Fa joe e tron wan borgoe foe a tiri foe Gado
Kapitel 15
Fa joe e tron wan borgoe foe a tiri foe Gado
1, 2. San de fanowdoe foe tron wan borgoe foe a tiri foe Gado?
JOE WANI libi foe têgo na grontapoe na ondro a tiri foe Gado? Ibri sma di de na en boen froestan sa piki Ija! Joe sa njan boen foe kefalek moi winimarki. Ma foe kisi dati, joe no kan soetoe joe anoe go na loktoe nomo èn taki: ’Mi wani de wan borgoe foe a tiri foe Gado.’ Moro leki dati de fanowdoe.
2 Foe eksempre, kon wi taki, dati joe ben wani tron wan borgoe foe wan tra kondre. Foe kan doe dati, joe ben sa moesoe doe den sani di a tiri foe a kondre dati e aksi foe joe. Ma bifo joe kan doe dati, joe ben sa moesoe kon sabi san na den sani di den e aksi foe joe. Na a srefi fasi joe moesoe kon sabi san Gado e aksi foe den sma di wani tron borgoe foe en tiri. Èn dan joe moesoe doe den sani disi, di Gado e aksi foe joe.
SABI DE FANOWDOE
3. San na wán sani di Gado e aksi foe wan sma tron wan borgoe foe a tiri foe En?
3 Wan toemoesi prenspari sani di Gado e aksi foe tron wan borgoe foe a tiri foe En, na foe sabi a „tongo” foe a tiri foe En. Disi troetroe de nanga reti. Son tiri foe libisma e aksi toe, taki njoen borgoe moesoe man foe taki a tongo foe a kondre. We, sortoe „tongo” den sma moesoe leri dan, di sa kisi libi na ondro a tiri foe Gado?
4. Sortoe „soifri tongo” Gado pipel moesoe leri?
4 Loekoe pikinso san Jehovah e taki foe disi ini en Wortoe, bijbel: „Bikasi dan mi sa meki pipel go bigin taki wan soifri tongo, so taki den alamala kari a nen foe Jehovah, foe dini en skowroe na skowroe” (Sefania 3:9). A „soifri tongo” disi na a waarheid foe Gado, di de foe feni na ini bijbel. A de na a fosi presi a waarheid di abi foe doe nanga a Kownoekondre tiri foe Gado. So boen, foe tron wan borgoe foe a tiri foe Gado, joe moesoe leri a „tongo” disi, foe di joe e teki sabi na ini joe foe Jehovah nanga en Kownoekondre seti. — Kolosesma 1:9, 10; Odo 2:1-5.
5. (a) San wi moesoe sabi foe a tiri foe Gado? (b) Sortoe sabi wi abi fanowdoe foe kisi têgo libi?
5 Na ini a ten disi, son tiri foe libisma e aksi taki den sma di e tron borgoe foe a kondre, moesoe sabi wan sani foe a historia foe a tiri foe a kondre dati, so srefi foe a fasi fa a tiri dati e wroko. Efoe joe wani tron wan borgoe foe a tiri foe Gado, dan na a srefi fasi joe moesoe kon sabi den sortoe sani disi foe a tiri foe Gado. A sabi disi kan tjari joe go na têgo libi. Jesus ben taki na ini begi na en Tata: „Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes.” — Johanes 17:3.
6. (a) San na wan toe aksi san borgoe foe a tiri foe Gado moesoe man piki? (b) Joe kan piki den?
6 Efoe joe studeri den kapitel kaba di de dja na fesi na ini a boekoe disi, dan now kaba joe teki foeroe foe a toemoesi prenspari sabi disi na ini joe, a no so? Joe man sori taki disi de so nanga a piki di joe o piki den aksi soleki den wan di e kon now: O ten Gado ben taki foe a fosi tron foe en prakseri di abi foe doe nanga wan Kownoekondre tiri? Soema ben de wan toe foe den foetoeboi foe Gado di ben loekoe go na fesi foe de borgoe na grontapoe foe a tiri dati? Omeni tiriman, noso kownoe, a tiri foe Gado sa abi? Komoto foe pe den kownoe disi o tiri? Soema ben de den fosiwan di Gado ben teki foe de kownoe ini a tiri foe Gado? Fa Jesus ben sori taki a ben sa de wan boen kownoe? Ma, foe tron wan borgoe foe a tiri foe Gado, moro de fanowdoe leki foe abi sabi nomo foe a tiri dati.
REGTFARDIKI FASI FOE TJARI JOESREFI DE FANOWDOE
7. Foe a sei foe den tiri foe libisma, fa den sani di den e aksi foe sma foe tron borgoe foe a kondre foe den, kenki?
7 Tiri na ini a ten disi e aksi, taki njoen borgoe moesoe doro wan seiker markitiki ini a fasi fa den e tjari densrefi. Foe eksempre, den kan taki dati wan man mag abi soso wán wefi èn wan oema soso wán masra. Tokoe wan toe tra tiri abi wet di de tra fasi. Den e gi pasi na den borgoe foe den foe abi moro leki wán trowpatna. Sortoe fasi foe libi Gado e froewakti foe sma di wani tron wan borgoe foe a tiri foe en? San Gado e feni taki de joisti ini a tori foe a trowlibi?
8. (a) San na a markitiki foe Gado gi a trowlibi? (b) San na soetadoe, èn san Gado e taki foe dati?
8 Na ini a bigin Jehovah ben poti a markitiki gi a trowlibi, di a ben gi Adam wán wefi nomo. Gado ben taki: „Wan man sa gowe libi en papa nanga en mama èn a moesoe tai hori na en wefi èn den moesoe tron wán skin” (Genesis 2:21-24). Jesus ben tjari kon na krin taki disi na a joisti markitiki gi kresten (Mateus 19:4-6). Foe di trowpatna tron „wán skin”, dan den e afrontoe a trowlibi efoe den abi seks nanga wan tra sma. A doe disi den e kari soetadoe, èn Gado e taki dati a sa strafoe soetaman. — Hebrewsma 13:4; Maleaki 3:5.
9. (a) Fa Gado e si a tori efoe sma, di no trow, abi seks nanga makandra? (b) San na hoeroedoe?
9 Na a tra sei a de so, taki foeroe man nanga oema e libi nanga makandra èn abi seks sondro taki den trow. Ma a no ben de a prakseri foe Gado foe a krosibei matifasi disi na mindri wan man nanga wan oema ben moesoe de wan sani foe proeberi loekoe. So boen, libi nanga makandra sondro foe trow, na wan sondoe na Gado, a Sma di ben seti a trowlibi. Disi den e kari hoeroedoe. Hoeroedoe na te wan sma abi seks nanga wan sma di a no trow nanga en. Èn bijbel e taki: „Disi na san Gado wani, . . . taki oenoe hori oensrefi fara foe hoeroedoe” (1 Tesalonikasma 4:3-5). So boen, a de wan fowtoe sani gi wan sma di no trow, foe abi seks nanga iniwan sma.
10. Sortoe tra sekslibi de teige den wet foe Gado?
10 Na ini a ten disi foeroe man nanga oema abi seks nanga sma foe den eigi sortoe — man nanga man èn oema nanga oema. Den e kari den sma disi matisma noso homo. Sontron den e kari oema di abi seks nanga makandra matimèid noso lesbis. Ma a Wortoe foe Gado e taki dati san den e doe, no joisti, dati a de „sjen sekslibi” (Romesma 1:26, 27). A de teige a wet foe Gado toe, efoe wan sma abi seks nanga wan meti (Lefitikus 18:23). Ibri sma di wani libi na ondro a tiri foe Gado, moesoe tan fara foe den hoeroelibi disi.
11. (a) Fa Gado e si a gebroiki foe tranga dringi? (b) Sma di wani de borgoe foe a tiri foe Gado, moesoe hori densrefi fara foe sortoe libi di no boen gi a gosontoe?
11 Te wan sma e dringi win, biri noso sopi, ma nanga marki, dan a no de teige a wet foe Gado. Bijbel e sori wi srefi taki wan pikinso win kan boen gi wan sma gosontoe (Psalm 104:15; 1 Timoteus 5:23). Ma a de teige a wet foe Gado foe kon droengoe noso foe teki prati na werdri fesa pe sma e gi densrefi abra na hoeroedoe (Efeisesma 5:18; 1 Petrus 4:3, 4). Boiti taki sma e gebroiki tranga dringi foe kon droengoe noso kon „hei”, foeroe sma ini a ten disi e gebroiki difrenti sortoe drug foe doro a srefi marki disi. So srefi foe prisiri ede, den e smoko marwana noso tabaka, ala di tra sma e kaw pinangnoto noso coca wiwiri. Ma den sani disi e doti a skin foe den èn e doe a gosontoe foe den ogri. So boen, efoe joe wani de wan borgoe foe a tiri foe Gado, dan joe moesoe tan fara foe den gwenti disi di e doe sma ogri. — 2 Korentesma 7:1.
12. (a) San na wan toe kroeka libi, di de teige a wet foe Gado? (b) Fa wan sma di e teki prati na den sortoe libi disi, kan meki Gado feni en boen?
12 A de krin taki tiri foe libisma no wani ogriman leki njoen borgoe. Èn Jehovah abi srefi moro hei markitiki. A e aksi, taki wi „tjari wisrefi na wan eerlijk fasi ini ala sani” (Hebrewsma 13:18). Efoe sma no e hori densrefi na den wet foe Gado, dan den no sa kisi pasi foe libi na ondro en kownoekondre. Ini a ten disi nofotron sma e doe neleki den de eerlijk, ala di den e pasa foeroe wet. Ma Gado e si ala sani. No wan sma kan bidrigi en (Hebrewsma 4:13; Odo 15:3; Galasiasma 6:7, 8). Dati meki Jehovah sa sorgoe taki sma di e pasa den wet foe en, soleki den wet taki joe no mag lei noso foefoeroe, no sa tron borgoe foe en tiri (Efeisesma 4:25, 28; Openbaring 21:8). Ma Gado abi pasensi èn a e gi pardon. So boen, efoe wan sma di pasa a wet foe Gado, e tapoe nanga den takroe libi foe en èn e go doe san boen, dan Gado sa teki en. — Jesaja 55:7.
13. Fa den foetoeboi foe Gado moesoe si den wet foe den tiri foe libisma?
13 Ma fa a de nanga a hori di wi moesoe hori den wet foe den tiri foe libisma? So langa leki libisma tiri de, dan Gado e aksi foe den foetoeboi foe en, taki den moesoe saka densrefi na ondro den „hei tirimakti” disi. Den moesoe pai belasting na den, awinsi a belasting hei èn wan sma no e agri kande nanga a fasi fa den tiri e gebroiki a belasting moni. So srefi den moesoe gi jesi na den wet foe a tiri (Romesma 13:1, 7; Titus 3:1). A wan-enkri fasi dati disi no de so, ben sa de efoe a gi di a ben sa gi jesi na a wet foe granlanti ben sa tjari en go so fara taki a pasa a wet foe Gado. Ini na afersi dati, wi moesoe „gi jesi na Gado leki tiriman moro leki na libisma”, soleki fa Petrus nanga den tra apostel ben taki. — Tori foe den Apostel 5:29.
14. Fa wi kan sori taki neleki Gado wi e si libi leki wan warti sani?
14 Gado e si libi leki wan toemoesi warti sani. Den sma di wani tron borgoe foe a tiri foe en, moesoe froestan disi. A no de foe taki, dati kiri wan sma de teige a wet foe Gado. Ma a si di sma no wani si makandra na ai, nofotron e meki wan sma kiri wan trawan èn dati meki srefi wan sma di e go doro foe no wani si a sma na en sei, na ai, no kan de wan borgoe foe a tiri foe Gado (1 Johanes 3:15). A de foe dati ede toemoesi prenspari, taki wi doe san bijbel e taki na Jesaja 2:4. Drape tanapoe taki wi no moesoe teki fetisani kiri sma na wi sei. A Wortoe foe Gado e sori taki srefi a libi foe wan pikin di no gebore ete èn di de na ini a bere foe en mama, diri ini den ai foe Jehovah (Exodus 21:22, 23; Psalm 127:3). Èn tokoe ibri jari sma e poeroe miljoenmiljoen bere. A pori disi di sma e pori libi, de teige a wet foe Gado, bika a libisma na ini a bere foe en mama, na wan sma di de na libi, èn sma no mag kiri en.
15. Na sortoe komando foe Gado Kownoe ala borgoe foe a Kownoekondre moesoe gi jesi?
15 Ma moro sani Gado e aksi foe den sma di wani tron borgoe foe a tiri foe En, leki soso foe no doe san fowtoe noso san no kroederi nanga boen gwenti nanga wet. So srefi den moesoe span densrefi troetroe foe doe sani gi tra sma, pe den e sori switifasi èn pe den e sori taki den no e prakseri densrefi nomo. Den moesoe libi akroederi a wet foe Gado, di a Kownoe, Jesus Krestes, ben gi, taki: „Ala sani, foe dati ede, di oenoe wani foe sma doe gi oenoe, oenoe moesoe doe so srefi gi den toe” (Mateus 7:12). Krestes ben gi na eksempre foe di a ben sori lobi gi tra sma. A ben gi en libi srefi foe a boen foe a libisma famiri èn a ben komanderi en bakaman, taki: „Lobi makandra, neleki fa mi lobi oenoe” (Johanes 13:34; 1 Johanes 3:16). A de a sortoe lobi nanga broko-ede disi, di joe e sori gi tra sma sondro foe prakseri joesrefi nomo, san sa meki a libi na ondro a tiri foe Gado kownoekondre sa de wan troetroe prisiri sani. — Jakobus 2:8.
16, 17. (a) Foe sortoe boen sani ede, wi moesoe tjari kenki kon ini wi libi, so taki wi man doe san Gado e aksi foe wi? (b) Foe san ede wi kan de seiker taki wi man tjari ala fanowdoe kenki kon?
16 Bijbel e sori taki sma moesoe tjari kenki kon na ini den libi foe doe den sani san Gado e aksi foe den foe tron borgoe foe a tiri foe en (Efeisesma 4:20-24). Joe e doe moeiti foe tjari den kenki disi kon? Foe troe, a warti ala moeiti! Foe san ede? Foe di a no sa wani taki, dati foe soso wan toe jari joe sa abi wan moro boen libi na ondro wan tiri foe libisma. Nôno, joe sa kisi têgo libi ini volmaakti gosontoe na wan paradijs grontapoe na ondro wan tiri di de na ini Gado anoe!
17 Srefi now kaba, te joe e doe den sani di Gado e aksi foe joe, dan joe sa abi wan moro kolokoe libi. Ma a kan taki joe moesoe tjari kenki kon na ini joe libi. We, boen foeroe sma di ben abi ogri-ati noso di ben abi bigi-ai, kenki. So srefi hoeroeman, soetaman, matisma noso homo, droengoeman, kiriman, foefoeroeman, sma di de srafoe foe drug, nanga sma di e gebroiki tabaka kenki a fasi fa den ben libi. Den doe disi foe di den ben doe troetroe moeiti èn nanga a jepi foe Gado (1 Korentesma 6:9-11; Kolosesma 3:5-9). So boen, no lasi ati efoe joe moesoe tjari moeilek kenki kon foe doe san Gado e aksi foe joe. Joe man doe dati!
LOYAALFASI NA A TIRI FOE GADO
18. Na sortoe spesroetoe fasi Gado e froewakti foe wi taki wi e hori baka na wan loyaal fasi gi a kownoekondre foe en?
18 Dati Jehovah Gado e aksi foe en borgoe, taki den hori baka na wan loyaal fasi gi en Kownoekondre tiri, no moesoe froewondroe wi. Tiri foe libisma e aksi a srefi sani foe den borgoe foe den. Ma na sortoe spesroetoe fasi Gado e froewakti taki en borgoe hori baka na wan loyaal fasi gi a tiri foe en? Foe di den borgoe foe en moesoe teki fetisani go feti gi a kownoekondre foe en? Nôno. Na presi foe dati, den moesoe de loyaal takiman noso preikiman foe a kownoekondre foe Gado, neleki fa Jesus Krestes nanga den fositen bakaman foe en ben de (Mateus 4:17; 10:5-7; 24:14). A de a wani foe Jehovah, taki ibri sma kon sabi san na a kownoekondre foe en èn fa a sa loesoe den problema foe libisma. Joe ben prati sani di joe ben leri na ini a Wortoe foe Gado nanga famiri, mati nanga tra sma? A de a wani foe Gado taki joe doe dati. — Romesma 10:10; 1 Petrus 3:15.
19. (a) Foe san ede wi kan froewakti gens te wi e taki nanga tra sma foe a kownoekondre foe Gado? (b) Na tapoe sortoe aksi joe moesoe gi piki?
19 Krestes nanga den fositen bakaman foe en ben abi deki-ati fanowdoe foe taki nanga tra sma foe a Kownoekondre, bikasi nofotron den ben kisi foe doe nanga gens (Tori foe den Apostel 5:41, 42). Dati de so toe na ini a ten disi. A grontapoe disi di Didibri e tiri, no wani foe a boen njoensoe foe a Kownoekondre moesoe preiki. So boen, den aksi na: Sortoe sei joe e teki? Joe sa hori baka na wan loyaal fasi gi a kownoekondre foe Gado? A de a wani foe en taki wan toemoesi bigi kotoigiwroko foe a Kownoekondre doe bifo a kaba kon. Joe sa teki prati na a wroko disi?
[Aksi foe a tori disi]
[Prenki na tapoe bladzijde 128]
Den wan di e tron borgoe foe a tiri foe Gado moesoe abi sabi foe a tiri dati
[Prenki na tapoe bladzijde 131]
Borgoe foe a tiri foe Gado moesoe tan fara foe sani di Gado no e feni boen
[Prenki na tapoe bladzijde 133]
Borgoe foe a tiri foe Gado moesoe froeteri tra sma foe a tiri dati
