Fa foe kon sabi a troe relisi
Kapitel 22
Fa foe kon sabi a troe relisi
1. Soema na ini a fosi jarihondro ben e libi leki fa a troe relisi e taki?
DEGEDEGE NO KAN DE srefisrefi soema ini a fosi jarihondro ben de den sma di ben e libi leki fa a troe relisi e taki. Dati ben de den bakaman foe Jesus Krestes. Den alamala ben de foe a wán kresten organisâsi. Ma fa a de na ini a ten disi? Fa wi kan kon sabi den sma di e libi leki fa a troe relisi e taki?
2. Fa wi kan kon sabi den sma di e libi leki fa a troe relisi e taki?
2 Jesus ben tjari kon na krin fa wi kan doe disi, di a ben taki: „Na den froktoe foe den oenoe sa kon sabi den. . . . Ibri boen bon e meki boen froktoe, ma ibri pori bon e meki froktoe di no warti noti; . . . So boen, na den froktoe foe den oenoe sa kon sabi den sma dati troetroe” (Mateus 7:16-20). Sortoe boen froktoe joe ben sa froewakti taki troe anbegiman foe Gado ben sa meki? San na den sani di den moesoe taki èn doe na ini a ten disi?
SANTA A NEN FOE GADO
3, 4. (a) San ben de a fosi sani di Jesus ben aksi na ini a Modelbegi foe en? (b) Fa Jesus ben santa a nen foe Gado?
3 Troe anbegiman foe Gado ben sa handri leki fa a Modelbegi di Jesus ben leri den bakaman foe en, e taki. A fosi sani san Jesus ben taki drape ben de disi: „Wi Tata na hemel, meki joe nen kon santa.” Wan tra bijbel vertaling e taki den wortoe disi so: „Joe nem moe de santa” (Mateus 6:9, Njoe Testament Nanga dem Psalm). San a wani taki foe santa a nen foe Gado noso foe hori Gado nen santa? Fa Jesus ben doe disi?
4 Jesus ben sori fa a ben doe disi, di a ben taki ini begi na en Tata: „Mi ben tjari joe nen kon na krin gi den sma di joe ben gi mi na grontapoe” (Johanes 17:6). Ija, Jesus ben meki a nen foe Gado, Jehovah, bekènti na tra sma. A no ben misi foe gebroiki a nen dati. Jesus ben sabi taki a ben de a prakseri foe en Tata foe gi a nen dati glori na heri grontapoe. So boen, a ben gi na eksempre foe meki a nen dati bekènti èn foe hori en santa. — Johanes 12:28; Jesaja 12:4, 5.
5. (a) Na sortoe fasi a kresten gemeente abi foe doe nanga a nen foe Gado? (b) San wi moesoe doe efoe wi wani kisi froeloesoe?
5 Bijbel e sori taki srefi a de di a troe kresten gemeente de, abi foe doe nanga a nen foe Gado. Na apostel Petrus ben tjari kon na krin, taki Gado „ben poti en prakseri na tapoe den nâsi foe teki na den mindri wan pipel foe en nen” (Tori foe den Apostel 15:14). So boen, a troe pipel foe Gado moesoe handri nanga a nen foe en leki wan santa sani èn moesoe meki en bekènti na heri grontapoe. Te joe loekoe en boen, dan foe kan kisi froeloesoe, a de fanowdoe foe sabi a nen dati, soleki fa bijbel e taki: „Bika ’ibri sma di e kari a nen foe Jehovah, sa kisi froeloesoe’.” — Romesma 10:13, 14.
6. (a) A de so, taki pikinmoro ala den kerki e hori a nen foe Gado santa? (b) Wan foe den de di e gi kotoigi foe a nen foe Gado?
6 We, soema na ini a ten disi e handri nanga a nen foe Gado leki wan santa sani èn e meki en bekènti na heri grontapoe? Pikinmoro ala kerki no e gebroiki a nen Jehovah. Son wan poeroe srefi a nen dati na ini den bijbel vertaling foe den. Ma, efoe joe ben sa taki nanga joe birtisma, èn foeroetron ben sa taki foe Jehovah, èn ben sa gebroiki en nen, dan na ini sortoe organisâsi den ben sa denki taki joe de? Soso wán pipel de, di e waka troetroe baka na eksempre foe Jesus ini a tori disi. A moro prenspari marki na ini den libi na foe dini Gado èn foe gi kotoigi foe en nen, neleki fa Jesus ben doe dati. Foe dati ede den teki a bijbel nen „Jehovah Kotoigi”. — Jesaja 43:10-12.
MEKI A KOWNOEKONDRE FOE GADO BEKÈNTI
7. Fa Jesus ben sori tapoe a prensparifasi foe a kownoekondre foe Gado?
7 Na ini a Modelbegi di Jesus ben gi, a ben sori so srefi toe na tapoe a prensparifasi foe a kownoekondre foe Gado. A ben leri sma foe begi: „Meki joe kownoekondre kon” (Mateus 6:10). Ala ten baka, Jesus ben poti prakseri na tapoe a Kownoekondre leki a wan-enkri loesoe gi den problema foe a libisma famiri. En nanga den apostel foe en ben doe disi, foe di den ben preiki gi sma foe a kownoekondre dati „dorpoe foe dorpoe” nanga „oso foe oso” (Lukas 8:1; Tori foe den Apostel 5:42; 20:20). A kownoekondre foe Gado ben de a prenspari tori foe a preiki nanga a leri foe den.
8. Fa Jesus ben sori san ben sa de a moro prenspari boskopoe foe den troe bakaman foe en na ini den „lasti dei” disi?
8 Fa a de na ini a ten foe wi? San na a moro prenspari leri foe a troe kresten organisâsi foe Gado? Di Jesus ben e taki na fesi foe den „lasti dei” disi, a ben taki: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). So boen, a Kownoekondre moesoe de a moro prenspari boskopoe foe Gado pipel na ini a ten disi.
9. Sortoe sma e preiki a Kownoekondre boskopoe na ini a ten disi?
9 Aksi joesrefi: Efoe wan sma kon na joe doro èn a e taki foe a kownoekondre foe Gado leki a troe howpoe gi a libisma famiri, dan na ini sortoe organisâsi joe denki taki a sma dati de? Sma foe iniwan relisi, boiti Jehovah Kotoigi, taki nanga joe foe a kownoekondre foe Gado? We, a no foeroe foe den sabi srefi san na a kownoekondre foe Gado! Den no e taki srefisrefi foe a tiri foe Gado. Tokoe a de so, taki san a tiri disi o doe, na njoensoe di e seki grontapoe. A profeiti Danièl ben taki na fesi, taki a kownoekondre disi ’ben sa broko ala tra tiri na pisipisi èn tjari den kon na wan kaba èn en wawan ben sa tiri grontapoe’. — Danièl 2:44.
LESPEKI GI A WORTOE FOE GADO
10. Fa Jesus ben sori lespeki gi a Wortoe foe Gado?
10 Ete wan fasi fa wi kan kon sabi den sma di e libi leki fa a troe relisi e taki, na a fasi fa den de nanga bijbel. Ala ten Jesus ben sori respeki gi a Wortoe foe Gado. Ala ten baka, a ben teki dati leki a makti di te foe kaba e taki leti ini afersi (Mateus 4:4, 7, 10; 19:4-6). So srefi Jesus ben sori lespeki gi bijbel toe, foe di a ben libi leki fa den leri foe bijbel e taki. Noiti a ben broko bijbel saka. Na presi foe dati, a ben kroetoe den wan di no ben gi leri di e kroederi nanga bijbel èn di ben proeberi foe swaki a krakti foe den leri foe bijbel, foe di den ben tjari den eigi denki kon na fesi. — Markus 7:9-13.
11. Sortoe fasi den kerki e sori foeroetron fa den de nanga a Wortoe foe Gado?
11 Fa den kerki foe krestenhèit e doro den markitiki foe na eksempre foe Krestes ini a tori disi? Den abi dipi lespeki gi bijbel? Foeroe kerki leriman na ini a ten disi, no e bribi na ini den bijbel tori foe a fadon di Adam fadon ini sondoe, a froedoe ini den dei foe Noa, Jona nanga a bigi fisi nanga tra tori. Den e taki toe, dati libisma ben doe kon djaso nanga evolutie, a no Gado srefi ben meki den. Den e gi sma deki-ati na so wan fasi foe lespeki a Wortoe foe Gado? Son kerki fesiman e taki toe, dati a no fowtoe foe abi seks dorosei foe a trowlibi, noso taki srefi homo-sekslibi, noso trow nanga moro leki wan oema kan de joisti. Joe e feni taki den e gi sma deki-ati foe gebroiki bijbel leki a tjariman foe den? Foe troe, den no e waka baka na eksempre foe a Manpikin foe Gado nanga den apostel foe en. — Mateus 15:18, 19; Romesma 1:24-27.
12. (a) Foe san ede na anbegi foe foeroe sma di abi srefi wan bijbel, no e plisi Gado? (b) Efoe den e gi pasi na sma di e doe ogri foe espresi, foe tan ini wan boen posisi na ini wan kerki, dan na sortoe bosroiti wi moesoe kon?
12 Memre foe kerki de di abi bijbel èn di e studeri bijbel srefi, ma a fasi fa den e libi, e sori taki den no e libi leki fa bijbel e taki. Foe den sortoe sma dati, bijbel e taki: „Den e meki bekènti na poebliki taki den sabi Gado, ma nanga den wroko foe den, den e sori taki den no wani sabi en” (Titus 1:16; 2 Timoteus 3:5). Efoe memre foe kerki, di e dòbel, di e droengoe noso di e doe tra ogri, e kisi pasi foe tan ini wan boen posisi na ini a kerki foe den, dan san disi e sori dan? A e boeweisi taki Gado no e feni a relisi organisâsi foe den boen. — 1 Korentesma 5:11-13.
13. Sortoe serjoesoe bosroiti wan sma moesoe teki, efoe a kon sabi taki a no ala den leri foe en kerki e kroederi nanga bijbel?
13 Efoe joe poti prakseri kaba na den kapitel na fesi foe a boekoe disi, èn joe loekoe den bijbel tekst di ben de foe feni drape, dan joe kon sabi den fondamenti leri foe a Wortoe foe Gado. Ma kon wi taki, dati den leri foe a relisi organisâsi pe joe de na ini, no e kroederi nanga di foe a Wortoe foe Gado? Dan joe abi wan serjoesoe problema, namkoe, taki joe moesoe bosroiti efoe joe o teki a waarheid foe bijbel, noso o poti en na wan sei èn hori joesrefi na leri di bijbel no e hori baka gi. A no de foe taki, dati joe moesoe teki joe eigi bosroiti san joe o doe. Ma joe moesoe wegi na afersi go-kon boenboen. Disi de so bikasi a bosroiti di joe e teki sa abi krakti na tapoe a posisi foe joe na fesi foe Gado, nanga den froewakti foe joe foe libi foe têgo ini wan paradijs na grontapoe.
HORI JOESREFI APARTI FOE GRONTAPOE
14. (a) San na wan tra marki foe kon sabi a troe relisi? (b) Foe san ede a de so prenspari taki troe anbegiman doro a marki disi?
14 Ete wan tra marki foe kon sabi den sma di e libi leki fa a troe relisi e taki, na soleki fa Jesus ben taki, dati „den no de wan pisi foe grontapoe” (Johanes 17:14). Disi wani taki, dati troe anbegiman e hori densrefi aparti foe a pori grontapoe nanga den afersi foe en. Jesus Krestes ben weigri foe tron wan politiek tiriman (Johanes 6:15). Joe sa kan froestan foe san ede a de so prenspari foe hori joesrefi aparti foe grontapoe, te joe prakseri taki bijbel e taki dati Satan Didibri na a tiriman foe grontapoe (Johanes 12:31; 2 Korentesma 4:4). A serjoesoefasi foe na afersi disi e kon moro fara na krin na ini den wortoe foe bijbel: „Ibri sma foe dati ede, di wani de wan mati foe grontapoe, e meki ensrefi tron wan feanti foe Gado.” — Jakobus 4:4.
15. (a) A de so, taki den kerki di joe sabi, troetroe „no de wan pisi foe grontapoe”? (b) Joe sabi wan relisi di doro a marki disi?
15 Den troe tori e sori, taki den kerki na ini joe birti e teki na afersi disi na ati? Den kerki leriman, èn so srefi den memre foe den gemeente foe den, troetroe „no de wan pisi foe grontapoe”? Noso a de so, taki den abi foeroe foe doe nanga nationalisme, politiek, nanga a strei na mindri den difrenti groepoe foe den libimakandra foe grontapoe? A no moeilek foe gi piki tapoe den aksi disi, bika den sani san den kerki e doe, sma sabi na ala sei. Na a tra sei, a makriki toe foe go loekoe den sani san Jehovah Kotoigi e doe. Efoe joe e doe dati, dan joe sa si taki den e waka troetroe baka na eksempre foe Krestes nanga den fosi bakaman foe en, foe di den e hori densrefi aparti foe grontapoe, e hori densrefi aparti foe den politiek afersi foe en, nanga den fasi foe grontapoe di e prakseri ensrefi nomo, di de teige boen gwenti nanga wet èn di e doe sma ogri nanga tranga. — 1 Johanes 2:15-17.
LOBI NA DEN MINDRI
16. San na wan prenspari fasi foe kan kon sabi den troe disipel foe Krestes?
16 Wan foe den moro prenspari fasi fa joe kan kon sabi den troe disipel foe Krestes, na a lobi di den abi na den mindri. Jesus ben taki: „Nanga disi ala sma sa sabi taki oenoe na mi disipel, efoe oenoe abi lobi na oen mindri” (Johanes 13:35). Den relisi organisâsi di joe sabi, abi a lobi disi? San den e doe foe eksempre, te den kondre pe den e libi, e go feti nanga makandra?
17. Fa den relisi organisâsi nanga den memre foe den e doro a markitiki foe sori lobi na den mindri?
17 Joe sabi san e pasa foeroetron. Na tapoe a komando foe grontapoe man, den memre foe den difrenti relisi organisâsi e go na a fetigron èn e srakti den kompe bribiman foe den foe wan tra kondre. Na so Katolik e kiri Katolik, Protestant e kiri Protestant èn Moslim e kiri Moslim. Joe e denki taki so wan fasi foe handri de soleki fa a Wortoe foe Gado e taki, èn taki a e sori troetroe a jeje foe Gado? — 1 Johanes 3:10-12.
18. Fa Jehovah Kotoigi e doro a markitiki ini a tori disi foe sori lobi gi makandra?
18 Fa Jehovah Kotoigi e doro a markitiki ini a tori disi foe sori lobi gi makandra? Den no e waka baka a fasi foe den relisi foe grontapoe. Den no e srakti kompe bribiman na den fetigron. Den no ben meki a fowtoe foe de nanga hoigrifasi, foe di den e taki „Mi lobi Gado”, ala di den no wani si a brada foe den na ai, di de foe wan tra nâsi, wan tra lo noso wan tra ras (1 Johanes 4:20, 21). Ma den e sori lobi na tra fasi toe. Fa? Nanga a fasi fa den e handri nanga den sma na den sei èn nanga den moeiti di den e doe na wan lobi-ati fasi foe jepi tra sma foe leri sabi Gado. — Galasiasma 6:10.
WÁN TROE RELISI
19. Foe san ede a de wan joisti denki èn wan sani di bijbel e hori baka gi, foe taki dati soso wán troe relisi de?
19 A de soso wan joisti denki taki wán troe relisi ben sa de. Disi e kroederi nanga a troe tori taki a troe Gado a „no [wan Gado] foe broeja, ma foe vrede” (1 Korentesma 14:33). Bijbel e taki dati, te joe loekoe en boen, soso „wán bribi” de (Efeisesma 4:5). Soema na den sma dan di de a groepoe foe troe anbegiman ini a ten disi?
20. (a) Te joe loekoe ala den boeweisi, dan na tapoe soema a boekoe disi e sori leki den troe anbegiman na ini a ten disi? (b) Joe e bribi dati? (c) San na a moro boen fasi foe kon leri sabi Jehovah Kotoigi boen?
20 Wi no e draidrai foe taki dati den na Jehovah Kotoigi. Foe joe kan overtoigi joesrefi foe disi, wi e kari joe foe kon leri sabi den moro boen. A moro boen fasi foe doe disi na foe go na den konmakandra foe den na ini a Kownoekondre zaal foe Jehovah Kotoigi. Foe di bijbel e sori taki te joe e libi leki fa a troe relisi e taki, dati a e tjari bigi tefreidefasi kon nownow kaba èn e opo a pasi foe njan boen foe têgo libi na ini wan paradijs na grontapoe, dan a sa warti troetroe a moeiti foe joe ondrosoekoe disi (Deuteronomium 30:19, 20). Nanga waran firi na ati wi e kari joe foe doe dati. Foe san ede joe no ben sa ondrosoekoe dati nownow?
[Aksi foe a tori disi]
[Prenki na tapoe bladzijde 185]
Efoe joe ben sa taki nanga wan sma foe Jehovah nanga en kownoekondre, dan na ini sortoe relisi den sma ben sa denki taki joe de?
[Prenki na tapoe bladzijde 186]
Joe kan taki dati wan sma e respeki a Wortoe foe Gado, efoe a no e libi leki fa a Wortoe e taki?
[Prenki na tapoe bladzijde 188, 189]
Jesus ben weigri foe tron wan politiek tiriman
[Prenki na tapoe bladzijde 190]
Nanga waran firi na ati wi e kari joe foe go na den konmakandra foe Jehovah Kotoigi
