Kapitel 27

Fa jepi e kon nanga begi

1. Sortoe jepi wi abi fanowdoe foe Gado, èn fa wi e kisi dati?

FOE TAN FRI foe na ogri krakti foe grontapoe, kresten abi spesroetoe a jepi fanowdoe di den kan kisi nanga begi. Jesus ben taki: „A Tata na hemel [sa] gi santa jeje na den wan di e aksi en foe dati” (Lukas 11:13). Wi abi a santa jeje noso wrokokrakti foe Gado fanowdoe, neleki fa wi abi studie foe en Wortoe nanga demakandra nanga en organisâsi fanowdoe. Ma efoe wi wani kisi santa jeje, dan wi moesoe begi foe dati.

2. (a) San begi wani taki? (b) San na difrenti sortoe fasi foe begi? (c) Foe san ede begi de prenspari?

² Begi na a taki di wan sma e taki nanga Gado na wan respeki fasi. Dati kan pasa na ini a fasi foe wan aksi, soleki te wi e aksi Gado sani. Ma begi kan de so srefi toe wan fasi foe taki Gado tangi noso foe prèise en (1 Kroniki 29:10-13). Foe kan abi wan boen matifasi nanga wi hemel Tata, dan wi moesoe taki nanga en ala ten baka na ini begi (Romesma 12:12; Efeisesma 6:18). A wrokokrakti foe en, di wi e kisi te wi e aksi foe dati, kan tranga wi foe doe en wani, awinsi sortoe problema noso tesi Satan noso en grontapoe kan tjari kon na wi tapoe. — 1 Korentesma 10:13; Efeisesma 3:20.

3. (a) Sortoe tranga wi kan kisi foe Gado? (b) Fa wawan wi kan hori wan boen matifasi nanga Gado na libi?

³ Kande joe moesoe feti wan hebi feti foe kon fri foe wan gwenti noso doe di no e plisi Gado. Efoe dati de so, dan soekoe a jepi foe Jehovah. Go na en na ini begi. Na apostel Paulus ben doe dati èn a ben skrifi: „Gi ala sani mi abi a tranga foe en di e gi mi krakti” (Filipisma 4:13; Psalm 55:22; 121:1, 2). Wan oema di ben drai en baka gi en hoeroelibi, ben taki: „En na a wan-enkriwan di abi a makti foe jepi joe komoto na so wan situwâsi. Joe moesoe abi a matifasi dati foe joesrefi nanga Jehovah èn a wan-enkri fasi foe hori a matifasi dati foe joesrefi na libi, na foe begi.”

4. Fa wan man ben kisi tranga foe broko nanga a gwenti foe smoko?

⁴ Ma kande wan sma ben sa taki: ’Mi begi foeroetron foe kisi jepi  foe Gado, ma tokoe ete mi no man tapoe nanga a doe foe san fowtoe.’ Sma di e smoko, e taki disi sontron. Di den ben aksi so wan man: „O ten joe e begi?” a ben piki: „Neti bifo mi e go sribi, nanga mamanten te mi e opo, èn baka te mi ben smoko na ini wan momenti foe swakifasi, dan mi e froeteri Jehovah taki mi e sari foe san mi doe.” En mati ben taigi en: „A ten di joe abi a jepi foe Gado troetroe fanowdoe, na a momenti di joe o teki wan skarèt, a no so? Dati na a momenti di joe moesoe begi Jehovah foe gi joe tranga.” Di a man ben doe dati, dan a ben kisi jepi foe libi a smoko.

5. (a) San a e aksi foe dini Gado na a joisti fasi? (b) San e sori taki a hari di wan sma e hari ensrefi poeroe na sondoe sani, nofotron e go makandra nanga a njan di a moesoe njan pina?

⁵ Disi no wani taki, dati begi na Gado, makandra nanga a studeri foe en Wortoe nanga demakandra nanga en organisâsi di wi kan si, sa meki en makriki gi joe foe doe san boen. A e aksi moeiti ete, ija, wan moeilek feti, di kan tjari srefi pina kon nanga en (1 Korentesma 9:27). Takroe gwenti kan abi leki bakapisi wan kefalek angri di wan sma e angri foe san takroe. So boen, a njan di wan sma e njan pina e kon moro foeroe te a e hari ensrefi poeroe na sondoe sani. Joe de klari foe njan pina foe joe doe san boen? — 1 Petrus 2:20, 21.

BEGI DI GADO E JERE

6. (a) Foe san ede meki foeroe sma e feni en moeilek foe begi? (b) San wi abi fanowdoe efoe wi wani Gado jere wi begi?

⁶ Foeroe sma e feni en moeilek foe begi. „Na wan moeilek sani gi mi foe begi na wan sma di mi no kan si”, wan jongoe oema ben taki. Foe di no wan sma si Gado, dan wi abi bribi fanowdoe foe kan begi èn foe Gado jere wi. Wi moesoe bribi taki Jehovah de troetroe èn taki a kan doe san wi e aksi (Hebrewsma 11:6). Efoe wi abi so wan bribi èn efoe wi e go na Gado nanga wan opregti ati, dan wi kan de seiker taki a sa jepi wi (Markus 9:23). Na so Gado ben jere a begi foe Cornelius, a legre-edeman foe Rome, di a ben begi opregti foe kisi tiri, ala di a no ben de wan pisi foe na organisâsi foe Gado na a ten dati. — Tori foe den Apostel 10:30-33.

7. (a) Sortoe begi e plisi Gado? (b) Na sortoe begi Gado no sa arki?

⁷ A de wan moeilek sani gi son sma foe feni wortoe foe taki san den e prakseri. Ma disi no moesoe tapoe den foe taki nanga Gado na ini begi. Wi kan de seiker taki Gado sabi wi nowtoe èn sa froestan  san wi wani taki (Mateus 6:8). Prakseri pikinso: Sortoe wortoe foe wan pikin joe e warderi moro foeroe — a sempel opregti „Grantangi” foe en noso den spesroetoe wortoe di wan sma ben taigi en foe taki? Na so wi hemel Tata e warderi den sempel opregti wortoe foe wi sei (Jakobus 4:6; Lukas 18:9-14). Spesroetoe wortoe noso wortoe di relisi e gebroiki no de fanowdoe. Gado no e arki srefi na sma di e begi nanga kefalek wortoe noso hei wortoe foe meki trawan kisi respeki foe den, noso di e taki den srefi sani ala ten baka na wan fasi di no de opregti. — Mateus 6:5, 7.

8. (a) San e sori taki Gado kan jere den begi di wi e begi ini wisrefi? (b) Bijbel e sori taki wi moesoe begi ini wan seiker posisi noso na wan seiker presi?

⁸ Srefi te joe e begi na ini joesrefi, dan Gado man jere joe. Di Nehemia ben doe disi, dan Gado ben handri tapoe na opregti begi foe en, èn a srefi fasi a ben de nanga Hana (Nehemia 2:4-8; 1 Samuèl 1:11-13, 19, 20). Na so a de toe, taki a no a posisi foe wan sma skin de prenspari te a e begi. Joe kan begi ini ibri posisi, na ibri momenti èn na ibri presi. Ma, bijbel e sori taki wan posisi foe sakafasi, soleki nanga beni ede noso kindikindi, fiti (1 Kownoe 8:54; Nehemia 8:6;  Danièl 6:10; Markus 11:25; Johanes 11:41). Èn Jesus ben sori taki a de wan boen sani te den begi foe joesrefi e begi na wan presi pe joe wawan de, sondro foe tra sma e si joe. — Mateus 6:6.

9. (a) Na soema ala wi begi moesoe go, èn foe san ede? (b) Efoe wi wani meki Gado feni den begi foe wi boen, dan na ini soema nen wi moesoe begi?

⁹ Begi na wan pisi foe wi anbegi. Dati meki den begi foe wi moesoe go soso na wi Mekiman, Jehovah Gado, èn no na nowan tra sma (Mateus 4:10). Èn bijbel e sori taki kresten moesoe go na Gado nanga jepi foe Jesus, di ben gi en libi foe poeroe wi sondoe. Disi wani taki, dati wi moesoe taki den begi foe wi na ini a nen foe Jesus. — Johanes 14:6, 14; 16:23; Efeisesma 5:20; 1 Johanes 2:1, 2.

10. (a) Den begi foe sortoe sma no e plisi Gado? (b) Sortoe fondamenti sani san Gado e aksi, wi moesoe doro efoe wi wani meki Gado jere wi begi?

¹⁰ Ma na ala begi e plisi Jehovah? Bijbel e taki: „A sma di e poeroe en jesi foe a jere foe a wet - srefi a begi foe en na wan tegoe sani” (Odo 28:9; 15:29; Jesaja 1:15). So boen, efoe wi wani taki Gado jere wi begi, dan wan fondamenti sani san a e aksi, na taki wi doe en wani, taki wi gi jesi na den wet foe en. Noso Gado no sa arki na wi, neleki fa wan opregti sma no sa wani arki wan radio programa di a e feni taki a de teige boen gwenti nanga wet. Bijbel e taki: „Awinsi san wi e aksi, wi e kisi foe en, foe di wi e hori den komando foe en èn e doe den sani di e plisi en ai.” — 1 Johanes 3:22.

11. San a wani taki foe wroko na den sani di wi e begi foe den?

¹¹ Disi wani taki, dati wi moesoe wroko na den sani di wi e begi foe den. Foe eksempre, a ben sa de wan fowtoe sani efoe wan sma ben sa aksi Gado foe jepi en foe stòp foe gebroiki tabaka noso marwana, èn tokoe a e go bai den sani disi. Na so a no ben sa kan aksi Jehovah toe foe jepi en foe tan farawe foe hoeroedoe, èn tokoe a e leisi boekoe èn e loekoe felem nanga telefisi programa, pe hoeroedoe na wan prenspari pisi foe den. Noso efoe dòbel na a swaki penti foe wan sma, dan a no ben kan aksi Gado na ini begi foe jepi en foe stòp nanga dati, èn tokoe a e go na karta-oso noso tra presi pe den e dòbel. Efoe wi wani meki Gado jere den begi foe wi, dan wi moesoe sori en nanga den doe foe wi taki wi e meine troetroe san wi e taki.

12. (a) San na wan toe sani di wi kan taki so srefi foe den na ini wi begi? (b) San wi moesoe kon sabi, efoe wi wani den begi foe wi plisi Gado?

¹² San na wan toe sani foe wisrefi di wi kan taki toe foe den na ini wi begi na Jehovah? Te joe loekoe en boen, dan ala sani di sa abi krakti na tapoe wi matifasi nanga Gado na wan tori di fiti foe begi  foe en, so srefi a gosontoe foe wi na skinfasi nanga a kweki foe pikin de na ini a tori toe (2 Kownoe 20:1-3; Kroetoeman 13:8). Na apostel Johanes ben skrifi, taki „awinsi san wi e aksi akroederi en wani, a e jere wi” (1 Johanes 5:14). So boen, a prenspari sani de, taki den sani san wi e aksi, moesoe de ini akroederi nanga a wani foe Gado. Disi wani taki, dati wi moesoe kon sabi fosi san na en wani (Odo 3:5, 6). Dan efoe te wi e begi, wi e poti denki na a wani nanga a prakseri foe Gado, na presi foe broko wi ede nomo nanga den sani foe wisrefi, dan Jehovah sa feni den begi foe wi boen. A fiti taki wi taki Jehovah tangi ala dei foe den boen sani di a e gi. — Johanes 6:11, 23; Tori foe den Apostel 14:16, 17.

13. (a) Fa Jesus ben sori san moesoe kon na a fosi presi na ini wi begi? (b) San na den sani di de na a di foe toe presi èn di wi moesoe begi foe den?

¹³ Jesus ben gi en bakaman wan modelbegi, so taki den ben sa sabi sortoe begi Gado e teki (Mateus 6:9-13). A begi disi e sori taki a nen foe Gado, en kownoekondre èn a doe foe en wani na grontapoe moesoe kon na a fosi presi. Moro fara wi kan aksi efoe Gado wani sorgoe gi den fanowdoe foe wisrefi, soleki wi aladei njanjan, a pardon foe sondoe, èn a froeloesoe foe wi poeroe na tesi èn na a ogriwan, Satan Didibri.

BEGI FOE JEPI TRAWAN

14. Fa bijbel e sori o prenspari a de foe begi gi tra sma?

¹⁴ Jesus ben sori nanga en eksempre o prenspari a de foe begi gi  trawan (Lukas 22:32; 23:34; Johanes 17:20). Na apostel Paulus ben sabi a waarde foe den sortoe begi disi èn a ben aksi trawan foeroetron foe begi gi en (1 Tesalonikasma 5:25; 2 Tesalonikasma 3:1; Romesma 15:30). Di a ben de na doengroe-oso a ben skrifi: „Mi e howpoe taki nanga den begi foe oenoe, . . . mi sa kon fri” (Fileimon 22; Efeisesma 6:18-20). Dati sjatoe baka dati, Paulus ben komoto na doengroe-oso, e sori a winimarki foe den begi di ben begi gi en.

15. Foe sortoe sani wi kan aksi ini begi gi den sma di wi lobi?

¹⁵ Paulus ben begi toe gi tra sma foe den kisi jepi. „Wi e [begi] ala ten gi oenoe, taki a Gado foe wi mag feni oenoe warti gi a kari di a kari oenoe”, a ben skrifi (2 Tesalonikasma 1:11). Èn gi wan tra gemeente a ben tjari kon na krin: „Wi e begi Gado taki oenoe no moesoe doe noti san fowtoe, . . . ma taki oenoe moesoe e doe san boen” (2 Korentesma 13:7). A de seiker wan boen sani foe waka baka na eksempre foe Paulus èn foe begi foe spesroetoe sani foe a boen foe sma di wi lobi. Ija, „a tranga begi [na opregti begi] foe wan regtfardikiwan abi foeroe krakti, te a de ini wroko”. — Jakobus 5:13-16.

16. (a) O ten wi moesoe begi, efoe wi wani kisi a jepi di wi abi fanowdoe? (b) Foe san ede meki begi de so wan bigi grani?

¹⁶ Joe abi wan bedinari foe na evangelium di, te a e hori wan bijbelstudie, e aksi foeroetron: „Joe e begi na tra ten boiti na a okasi foe joe alawiki bijbelstudie?” Foe kisi a jepi di wi abi fanowdoe, dan wi moesoe taki nanga Gado foeroetron (1 Tesalonikasma 5:17; Lukas 18:1-8). Leri foe taki nanga en na wan sakafasi, soleki te joe ben o taki nanga wan lobi mati di joe e froetrow. A de troetroe wan kefalek bigi grani foe kan seni begi go na a glori Tiriman foe a heri universum, a Jereman foe begi, èn foe sabi taki a e jere joe! — Psalm 65:2.

[Aksi foe a tori disi]

[Prenki na tapoe bladzijde 227]

San wan sma moesoe doe te a e kon ini tesi foe smoko — begi foe kisi jepi noso gi jesi na a tesi?

[Prenki na tapoe bladzijde 229]

Joe e begi foe kisi jepi èn tokoe e teki prati na sani di kan tjari joe go na ogridoe?

[Prenki na tapoe bladzijde 230]

Joe e begi te joe de joe wawan noso soso te joe de nanga tra sma?