Gado organisâsi di wi kan si
Kapitel 23
Gado organisâsi di wi kan si
1. San bijbel e taki foe Gado organisâsi di wi no kan si?
FOE SAN EDE wi kan de seiker taki Gado abi wan organisâsi di wi kan si? Wan sani foe san ede, na foe di a abi wan organisâsi di wi no kan si. Jehovah ben meki keroebim, serafim nanga foeroe tra engel foe doe en wani na hemel (Genesis 3:24; Jesaja 6:2, 3; Psalm 103:20). Jesus Krestes na a Gran engel di de tapoe den alamala (1 Tesalonikasma 4:16; Judas 9; Openbaring 12:7). Bijbel e froeteri foe den engel, taki den orga den ini „kownoestoeroe noso tirimakti noso tiri noso makti” (Kolosesma 1:16; Efeisesma 1:21). Den alamala e dini tapoe a komando foe Jehovah, ala di ini wánfasi den e doe a wroko di a gi den foe doe. — Danièl 7:9, 10; Job 1:6; 2:1.
2. Fa a fasi fa Gado ben meki wi materia universum e sori o prenspari a e feni organisâsi?
2 Wi e kon froestan toe o prenspari Gado e feni organisâsi, te wi e loekoe den materia mekisani foe en. Joe abi foe eksempre, den biljoenbiljoen stari na ini na universum, di poti na ini boen bigi groepoe di den e kari stari sistema. Den stari sistema disi e boeweigi densrefi na wan orde fasi na ini a kontren foe na universum, èn na so den aparti stari nanga den planeiti na ini den stari sistema disi e doe toe. Foe eksempre, ibri jari wi planeiti Grontapoe e drai ini soifri 365 dei, 5 joeroe, 48 miniti nanga 45,51 sekonde lontoe a son, di de a stari di de moro krosibei foe wi. Ija, a materia universum orga na wan toemoesi hei fasi!
3. San a toemoesi moi organisâsi na mindri Gado en mekisani di wi no kan si, èn na ini en materia universum, e leri wi?
3 A de so, taki a wondroe organisâsi disi na mindri Gado en mekisani di wi no kan si, èn na ini en materia universum, e leri wi wan sani? Ija, a e leri wi taki Jehovah na wan Gado foe organisâsi. So boen, so wan Gado seiker no ben sa libi libisma na grontapoe, di troetroe lobi en, sondro foe den abi tiri nanga organisâsi.
GADO ORGANISÂSI DI WI KAN SI — FOSITEN ÈN NOW
4, 5. Fa wi sabi taki Gado ben tjari en pipel na wan orga fasi ini den dei foe Abraham èn foe a nâsi Israèl?
4 Bijbel e sori taki Jehovah tjari den foetoeboi foe en ala ten na wan orga fasi. Foe eksempre, den man di ben abi bribi soleki Abraham, ben sori den osofamiri nanga den foetoeboi foe den fa foe anbegi Jehovah. Jehovah ben meki a wani foe en di abi foe doe nanga Abraham, bekènti, foe di a ben e taki nanga en (Genesis 12:1). Èn Gado ben gi en a komando foe gi den bodoi disi na trawan, di a ben taki: „Mi kon sabi [Abraham] meki a kan komanderi den manpikin foe en nanga en osofamiri baka en, so taki den sa hori a pasi foe Jehovah” (Genesis 18:19). Disi ben de wan orde fasi fa sani ben seti gi wan groepoe sma foe anbegi Jehovah na a joisti fasi.
5 Di baka ten den Israèlsma ben kon foeroe èn ben tron wan pipel foe miljoenmiljoen sma, dan Jehovah no ben meki ibri sma anbegi na en eigi fasi, aparti foe iniwan orga seti. Nôno, den Israèlsma ben seti kon tron wan nâsi foe anbegiman di ben orga. Den ben kari a nâsi Israèl „a gemeente foe Jehovah” (Numeri 20:4; 1 Kroniki 28:8). Efoe joe ben de wan troe anbegiman foe Jehovah na a ten dati, dan joe ben moesoe de wan pisi foe a gemeente dati foe anbegiman, joe no ben kan de aparti foe dati. — Psalm 147:19, 20.
6. (a) Fa Gado ben sori taki a ben feni den bakaman foe Krestes boen? (b) Sortoe boeweisi de, taki kresten ben tjari kon na ini wan organisâsi foe anbegi Gado?
6 San ben de a situwâsi na ini a fosi jarihondro? Bijbel e sori taki Jehovah boen-ati ben de tapoe den bakaman foe en Manpikin, Jesus Krestes. Jehovah ben kanti en santa jeje na den tapoe. Foe sori taki a ben e gebroiki a kresten organisâsi disi now na presi foe a nâsi Israèl, a ben gi son fositen kresten makti foe dresi den sikisma, foe opo dedesma baka èn foe doe tra wondroe. Joe no kan leisi den kresten Griki Boekoe foe bijbel sondro taki joe kon froestan, taki den ben orga kresten foe anbegi Gado. Te joe loekoe en boen, dan den ben kisi a komando foe kon makandra foe a sani disi ede (Hebrewsma 10:24, 25). So boen, efoe joe ben de wan troe anbegiman foe Jehovah na ini a fosi jarihondro, dan joe ben moesoe de wan pisi foe en kresten organisâsi.
7. Fa wi sabi taki, ini iniwan sortoe pisi ten toe di wi sa teki, Jehovah no ben gebroiki moro leki wán organisâsi?
7 Jehovah ben gebroiki oiti moro leki wán organisâsi na ini iniwan pisi ten? Na ini den dei foe Noa, Gado ben kibri soso Noa nanga den sma di ben de nanga en na ini na ark, èn den wawan ben pasa den watra foe a froedoe libilibi (1 Petrus 3:20). So srefi na ini a fosi jarihondro joe no ben abi toe noso moro kresten organisâsi. Gado ben handri nanga a wán nomo. Joe ben abi soso a „wán Masra, wán bribi, wán dopoe” (Efeisesma 4:5). Na so Jesus Krestes ben taki na fesi toe foe a ten foe wi, taki soso wán presi foe kisi leri na jejefasi ben sa de gi Gado pipel.
8. Fa Jesus ben sori taki na ini wi ten wán organisâsi nomo di wi kan si èn di de foe Gado, ben sa de na grontapoe?
8 Di Jesus ben taki foe en denoja ini Kownoekondre makti, a ben taki: „Soema na troetroe a getrow èn koni srafoe, di en meester ben poti foe loekoe den oso-foetoeboi foe en foe gi den a njanjan foe den na a reti ten? Kolokoe foe a srafoe dati efoe, te en meester kon baka, a e feni en e doe so. Foe troe, mi e taigi oenoe: A sa poti en foe loekoe ala en goedoe” (Mateus 24:45-47). Di Jesus ben drai kon baka ini Kownoekondre makti na ini a jari 1914, a ben feni wan „getrow èn koni srafoe” groepoe dan di ben e gi „njanjan”, noso bodoi na jejefasi? Ija, a ben feni so wan „srafoe”, di de den wan di tan abra na grontapoe foe den 144.000 „brada” foe en (Openbaring 12:10; 14:1, 3). Èn foe sensi 1914, miljoenmiljoen sma ben teki a „njanjan” di den ben gi, èn makandra nanga den, den bigin libi leki fa a troe anbegi e taki. Sma sabi na organisâsi disi foe den foetoeboi foe Gado leki Jehovah Kotoigi.
9. (a) Foe san ede den foetoeboi foe Gado e tjari a nen Jehovah Kotoigi? (b) Foe san ede den e kari den presi foe den pe den e anbegi, Kownoekondre zaal?
9 Jehovah Kotoigi e loekoe go na Gado nanga en Wortoe foe kisi tiri ini ala san den e doe. A nen foe den, Jehovah Kotoigi, e sori kaba taki a moro prenspari wroko foe den na foe gi kotoigi foe a nen nanga a kownoekondre foe Jehovah Gado, neleki fa Krestes ben doe disi (Johanes 17:6; Openbaring 1:5). Boiti dati, den e kari a presi pe den e kon makandra foe anbegi Gado, a Kownoekondre zaal, foe di a kownoekondre foe Gado na ini anoe foe a Mesias noso Krestes, na a prenspari tori foe heri bijbel. Foe di a de krin, taki Gado ben feni a fosi jarihondro krestendom boen, dan Jehovah Kotoigi seti na organisâsi foe den na a model disi. Meki wi go loekoe sjatoe a fosi kresten organisâsi dati èn baka dati poti prakseri na tapoe den sani pe a e kroederi nanga Gado organisâsi di wi kan si ini a ten disi.
A FOSI JARIHONDRO MODEL
10. San ben de wan toe marki foe a fosi jarihondro kresten organisâsi?
10 Ala presi pe kresten ben de na ini a fosi jarihondro, den ben kon makandra ini groepoe foe anbegi Gado. Den gemeente disi ben kon makandra ala ten baka foe de nanga makandra èn foe studeri (Hebrewsma 10:24, 25). A moro prenspari sani di den ben doe, ben de foe preiki èn foe gi sma leri foe a kownoekondre foe Gado, neleki fa Krestes ben doe disi (Mateus 4:17; 28:19, 20). Efoe wan memre foe a gemeente ben drai go libi wan takroe libi, dan den ben poeroe en na ini a gemeente. — 1 Korentesma 5:9-13; 2 Johanes 10, 11.
11, 12. (a) San e boeweisi taki den fosi kresten gemeente ben kisi tiri nanga ordroe foe den apostel nanga „owroeman” na Jerusalem? (b) San „theokrasia” tiri wani taki? (c) San ben de a bakapisi foe di den gemeente ben e teki a tiri disi?
11 Den kresten gemeente dati na ini a fosi jarihondro ben de srefidensi foe makandra, ala di ibriwan ben e teki den eigi bosroiti ini afersi? Nôno, bijbel e sori taki den ben de wán na ini a wán kresten bribi. Ala den gemeente ben kisi tiri nanga ordroe foe a srefi presi. So boen, di wan kesekese ben kon foe na afersi foe a besnijdenis, dan den gemeente noso aparti sma no ben teki wan bosroiti gi densrefi san den ben moesoe doe. Nôno, ma na presi foe dati, na apostel Paulus, Barnabas nanga trawan, ben kisi a rai foe „go na den apostel nanga owroeman na Jerusalem ini a tori foe a kesekese disi”. Di den lepi man disi ben teki wan bosroiti nanga jepi foe a Wortoe foe Gado nanga en „santa jeje”, dan den ben seni getrow man go froeteri den gemeente foe a bosroiti dati. — Tori foe den Apostel 15:2, 27-29.
12 San ben de a bakapisi foe di den gemeente ben e kisi a theokrasia noso Gado-gi tiri nanga ordroe disi? Bijbel e taki: „Now di den [na apostel Paulus nanga den kompe foe en] ben waka pasa den foto, den ben tjari go gi den sma drape foe den hori, den wet di den apostel nanga den owroeman na Jerusalem ben teki a bosroiti foe dati. Ija, foe dati ede den gemeente ben kon de fasti ini bribi doronomo èn ben gro kon moro foeroe dei foe dei” (Tori foe den Apostel 16:4, 5). Ija, ala gemeente ben wroko makandra foe doe san a skin foe owroeman na Jerusalem ben bosroiti, èn den ben kon moro tranga ini bribi.
THEOKRASIA TIRI INI A TEN DISI
13. (a) Na sortoe presi na grontapoe èn nanga jepi foe sortoe groepoe man, Gado organisâsi di wi kan si, e kisi tiri na ini a ten disi? (b) San a tiriskin nanga „a getrow èn koni srafoe” abi foe doe nanga makandra?
13 Gado disiten organisâsi di wi kan si, e kisi theokrasia tiri nanga ordroe toe. Na a edekantoro foe Jehovah Kotoigi na Brooklyn (New York), joe abi wan tiriskin foe owroe kresten man foe difrenti pisi foe grontapoe, di e hori ai, leki fa a de fanowdoe, tapoe a wroko foe Gado pipel na heri grontapoe. Den memre foe a tiriskin disi na memre di de foe „a getrow èn koni srafoe”. A tiriskin e doe wroko leki a takiman foe a getrow „srafoe” dati.
14. Tapoe san a tiriskin foe Gado pipel e bow te den e teki bosroiti?
14 Den man foe a tiriskin dati abi foeroe jari ondrofeni ini a diniwroko foe Gado, neleki den apostel nanga owroeman na Jerusalem. Ma den no e bow tapoe libisma koni te den e teki bosroiti. Nôno, foe di na wan theokrasia fasi den e kisi tiri, dan den e waka baka na eksempre foe a fositen tiriskin na Jerusalem, di den bosroiti foe den ben abi a fondamenti foe den tapoe a Wortoe foe Gado èn den bosroiti foe den ben teki na ondro a tiri foe santa jeje. — Tori foe den Apostel 15:13-17, 28, 29.
TIRI WAN ORGANISÂSI NA HERI GRONTAPOE
15. Foe san ede den wortoe foe Jesus na Mateus 24:14 e sori taki Gado ben sa abi wan bigi organisâsi na grontapoe ini a ten foe a kaba?
15 Jesus Krestes ben gi wan idea o bigi na organisâsi ben sa de, di Gado ben sa abi na grontapoe na ini a ten disi foe a kaba, di a ben taki: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Prakseri pikinso foe a kefalek foeroe wroko di de fanowdoe foe froeteri den miljardmiljard sma na grontapoe foe Gado kownoekondre di opo. A disiten kresten organisâsi, di e loekoe go na a tiriskin foe kisi tiri nanga ordroe, de srekasreka foe doe a bigi wroko disi?
16. (a) Foe san ede Jehovah Kotoigi ben opo foeroe bigi drukkerij? (b) San den e meki ini den drukkerij disi?
16 Jehovah Kotoigi e preiki a Kownoekondre boskopoe na ini a ten disi na moro leki 200 kondre nanga eilanti foe den se na heri grontapoe. Foe jepi den moro leki 4.250.000 Kownoekondre preikiman (ini 1991) foe doe a wroko disi, dan den ben opo bigi drukkerij na foeroe kondre. Djaso den e meki boen foeroe bijbel nanga boekoe di e taki foe bijbel. Ibri wrokodei den e druk gemiddeld moro leki toe miljoen foe den tijdschrift Waktitoren nanga Ontwaakt!, èn foe den drukkerij disi den e seni den boekoe disi go na den gemeente.
17. (a) Foe san ede den e meki den boekoe disi di e taki foe bijbel? (b) Foe doe sortoe sani den e gi joe a kari?
17 Den e meki ala den boekoe disi di e taki foe bijbel, foe jepi sma kon sabi moro foe den toemoesi prenspari prakseri foe Jehovah. Te joe loekoe en boen, dan den wortoe „A e bari wroko gi Jehovah Kownoekondre”, na wan pisi foe a titel foe a tijdschrift A Waktitoren. Joe e kisi a kari foe teki prati na a prati foe den boekoe disi di e taki foe bijbel, èn foe tjari den bijbel waarheid di de na ini den kon na krin gi tra sma. Foe eksempre, joe sabi wan sma di joe kan prati den prenspari bodoi nanga en, di joe leri ini a boekoe disi, Joe kan libi foe têgo na ini wan paradijs na grontapoe?
18. (a) Sortoe organisâsi na organisâsi foe Gado de na ini a ten disi? (b) Foe san ede Gado pipel abi foeroe deki-ati fanowdoe na ini a ten disi?
18 Soleki fa a ben de na ini a fosi jarihondro, na so a de na ini a ten disi, taki na organisâsi foe Gado na wan organisâsi foe Kownoekondre preikiman di gi densrefi abra èn di teki dopoe. Èn den ben opo na organisâsi disi foe jepi ala den memre foe en foe abi wan prati na a preikiwroko disi. Den sma disi abi foeroe deki-ati nanga tranga na jejefasi fanowdoe, foe di Satan nanga den sma di a man abi krakti na den tapoe, e gens a Kownoekondre boskopoe. Den sortoe gensman disi ben meki den kiri Jesus foe a preiki di a ben preiki a boskopoe dati, èn bijbel e warskow taki den bakaman foe en ben sa kisi froefolgoe toe. — Johanes 15:19, 20; 2 Timoteus 3:12.
19. (a) Soema den poti na ini a ten disi foe jepi èn foe tranga Gado pipel? (b) Fa den e kibri a gemeente gi takroe krakti di ben sa kan pori en?
19 Soleki fa a ben de na ini a fosi jarihondro, na so na ini a ten disi den poti „owroeman” na wroko, foe jepi èn tranga ibri gemeente. Den kan jepi joe toe nanga bijbel rai foe kakafoetoe gi difrenti sortoe problema. Den owroeman disi e kibri „na ipi foe Gado” toe. So boen, efoe wan memre foe a gemeente e drai go libi wan takroe libi èn e weigri foe kenki, dan den „owroeman” e sorgoe taki den poeroe so wan sma na ini a gemeente, noso e sluit en uit. Na so fasi, wan gemeente e tan gosontoe èn krin na jejefasi. — Titus 1:5; 1 Petrus 5:1-3; Jesaja 32:1, 2; 1 Korentesma 5:13.
20. (a) Soema a tiriskin na Jerusalem ben seni go na ini a fosi jarihondro, èn foe san ede? (b) Soema a tiriskin e seni go ini a ten disi?
20 Neleki fa a tiriskin na Jerusalem ben seni spesroetoe sma di e teki presi gi den, soleki Paulus nanga Silas, foe gi leri èn deki-ati na Gado pipel, na so a disiten tiriskin e doe toe na ini a ten disi foe a kaba (Tori foe den Apostel 15:24-27, 30-32). Sani e seti taki so wan toe tron ini wan jari, wan bedinari di abi foeroe ondrofeni èn di den e kari wan kringopziener, e wroko wan heri wiki nanga ibri gemeente foe en kring.
21. Fa a kringopziener e jepi den gemeente foe Gado pipel?
21 Joe abi moro leki 66.000 gemeente foe Jehovah Kotoigi na heri grontapoe, di den prati ini kring, di ibriwan e teri so wan 20 gemeente. Te a kringopziener e go loekoe den gemeente ini en kring, dan a e gi den Kownoekondre kotoigi tranga, foe di a e go nanga den ini a preiki nanga leriwroko foe den. Boiti taki a e gi den deki-ati na a fasi disi, a e gi den rai toe foe jepi den foe meki a diniwroko foe den kon moro boen. — Tori foe den Apostel 20:20, 21.
22. (a) Sortoe tra sani seti foe tranga Gado pipel toe tron ini wan jari? (b) Sortoe kari joe e kisi?
22 Deki-ati nanga tranga e gi moro fara te, soleki fa a gwenti de, den gemeente na ibri kring e kon makandra, toe tron wan jari, foe abi wan wán-dei noso toe-dei konmakandra. Na den okasi disi, joe abi kande na ibri presi toe hondro noso dri hondro te go miti 2000 noso moro sma di de drape. Joe e kisi a kari foe kon na a tra bigi konmakandra di sa hori ini a birti pe joe e libi. Wi de seiker taki joe sa feni a konmakandra wan sani di e gi joe kowroe-ati na jejefasi èn di joesrefi sa abi wini foe en.
23. (a) Sortoe tra konmakandra den e hori wán tron ini wan jari? (b) O bigi wán foe den kongres disi ben de?
23 Boiti dati, dan wán tron ini wan jari, den e hori wan moro bigi konmakandra foe wan toe dei langa, di den e kari wan distriktkongres. Foe san ede joe no e doe troetroe moeiti foe go na so wan kongres meki joesrefi kan si o switi dati kan de èn fa a kan de wan wini gi joe na jejefasi? Ini son jari, na presi foe hori distriktkongres, den ben hori moro bigi nationaal noso internationaal kongres. A moro bigiwan di oiti ben hori na wán presi, ben de na ini Yankee Stadion nanga Polo Grounds na a foto New York, aiti dei langa, ini 1958. Na a okasi dati, 253.922 sma ben de drape foe arki a poebliki taki „Gado Kownoekondre e tiri — A kaba foe grontapoe kon krosibei?” Foe sensi a ten dati, no wan presi ben bigi nofo foe hori den sortoe bigi groepoe sma disi, èn dati meki sani ben seti foe gebroiki konmakandrapresi gi bigi kongres na foeroe prenspari foto.
KONMAKANDRA INI DEN GEMEENTE
24. Sortoe feifi alawiki konmakandra den gemeente foe Gado pipel e hori?
24 So srefi a tiriskin foe Jehovah Kotoigi e seti a srefi sortoe programa foe bijbel leri, di e hori ini ala den gemeente foe Jehovah pipel. Ibri gemeente abi feifi konmakandra ini wan wiki. Den disi na a Theokrasia Diniwroko-Skoro, a Diniwroko Konmakandra, a Poebliki Konmakandra, a Waktitoren-studie nanga a gemeente boekoestudie. Foe di kande joe no sabi den konmakandra disi ete, dan wi o froeteri sjatoe foe den.
25, 26. San na a marki foe a Theokrasia Diniwroko-Skoro nanga a Diniwroko Konmakandra?
25 A Theokrasia Diniwroko-Skoro seti so foe jepi studenti foe kan taki moro boen nanga trawan foe a kownoekondre foe Gado. Ten na ten, dan den sma di poti den nen na a skoro, e hori sjatoe lezing foe bijbel tori gi a heri groepoe. Dan wan owroeman di abi foeroe ondrofeni, e gi rai fa foe go na fesi.
26 Soleki fa a gwenti de, dan wan Diniwroko Konmakandra e hori na a srefi neti toe. A schema foe a konmakandra disi de foe feni ini Wi Kownoekondre Dienst, wan alamoen poeblikâsi foe toe noso moro bladzijde, di a tiriskin e tjari kon na doro. Na a konmakandra disi, den e gi praktis rai nanga demonstrâsi fa foe taki moro boen nanga tra sma foe a Kownoekondre boskopoe. Na a srefi fasi, Krestes ben gi deki-ati na den bakaman foe en èn ben leri den fa den ben moesoe doe a diniwroko foe den. — Johanes 21:15-17; Mateus 10:5-14.
27, 28. Sortoe konmakandra a Poebliki Konmakandra, a Waktitoren-studie nanga a gemeente boekoestudie de?
27 A Poebliki Konmakandra èn so srefi a Waktitoren-studie e hori soleki fa a gwenti de na sonde. Spesroetoe moeiti e doe foe kari njoen sma di abi belangstelling foe kon na a Poebliki Konmakandra, pe wan bekwaam bedinari e hori wan bijbel lezing. A Waktitoren-studie na wan aksi-nanga-piki-takimakandra foe wan bijbel artikel, di tanapoe na ini wan foe den njoen uitgave foe a tijdschrift A Waktitoren.
28 Ala di a heri gemeente e kon makandra kande ini wan Kownoekondre zaal gi den konmakandra di wi ben taki djaso foe den na tapoesei, tokoe moro pikin groepoe e kon makandra na ini oso foe sma gi na alawiki gemeente boekoestudie. Den e gebroiki wan bijbelstudie-jepisani, soleki a boekoe disi di joe e leisi now, foe hori a bijbel takimakandra dati di no de moro langa leki wán joeroe.
29. (a) Sortoe memrefesa kresten e hori ala jari? (b) Soema e njan èn dringi nanga reti foe a brede nanga a win?
29 Boiti den alawiki konmakandra disi, dan Jehovah Kotoigi e hori ibri jari wan spesroetoe konmakandra foe memre a dede foe Jesus. Di Jesus ben seti sani foe a fosi tron foe memre a dede foe en, a ben taki: „Tan doe disi foe memre mi” (Lukas 22:19, 20). Ini wan sempel ceremonia, Jesus ben gebroiki win nanga brede di no ben abi sroedeki leki wan agersifasi foe a libi di a ben o òfer gi a libisma famiri. So boen, na a Memrefesa-njanjan disi di e hori ala jari, den wan di tan abra na grontapoe foe den 144.000 salfoe bakaman foe Krestes, e sori taki den abi a hemel howpoe, foe di den e njan èn dringi foe a brede nanga a win.
30. (a) Soema nanga reti de toe na a Memrefesa, èn san na den froewakti foe den? (b) Fa Jesus e taki foe den sortoe sma disi?
30 Den miljoenmiljoen tra sma di e go na a Memrefesa disi na ini den Kownoekondre zaal na heri grontapoe, breiti taki den mag de drape e loekoe. A memrefesa e memre den toe na san Jehovah Gado nanga Jesus Krestes ben doe foe meki a kan, taki den kon fri foe sondoe nanga dede. Ma na presi foe den e loekoe go na fesi foe go libi na hemel, den e prisiri ini a froewakti foe libi foe têgo ini wan paradijs na grontapoe. Den de leki Johanes a Dopoeman, di ben taki foe ensrefi leki wan „mati foe a trowmasra”, na presi foe de wan pisi foe a trowmisi foe Krestes, di e teri 144.000 memre (Johanes 3:29). Den miljoenmiljoen sma disi de wan pisi foe den „tra skapoe”, di Jesus ben taki foe den. Den no de memre foe a „pikin ipi”. Ma, soleki fa Jesus ben taki, den e dini ini wánfasi nanga den memre foe a „pikin ipi”, so taki den alamala e „tron wán ipi”. — Johanes 10:16; Lukas 12:32.
DINI GADO MAKANDRA NANGA EN ORGANISÂSI
31. Sortoe boeweisi de, taki Gado no e feni den sma boen, di tan de wan pisi foe falsi relisi èn na a srefi ten e proeberi foe de wan pisi foe en organisâsi?
31 Fa a de krin, taki neleki na ini ten di pasa, na so Jehovah Gado abi na ini a ten disi wan organisâsi di wi kan si! A e gebroiki dati now foe gi sma leri foe den kisi libi na ini en regtfardiki njoen seti. Ma, wi no kan de wan pisi foe Gado organisâsi èn na a srefi ten de wan pisi foe falsi relisi. A Wortoe foe Gado e taki: „No kon na ondro wan srefi tjatjari nanga sma di no de na bribi. Bika san regtfardikifasi abi foe doe nanga kroektoedoe? Noso sortoe demakandra leti abi nanga doengroe? . . . Noso sortoe prati wan getrow sma abi nanga wan sma di no de na bribi?” So boen, Gado e komanderi: „Foe dati ede komoto na den mindri èn poti joesrefi aparti foe den.” — 2 Korentesma 6:14-17.
32. (a) San wi moesoe doe foe „komoto na den mindri”? (b) Sortoe blesi wi sa kisi efoe wi e doe positief stap foe dini Gado makandra nanga en theokrasia organisâsi di wi kan si?
32 San a wani taki foe „komoto na den mindri”? We, wi no ben sa kan gi jesi na a komando dati, efoe wi e tan de wan pisi foe wan relisi organisâsi di Jehovah Gado no e gebroiki, noso e tan hori baka gi dati. So boen, efoe iniwan foe wi de te now ete wan pisi foe so wan relisi organisâsi, dan wi moesoe taigi den taki wi no de wan memre foe den moro. Efoe wi e komoto now na mindri den sma di e libi leki fa falsi relisi e taki èn wi e doe positief stap foe dini Gado makandra nanga en theokrasia organisâsi di wi kan si, dan wi sa de na mindri den sma di Gado e taki foe den: „Mi sa libi na den mindri èn waka na den mindri, èn mi sa de a Gado foe den èn den sa de a pipel foe mi.” — 2 Korentesma 6:16.
[Aksi foe a tori disi]
[Prenki na tapoe bladzijde 192]
Gado ben abi moro leki wán organisâsi na a ten foe a Froedoe?
[Prenki na tapoe bladzijde 196]
EDEKANTORO FOE JEHOVAH KOTOIGI GI HERI GRONTAPOE
Den EDEMAN KANTORO
Computer Sistema
DRUKKERIJ NA BROOKLYN
Rotâsi-pers
Boekoe-binderij
Foe dja boekoe e seni gowe
[Prenki na tapoe bladzijde 197]
WAN TOE FOE DEN FOEROE TRA WAKTITOREN DRUKKERIJ
Brasjonkondre
Ingrisikondre
Zuid-Afrika
Wallkill, New York
Kanada
[Prenki na tapoe bladzijde 198]
Wan toe foe den 253.922 sma na wan kongres foe Jehovah Kotoigi na New York
Polo Grounds
Yankee Stadion
[Prenki na tapoe bladzijde 201]
Sma e njan boen foe wan programa foe bijbel leri na den konmakandra foe Jehovah Kotoigi
