedei, namkoe, a disiten „dei foe kroetoe èn foe a pori foe den takroe sma”. — 2 Petrus 3:7.
23. (a) Na ini sortoe toe groepoe den e prati libisma nownow kaba? (b) San sa pasa nanga ibriwan foe den groepoe, èn foe san ede?
23 Ija, sensi Krestes ben drai kon baka èn ben go sidon na tapoe en hemel kownoestoeroe, a e kroetoe a heri libisma famiri. A disiten „dei foe kroetoe” e kon bifo a 1000-jari Kroetoedei e bigin. Na ini a ten foe a disiten kroetoe den e prati sma leki „bokoboko” na a kroektoe-anoesei foe Krestes noso leki „skapoe” na a reti-anoesei foe en. Den „bokoboko” sa kisi pori foe di den no e jepi den salfoe „brada” foe Krestes ini a diniwroko di den e doe gi Gado. Baka wan pisi ten, den „bokoboko” disi e sori taki den de sondari di no abi berow, di ogri èn di ati kon tranga ini a doe di den e doe onregtfardikifasi. Den „skapoe” na a tra sei, sa kisi blesi nanga libi na ondro a Kownoekondre tiri, foe di den e hori baka gi den „brada” foe Krestes na ala fasi. — Mateus 25:31-46.
[Aksi foe a tori disi]
[Prenki na tapoe bladzijde 178]
Foe san ede Jesus ben taki dati na a Kroetoedei a ben sa de moro makriki gi den sma foe Sodom foe tjari?
