A tiri foe Gado foe vrede
Kapitel 13
A tiri foe Gado foe vrede
1. San libisma tiri no ben man foe doe?
JOE NO SI taki tiri foe libisma, srefi den tiri di abi boen sani na prakseri gi den borgoe foe den, no man foe sorgoe gi den troetroe fanowdoe foe sma? No wan foe den loesoe den problema foe takroedoe nanga a si di sma foe a wan ras no wani si sma foe wan tra ras na ai, noso sorgoe taki ala den sma foe den kisi boen njanjan nanga oso. Den no meki den borgoe foe den kon fri krinkrin foe siki. Na so no wan enkri tiri no man toe foe tapoe na owroe di sma e kon owroe noso foe tapoe dede noso foe tjari den dedewan kon baka na libi. No wán tiri de, di tjari vrede nanga seikerfasi di e tan, kon gi den borgoe foe en. Tiri foe libisma no man loesoe kwetikweti den bigi problema di libisma abi foe doe nanga den.
2. San na a moro prenspari boskopoe foe bijbel?
2 Wi Mekiman sabi o tranga wi abi wan regtfardiki tiri fanowdoe di sa meki a kan, taki ala sma njan boen foe wan kolokoe libi pe noti mankeri na en. Dati meki bijbel e taki foe wan tiri na ini anoe foe Gado. Te joe loekoe en boen, dan a pramisi tiri disi foe Gado, na a moro prenspari boskopoe foe bijbel.
3. San Jesaja 9:6, 7 e taki foe a tiri foe Gado?
3 Ma kande joe sa aksi: ’Pe bijbel e taki foe a tiri foe Gado?’ We, a e doe disi foe eksempre na Jesaja 9:6, 7. Drape tanapoe: „Bika wan mama meki wan pikin gi wi, den gi wan manpikin na wi; èn a tiri leki Granman sa kon na tapoe en skowroe. Èn den sa kari en nen: Wondroe Raiman, Tranga Gado, Têgo Tata, Granman foe Vrede. Na a tiri leki Granman di de pasa marki èn na vrede, wan kaba no sa kon.”
4. Soema na a pikin di e tron a tiriman foe a tiri foe Gado?
4 Bijbel e taki djaso foe a meki di wan mama ben o meki wan pikin, wan manpikin foe wan kownoe. Baka wan pisi ten, dan a ’manpikin’ disi ’foe wan kownoe’, ben sa tron wan bigi tiriman, „a Granman foe Vrede”. Den ben sa poti en leki edeman foe wan troetroe kefalek boen tiri. A tiri disi sa tjari vrede kon gi heri grontapoe èn a vrede sa tan foe têgo. A pikin, di Jesaja 9:6, 7 ben taki foe en na fesi taki a ben sa gebore, ben de Jesus. Di na engel Gabrièl ben froeteri a njoenwenke Maria taki a ben sa meki Jesus, a ben taki foe en: „Leki kownoe a sa tiri . . . èn wan kaba no sa kon na a kownoekondre foe en.” — Lukas 1:30-33.
POTI KRAKTI NA TAPOE A PRENSPARIFASI FOE A KOWNOEKONDRE
5. (a) Fa bijbel e sori a prensparifasi foe a Kownoekondre? (b) San na a kownoekondre foe Gado, èn san a sa doe?
5 Di Jesus nanga den bakaman foe en ben de na grontapoe, dan a prenspari wroko foe den ben de foe preiki èn leri sma foe a kownoekondre foe Gado di e kon (Lukas 4:43; 8:1). Den e taki foe a kownoekondre dati so wan 140 tron na ini bijbel. Jesus ben leri en bakaman srefi foe begi na Gado, taki: „Meki joe kownoekondre kon. Meki joe wani pasa, soleki na hemel, so toe na grontapoe” (Mateus 6:10). A kownoekondre disi, di kresten e begi foe en, na troetroe wan tiri? Kande joe no ben si en so, ma tokoe a de so. A Manpikin foe Gado, Jesus Krestes, na a Kownoe foe a Kownoekondre. Èn heri grontapoe sa de a kontren di a sa tiri. Fa a sa de wan toemoesi moi sani te sma no sa prati moro na ini foeroe nâsi di de feanti foe makandra, ma ala sma sa tjari kon na wán ini vrede na ondro Gado Kownoekondre tiri!
6. Foe san ede di Jesus ben de na grontapoe, den ben taki dati a Kownoekondre ben de „krosibei” èn „na oen mindri”?
6 Johanes a Dopoeman ben bigin preiki foe a tiri disi èn a ben froeteri den sma, taki: „Abi berow, bikasi a kownoekondre foe hemel kon krosibei” (Mateus 3:1, 2). Foe san ede Johanes ben kan taki disi? Foe di Jesus, a Sma di ben sa tron a tiriman foe Gado hemel tiri, ben o teki dopoe heri esi na Johanes èn ben o kisi salfoe nanga Gado santa jeje. So boen, joe kan froestan foe san ede Jesus ben taigi den Fariseiman baka ten, taki: „Loekoe! a kownoekondre foe Gado de na oen mindri” (Lukas 17:21). Dati ben de so, foe di Jesus, di Gado ben poti leki kownoe, ben de drape na den mindri. Na ini den dri nanga afoe jari di Jesus ben preiki èn ben gi sma leri, a ben sori taki a ben abi a reti foe de kownoe, foe di te na dede a ben tan getrow na Gado.
7. San e sori taki a Kownoekondre ben de wan prenspari afersi, di Jesus ben de na grontapoe?
7 Foe sori taki a kownoekondre foe Gado ben de a prenspari afersi na ini a ten foe a diniwroko foe Krestes, dan meki wi loekoe pikinso san ben pasa na a lasti dei bifo a dede. Bijbel e froeteri wi taki den sma ben kragi Jesus èn ben taki: „Wi kon sabi taki a man disi e soetoe faja gi a nâsi foe wi foe meki den opo densrefi teige makti èn a e tapoe sma foe pai belasting na Caesar èn e taki foe ensrefi taki en na Krestes, wan kownoe.” Di a tiriman Pontius Pilatus, di ben de wan Romesma, ben jere disi, a ben aksi Jesus: „Joe na a kownoe foe den djoe?” — Lukas 23:1-3.
8. (a) Fa Jesus ben piki, di den ben aksi en efoe a ben de wan kownoe? (b) San Jesus ben wani taki, di a ben taki dati en kownoekondre „no [ben de] foe a fonten disi”?
8 Jesus no ben piki na aksi foe Pilatus nanga ija noso no, ma a ben taki: „Mi kownoekondre no de wan pisi foe a grontapoe disi. Efoe mi kownoekondre ben de wan pisi foe a grontapoe disi, dan den dinari foe mi ben sa feti, so taki den [sma] no ben sa gi mi abra na den djoe. Ma, soleki fa a de, mi kownoekondre no de foe a fonten disi.” Jesus ben piki na a fasi disi, foe di en kownoekondre no ben sa de wan grontapoe kownoekondre. Jesus ben sa tiri komoto na hemel, no leki wan libisma na tapoe wan kownoestoeroe na grontapoe. Foe di a tori ben de efoe Jesus ben abi a reti noso no ben abi a reti foe tiri leki kownoe, dan Pilatus ben aksi Jesus ete wan tron: „We now, joe na wan kownoe dan?”
9. (a) Sortoe kefalek moi waarheid Jesus ben meki bekènti? (b) San na den prenspari aksi na ini a ten disi?
9 A de krin taki Jesus ben tanapoe na fesi kroetoe foe en libi, foe di a ben preiki èn leri sma foe wan njoen tiri. Dati meki Jesus ben piki Pilatus: „Joesrefi e taki dati mi na wan kownoe. Na foe a sani disi ede mi mama meki mi, èn na foe a sani disi ede mi kon na grontapoe, so taki mi ben sa gi kotoigi foe a waarheid” (Johanes 18:36, 37). Ija, Jesus ben gebroiki en libi na grontapoe foe froeteri sma a kefalek moi waarheid foe a Kownoekondre tiri foe Gado. A ben de en moro prenspari boskopoe. Èn a Kownoekondre na a moro prenspari afersi na ini a ten disi ete. Ma, den aksi disi de ete: Sortoe tiri na a moro prenspariwan ini wan sma libi? Na wan tiri foe libisma noso na a kownoekondre foe Gado nanga Krestes leki tiriman?
SETI SANI GI A NJOEN TIRI NA GRONTAPOE
10. (a) O ten Gado ben si taki a ben de fanowdoe foe wan njoen tiri kon? (b) Pe na ini bijbel den e taki foe a fosi tron foe a tiri disi? (c) Soema a sneki e prenki?
10 Di Satan ben tjari Adam nanga Eva go so fara foe kon na en sei ini na opo di a ben opo ensrefi teige Gado, dan Jehovah ben si taki a ben de fanowdoe foe wan njoen tiri kon tapoe libisma. Dati meki wantewante Gado ben tjari en prakseri kon na krin foe opo so wan tiri. A ben taki foe a tiri disi, di a ben leisi strafoe gi a sneki, ma te joe loekoe en boen, dan na Satan Didibri a ben taigi, taki: „Mi sa poti feantifasi na mindri joe nanga na oema èn na mindri joe siri nanga en siri. A sa maskaderi joe na joe ede èn joe sa maskaderi en na en bakafoetoe.” — Genesis 3:14, 15.
11. Soema nanga soema no ben o wani si makandra na ai?
11 Ma kande joe sa aksi: ’Pe wan sani e taki djaso foe wan tiri?’ Meki wi go loekoe den wortoe disi finifini, dan a sa kon na krin gi wi. A tekst e taki, dati feantifasi, noso a si di sma no wani si makandra na ai, ben sa de na mindri Satan nanga „na oema”. Boiti foe dati, na mindri a „siri” noso pikin foe Satan nanga a „siri” noso pikin foe na oema a ben sa de so, taki den no ben o wani si makandra na ai. Ini a fosi presi, wi moesoe kon sabi soema na „a oema”.
12. San Openbaring 12 e taki foe „da oeman”?
12 Na oema a no wan oema na grontapoe. A no de so, taki Satan spesroetoe no ben wani si wan oema, di de wan libisma, na ai. Na presi foe dati, a de wan agersi oema. Dati wani taki, dati a e prenki wan tra sani. Disi e kon na krin na a lasti boekoe foe bijbel, Openbaring, pe den e gi moro bodoi foe en. Drape den e froeteri foe „na oema” leki „disi weri zon vo hem klosi, moen a habi na ondro hem foetoe; en na hem hede tapo a weri twaalvoe staar leki wan kroon”. Foe jepi wi foe kon sabi soema na „oema” disi e prenki, loekoe san Openbaring e taki moro fara foe a pikin foe en: „Da oeman meki wan manpikien, disi sa tiri ala heiden nanga wan isri tiki ; en dem teki poeloe da pikien na hem sei, potti hem na fesi vo Gado en vo hem troon.” — Openbaring 12:1-5, Njoe Testament Nanga dem Psalm.
13. Soema noso san a „manpikien” nanga „da oeman” e prenki?
13 Efoe wi sabi soema noso san na a „manpikien”, dan disi sa jepi wi foe kon sabi soema noso san „da oeman” e prenki. A pikin a no wan troetroe sma, neleki fa na oema a no wan troetroe oemasma. A tekst e sori taki a „manpikien” disi „sa tiri ala heiden”. So boen, a „pikien” e prenki a tiri foe Gado nanga Jesus Krestes leki a Kownoe di e tiri. „Da oeman” foe dati ede, e prenki na organisâsi foe Gado foe getrow hemel mekisani. Neleki fa a „manpikien” kon foe „da oeman”, na so a Kownoe, Jesus Krestes, kon foe a hemel organisâsi, a groepoe foe loyaal jeje mekisani ini hemel di e wroko makandra foe doe a prakseri foe Gado. Galasiasma 4:26 e kari na organisâsi disi „a Jerusalem di de na tapoesei”. So boen, di Adam nanga Eva foe a fosi tron ben opo densrefi teige a tirimakti foe Gado, dan Jehovah ben seti sani gi wan Kownoekondre tiri di ben sa de leki wan howpoe gi sma di lobi regtfardikifasi.
JEHOVAH E MEMRE EN PRAMISI
14. (a) Fa Jehovah ben sori taki a ben memre en pramisi foe wan „siri” di ben sa maskaderi Satan? (b) Soema na a pramisi „siri”?
14 Jehovah no ben frigiti en pramisi foe seni wan „siri” kon, di ben sa de a tiriman foe a tiri foe Gado. A tiriman disi ben o pori Satan foe di a o masi en ede (Romesma 16:20; Hebrewsma 2:14). Baka ten Jehovah ben taki, dati a pramisi siri ben sa kon nanga jepi foe a getrow man Abraham. Jehovah ben taigi Abraham: „Nanga jepi foe joe siri ala nâsi foe grontapoe sa blesi densrefi seiker” (Genesis 22:18). Soema na a „siri” disi di Gado ben pramisi, taki a ben sa kon nanga jepi foe a famirilin foe Abraham? Baka ten bijbel e gi a piki te a e taki: „Den pramisi now ben taki gi Abraham nanga gi en siri. A no e taki: ’Èn gi den siri’, soleki gi foeroe foe den, ma soleki gi wán: ’Èn gi a siri foe joe’, dati na Krestes” (Galasiasma 3:16). Jehovah ben taigi a manpikin foe Abraham, Isak, nanga en granpikin Jakob, taki a „siri” foe na „oema” foe Gado ben sa kon nanga jepi foe a famirilin foe den. — Genesis 26:1-5; 28:10-14.
15, 16. San e boeweisi taki a „siri” ben o de wan kownoe di e tiri?
15 Foe sori taki a „siri” disi ben sa de wan kownoe di e tiri, dan Jakob ben taki den wortoe disi gi en manpikin Juda: „A tiriman tiki [noso makti foe tiri] no sa komoto na Juda, èn so toe a komanderiman tiki na mindri en foetoe, te leki Silo kon; èn na en den pipel sa gi jesi” (Genesis 49:10). Jesus Krestes ben kon foe a lo foe Juda. A ben sori taki en ben de a „Silo” disi, di „den pipel sa gi jesi” na en. — Hebrewsma 7:14.
16 Pikinmoro 700 jari baka di Juda ben kisi den wortoe foe jere, Jehovah ben taki foe David di ben de foe a lo foe Juda, taki: „Mi feni mi foetoeboi David . . . Èn seiker mi sa poti a siri foe en steifi foe têgo èn a kownoestoeroe foe en leki den dei foe hemel” (Psalm 89:20, 29). Te Gado e taki, dati En sa poti a „siri” foe David steifi „foe têgo” èn taki David „en kownoestoeroe” sa tan so langa „leki den dei foe hemel”, san Gado wani taki dan? Jehovah Gado e sori go na fa sani o de troetroe, taki a Kownoekondre tiri na ini anoe foe a tiriman di a poti, Jesus Krestes, sa tan foe têgo. Fa wi sabi dati?
17. Fa wi sabi taki a pramisi tiriman na Jesus Krestes?
17 We, prakseri pikinso san Jehovah engel Gabrièl ben taigi Maria foe a pikin di a ben sa kisi. A ben taki: „Joe moesoe gi en a nen Jesus.” Ma Jesus no ben o tan wan pikin nomo, noso srefi wan libisma na grontapoe. Gabrièl ben taki moro fara: „A wan disi sa bigi èn den sa kari en a Manpikin foe a Moro Heiwan; èn Jehovah Gado sa gi en a kownoestoeroe foe en tata David, èn leki kownoe a sa tiri na oso foe Jakob foe têgo èn wan kaba no sa kon na a kownoekondre foe en” (Lukas 1:31-33). A no de wan kefalek moi sani taki Jehovah ben seti sani foe opo wan regtfardiki tiri foe a têgo boen foe den sma di lobi en èn di e froetrow en?
18. (a) Fa bijbel e taki foe a kaba foe den tiri foe grontapoe? (b) San a tiri foe Gado sa doe gi libisma?
18 A ten kon krosibei now, taki Gado Kownoekondre tiri sa opo doe wan sani foe pori ala tiri foe grontapoe. Dan Jesus Krestes sa opo go feti leki wan Kownoe di e wini. Te bijbel e taki foe a feti disi, dan a e taki: „Na ini den dei foe den kownoe dati, a Gado foe hemel sa opo wan kownoekondre di noiti no sa kisi pori. . . . A sa broko ala den kownoekondre disi na pisipisi èn tjari den kon na wan kaba, èn ensrefi sa tan te ten di no skotoe” (Danièl 2:44; Openbaring 19:11-16). Te ala tra tiri komoto na pasi, dan a tiri foe Gado sa sorgoe gi den troetroe fanowdoe foe libisma. A Tiriman, Jesus Krestes, sa sorgoe taki no wan enkri getrow borgoe foe en sa siki, kon owroe noso dede. Takroedoe, mankeri foe boen oso, angri nanga ala den sortoe problema disi sa kon loesoe. Ala pe na grontapoe troe vrede nanga seikerfasi sa de (2 Petrus 3:13; Openbaring 21:3-5). Ma, wi moesoe kon sabi moro foe den sma di sa de tiriman ini a Kownoekondre tiri disi foe Gado.
[Aksi foe a tori disi]
[Prenki na tapoe bladzijde 112, 113]
Jesus ben seni den bakaman foe en foe doe a prenspari wroko foe preiki foe Gado kownoekondre
[Prenki na tapoe bladzijde 114]
Di Jesus ben tanapoe na fesi kroetoe foe en libi, a ben tan preiki foe Gado kownoekondre
[Prenki na tapoe bladzijde 119]
Fa joe e si Jesus — leki wan kownoe di e wini noso wan beibi di no man doe noti?
