Kapitel 16

A tiri foe Gado e bigin foe tiri

1. (a) San sma di ben abi bribi, wakti langa foe a kon? (b) Foe san ede den e kari a kownoekondre foe Gado wan „foto”?

DOESOENDOESOEN jari kaba, sma di ben poti bribi na ini a tiri foe Gado, wakti a ten te a tiri disi ben sa bigin foe tiri. Foe eksempre, bijbel e taki dati a getrow man Abraham „ben froewakti a foto di abi troetroe fondamenti, a foto di Gado na a bowman nanga mekiman foe en” (Hebrewsma 11:10). A „foto” dati na a kownoekondre foe Gado. Ma foe san ede den e kari a kownoekondre djaso wan „foto”? Foe di na ini owroeten, a ben de na ala sei so, taki wan kownoe ben tiri wan foto. Dati meki sma ben si wan foto nofotron leki wan kownoekondre.

2. (a) San e sori taki a Kownoekondre ben de wan troetroe sani gi den fositen disipel foe Krestes? (b) San den ben wani sabi foe a Kownoekondre?

 ² A kownoekondre foe Gado ben de wan troetroe sani gi den fositen bakaman foe Krestes. Disi e kon na krin ini a bigi belangstelling di den ben abi gi a tiri foe en (Mateus 20:20-23). Wan aksi di den ben abi na prakseri ben de: O ten Krestes nanga den disipel foe en ben sa bigin foe tiri? Wan leisi di Jesus ben sori ensrefi na den disipel foe en, baka na opobaka foe en, den ben aksi: „Masra, na ini a ten disi joe e opo a kownoekondre gi Israèl baka?” (Tori foe den Apostel 1:6) So boen, joe e angri neleki den disipel foe Krestes foe sabi o ten Krestes e bigin foe tiri leki Kownoe foe a tiri foe Gado?

A TIRI DI KRESTEN E BEGI FOE EN

3, 4. (a) San e sori taki Gado tiri ala ten leki Kownoe? (b) So boen, foe san ede Krestes ben leri den bakaman foe en foe begi foe a kownoekondre foe Gado kon?

³ Krestes ben leri den bakaman foe en foe begi Gado: „Meki joe kownoekondre kon. Meki joe wani pasa, soleki na hemel, so toe na grontapoe” (Mateus 6:9, 10). Ma kande wan sma sa aksi: ’Jehovah Gado no tiri ala ten leki kownoe? Èn efoe dati de so, dan foe san ede sma moesoe begi foe en kownoekondre kon?’

⁴ A troe taki bijbel e kari Jehovah a „Kownoe foe têgo ten” (1 Timoteus 1:17). Èn bijbel e taki: „Jehovah srefi poti en kownoestoeroe steifi na hemel; èn en eigi kownoemakti tiri ala sani” (Psalm 103:19). So boen, ala ten Jehovah ben de a Moro Hei Tiriman tapoe ala den mekisani foe en (Jeremia 10:10). Ma, bika sma ben opo densrefi teige en tirimakti ini a djari foe Eden, meki Gado ben seti sani gi wan spesroetoe tiri. Disi na a tiri di baka ten Jesus ben leri den bakaman foe en foe begi foe en. A prakseri foe a tiri disi na foe tjari wan kaba kon na den problema di ben kon, di Satan Didibri nanga trawan ben drai baka gi a tirimakti foe Gado.

5. Efoe a kownoekondre na foe Gado, dan foe san ede den e kari en so srefi a kownoekondre foe Krestes nanga a kownoekondre foe den 144.000?

⁵ A njoen Kownoekondre tiri disi e kisi en makti nanga en reti foe tiri foe a Bigi Kownoe, Jehovah Gado. Na en kownoekondre. Ala ten baka bijbel e taki foe a kownoekondre disi leki a „kownoekondre foe Gado” (Lukas 9:2, 11, 60, 62; 1 Korentesma 6:9, 10; 15:50). Ma, foe di Jehovah poti en Manpikin leki a Moro Prenspari Tiriman foe a kownoekondre, dan den e taki so srefi foe a kownoekondre disi leki a kownoekondre foe  Krestes (2 Petrus 1:11). Soleki fa wi ben leri na ini wan kapitel na fesi, dan 144.000 sma di Gado teki na mindri a libisma famiri, sa tiri nanga Krestes na ini a kownoekondre disi (Openbaring 14:1-4; 20:6). Dati meki bijbel e taki so srefi foe a kownoekondre disi leki „a kownoekondre foe den”. — Danièl 7:27.

6. O ten a kownoekondre foe Gado ben bigin foe tiri, soleki fa son sma e taki?

⁶ Son sma e taki dati a Kownoekondre ben bigin foe tiri na ini a jari di Jesus ben drai go baka na hemel. Den e taki dati Krestes ben bigin foe tiri di a ben kanti santa jeje na tapoe den bakaman foe en na a dei foe a djoe pinksterfesa na ini a jari 33 G.T. (Tori foe den Apostel 2:1-4). Jehovah ben seti a Kownoekondre tiri foe tjari wan kaba kon na ala den problema di ben kon nanga na opo di Satan ben opo ensrefi teige Gado. Ma a Kownoekondre tiri disi no ben bigin foe tiri na a ten dati foe 33 G.T. Noti no de di e sori taki a „manpikin”, namkoe, a tiri foe Gado di abi Krestes leki tiriman, ben gebore na a ten dati èn ben bigin foe tiri (Openbaring 12:1-10). Ma, awinsi fa a no fa, Jesus ben abi wan kownoekondre na ini a jari 33 G.T.?

7. Soema Krestes ben tiri foe sensi 33 G.T.?

⁷ Ija, na a ten dati Jesus ben bigin foe tiri en gemeente foe bakaman, di, baka wan pisi ten, ben sa go na en na hemel. So boen, bijbel e taki foe den, ala di den de na grontapoe ete, taki den teki den poti na ini „a kownoekondre foe a Manpikin foe [a] lobi [foe Gado]” (Kolosesma 1:13). Ma a tiri, noso „kownoekondre” disi, di e tiri kresten di abi a howpoe foe kisi hemel libi, a no a Kownoekondre tiri di Jesus ben leri den bakaman foe en foe begi foe en. Na wan kownoekondre di e tiri soso den 144.000 di sa tiri nanga en na hemel. Na ini den jarihondro di pasa, den ben de den wan-enkri borgoe foe a kownoekondre. Foe dati ede a tiri, noso ’kownoekondre [disi] foe a Manpikin foe a lobi foe Gado’, sa kon na wan kaba, te a lastiwan foe den borgoe disi di abi wan hemel howpoe, dede, èn go na Krestes na hemel. Dan den no sa de borgoe foe Krestes moro langa, ma den sa de kownoe nanga en na ini a Kownoekondre tiri di Gado ben pramisi langa ten kaba.

A E BIGIN TIRI NA MINDRI FEANTI

8. (a) San e sori taki baka na opobaka foe Krestes, a ben sa moesoe wakti wan pisi ten bifo a ben bigin foe tiri? (b) San Gado ben taigi Krestes di a ten ben doro gi en foe tiri?

⁸ Di Krestes ben drai go baka na hemel, baka na opobaka foe en, dan a no ben bigin foe tiri leki Kownoe foe a tiri foe Gado na a ten dati. Na  presi foe dati, a ben moesoe wakti wan pisi ten, soleki fa na apostel Paulus e tjari kon na krin: „A man disi [Jesus Krestes] ben tjari foe ala ten wán ofrandi gi sondoe èn ben go sidon na a reti-anoe foe Gado, foe sensi a ten dati a e wakti te leki den feanti foe en ben sa poti leki wan foetoebangi gi en foetoe” (Hebrewsma 10:12, 13). Di a ten ben doro gi Krestes foe bigin tiri, dan Jehovah ben taigi en: „Go poti na joe ondro [noso wini] na mindri den feanti foe joe.” — Psalm 110:1, 2, 5, 6.

9. (a) Foe san ede a no ala sma wani a kownoekondre foe Gado? (b) San den nâsi e doe te a tiri foe Gado e bigin foe tiri?

⁹ Na wan freimde sani gi joe foe jere taki wan sma ben sa kan de wan feanti foe a tiri foe Gado? Tokoe a no ala sma wani foe libi na ondro wan tiri di e aksi foe en borgoe taki den moesoe doe san boen. So boen, baka te bijbel e froeteri fa Jehovah nanga en Manpikin ben sa teki a grontapoe tirimakti abra, dan a e taki dati ’den nâsi ati ben kon bron’ (Openbaring 11:15, 17, 18). Den nâsi no e prisiri nanga a kownoekondre foe Gado, foe di Satan e kori den foe gens a kownoekondre dati.

10, 11. (a) San e pasa na hemel te a tiri foe Gado e bigin foe tiri? (b) San e pasa na grontapoe? (c) Sortoe prenspari penti wi wani hori na prakseri foe dati ede?

¹⁰ Te a tiri foe Gado e bigin foe tiri, dan Satan nanga den engel foe en de na hemel ete. Foe di den e gens a Kownoekondre tiri, dan feti e broko wantewante. Leki wan bakapisi foe dati, dan den e trowe Satan nanga den engel foe en komoto na hemel. Tapoe dati wan tranga sten e taki: „Now a froeloesoe nanga a krakti nanga a kownoekondre foe wi Gado nanga a makti foe en Krestes kon.” Ija, a tiri foe Gado e bigin foe tiri! Èn foe di den poeroe Satan nanga den engel foe en na hemel, dan prisiri e bari drape. „Foe dati ede, oen prisiri, oen hemel nanga oenoe di e libi drape!” bijbel e taki. — Openbaring 12:7-12.

¹¹ Disi na wan kolokoe ten gi grontapoe toe? Nôno! Na presi foe dati, a ten doro gi den moro bigi problema di grontapoe oiti ben sabi. Bijbel e froeteri wi: „Heloe foe grontapoe nanga se, bika Didibri saka kon na oenoe, a abi bigi atibron, foe di a sabi taki a abi wan sjatoe pisi ten nomo” (Openbaring 12:12). So boen, disi na wan prenspari penti di wi moesoe hori na prakseri: Te a kownoekondre foe Gado e bigin foe tiri, dan disi no wani taki, dati vrede nanga seikerfasi e kon wantewante na grontapoe. Troe vrede sa kon baka ten, te a kownoekondre foe Gado sa teki a tiri foe grontapoe krinkrin abra. Disi e pasa na a kaba foe a „sjatoe pisi ten”, te den sa poeroe Satan nanga den engel foe en na pasi, so taki den no kan meki problema kon moro gi no wan sma.

12. Foe san ede wi kan froewakti taki bijbel ben sa froeteri wi o ten a kownoekondre foe Gado e bigin foe tiri?

 ¹² Ma o ten den e trowe Satan komoto na hemel, san e meki taki problema e kon na grontapoe foe „wan sjatoe pisi ten”? O ten a tiri foe Gado e bigin foe tiri? Bijbel e gi wan piki na tapoe disi? Wi kan froewakti dati. Foe san ede? We, foe di bijbel ben taki langa ten na fesi o ten a Manpikin foe Gado ben sa sori ensrefi fosi leki wan libisma na grontapoe, foe tron a Mesias. Te joe loekoe en boen, dan bijbel ben sori srefi tapoe a jari di a ben tron a Mesias. Fa a de now dan nanga srefi a moro prenspari kon foe a Mesias, noso Krestes, foe bigin nanga en Kownoekondre tiri? Seiker wi kan froewakti taki bijbel ben sa froeteri wi toe o ten dati ben sa pasa!

13. Fa bijbel e taki soifri na fesi foe a jari di a Mesias ben o sori ensrefi na grontapoe?

¹³ Ma kande wan sma sa aksi: ’Pe bijbel e taki soifri na fesi foe a jari di a Mesias ben o sori ensrefi na grontapoe?’ A bijbel boekoe Danièl e taki: „Foe sensi a wortoe go na doro foe meki Jerusalem kon boen baka èn foe bow en baka te doro a Mesias a Fesiman, joe sa abi seibi wiki, so srefi toe siksitenti na toe wiki”, noso 69 wiki ala nanga ala (Danièl 9:25). Ma disi a no 69 troetroe wiki, san ben sa de 483 dei nomo noso pikinso moro leki wan jari. Ma na 69 jari-wiki noso 483 jari. (Teki gersi Numeri 14:34.) A komando foe meki den skotoe foe Jerusalem kon boen baka èn bow den baka, ben gi ini 455 bifo G.T. * (Nehemia 2:1-8). So boen, den 69 jari-wiki disi ben kon na wan kaba 483 jari na baka, na ini 29 G.T. Èn dati na joisti a jari di Jesus ben kon na Johanes foe teki dopoe! Na a okasi dati a ben kisi salfoe nanga santa jeje èn a ben tron a Mesias, noso Krestes. — Lukas 3:1, 2, 21-23.

O TEN A TIRI FOE GADO E BIGIN FOE TIRI

14. San a „bon” na ini Danièl kapitel fo e prenki?

¹⁴ Ma pe bijbel e taki na fesi foe a jari te Krestes e bigin foe tiri leki kownoe foe a tiri foe Gado? Na ini a srefi bijbel boekoe Danièl (Danièl 4:10-37). Drape den e gebroiki wan kefalek bigi bon di hei go te na hemel, foe prenki kownoe Nebukadnesar foe Babilon. Na ini a ten dati a ben de a moro hei libisma tiriman. Ma Gado ben dwengi kownoe Nebukadnesar foe kon froestan taki wan moro hei tiriman ben de. A  wan disi na „a Moro Heiwan” noso „a Kownoe foe hemel”, Jehovah Gado (Danièl 4:34, 37). Dati meki a bon disi, di hei go te na hemel, e prenki na wan moro prenspari fasi a moro hei tirimakti foe Gado, spesroetoe ini a tori foe a grontapoe foe wi. Wan heri pisi ten Jehovah ben sori en tirimakti nanga a kownoekondre di a ben opo foe tiri a nâsi Israèl. Dati meki den ben taki foe den kownoe foe a lo foe Juda, di ben tiri den Israèlsma, taki den ben „sidon na tapoe a kownoestoeroe foe Jehovah”. — 1 Kroniki 29:23.

15. Foe san ede den ben tai banti lontoe a bontompoe, di den ben koti a „bon” trowe?

¹⁵ Soleki fa a bijbel tori na ini Danièl kapitel fo e froeteri, dan den ben koti a bon di hei go te na hemel, trowe. Ma den ben libi a bontompoe tanapoe èn den ben tai banti foe isri nanga kopro lontoe en. Disi ben meki taki a bontompoe no ben sa gro, te leki a ten foe Gado ben doro foe poeroe den banti èn meki a bigin gro baka. Ma fa èn o ten a tirimakti foe Gado ben koti trowe?

16. (a) Fa èn o ten a tirimakti foe Gado ben koti trowe? (b) San den ben taigi a lasti kownoe foe Juda di ben sidon na tapoe „a kownoestoeroe foe Jehovah”?

¹⁶ Baka wan pisi ten a kownoekondre foe Juda, di Jehovah Gado ben opo, ben kon de so pori, taki a ben gi kownoe Nebukadnesar pasi foe wai en poeroe, foe koti en trowe. Disi ben pasa na ini a jari 607 bifo G.T. Ne den ben taigi Sedekia, a lasti kownoe foe Juda di ben sidon na tapoe a kownoestoeroe foe Jehovah: „Poeroe a kownoe-ati. . . . seiker a no sa tron foe no wan sma te leki en kon, di abi  a reti na tapoe leki fa wet taki, èn mi moesoe gi en dati.” — Esekièl 21:25-27.

17. Sortoe pisi ten ben bigin na ini 607 bifo G.T.?

¹⁷ So boen, a tirimakti foe Gado, di a „bon” ben de wan prenki foe en, ben koti trowe na ini 607 bifo G.T. No wan tiri ben de moro foe teki presi gi a tirimakti foe Gado na grontapoe. Dati meki na ini 607 bifo G.T. wan pisi ten ben bigin, di Jesus Krestes ben kari baka ten „den fasti ten foe den nâsi”, noso „da tem vo dem heiden” (Lukas 21:24; Njoe Testament Nanga dem Psalm). Na den „fasti ten” disi, Gado no ben abi wan tiri foe teki presi gi en tirimakti na grontapoe.

18. San ben moesoe pasa na a kaba foe „den fasti ten foe den nâsi”?

¹⁸ San ben moesoe pasa na a kaba foe den „fasti ten [disi] foe den nâsi”? Jehovah ben moesoe gi a makti foe tiri na a Sma „di abi a reti na tapoe leki fa wet taki”. A Sma disi na Jesus Krestes. So boen, efoe wi kan kon sabi o ten „den fasti ten foe den nâsi” e kon na wan kaba, dan wi sa sabi o ten Krestes e bigin foe tiri leki kownoe.

19. Omeni „ten” a tirimakti foe Gado no ben sa de na grontapoe?

¹⁹ Soleki fa Danièl kapitel fo e taki, dan den „fasti ten” disi ben sa de „seibi ten”. Danièl e sori taki „seibi ten” ben sa de, èn na ini a pisi ten dati a tirimakti foe Gado — di a „bon” ben de wan prenki foe en — no ben sa e doe sani ini a tori foe grontapoe (Danièl 4:16, 23). O langa den „seibi ten” disi de?

20. (a) O langa wan „ten” de? (b) O langa den „seibi ten” de? (c) Foe san ede wi e teri wan dei leki wan jari?

 ²⁰ Na ini Openbaring kapitel 12, vers 6 nanga 14, wi e kon sabi taki 1260 dei de a srefi leki „wan ten [dati na 1 ten] nanga ten [dati na 2 ten] nanga wan afoe ten”. Dati na ala nanga ala 3 ¹/₂ ten. So boen, „wan ten” ben sa de a srefi leki 360 dei. Dati meki „seibi ten” ben sa de 7 tron 360, noso 2520 dei. Now, efoe wi teri wan dei leki wan jari, soleki fa wan bijbel gronprakseri e taki, dan den „seibi ten” de a srefi leki 2520 jari. — Numeri 14:34; Esekièl 4:6.

21. (a) O ten „den fasti ten foe den nâsi” bigin èn o ten den kon na wan kaba? (b) O ten a tiri foe Gado bigin foe tiri? (c) Foe san ede a fiti ete foe begi foe a kownoekondre foe Gado kon?

²¹ Wi leri kaba, taki „den fasti ten foe den nâsi” ben bigin na ini a jari 607 bifo G.T. So boen, efoe wi e teri 2520 jari foe sensi a jari dati, dan wi e kon na 1914 G.T. Dati na a jari di den „fasti ten” disi ben kon na wan kaba. Miljoenmiljoen sma di de na libi ete, e memre den sani di ben pasa na ini 1914. Na ini a jari dati, a Fosi Grontapoefeti ben meki wan ten foe kefalek ogri problema bigin, di go doro te na wi ten. Disi wani taki, dati Jesus Krestes ben bigin foe tiri leki kownoe foe Gado hemel tiri na ini 1914. Èn foe di a Kownoekondre bigin foe tiri kaba, dan a de a joisti ten now foe begi taki a „kon” foe figi na ogri seti foe sani foe Satan poeroe na grontapoe! — Mateus 6:10; Danièl 2:44.

22. Sortoe aksi son sma sa aksi kande?

²² Ma kande wan sma sa aksi: ’Efoe Krestes kon baka kaba foe tiri na ini a kownoekondre foe en Tata, foe san ede wi no e si en dan?’

[Foetoewortoe]

[Aksi foe a tori disi]

[Karta na tapoe bladzijde 140, 141]

Na ini 607 bifo G.T. Gado kownoekondre na ini Juda ben fadon.

Na ini 1914 G.T. Jesus Krestes ben bigin foe tiri leki kownoe foe Gado hemel tiri

607 bifo G.T. — 1914 G.T.

Oktober 607 bifo G.T. — oktober 1 bifo G.T. = 606 JARI

Oktober 1 bifo G.T. — oktober 1914 G.T. = 1914 JARI

SEIBI TEN FOE DEN HEIDEN = 2520 JARI

[Prenki na tapoe bladzijde 134]

„Na ini a ten disi joe e opo a kownoekondre gi Israèl baka?”

[Prenki na tapoe bladzijde 139]

A hei bon na ini Danièl kapitel 4 e prenki a tirimakti foe Gado. Wan heri pisi ten Gado ben sori a tirimakti foe en disi nanga jepi foe a kownoekondre foe Juda

[Prenki na tapoe bladzijde 140, 141]

A bon ben koti trowe di a kownoekondre foe Juda ben kisi pori