Feni en nanga makandra na ini lobi
Kapitel 28
Feni en nanga makandra na ini lobi
1. (a) Fa joe kan tron wan pisi foe na organisâsi foe Gado? (b) Na sortoe komando joe moesoe gi jesi dan?
TE JOE E KISI moro sabi foe Jehovah Gado nanga den prakseri foe en èn e go warderi den moro, dan joe sa wani de ala ten baka nanga sma di abi a srefi bribi nanga howpoe disi. Te joe e doe disi, dan joe sa tron wan pisi foe Gado organisâsi di wi kan si, wan troe kresten bradafasi. „Abi lobi gi a heri gemeenschap foe brada” sa de dan wan komando, di joe moesoe gi jesi na en. — 1 Petrus 2:17; 5:8, 9.
2. (a) Sortoe njoen komando Jesus ben gi en bakaman? (b) San den wortoe „makandra” nanga „na oen mindri” e sori krin? (c) O prenspari a de foe abi lobi?
2 Jesus Krestes ben sori na wan krakti fasi o prenspari a de taki en bakaman lobi makandra. A ben taigi den: „Mi e gi oenoe wan njoen komando, dati oenoe lobi makandra . . . Nanga disi ala sma sa sabi taki oenoe na mi disipel, efoe oenoe abi lobi na oen mindri” (Johanes 13:34, 35). Den wortoe „makandra” nanga „na oen mindri” e sori krin, taki ala troe kresten ben sa de makandra ini wán groepoe noso organisâsi (Romesma 12:5; Efeisesma 4:25). Èn sma ben sa kon sabi na organisâsi disi na a lobi di den memre foe en abi gi makandra. Efoe wan sma no abi lobi, dan ala tra sani na foe soso. — 1 Korentesma 13:1-3.
3. Fa bijbel e poti krakti na tapoe, taki a de prenspari foe lobi kompe kresten èn foe broko wi ede nanga den?
3 Dati meki foeroetron den fositen kresten ben kisi den sortoe froemane leki: „Abi safoe firi foe lobi gi makandra.” „Teki makandra nanga prisiri.” „Dini makandra leki srafoe.” „Abi switifasi gi makandra, nanga safoe sari-atifasi.” „Tan froedrage makandra èn gi makandra pardon na wan fri fasi efoe a wan abi wan sani foe kragi foe a trawan.” „Tan trowstoe makandra, èn bow makandra.” „Lobi foe de ini vrede nanga makandra.” „Abi tranga lobi gi makandra.” — Romesma 12:10; 15:7; Galasiasma 5:13; Efeisesma 4:32; Kolosesma 3:13, 14; 1 Tesalonikasma 5:11, 13; 1 Petrus 4:8; 1 Johanes 3:23; 4:7, 11.
4. (a) San e sori taki kresten moesoe lobi tra sma toe, boiti taki den moesoe lobi „makandra”? (b) Soema kresten moesoe lobi spesroetoe?
4 Ma disi no wani taki, dati troe kresten moesoe lobi soso den memre foe na organisâsi foe Gado. Den moesoe lobi tra sma toe. Te joe loekoe en boen, dan bijbel e gi den deki-ati foe gro „na ini lobi gi makandra èn gi ala sma” (1 Tesalonikasma 3:12; 5:15). Di na apostel Paulus ben sori san na a joisti balansi fasi foe loekoe sani, a ben skrifi: „Meki wi doe boen na ala sma, ma spesroetoe na den wan di de ini a srefi bribi leki wi” (Galasiasma 6:10). So boen, ala di kresten moesoe lobi ala sma, so srefi den feanti foe den, tokoe den moesoe lobi spesroetoe den tra memre foe na organisâsi foe Gado, den brada nanga sisa foe den na jejefasi. — Mateus 5:44.
5. San e sori taki sma sabi troe kresten foe fositen nanga foe disi ten leki sma di e sori lobi?
5 Sma ben sabi den fositen kresten foe a lobi disi, di den ben abi gi makandra. Soleki fa a di foe toe jarihondro skrifiman Tertullianus ben taki, dan sma ben gwenti foe taki foe den: ’Loekoe fa den lobi makandra èn fa den de klari foe dede gi makandra.’ A lobi disi de foe si toe na mindri troe kresten na ini a ten disi. Ma disi wani taki dati problema noso moeilekhèit noiti no de na mindri troe kresten?
DEN BAKAPISI FOE ONVOLMAAKTIFASI
6. Foe san ede a de so, taki srefi troe kresten e sondoe na makandra wanwan tron?
6 Nanga a studeri di joe studeri bijbel joe kon froestan, taki wi alamala kisi onvolmaaktifasi foe wi fosi papa nanga mama, Adam nanga Eva (Romesma 5:12). So boen, wi e firi foe go doe san fowtoe. „Wi alamala e naki foetoe foeroetron”, bijbel e taki (Jakobus 3:2; Romesma 3:23). Èn joe moesoe sabi taki memre foe na organisâsi foe Gado de onvolmaakti toe èn sontron den e doe sani di no boen. Disi kan tjari problema nanga moeilekhèit kon na mindri troe kresten srefi.
7. (a) Foe san ede den ben moesoe taigi Efowdia nanga Sentike meki den „de foe a srefi denki”? (b) San e sori taki, te joe loekoe en boen, den ben de toemoesi boen kresten oema?
7 Teki a tori foe toe oema di ben nen Efowdia nanga Sentike na ini a fositen gemeente Filipi. Na apostel Paulus ben skrifi: „Efowdia nanga Sentike mi e froemane foe de foe a srefi denki na ini Masra.” Foe san ede Paulus ben gi tranga na den toe oema disi „foe de foe a srefi denki”? A de krin taki wan trobi ben de na den mindri. Bijbel no e froeteri san ben de a trobi. Kande foe wan sani ede den ben djaroesoe na tapoe makandra. Tokoe, te joe loekoe en boen, dan den ben de toemoesi boen oema. Den ben de kresten foe wan pisi ten kaba, bika jari na fesi den ben wroko makandra nanga Paulus na ini a preikiwroko. Foe dati ede Paulus ben skrifi gi a gemeente: „Tan asisteri den oema disi, di ben strei sei na sei nanga mi gi a boen njoensoe.” — Filipisma 4:1-3.
8. (a) Sortoe problema ben kon na mindri Paulus nanga Barnabas? (b) Efoe joe ben de drape èn ben si a problema disi, na sortoe bosroiti joe ben o kon dan?
8 Wan dei wan problema ben kon toe na mindri na apostel Paulus nanga en kompe Barnabas di ben e waka nanga en go na difrenti presi. Di den ben de so fara foe go na a di foe toe preikiwaka foe den leki zendeling, dan Barnabas ben wani teki en neef Markus go nanga en. Ma, Paulus no ben wani foe Markus go nanga den, foe di Markus ben gowe libi den èn ben drai go baka na oso na a fosi preikiwaka foe den leki zendeling (Tori foe den Apostel 13:13). Bijbel e taki: „Tapoe disi wan bigi atibron ben kon, so taki den ben prati foe makandra” (Tori foe den Apostel 15:37-40). Prakseri dati pikinso! Efoe joe ben de drape èn ben si a „bigi atibron” disi, joe ben o kon na a bosroiti taki Paulus nanga Barnabas no ben de wan pisi foe na organisâsi foe Gado, foe di den ben tjari densrefi na so wan fasi?
9. (a) Sortoe sondoe Petrus ben doe, èn san ben tjari en go so fara foe doe so? (b) San Paulus ben doe di a ben si san ben e pasa?
9 Na wan tra okasi, na apostel Petrus ben meki wan fowtoe. A ben tapoe foe de krosibei makandra nanga kresten di ben de heiden fositen, foe di a ben frede taki a ben sa lasi a boen-ati foe sonwan foe den djoe kresten, di no nanga reti ben e broko-ai gi den brada foe den, di ben de heiden fositen (Galasiasma 2:11-14). Di na apostel Paulus ben si san Petrus ben doe, a ben kroetoe na fesi foe ala sma di ben de drape, a fowtoe fasi fa Petrus ben tjari ensrefi. Fa joe ben sa firi efoe joe ben de na Petrus presi? — Hebrewsma 12:11.
LOESOE MOEILEKHÈIT INI LOBI
10. (a) Fa Petrus ben doe di Paulus ben sori en na tapoe en fowtoe? (b) San wi kan leri foe na eksempre foe Petrus?
10 Petrus ati ben kan kon bron nanga Paulus. A ben kan mandi nanga a fasi fa Paulus ben sori en na tapoe en fowtoe na fesi foe tra sma. Ma dati a no ben doe (Preikiman 7:9). Petrus ben abi sakafasi. A ben teki a sori di Paulus ben sori en na tapoe en fowtoe èn a no ben gi pasi meki dati kowroe en lobi gi Paulus (1 Petrus 3:8, 9). Loekoe fa Petrus ben taki foe Paulus baka ten na ini wan brifi pe a e gi kompe kresten deki-ati: „Loekoe . . . a pasensi foe wi Masra leki froeloesoe, soleki fa wi lobi brada Paulus ben skrifi oenoe toe akroederi a koni di a ben kisi” (2 Petrus 3:15). Ija, Petrus ben meki lobi tapoe a moeilekhèit, di ini a tori disi ben de a bakapisi foe en eigi fowtoe fasi foe tjari ensrefi. — Odo 10:12.
11. (a) Fa Paulus nanga Barnabas ben sori taki den ben de troe kresten, ala di den ati ben bron nanga makandra? (b) Fa wi kan kisi wini foe na eksempre foe den?
11 Fa a problema na mindri Paulus nanga Barnabas ben waka? Dati toe ben loesoe na ini lobi. Bika baka ten, di Paulus ben skrifi gi a gemeente foe Korente, a ben taki foe Barnabas leki wan krosibei kompe wrokoman (1 Korentesma 9:5, 6). Èn ala di a ben gersi leki na foe wan boen sani ede meki Paulus ben degedege na a waarde di Markus ben sa abi leki wan sma di ben sa waka go nanga den na tra kondre, tokoe a jonkoeman disi ben gro kon so lepi baka ten, taki Paulus ben kan skrifi gi Timoteus: „Teki Markus tjari kon nanga joe, bika mi kan gebroiki en foe doe diniwroko” (2 Timoteus 4:11). Wi kan kisi wini foe na eksempre disi foe a fasi fa kesekese ben loesoe.
12. (a) Foe san ede meki wi kan bribi taki Efowdia nanga Sentike ben loesoe a kesekese foe den? (b) Foe san ede a de toemoesi prenspari taki kresten loesoe den kesekese foe den na ini lobi, soleki fa Galasiasma 5:13-15 e taki?
12 Èn fa a ben waka nanga Efowdia nanga Sentike? Den ben loesoe a kesekese foe den èn ben meki lobi tapoe o sortoe sondoe toe di kande den doe na makandra? Bijbel no e froeteri wi san ben pasa nanga den te foe kaba. Ma foe di den ben de boen oema di ben wroko sei na sei nanga Paulus ini a kresten diniwroko, dan wi kan bribi taki den ben teki na wan sakafasi a rai di den ben kisi. Wi kan tjari kon na wi prakseri fa, baka di den ben kisi a brifi foe Paulus, den ben waka go miti makandra èn ben loesoe a problema foe den na ini wan jeje foe lobi. — Galasiasma 5:13-15.
13. Sortoe eksempre ini a sori foe lobi Jehovah Gado gi?
13 Kande joesrefi e feni en wan moeilek sani foe feni en nanga wan seiker sma noso nanga sma na ini a gemeente. Ala di kande den moesoe wroko tranga ete foe kweki troe kresten eigifasi, tokoe a boen foe denki na a sani disi: Jehovah Gado e wakti te leki sma libi ala den takroe fasi foe den bifo a lobi den? Nôno; bijbel e taki: „Gado e rikomanderi en eigi lobi na wi na ini disi, taki Krestes ben dede gi wi, ala di wi ben de sondari ete” (Romesma 5:8). Wi moesoe waka baka na eksempre dati foe Gado èn sori lobi gi den sma di e doe takroe èn don sani. — Efeisesma 5:1, 2; 1 Johanes 4:9-11; Psalm 103:10.
14. Sortoe rai Jesus ben gi foe no soekoe foe feni fowtoe na trawan?
14 Jesus ben leri taki wi no moesoe soekoe foe feni fowtoe na trawan, bikasi wi alamala de so onvolmaakti. A troe, trawan abi fowtoe, ma wi abi den toe. „Foe san ede dan joe e loekoe na a pikin drei grasi na ini na ai foe joe brada, ma no e si a barki na ini joe eigi ai?” Jesus ben aksi (Mateus 7:1-5). Te wi e hori a koni rai disi na prakseri, dan wi sa kisi jepi foe feni en nanga wi brada nanga sisa.
15. (a) Foe san ede a de prenspari taki wi gi trawan pardon, srefi te wi abi wan sani foe kragi foe den? (b) Fa Jesus ben tjari kon na krin na ini na agersitori foe en na ini Mateus kapitel 18, taki wi moesoe foe gi trawan pardon?
15 A de fanowdoe nomonomo taki wi abi sari-ati èn taki wi lobi foe gi sma pardon. A troe, kande joe abi wan troetroe sani foe kragi foe wan brada noso wan sisa. Ma prakseri a bijbel rai: „Tan froedrage makandra èn gi makandra pardon na wan fri fasi efoe a wan abi wan sani foe kragi foe a trawan.” Ma foe san ede joe ben sa gi trawan pardon efoe joe abi troetroe wan sani foe kragi foe den? Bikasi „Jehovah ben gi oenoe pardon na wan fri fasi”, bijbel e piki (Kolosesma 3:13). Èn efoe wi wani kisi a pardon foe en, Jesus ben taki, dan wi moesoe gi trawan pardon (Mateus 6:9-12, 14, 15). Jehovah ben gi wi pardon doesoendoesoen tron, neleki a kownoe na ini wán foe den agersitori foe Jesus. So boen, wi no kan gi wi brada wan toe leisi pardon dan? — Mateus 18:21-35; Odo 19:11.
16. (a) Soleki fa 1 Johanes 4:20, 21 e taki, dan fa a lobi gi Gado abi foe doe nanga a lobi gi kompe kresten? (b) Sortoe fasi foe doe de fanowdoe efoe joe brada abi wan sani nanga joe?
16 Wi no kan libi leki fa a waarheid taki èn na a srefi ten handri sondro lobi nanga wi brada nanga sisa èn no wani gi den pardon (1 Johanes 4:20, 21; 3:14-16). So boen, efoe oiti joe kisi wan problema nanga wan kompe kresten, no weigri foe taki nanga en moro. No hori en na ati, ma poti na afersi reti na ini wan jeje foe lobi. Efoe joe hati a firi foe joe brada, de klari dan foe taki dati joe no ben kan jepi èn aksi en pardon. — Mateus 5:23, 24.
17. San na a joisti fasi foe doe efoe wan sma doe joe ogri?
17 Ma efoe wan sma e afrontoe joe noso e doe joe ogri na a wan noso tra fasi? Bijbel e gi a rai: „No taki: ’Neleki fa en ben doe mi, na so mi sa doe en’” (Odo 24:29; Romesma 12:17, 18). Jesus Krestes ben gi a rai: „Efoe wan sma klapoe joe na joe reti seifesi, dan drai a tra sei gi en toe” (Mateus 5:39). Wan klapoe no wani taki foe doe wan sma ogri na skinfasi, ma soso foe afrontoe noso kari a sma kon feti. Jesus ben leri en bakaman na a fasi disi foe no go na ini wan feti noso wan trobi. Na presi foe „pai ogri foe ogri noso skempi foe skempi”, joe moesoe „soekoe vrede èn feti na en baka”. — 1 Petrus 3:9, 11; Romesma 12:14.
18. San wi moesoe leri foe na eksempre foe Gado foe lobi ala sma?
18 Prakseri dati wi moesoe „abi lobi gi a heri gemeenschap foe brada” (1 Petrus 2:17). Jehovah Gado e gi na eksempre. A no e teki sma partèi. Ala ras de a srefi na ini en ai (Tori foe den Apostel 10:34, 35; 17:26). Den sma di sa feni kibri na ini „a bigi banawtoe” di e kon, na sma di den e teki „foe ala nâsi nanga lo nanga pipel nanga tongo” (Openbaring 7:9, 14-17). So boen, te wi e waka baka Gado na ini disi, dan wi no moesoe lobi tra sma moro mendri foe di den de foe wan tra ras noso foe wan tra nâsi noso abi wan tra maatschapelek posisi noso abi wan tra skin kloroe.
19. (a) Fa wi moesoe si kompe kresten èn fa wi moesoe handri nanga den? (b) Sortoe bigi grani kan kon de foe wi?
19 Leri sabi ala sma na ini a kresten gemeente boen, èn joe o kon lobi èn warderi den. Handri nanga owroe sma leki papa nanga mama, jongoe sma leki brada nanga sisa (1 Timoteus 5:1, 2). A de troetroe wan grani foe de wan pisi foe na organisâsi foe Gado di wi kan si èn di joe kan teki gersi nanga wan famiri di den memre foe en e feni en so boen nanga makandra na ini lobi. Fa a sa de wan toemoesi moi sani foe libi foe têgo na ini wan paradijs na grontapoe nanga so wan lobi-ati famiri! — 1 Korentesma 13:4-8.
[Aksi foe a tori disi]
[Prenki na tapoe bladzijde 233]
San wi kan leri foe a sani di ben pasa na mindri Efowdia nanga Sentike?
[Prenki na tapoe bladzijde 235]
A kesekese di ben kon na mindri Paulus nanga Barnabas ben wani taki dati den no ben de memre foe Gado organisâsi?
[Prenki na tapoe bladzijde 236]
Troe kresten e meki lobi tapoe den sani di e meki den kragi
[Prenki na tapoe bladzijde 237]
Na ini na organisâsi foe Gado, lobi e boeweigi kresten foe feni en nanga makandra leki speri
