Baka Armagedon, wan paradijs grontapoe
Kapitel 19
Baka Armagedon, wan paradijs grontapoe
1. (a) Fa moro foeroe sma e prakseri foe Armagedon? (b) San bijbel e taki foe Armagedon?
„ARMAGEDON” na wan wortoe di e meki foeroe sma frede. Nofotron fesiman foe grontapoe e gebroiki en foe sori go na wan di foe Dri Grontapoefeti di kan kon. Ma bijbel e taki foe Armagedon leki a presi pe Gado e feti wan regtfardiki feti (Openbaring 16:14, 16, Njoe Testament Nanga dem Psalm). A feti foe Gado disi sa opo a pasi gi wan regtfardiki njoen grontapoe.
2. (a) Soema Gado sa pori na ini Armagedon? (b) So boen, foe sortoe doe wi moesoe tan fara?
2 Tra fasi leki den feti foe libisma, di e kiri den boen sma nanga den takroe sma, Armagedon sa pori soso den takroe sma (Psalm 92:7). Jehovah Gado sa de a Kroetoeman, èn a sa poeroe ibri sma di foe espresi e weigri foe gi jesi na den regtfardiki wet foe en. Na ini a ten disi foeroe sma no e si no wan ogri ini sani leki hoeroedoe, kon droengoe, lei noso bidrigifasi. Ma soleki fa Gado e si en, dan den sani disi fowtoe. Dati meki na ini Armagedon, a no sa froeloesoe den sma di e tan doe den sani disi (1 Korentesma 6:9, 10; Openbaring 21:8). A de prenspari gi sma di kande e doe den sortoe ogri sani disi, foe kenki a fasi foe libi foe den te den e leri sabi den wet foe Gado ini den afersi disi.
3. (a) Nanga san Jesus ben teki a kaba foe a disiten grontapoe gersi? (b) San o pasa nanga Satan nanga den ogri jeje foe en? (c) Foe sortoe fasi fa sani o de, sma sa njan boen foe den na a paradijs grontapoe, soleki fa den tekst na tapoe den bladzijde di e kon now e sori?
3 No wan pisi foe na ogri grontapoe disi sa tan abra baka Armagedon. Sma nomo di e dini Gado, sa tan na libi (1 Johanes 2:17). Jesus Krestes ben teki a fasi fa sani de, gersi nanga di foe a ten foe Noa (Mateus 24:37-39; 2 Petrus 3:5-7, 13; 2:5). Baka Armagedon, a kownoekondre foe Gado sa de a wan-enkri tiri di o tiri heri grontapoe. Satan nanga den ogri jeje foe en no sa de moro (Openbaring 20:1-3). Loekoe pikinso na tapoe den bladzijde di e kon now, wan toe foe den blesi di bijbel e sori taki sma di e gi jesi sa njan boen foe den.
VREDE NA MINDRI ALA SMA
„Wan mama meki wan pikin gi wi, den gi wan manpikin na wi; èn a tiri leki Granman sa kon na tapoe en skowroe. Èn den sa kari en nen . . . Granman foe Vrede. Na a tiri leki Granman di de pasa marki èn na vrede, wan kaba no sa kon.” — Jesaja 9:6, 7.
„Na ini den dei foe en a regtfardikiwan sa sproiti, èn vrede pasa marki, te leki moen no de moro. Èn a sa abi borgoe foe se te go miti se èn foe a Liba te na den oekoe foe grontapoe.” — Psalm 72:7, 8.
NO WAN FETI MORO
„Oen kon, loekoe den wroko foe Jehovah, fa a doe froewondroe sani na grontapoe. A e meki feti kon na wan kaba te na a moro farawe presi foe grontapoe.” — Psalm 46:8, 9.
MOI OSO NANGA PRISIRI WROKO GI IBRI SMA
„Den sa bow oso troetroe èn go libi na ini . . . Den no sa bow èn wan tra sma go libi na ini; den no sa prani èn wan tra sma go njan foe en . . . den sma di mi ben teki sa gebroiki a wroko foe den eigi anoe krinkrin. Den no sa wroko tranga foe soso, noso kisi pikin nanga problema, bika den na den bakapikin di de foe den sma di Jehovah ben teki, èn den bakapikin foe den nanga den.” — Jesaja 65:21-23.
TAKROEDOE, OGRI DI DOE NA SMA NANGA TRANGA, NANGA OGRIDOE NO DE MORO
„Bika den sa koti ogri sma poeroe . . . Èn ete wan sjatoe ten èn na ogriwan no sa de moro; èn joe sa poti prakseri troetroe na a presi foe en, èn a no sa de.” — Psalm 37:9, 10.
„Foe taki foe den ogri sma, den sa koti den poeroe foe grontapoe srefi; èn foe taki foe den wan di e tori trawan, den sa hari den poeroe foe en.” — Odo 2:22.
HERI GRONTAPOE WAN PARADIJS
Jesus ben taki: „Joe sa de nanga mi na ini a Paradijs.” — Lukas 23:43.
„Na den regtfardikiwan sa abi grontapoe, èn den sa libi na tapoe foe têgo.” — Psalm 37:29.
BOEN NJANJAN DE FOEROE GI ALA SMA
„Jehovah foe den feti-legre troetroe sa poti gi ala pipel . . . wan fesa-njanjan foe preti di lai nanga oli, wan fesa-njanjan foe win di den kibri na tapoe a sakasaka, foe preti di lai nanga oli èn di foeroe nanga bonjo fatoe.” — Jesaja 25:6.
„Karoe sa de foeroe na grontapoe; na tapoe na ede foe den bergi sani sa de pasa marki.” „Grontapoe srefi sa gi troetroe en njanjan; Gado, wi Gado, sa blesi wi.” — Psalm 72:16; 67:6.
4, 5. (a) Sortoe fasi fa sani de no sa de moro na a paradijs grontapoe? (b) Sortoe sani sma o man doe, san na foeroe presi den no man doe now?
4 A no de foe taki, dati joe wani libi na a paradijs grontapoe, di de leki a djari pe Gado ben meki a fosi libisma Adam na ini (Genesis 2:8; Lukas 23:43). Prakseri pikinso: no wan feti, no wan takroedoe noso ogri di doe na sma nanga tranga no de moro. Ibri momenti foe a dei noso foe a neti joe sa man waka na ala presi sondro foe frede taki wan ogri sa miti joe. Den ogri sma no sa de moro. — Psalm 37:35-38.
5 Disi wani taki, dati joe no sa abi kroeka politiekman nanga bisnis fesiman di abi bigi-ai èn di e kwinsi den sma. Sma no sa kon toe na ondro a hebi foe hei belasting foe pai gi sroedati fetisani. Noiti moro wan sma no sa de sondro boen njanjan nanga wan boen oso foe di a sma no man pai gi den sani disi. Dati sma no abi wroko, èn taki moni e lasi en waarde, nanga hei prijs, na sani di no sa de moro. Den problema di e meki osofamiri e pina ini a ten disi, no sa de moro. Ala sma sa abi prisiri wroko foe doe, èn den sa man si den boen bakapisi foe a wroko foe den èn njan boen foe den.
6. (a) Sortoe wroko sma, di sa pasa Armagedon libilibi, sa doe? (b) Fa Gado sa blesi a wroko di den e doe?
6 Na a fosi presi, den sma di sa pasa Armagedon libilibi sa abi a wroko foe krin grontapoe èn foe poeroe den ston-ipi foe broko-oso foe na owroe seti disi. Èn na ondro a tiri foe a Kownoekondre tiri den sa abi a grani foe sreka grontapoe èn meki a tron wan moi presi foe libi. Fa dati sa de wan prisiri wroko! Gado sa blesi ala sani san den e doe. A sa sorgoe gi a joisti marki foe son nanga alen foe meki njanjan gro èn foe kweki meti, èn a sa sorgoe taki den sani disi de fri foe siki nanga ogri.
7. (a) Sortoe pramisi foe Gado sa kon troe? (b) San kresten e froewakti soleki fa Gado pramisi?
7 Dan a pramisi disi, di a lobi-ati Mekiman gi nanga mofo foe a psalm singiman foe bijbel, sa kon troe: „Joe e opo joe anoe èn e meki a tranga lostoe foe ala san e libi kon troe” (Psalm 145:16). Ija, ala den joisti lostoe foe sma di e frede Gado sa kon troe dorodoro. Wi no kan tjari kon na wi prakseri srefi o kefalek switi a libi na ini wan paradijs na grontapoe sa de. Di na apostel Petrus ben froeteri foe a seti foe Gado foe blesi en pipel, a ben skrifi: „Njoen hemel nanga wan njoen grontapoe de, di wi e froewakti soleki fa [Gado] pramisi, èn na drape regtfardikifasi sa de.” — 2 Petrus 3:13; Jesaja 65:17; 66:22.
8. (a) Foe san ede wi no abi njoen hemel di wi kan si fanowdoe? (b) San na den „njoen hemel”?
8 San na den „njoen hemel” disi? Den njoen hemel a no njoen hemel di wi kan si. Gado ben meki den hemel foe wi di wi kan si, volmaakti èn den e gi en glori (Psalm 8:3; 19:1, 2). Den „njoen hemel” abi foe doe nanga wan njoen tirimakti di o tiri grontapoe. Den disiten „hemel” na den libisma tiri. Na ini Armagedon den sa kon na wan kaba (2 Petrus 3:7). Den „njoen hemel” di sa kon ini a presi foe den, sa de a hemel tiri foe Gado nanga Jesus Krestes leki kownoe. Ma leki wan pisi foe den „njoen hemel”, joe sa abi 144.000 foe den getrow bakaman foe en di sa tiri nanga en. — Openbaring 5:9, 10; 14:1, 3.
9. (a) San na a „njoen grontapoe”? (b) San na a grontapoe di den sa pori?
9 San na a „njoen grontapoe” dan? A no wan njoen planeiti. Gado ben meki a planeiti Grontapoe disi heri boen gi libisma foe libi na tapoe, èn a de a wani foe en dati a tan foe têgo (Psalm 104:5). A „njoen grontapoe” abi foe doe nanga wan njoen groepoe noso libimakandra foe sma. Nofotron bijbel e gebroiki a wortoe „grontapoe” na a fasi disi. Na so wi e leisi foe eksempre: „Heri grontapoe [dati wani taki, den libisma] ben abi wán tongo ete” (Genesis 11:1). A „grontapoe” di sa kisi pori, na den sma di e meki densrefi tron wan pisi foe na ogri seti foe sani disi (2 Petrus 3:7). A „njoen grontapoe” di e kon ini a presi foe den, sa de den troe foetoeboi foe Gado di poti densrefi aparti foe a grontapoe disi foe ogri sma. — Johanes 17:14; 1 Johanes 2:17.
10. (a) Soema den e tjari kon makandra now, èn na ini san? (b) Sortoe sani di libisma tiri no man doe, sa doe na a paradijs grontapoe soleki fa den tekst di de na den bladzijde di e kon now e sori? ?
10 Nownow kaba den e tjari sma foe ala ras nanga nâsi, di sa de wan pisi foe a „njoen grontapoe”, kon makandra na ini a kresten gemeente. A wánfasi nanga vrede di de na den mindri, na soso foe tesi na fesi pikinso san sa meki a libi na a paradijs grontapoe baka Armagedon, de so wan prisiri sani. Ija, a kownoekondre foe Gado sa doe san no wan enkri libisma tiri ben sa kan howpoe srefi foe doe. Loekoe pikinso wan toe foe den blesi disi na tapoe den bladzijde di e kon now.
WAN LOBI-ATI BRADAFASI NA MINDRI ALA SMA
„Gado no e teki sma partèi, ma na ini ibri nâsi a sma di e frede en èn e doe san regtfardiki, a e feni boen.” — Tori foe den Apostel 10:34, 35.
„Loekoe! wan bigi ipi, di no wan sma ben man teri, foe ala nâsi nanga lo nanga pipel nanga tongo . . . Den no sa pina foe angri noso dreiwatra moro.” — Openbaring 7:9, 16.
VREDE NA MINDRI LIBISMA NANGA METI
„A wolfoe sa tan troetroe wan pisi ten na sei a pikin manskapoe, èn a bigi sortoe penitigri srefi sa go didon na sei a pikin bokoboko, èn a pikin kaw nanga a jongoe lew di abi neki-wiwiri, nanga a meti di kisi boen njanjan, alamala makandra; èn wan pikin boi ete sa de fesiman foe den.” — Jesaja 11:6; 65:25.
NO WAN SIKI, OWROE DEI NOSO DEDE MORO
„Na ini a ten dati den ai foe den breniwan sa kon opo, èn srefi den jesi foe den dofoewan sa kon opo. Na ini a ten dati a malengriwan sa kren neleki wan dia, èn a tongo foe a babaw-wan sa bari wan prisiri babari.” — Jesaja 35:5, 6.
„Èn Gado srefi sa de nanga den. Èn a sa figi poeroe ala watra-ai na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Openbaring 21:3, 4.
DEDEWAN E TJARI KON NA LIBI BAKA
„A joeroe e kon pe ala sma di de na ini den memre-grebi, sa jere en sten èn sa kon na doro.” — Johanes 5:28, 29.
„A se ben gi den dedewan abra di ben de na en ini, èn dede nanga Hades ben gi den dedewan abra di ben de na den ini.” — Openbaring 20:13.
11. San e trobi nofotron a sortoe paradijs di libisma e meki now?
11 Fa a paradijs na ondro a kownoekondre foe Gado sa de moro boen leki iniwan sani di na owroe seti disi kan tjari kon! A troe, taki son sma na ini a ten disi meki a presi pe den e libi kon gersi wan paradijs. Ma den sma di e libi makandra na den sortoe moi presi disi, kande ogri èn e prakseri densrefi nomo, èn kande no wani si makandra na ai. Èn baka wan pisi ten den e kon siki, e kon owroe èn dede. Ma baka Armagedon, a paradijs na grontapoe sa abi moro foeroe sani leki soso moi oso, moi djari nanga moi park.
12, 13. (a) Sortoe fasi foe vrede sa de baka Armagedon? (b) San de fanowdoe foe meki den fasi disi fa sani o de, kon?
12 Prakseri disi pikinso: Sma foe ala ras nanga nâsi sa leri foe libi makandra leki wán famiri foe brada nanga sisa. Den sa lobi makandra troetroe. No wan sma sa prakseri ensrefi nomo noso no de nanga switifasi. No wan sma sa abi ogri-ati foe wan trawan soso foe en ras, en kloroe noso a presi pe a komoto ede. Foe kroetoe sma sondro foe sabi fa sani de, no sa de moro. Ibri sma na grontapoe sa tron wan troetroe mati nanga wan troetroe birman foe ibri tra sma. Ija, a sa de wan paradijs na jejefasi. Joe ben sa wani foe libi na ini a paradijs disi na ondro den „njoen hemel”?
13 Na ini a ten disi sma e taki foeroe foe libi makandra ini vrede, èn den ben opo srefi wan organisâsi foe „Verenigde Nâsi”. Tokoe sma nanga nâsi noiti ete na fesi ben prati so foe makandra. San ben sa moesoe pasa? Na ati foe den sma moesoe kenki. Ma dati na wan wondroe di den tiri foe a grontapoe disi no man doe srefisrefi. Ma a bijbel boskopoe, di abi foe doe nanga a lobi foe Gado, e doe disi.
14. San e pasa now leki wan boeweisi taki den paradijs fasi disi fa sani o de sa kon troetroe?
14 Te sma e kon sabi foe a regtfardiki njoen seti, dan dati e boeweigi na ati foe foeroe sma foe lobi Gado. Dati e meki taki den e bigin handri na wan lobi-ati fasi nanga tra sma toe, neleki fa Gado e doe dati (1 Johanes 4:9-11, 20). Disi wani taki wan bigi kenki na ini a libi foe den. So boen, foeroe sma di, neleki ogri meti, ben ogri èn ben hori sma na ati, kon de nanga safri-ati èn kon lobi vrede. Leki skapoe di e waka baka den herder, na so den e tjari den kon makandra na ini a kresten ipi.
15. (a) Sortoe toe groepoe kresten de? (b) Soema sa de den fosiwan di sa de wan pisi foe a „njoen grontapoe”?
15 Na ini a pisi ten foe moro leki 1900 jari den ben tjari a „pikin ipi” foe 144.000 kresten di sa tiri makandra nanga Krestes, kon makandra. Soso wan toe foe den wan disi de na grontapoe ete; moro foeroe foe den e tiri kaba nanga Krestes na hemel (Lukas 12:32; Openbaring 20:6). Ma di Jesus ben taki foe tra kresten, a ben taki: „Mi abi tra skapoe ete, di no de foe a koi disi [foe a „pikin ipi”]; den dati mi moesoe tjari kon toe, èn den sa arki mi sten, èn den sa tron wán ipi, wán herder” (Johanes 10:16). Den e tjari now wan „bigi ipi” foe den „tra skapoe” disi kon makandra. Den sa de den fosiwan di sa de wan pisi foe a „njoen grontapoe”. Jehovah sa kibri den pasa „a bigi banawtoe” na a kaba foe na ogri seti disi, foe den libi go doro na ini a paradijs na grontapoe. — Openbaring 7:9, 10, 13-15.
16. Sortoe wondroe sa meki a de di sma sa de nanga den meti de wan prisiri sani?
16 Baka Armagedon, dan ete wan wondroe sa meki den paradijs fasi fa sani o de, kon. Den meti soleki lew, tigri, bigi sortoe penitigri nanga beer, di kan ogri now, sa libi ini vrede. Fa a sa de wan moi sani dan, foe waka na ini den boesi ala di wan lew e waka na joe sei foe wan pisi ten èn baka ten kande wan beer toe! Noiti moro wan sma sa abi foe frede wan tra libi mekisani.
17, 18. (a) Sortoe sani di e meki sari kon, no sa de moro na a paradijs grontapoe? (b) Foe san ede wi kan de seiker taki ibri sma sa njan boen foe wan volmaakti gosontoe?
17 Ma awinsi fa den oso nanga djari ben sa moi toe, èn o fa den sma ben sa de nanga switifasi èn nanga lobi-atifasi, noso den meti nanga switifasi, efoe wi ben sa siki, kon owroe èn dede, dan tokoe sari ben sa de ete. Ma soema kan tjari volmaakti gosontoe kon gi ala sma? Libisma tiri no ben man foe poeroe kanker, ati-siki nanga tra siki. Ma srefi efoe den ben man doe disi, dan datra e taki dati disi no ben sa tapoe na owroe di sma e kon owroe. Wi ben sa kon owroe ete. Te foe kaba den ai foe wi ben sa go na baka, den titei foe wi skin ben sa kon swaki, a skin foe wi ben sa kon ploi èn den pisi na inisei foe wi skin ben sa tapoe foe doe den wroko. Baka dati wi ben sa dede. Fa dati na wan sari sani!
18 Baka Armagedon, wan bigi wondroe foe Gado sa kenki ala den sani dati na a paradijs grontapoe, bika a pramisi foe bijbel e taki: „No wan sma di e libi drape sa taki: ’Mi siki’” (Jesaja 33:24). Di Jesus Krestes ben de na grontapoe, a ben sori taki a ben man foe dresi ala sortoe siki nanga mankeri, di de wan bakapisi foe a sondoe di wi ben kisi foe Adam (Markus 2:1-12; Mateus 15:30, 31). Na ondro a Kownoekondre tiri sma no sa kon owroe moro. Den owroe sma srefi sa kon jongoe baka. Ija, ’wan sma skin sa kon moro moi leki ini en jongoe jari’ (Job 33:25). Fa a sa de wan span tori dan, foe wiki ibri mamanten èn kon froestan taki joe kon moro gosontoe leki a dei na fesi!
19. Sortoe lasti feanti sa tjari kon na wan kaba, èn fa?
19 A no de foe taki, dati no wan sma di e libi ini volmaakti gosontoe foe en jongoe jari na ini a paradijs grontapoe, sa wani dede oiti. Èn no wan sma sa abi foe dede! Foe di den e kisi den wini foe a froeloesoe-ofrandi, dan disi sa wani taki te foe kaba, dati den sa kisi a toemoesi bigi presenti foe Gado foe „têgo libi nanga jepi foe Krestes Jesus wi Masra” (Romesma 6:23). Soleki fa bijbel e taki, dan Krestes „moesoe tiri leki kownoe te leki Gado poti ala feanti na ondro en foetoe. Leki a lasti feanti, dan dede moesoe tjari kon na wan kaba”. — 1 Korentesma 15:25, 26; Jesaja 25:8.
20. Sortoe sma, boiti sma di e libi now, sa njan boen foe a paradijs grontapoe, èn fa dati sa man?
20 Srefi sma di dede now, sa njan boen foe a paradijs grontapoe. Den sa kon baka na libi! So boen, na a ten dati, na presi foe dedeboskopoe, wi sa kisi prisiri njoensoe foe sma di kisi wan opobaka. Fa a sa de wan kefalek prisiri sani foe bari wan switikon gi dede papa, mama, pikin nanga tra lobiwan di komoto na grebi! Dan no wan dede-oso, berpe noso grebiston no sa de moro foe pori a moi foe a paradijs grontapoe.
21. (a) Soema sa sorgoe taki sma sa hori den wet nanga leri foe den „njoen hemel”? (b) Fa wi kan sori taki wi wani troetroe den „njoen hemel” nanga a „njoen grontapoe”?
21 Soema sa tiri den wroko na a paradijs grontapoe? Ala wet nanga leri sa kon foe den „njoen hemel” na tapoesei. Ma djaso na grontapoe, den sa poti getrow man di sa sorgoe taki sma hori den wet nanga leri disi. Foe di den man disi e teki presi gi a hemel kownoekondre na wan spesroetoe fasi, bijbel e kari den „granman” (Jesaja 32:1, 2; Psalm 45:16). Srefi na ini a kresten gemeente na ini a ten disi, Gado santa jeje e poti man foe tiri èn sorgoe gi den aktiviteit foe a gemeente (Tori foe den Apostel 20:28). Baka Armagedon wi kan froetrow na tapoe taki Krestes sa sorgoe taki den poti den joisti sma foe teki presi gi a Kownoekondre tiri, bika dan a sa boemoei langalanga nanga den grontapoe afersi. Fa joe kan sori taki joe e angri foe Gado „njoen hemel” nanga „njoen grontapoe” kon? Foe di joe e doe ala san joe man foe doe den sani di Gado e aksi foe joe foe kan libi na ini a regtfardiki njoen seti dati. — 2 Petrus 3:14.
[Aksi foe a tori disi]
